Eaha to roto?

Tapura tumu parau

 TUMU PARAU HAAPIIRAA 18

Ia hope roa ia outou te hororaa!

Ia hope roa ia outou te hororaa!

“Ua hope ia ’u te hororaa.”—TIM. 2, 4:7.

HIMENE 129 E faaoromai tamau â tatou

HAAPOTORAA *

1. No te fana‘o i te re, eaha te titauhia ia tatou paatoa ia rave?

E HINAARO anei outou e horo i roto i te hoê hororaa fifi mau mai te peu mea ma‘ima‘i aore ra mea paruparu outou? Eita paha! Tera râ, te parau ra te aposetolo Paulo tei roto te mau Kerisetiano mau i te hoê hororaa. (Heb. 12:1) E feia ruhiruhia tatou aore ra apî, e tino oraora aore ra paruparu, e titauhia ia tatou paatoa ia faaoromai tamau e tae noa ’tu i te hopea no te fana‘o i te re ta Iehova i faaineine no tatou.—Mat. 24:13.

2. Eaha tei tia ia Paulo ia parau i roto i te Timoteo 2, 4:7, 8?

2 Ua tia ia Paulo ia parau: “Ua hope ia ’u te hororaa.” (A taio i te Timoteo 2, 4:7, 8.) Eaha te hororaa ta Paulo e mana‘o ra?

EAHA TE HORORAA?

3. Eaha te hororaa ta Paulo e mana‘o ra?

3 I te tahi taime, ua faahiti Paulo i te mau tata‘uraa i tupu na i Heleni tahito no te horoa i te tahi mau haapiiraa faufaa. (Kor. 1, 9:25-27; Tim. 2, 2:5) E rave rahi taime, ua faahoho‘a oia i te huru oraraa o te Kerisetiano i te hoê hororaa. (Kor. 1, 9:24; Gal. 2:2; Phil. 2:16) E faaô te tahi taata i roto i tera “hororaa” a pûpû ai o ’na i to ’na ora ia Iehova e a bapetizohia ’i. (Pet. 1, 3:21) E hope ta ’na hororaa i te taime a horoa ’tu ai Iehova i te re o te ora mure.—Mat. 25:31-34, 46; Tim. 2, 4:8.

4. Eaha ta tatou e hi‘opoa mai i roto i teie haapiiraa?

4 Te vai ra te tahi mau tuearaa i roto i te hoê hororaa atea e te oraraa o te hoê Kerisetiano. E toru ta tatou e hi‘opoa mai. A tahi, e titauhia ia haapao i te mau faatureraa. A piti, mea titauhia ia tiatonu noa i nia i te reni tapaeraa.  E te toru, mea titauhia ia faaoromai tamau i te fifi i te roaraa o te hororaa.

A MAITI MAITAI I TE E‘A

Mea titauhia ia pee maite tatou i te mau faatureraa o te hororaa no te ora (A hi‘o i te paratarafa 5-7) *

5. Eaha te mau faatureraa tei titauhia i te hoê Kerisetiano ia pee e no te aha?

5 Ia noaa te re i roto i te hoê hororaa, e titauhia i te feia horo ia pee maite i te mau faatureraa a te feia i faanaho i te hororaa. Hoê â huru atoa no tatou, mai te peu e hinaaro tatou e fana‘o i te re o te ora mure, mea titauhia ia pee maite tatou i te hi‘oraa ta te Mesia i vaiiho i te mau Kerisetiano. (Ohi. 20:24; Pet. 1, 2:21) Tera râ, te hinaaro nei Satani e to ’na mau taata ia hahi ê tatou a “horo faahou” atu ai tatou e o ratou. (Pet. 1, 4:4) Te faaino nei ratou i to tatou huru oraraa ma te parau, to ratou e‘a te mea maitai a‘e e te aratai i te tiamâraa. E parau hape râ te reira!—Pet. 2, 2:19.

