Eaha to roto?

Tapura tumu parau

 TUMU PARAU HAAPIIRAA 43

A pûpû i te hoê taviniraa mo‘a ia Iehova ana‘e

A pûpû i te hoê taviniraa mo‘a ia Iehova ana‘e

“O Iehova to oe Atua ta oe e haamori, e ia ’na ana‘e e pûpû ai oe i te hoê taviniraa mo‘a.”—MAT. 4:10.

HIMENE 51 Ia Iehova ua pûpû vau ia ’u!

HAAPOTORAA *

1. No te aha e titauhia ia pûpû i te hoê taviniraa mo‘a ia Iehova ana‘e?

MEA titauhia ia pûpû i te hoê taviniraa mo‘a ia Iehova ana‘e no te mea o ’na to tatou Atua poiete e te Tumu o te ora. (Apo. 4:11) Noa ’tu te here e te faatura ra tatou ia Iehova, e nehenehe te tahi mau mea o to tatou oraraa e haafifi mai ia horoa i te haamoriraa e au ia Iehova ana‘e. E hi‘opoa mai tatou i te reira i roto i teie tumu parau haapiiraa. Na mua râ, e hi‘o mai tatou eaha te auraa ia pûpû i te hoê taviniraa mo‘a ia Iehova ana‘e.

2. Ia au i te Mataio 4:10, eaha te titauhia ia rave no te pûpû i te hoê taviniraa mo‘a ia Iehova ana‘e?

2 Ia au i te Bibilia, e faaite te hoê taata i to ’na here mau i te Atua ma te haamori ia ’na ana‘e. Ia hinaaro tatou e pûpû i te hoê taviniraa mo‘a ia Iehova, o ’na ana‘e ïa ta tatou e haamori. Eita tatou e vaiiho i te hoê noa ’‘e ohipa aore ra taata ia rave i te parahiraa matamua i roto i to tatou aau.—A taio i te Mataio 4:10.

3. No te aha tatou e here ai ia Iehova?

3 Aita to tatou here ia Iehova i tupu noa mai mai tera. Ua haapii na mua hoi tatou i te parau mau no nia ia ’na. Ua haamata i te faahiahia i to ’na mau huru maitatai. Ua ite i te mau mea ta ’na e au ra e ta ’na e au ore ra e farii atura tatou i te mana‘o mai ia ’na. Ua haapii tatou eaha ta ’na opuaraa no te huitaata e te turu ra tatou i te reira. Ua mauruuru roa tatou e ua farii mai oia ia riro ei hoa no ’na. (Sal. 25:14) Ua tauturu mai te mau mea atoa ta tatou i haapii no nia i to tatou Atua poiete ia faafatata ’tu ia ’na.—Iak. 4:8.

4. (a) Eaha ta te Diabolo e faaohipa ra ia ore to tatou aau ia taatoa no Iehova? (b) Eaha ta tatou e hi‘opoa i roto i teie tumu parau haapiiraa?

 4 O te Diabolo te raatira o teie faanahoraa o te ao e te faaohipa ra oia i te reira ia faatupu tatou i te hinaaro tia ore puai mau. (Eph. 2:1-3; Ioa. 1, 5:19) Ta ’na fa, eiaha to tatou aau ia taatoa no Iehova. E hi‘opoa ana‘e e piti ravea paari ta ’na e faaohipa nei. A tahi, e faahema mai oia ia titau rahi tatou i te moni e te tao‘a. A piti, e turai oia ia tatou ia maiti i te faaanaanataeraa iino.

EIAHA E NOUNOU I TE MONI!

5. No te aha e titauhia ia ara eiaha tatou ia nounou i te moni?

5 E hinaaro tatou paatoa i te maa, te ahu e te hoê nohoraa au mau. Tera râ, e ara ana‘e eiaha tatou ia faatupu i te hinaaro tia ore ia nounou i te moni. E rave rahi taata i teie mahana e “nounou i te moni” e ta te moni e nehenehe e hoo mai. (Tim. 2, 3:2) Ua ite Iesu e faahemahia ta ’na mau pǐpǐ ia faatupu i tera hinaaro tia ore. No reira oia i parau ai: “E ore e tia i te hoê taata ia tavini e piti fatu, e hae hoi oia i te hoê e e here oia i te tahi atu, aore ra e faatura oia i te hoê e e vahavaha oia i te tahi atu. E ore e tia ia outou ia tavini i te Atua e te moni.” (Mat. 6:24) Te taata o te tavini ra ia Iehova a horoa rahi noa ’i i to ’na taime e puai no te titau i te oraraa fana‘o, te tamata ra ïa i te tavini e piti fatu. Aita roa oia e pûpû ra i te hoê taviniraa mo‘a ia Iehova ana‘e!