6. Eaha ta outou e haapii mai i te hi‘oraa o Brian?

6 E ite atu iho â te taata o te horo e te feia o te ao a Satani, eita tera e‘a e aratai i te tiamâraa, i te faatîtîraa râ. (Roma 6:16) Ta te hi‘oraa ïa o Brian e haapapu ra. Ua faaitoito to ’na na metua ia ’na ia maiti i te e‘a e aratai i te ora. Tera râ i to ’na apîraa, aita o ’na i papu tera te e‘a maitai. Ua faaoti Brian e pee i te oraraa o te feia o teie nei ao. Te na ô ra Brian: “Aita vau i mana‘o noa ’‘e e aratai te tiamâraa ta ’u i hinaaro noa i roto roa i te peu ino. . . . Ua rahi atu â ta ’u peu iino mai te raveraa i . . . te raau taero e te inu-hua-raa i te ava. I te mau matahiti i muri a‘e, ua rave au i te mau raau taero puai atu â a riro roa mai ai ei tîtî. . . . Haamata ’tura vau i te hoo i te raau taero ei imiraa moni.” I muri mai râ, ua faaoti Brian i te pee i ta Iehova mau ture aveia. Faarue a‘era oia i te e‘a o teie nei ao e haamata ’tura i ta ’na hororaa Kerisetiano i to ’na bapetizoraahia i 2001. Te oaoa nei Brian i te huru oraraa ta ’na i maiti i teie nei. *

7. Ia au i te Mataio 7:13, 14, eaha na e‘a e vai ra i mua ia tatou?

7 Mea faufaa ia maiti maitai tatou i te e‘a. Te hinaaro nei Satani ia faarue tatou paatoa i te e‘a ôaôa “e tae atu ai i te ora” no te haere na nia i te e‘a aano tei reira te rahiraa o te taata. Aita e faatureraa i nia i tera e‘a, e aratai râ te reira i “te haamouraa.” (A taio i te Mataio 7:13, 14.) No te ore e hahi ê e no te faaea i nia i te e‘a o te ora, mea titauhia ia tiaturi tatou  ia Iehova e ia haapao i ta ’na mau ture aveia.

A TIATONU E EIAHA E FAARUE I TE HORORAA

A tiatonu e eiaha e faarue i te hororaa (A hi‘o i te paratarafa 8-12) *

8. Ia topa te hoê taata horo, eaha te titauhia ia ’na ia rave?

8 I te tahi taime, e hi‘o te mau maona o te hoê hororaa atea i te purumu ia ore ratou ia topa. Ma te ore râ e haapao, e nehenehe te tahi maona e tote i nia i te tahi atu, aore ra e topa i roto i te apoo. Ia tupu noa ’tu te reira, e tia oioi mai ratou a tamau atu ai i te horo. Eita ratou e haapao i te tumu i topa ’i ratou, ta ratou fa, o te reni tapaeraa ïa e te re ta ratou e fana‘o.

9. Ia hape tatou, eaha te titauhia ia rave?

9 I roto i ta tatou hororaa no te ora, e nehenehe tatou e hape na roto anei i te parau aore ra i te ohipa. Aore ra, e nehenehe to tatou mau hoa e rave i te tahi mea o te haapepe ia tatou. Eita tatou e maere! E feia tia ore ana‘e to nia i te e‘a ôaôa e aratai atu i te ora. I te tahi taime, e tote iho â ïa te tahi i te tahi. Te tumu ïa Paulo i parau ai e nehenehe te tahi e te tahi e hapa. (Kol. 3:13) Eiaha tatou e hi‘o noa i te mea i hapa ’i tatou, e tiatonu ana‘e râ i te re e vai ra i mua. Ia hape tatou aore ra ia hapa noa mai vetahi ê, e tia ana‘e e e tamau ana‘e i te horo. Ia riri râ e ia inoino tatou a ore atu ai e tia mai, eita tatou e tae i te reni tapaeraa e e fana‘o i te re. Hau atu â, e riro tatou ei haafifiraa no te tahi atu mau Kerisetiano e horo ra na nia i te e‘a ôaôa e aratai i te ora.