To Laodikea mana‘o no nia ia ratou iho. To Iehova e to Iesu mana‘o ia ratou (A hi‘o i te paratarafa 6)

6. Eaha te haapiiraa e huti mai i ta Iesu i parau i te amuiraa i Laodikea?

6 Piri i te hopea o te senekele matamua, ua faaoru te mau mero o te amuiraa i Laodikea ma te mana‘o: “E tao‘a rahi ta ’u e mea rahi te tao‘a i noaa mai  ia ’u e aita vau e ere ra i te tahi mea.” I te aro râ o Iehova e o Iesu, “mea aroha roa [ratou] e te veve e te matapo e te vai tahaa.” Ua a‘o Iesu ia ratou no te mea ua vaiiho ratou i te nounou moni ia tuino i to ratou auhoaraa e o Iehova. (Apo. 3:14-17) Ia taa ia tatou ua oteo mai te nounou moni i roto i to tatou aau, e faatitiaifaro oioi ana‘e i to tatou huru feruriraa. (Tim. 1, 6:7, 8) Ia ore, eita to tatou aau e taatoa no Iehova e eita oia e farii i ta tatou taviniraa. O Iehova iho te titau mai ra ia taatoa tatou no ’na. (Mar. 12:30) E nafea te moni e nehenehe ai e riro ei marei no tatou?

7-9. Eaha te haapiiraa e huti mai i te hi‘oraa o David?

7 A feruri na i te hi‘oraa o te hoê matahiapo itoito o David te i‘oa e ora ra i Marite. Mea au roa na David ta ’na ohipa, ua horoahia ia ’na te hoê tiaraa rahi a‘e i roto i te taiete e aita ’tu taata aravihi mai ia ’na i roto i to ’na toroa i to ratou fenua. Ua parau David: “I tera taime, ua mana‘o vau e haamaitairaa ana‘e tera no ǒ mai ia Iehova.” Tera iho â anei?

8 Ua haamata David i te ite i te tahi mau tapao e faaite ra te tuino ra ta ’na ohipa i to ’na auhoaraa e o Iehova. Te na ô ra oia: “I te putuputuraa e tae roa ’tu i roto i te taviniraa, pinepine au i te feruri i ta ’u ohipa. E moni rahi ta ’u i te ava‘e, ua rahi atoa mai râ te haapeapearaa e te fifi i roto i to ’u faaipoiporaa.”

9 Ua taa ia David e titauhia ia rave i te tauiraa. Te na ô faahou ra oia: “Ua faaoti papu vau i te taui.” Ua faaineine David i te hoê tapura apî no te taui i ta ’na mau hora ohipa e faaite atura i to ’na paoti. Eaha tei tupu? Ua vaiihohia David! Tera  râ, te na ô ra oia: “I te mahana i muri iho, ua faaî au i ta ’u parau aniraa no te riro ei pionie tauturu tamau.” No te aupuru ia raua, e tamâ David e ta ’na vahine i te mau fare tahua rahi. Tau taime i muri a‘e, ua rave oia i te taviniraa pionie tamau e ua na reira atoa ta ’na vahine. Ua maiti teie na hoa faaipoipo i te hoê ohipa haihai no te rahiraa, e ere râ i te fifi no raua! Noa ’tu ua iti roa mai ta raua moni i te ava‘e, e navai noa te reira no te aufau i ta raua mau haamâu‘araa. Ua hinaaro raua e tuu ia Iehova i te parahiraa matamua. E ua ite mata roa raua e aupuru iho â Iehova i te feia atoa e imi na mua i te Faatereraa arii.—Mat. 6:31-33.

10. E nafea ia tiai i to tatou aau?

10 Mea navai tatou i te pae materia aore ra aita, e titauhia ia tatou paatoa ia tiai i to tatou aau. Eiaha tatou ia nounou i te moni e eiaha atoa te ohipa ia riro ei mea faufaa a‘e i te taviniraa ia Iehova. Eaha te tauturu atu ia tiai i to outou aau? A hi‘opoa ia outou iho na roto i te mau uiraa mai teie te huru: ‘I te putuputuraa aore ra i roto i te taviniraa, pinepine anei au i te feruri i ta ’u ohipa? E haapeapea noa anei au i te titauhia ia rave ia noaa mai te hoê oraraa fana‘o? Te fifi ra anei to ’u faaipoiporaa no te moni e te mau tao‘a materia? Ua ineine anei au i te taui i to ’u toroa no te rave i te hoê ohipa haihai no te rahiraa, o te tauturu mai râ ia tavini atu â ia Iehova?’ (Tim. 1, 6:9-12) A feruri maite ai i tera mau uiraa, a haamana‘o te here ra Iehova ia tatou e teie ta ’na i fafau i te feia atoa e ati maite ia ’na ana‘e: “E ore roa vau e vaiiho ia oe, e e ore roa vau e faarue ia oe.” No reira te aposetolo Paulo i parau ai: “Eiaha roa ei nounou moni i roto i to outou oraraa.”—Heb. 13:5, 6.