10. E nafea tatou ia ore e riro ei “ofai turoriraa” no vetahi ê?

10 No te ore e riro ei “ofai turoriraa” no to tatou mau hoa Kerisetiano, eita tatou e titau ia rave vetahi ê mai ta tatou e hinaaro. (Roma 14:13, 19-21; Kor. 1, 8:9, 13) Eiaha tatou ia riro mai te mau maona o teie nei ao o te tata‘u ra aore ra o te turai i te tahi atu ia noaa iho â te re ia ratou. E haapao noa tera mau maona ia ratou iho! Area tatou, eita tatou e tata‘u, e tauturu ana‘e râ i to tatou mau taeae ia tae i te reni tapaeraa e ia noaa atoa ia  ratou te re o te ora. (Gal. 5:26; 6:4) No reira, e pee ana‘e i te a‘oraa a Paulo ia imi i “to vetahi ê maitai, eiaha noa râ” i to tatou iho.—Phil. 2:4.

11. E tiatonu te feia horo i nia i te aha e no te aha?

11 Eita te feia horo e hi‘o noa i te purumu, e tiatonu atoa râ ratou i nia i te reni tapaeraa. Noa ’tu eita ratou e ite mata i tera reni, e nehenehe ratou e feruri mai te mea ra ua tapae e ua noaa te re ia ratou. E itoitohia ratou ia feruri noa i te re.

12. Eaha ta Iehova e haapapu mai ra no nia i ta tatou hororaa?

12 I roto i ta tatou hororaa, te haapapu mai ra Iehova e noaa iho â i to ’na nunaa te re, te ora mure ore i nia anei i te ra‘i aore ra i nia i te fenua. Te faaite mai ra te mau Papai i te mau maitai e noaa mai ia fana‘o tatou i te re. E nehenehe ïa tatou e feruri i te huru oraraa faahiahia te tiai mai ra. Ia vai noa tera tiaturiraa i roto i to tatou feruriraa e aau, eita tatou e faarue i te hororaa no te ora.

A HORO MA TE FAAOROMAI TAMAU NOA ’TU TE FIFI

A horo ma te faaoromai tamau noa ’tu te fifi (A hi‘o i te paratarafa 13-20) *

13. Eaha te taa-ê-raa e vai ra i rotopu ia tatou e te feia horo i tahito?

13 I Heleni i tahito, ua titauhia i te feia horo ia faaoromai i te tahi mau fifi mai te rohirohi e te mauiui. Ua titauhia ïa ia haamana‘o i te faaineineraa ta ratou i fana‘o e ia tiaturi i to ratou iho puai. Mai taua feia horo ra, ua faaineine-atoa-hia tatou no te hororaa. Te taa-ê-raa râ, e fana‘o tatou i te puai no ǒ mai ia Iehova ra. Ia tiaturi tatou ia ’na, e faaineine e e haapuai oia ia tatou no ta tatou hororaa.—Pet. 1, 5:10.

14. E nafea te Korinetia 2, 12:9, 10 e tauturu ai ia tatou ia faaruru i te fifi?

14 Ua titau-atoa-hia ia Paulo ia faaruru e rave rahi atu â fifi mai te faainoraa e te hamani-ino-raa. Ua toaruaru atoa râ Paulo i te tahi taime e ua faaoromai i te tahi mea tei riro mai ‘te hoê tara i roto i to ’na nei tino.’ (Kor. 2, 12:7) Aita râ o ’na i faarue i ta ’na hororaa, ua faariro o ’na i to ’na mau fifi ei ravea no te turui atu â i nia ia Iehova. (A taio i te Korinetia 2, 12:9, 10.) E no te mea tera te mana‘o o Paulo, ua tauturu Iehova ia ’na i roto i to ’na mau fifi atoa.

15. Ia pee tatou i te hi‘oraa o Paulo, eaha ta tatou e ite?

15 E nehenehe atoa paha tatou e faainohia aore ra e hamani-ino-hia no to tatou faaroo. E roohia paha tatou i te hoê ma‘i ino aore ra e faaoromai i te hepohepo rahi. Ia pee râ tatou i te hi‘oraa o Paulo, e faariro ïa tatou i tera mau fifi atoa ei ravea no te ite i te rima puai e î i te here o Iehova.