A HAAPAO MAITAI I TA OUTOU FAAANAANATAERAA

11. Eaha te faahopearaa i nia i te hoê taata ia au i te faaanaanataeraa ta ’na e maiti?

11 Te hinaaro ra Iehova ia oaoa tatou i te oraraa nei. Ia au i te Parau a te Atua, mea maitai no te taata ia amu e ia inu i te maa “ei maitai no ’na i ta ’na ra mau ohipa.” (Koh. 2:24) E ere ïa te faaanaanataeraa i te mea ino. Tera râ, mea rahi te faaanaanataeraa a teie nei ao o te tuino i te oraraa o te taata e o te turai ia ratou ia au i te mau mea ta te Atua e ore e au.

Na vai e faaineine ra ta outou faaanaanataeraa? (A hi‘o i te paratarafa 11-14) *

12. Ia au i te Korinetia 1, 10:21, 22, no te aha e titauhia ia maiti maitai ta tatou faaanaanataeraa?

 12 E hinaaro Iehova ia taatoa tatou no ’na. Eita ïa tatou e nehenehe e amu i “te amuraa maa a Iehova” e i “te amuraa maa a te mau demoni.” (A taio i te Korinetia 1, 10:21, 22.) Ia farii tatou i te tamaa e te hoê taata, te faahoa ra ïa tatou ia ’na. Ia maiti tatou i te faaanaanataeraa e faatietie i te taparahiraa taata, te peu tahutahu, te peu faufau aore ra te tahi atu hinaaro tia ore, te amu ra ïa tatou i te maa faaineinehia e te mau enemi o te Atua! E mauiui tatou e e ino to tatou auhoaraa e o Iehova.

13-14. Ia au i te Iakobo 1:14, 15, no te aha e titauhia ia haapao maitai i ta tatou faaanaanataeraa? A horoa i te hi‘oraa.

13 E au te faaanaanataeraa i te maa. E nehenehe tatou e maiti i te maa ta tatou e tuu i roto i to tatou vaha. Ua amu ana‘e tatou i te maa, e ô te reira i roto i to tatou tino. E maa maitai ana‘e, e maitaihia te tino. Ia ore, e fifi to tatou ea. Eita paha te faahopearaa e itehia i tera iho â mahana, e itehia râ i te roaraa o te tau.

14 Hoê â atoa no te faaanaanataeraa. E nehenehe tatou e maiti i ta tatou e tuu i roto i to tatou feruriraa. Ia oti, e ohipa te reira i nia i to tatou mana‘o e aau. Mea maitai ana‘e te faaanaanataeraa, e maitaihia ïa tatou. Ia ore, e mauiui tatou. (A taio i te Iakobo 1:14, 15.) Eita te faahopearaa e ite-oioi-hia, e itehia râ i te roaraa o te tau. No reira te Bibilia i parau ai: “Eiaha e vare: Eita te Atua e noaa i te haavare. Ta te taata hoi e ueue ra, o ta ’na atoa ïa e ooti. No te mea te taata e ueue ia au i ta to ’na iho tino, e ooti ïa i ta te tino e faatupu, oia hoi te tahuti.” (Gal. 6:7, 8) Mea faufaa ia haapae roa i te mau faaanaanataeraa e faatietie ra i te mau mea ta Iehova e au ore!—Sal. 97:10.

15. Eaha te ô ta Iehova i horoa mai no to tatou maitai?

15 Mea au roa na te mau tavini o Iehova e mataitai i te JW Haapurororaa teata, e faanahoraa teata maitai ana‘e to nia iho! Te na ô ra tuahine Marilyn: “Ua tauturu mai te JW Haapurororaa teata ia faatupu i te hoê feruriraa maitai. E nehenehe au e mataitai i te mau mea atoa, aita e ohipa ino i nia iho. Ia mo‘emo‘e aore ra ia toaruaru vau, e pata vau i te hoê oreroraa parau faaitoito mau aore ra te hoê haamoriraa poipoi. Ua faafatata ’tu â vau ia Iehova e i ta ’na faanahonahoraa. Ua maitai-roa-hia to ’u oraraa i te JW Haapurororaa teata!” Te haafaufaa ra anei outou i teie ô no ǒ mai ia Iehova? Taa ê atu i te faanahoraa o te ava‘e, e matara atoa mai te haruharuraa, te video e te himene faaitoito mau i nia i te JW Haapurororaa teata.

16-17. No te aha e titauhia ia haapao maitai i te rahiraa taime e faaanaanatae ai tatou e eaha te tauturu mai ia na reira?

16 E titauhia ia haapao maitai i te huru faaanaanataeraa, i te rahiraa taime atoa râ e faaanaanatae ai tatou. Ia ore, e rahi a‘e te taime e horoahia no te faaanaanataeraa i te taviniraa ia Iehova. Ia ore tatou e ara, e mâu‘a hanoa to tatou taime. Te na ô ra tuahine Abigail, 18 matahiti: “I te hopea mahana, mea au na ’u e tamǎrû ia ’u ma te mataitai i te afata teata. Ia ore râ vau e haapao, e hora taatoa vau  i mua i te reira!” Te parau atoa ra taeae Samuel: “E pau rahi to ’u taime ia mataitai e rave rahi video poto i nia i te natirara. Hoê noa hoi ta ’u i hinaaro e mataitai, i te hopearaa e toru aore ra e maha ’tu hora vau i te na reiraraa!”

17 E nafea ia haapao maitai i te taime outou e faaanaanatae ai? Na mua, a tapao ehia taime ta outou e faataa nei no te faaanaanatae i roto hoê hebedoma. I nia i te hoê tarena, a tapao ehia taime ta outou i faaohipa no te mataitai i te afata teata, no te haere i nia i te natirara e no te hauti i nia i te matini uira. Ua rahi roa ana‘e te taime e horoahia no te faaanaanataeraa, a tapao i te mau tauiraa e titauhia ia rave. A tuu na mua i te mau mea faufaa roa e te toea o te taime no te faaanaanataeraa. Ia oti, a ani ia Iehova i te tauturu no te rave mai ta outou i faaoti. Ma te na reira, e taime e e puai to outou no ta outou iho haapiiraa Bibilia, no te haamoriraa utuafare, no te mau putuputuraa e no te tavini ia Iehova ma te poro e ma te haapii i te taata. A na reira ’i, e oaoa te noaa mai i te taime e faaanaanatae ai outou, o Iehova hoi ta outou i tuu na mua roa!

IA TAATOA NOA OUTOU NO IEHOVA

18-19. E nafea ia haapapu ua taatoa tatou no Iehova?

18 I te otiraa te aposetolo Petero i te faahiti i te parau no nia i te hopea o te ao a Satani e no nia i te ao apî, teie ta ’na i parau: “Taeae here ma, i te mea e te tiai nei outou i teie mau mea, a imi i te mau ravea atoa a itehia ’tu ai outou e te Atua ei mea viivii ore e te hapa ore e i roto i te hau.” (Pet. 2, 3:14) Ia haapao tatou i tera a‘oraa a tamau atoa ’i i te ora e i te haamori ia Iehova mai ta ’na e titau mai ra, ua taatoa ïa tatou no ’na.

19 E tamau Satani e ta ’na ao i te faahema ia tatou ia tuu tatou ia Iehova i te parahiraa hopea roa. (Luka 4:13) Noa ’tu eaha te tuuhia i mua ia tatou, eiaha e vaiiho i te hoê noa ’‘e taata aore ra ohipa e rave i te parahiraa matamua i roto i to tatou aau. E faaoti papu ana‘e i te pûpû i te taviniraa mo‘a ia Iehova ana‘e!

HIMENE 30 E Atua, Hoa, Metua oia no ’u

^ par. 5 Te oaoa nei tatou i te tavini ia Iehova. Tera râ, te pûpû ra anei tatou i te hoê taviniraa mo‘a ia ’na ana‘e? E itehia te pahonoraa na roto i te mau faaotiraa ta tatou e rave i roto e piti tuhaa o to tatou oraraa.

^ par. 53 FAATAARAA O TE HOHO‘A: Eita tatou e hinaaro e amu i te maa faaineinehia i roto i te hoê vahi reporepo. No te aha ïa tatou e mataitai ai i te hoho‘a e faatietie ra i te taparahiraa taata, te peu tahutahu e te peu faufau?