16. Noa ’tu mea ma‘ima‘i outou, eaha ta outou e nehenehe e rave?

16 Te tarava ra paha outou i nia i te hoê ro‘i aore ra tei roto paha i te hoê parahiraa turairai. Ua paruparu paha to outou turi aore ra ua mohimohi te mata. Mai te peu tera to outou tupuraa, e nehenehe anei outou e tavini amui ia Iehova e te feia apî mea oraora maitai? E! E rave rahi feia ruhiruhia aore ra ma‘ima‘i o te horo nei i roto i te hororaa no te ora. Eita râ ratou e turui i nia i to ratou iho puai. Te huti nei ratou i te puai na roto i te apeeraa i te mau putuputuraa Kerisetiano na roto i te niuniu aore ra ma te mataitai i te reira i muri a‘e. E te apiti atoa nei ratou i roto i te ohipa e faariro i te taata ei  pǐpǐ ma te poro i te mau taote, tuati ma‘i aore ra fetii.

17. Eaha to Iehova mana‘o i te feia ma‘ima‘i?

17 Eiaha e vaiiho i te ma‘i ia faatoaruaru ia outou a mana‘o atu ai eita outou e nehenehe e tamau i te horo na nia i te e‘a e aratai atu i te ora. Te here nei Iehova ia outou e eita o ’na e haamo‘e i to outou faaroo e faaoromai tamau. Teie te taime e hinaaro rahi ai outou i ta ’na tauturu, eita roa oia e faarue ia outou, e faafatata mai râ. (Sal. 9:10) A tapao na i ta te hoê tuahine ma‘ima‘i e parau ra: “Aita vau i poro rahi faahou a rahi mai ai to ’u ma‘i. Ua ite râ vau iti noa â ta ’u e rave, te faaoaoa ra vau i to Iehova aau e ua topa roa to ’u hau.” Ia hepohepo outou, a haamana‘o tei pihai iho Iehova ia outou. A feruri i te hi‘oraa o Paulo e a haamana‘o i ta ’na mau parau faaitoito: “Te oaoa nei au i to ’u nei mau paruparu. . . . Ia paruparu hoi au, i reira ïa vau e puai ai.”—Kor. 2, 12:10.

18. Eaha te fifi taa ê ta vetahi Kerisetiano e faaruru ra?

18 Te faaruru nei vetahi Kerisetiano i roto i te hororaa no te ora i te tahi fifi taa ê. Te hepohepo nei ratou i te pae aau e feruriraa, eita râ te taata e ite e e taa i to ratou tupuraa. No te aha râ teie mau tavini here a Iehova mai tera ’i? Ia fati te rima o te tahi taata aore ra tei roto ana‘e oia i te parahiraa turairai, e ite te taata atoa i to ’na fifi e e nehenehe ratou e tauturu atu ia ’na. Area te feia e hepohepo i te pae feruriraa e aau, eita te reira e itehia na nia i to ratou huru rapaeau. Tera râ, te mauiui mau ra ratou mai te taata ua fati to ’na rima, aita râ ratou e tauturuhia ra.

19. Eaha ta tatou e haapii mai i te hi‘oraa o Mephiboseta?

19 Mai te peu e tupuraa fifi to outou e aita te taata e taa ra ia outou, e nehenehe te hi‘oraa o Mephiboseta e faaitoito atu. (Sam. 2, 4:4) E tupuraa fifi to Mephiboseta no to ’na pirio‘i e no te mea atoa ua hi‘o ino e ua rave te arii Davida i te ohipa tia ore i nia ia ’na. Aita e hape ta Mephiboseta i rave. Ua tapea râ o ’na i te feruriraa maitai ma te haapao noa i te mau mea maitai o to ’na oraraa. Ua mauruuru oia i te mau maitai ta Davida i faaite atu ia ’na i tahito ra. (Sam. 2, 9:6-10) A mana‘o ino ai Davida ia ’na, aita Mephiboseta i tiatonu i nia i to ’na mau fifi, aita o ’na i inoino e aita atoa i faahapa ia Iehova. Ua tiatonu noa Mephiboseta i nia i tei maraa ia ’na ia rave no te turu i te arii maitihia e Iehova. (Sam. 2, 16:1-4; 19: 24-30) Ua haapapai Iehova i te hi‘oraa maitai roa o Mephiboseta i roto i ta ’na Parau ei haapiiraa no tatou.—Roma 15:4.

20. Eaha te tahi mau tupuraa e ahoaho ai vetahi e eaha te titauhia ia haamana‘o ratou?

20 Te ahoaho rahi nei vetahi taeae e tuahine i roto i te tahi mau tupuraa o te mau mahana atoa. Mea fifi paha no ratou ia haere i te vahi taata. Te tamau nei râ ratou i te tae i te mau putuputuraa a te amuiraa e i te mau tairururaa. Mea fifi paha no ratou ia paraparau i te feia ta ratou i ore i matau, te tutava nei râ ratou i te haere i roto i te taviniraa. Tera atoa anei to outou fifi? A haamana‘o tei pihai iho Iehova ia outou e te mauruuru nei o ’na i te mau tutavaraa ta outou e rave ra ma te aau atoa. Hau atu â, te faaruru atoa ra e rave rahi taeae e tuahine i te hoê â tupuraa. Ia faaoromai tamau outou, e ite-maitai-hia te puai ta Iehova e horoa ra ia outou. * (Phil. 4:6, 7; Pet. 1, 5:7) Ia tamau outou i te tavini ia Iehova noa ’tu te ma‘i, te hepohepo e te ahoaho, e mauruuru roa oia ia outou.

21. Maoti te tauturu a Iehova, eaha ta tatou paatoa e nehenehe e rave?

21 Te vai ra te taa-ê-raa i roto i te hororaa a teie nei ao e te hororaa a te mau Kerisetiano. I roto i te mau hororaa i faatupuhia na i Heleni, ua parau Paulo hoê ana‘e taata te haru i te re. No te upootia, mea titauhia ia oraora maitai te tino o te feia horo atoa. Area i roto i te hororaa Kerisetiano, noa ’tu te tino ma‘ima‘i, e fana‘o te feia atoa e faaoromai tamau e tae noa ’tu te hopea i te re o te ora mure ore. (Ioa. 3:16; Kor. 2, 4:16) Maoti te tauturu a Iehova, e hope roa ia tatou paatoa te hororaa no te ora!

HIMENE 144 A tiatonu i te re!

^ par. 5 I teie mahana, te faaruru nei e rave rahi tavini a Iehova i te tahi mau fifi no te matahiti rahi aore ra no te hoê ma‘i haaparuparu. I te tahi mau taime, e nehenehe tatou paatoa e rohirohi atoa. A feruri ai i te hororaa a te Kerisetiano, e nehenehe tatou e toaruaru. I roto i teie tumu parau, e hi‘o mai ïa tatou e nafea ia horo ma te faaoromai tamau e ia upootia i roto i te hororaa no te ora ta te aposetolo Paulo i faahiti.

^ par. 6 A hi‘o i te tumu parau “Ua taui te Bibilia i to ’u oraraa” i roto i Te Pare Tiairaa o te 1 no Tenuare 2013.

^ par. 20 No te ite i te tahi atu mana‘o tauturu e faatiaraa o te feia i roto i te hoê â tupuraa, a mataitai i te JW Haapurororaa teata no Me 2019. A pata i nia PIAHIA > JW HAAPURORORAA TEATA.

^ par. 63 FAATAARAA O TE HOHO‘A: Ua tauturu te taviniraa i te taeae ruhiruhia ia tamau i ta ’na hororaa Kerisetiano.

^ par. 65 FAATAARAA O TE HOHO‘A: E faaturori tatou ia vetahi ê ia onoono atu tatou ia inu i te ava aore ra ia ore tatou ia taotia i ta tatou inuraa.

^ par. 67 FAATAARAA O TE HOHO‘A: Noa ’tu te tarava ra te taeae i nia i te ro‘i i te fare ma‘i, te tamau ra oia i ta ’na hororaa ma te poro i te feia utuutu ma‘i.