No te mea ua maraa te numera o te feia poro, ua titauhia ia nenei hau atu â vea. Ua haapao te mau taeae o te Betela no Brooklyn ia neneihia te reira. Ua ohipa amui ïa ratou e te tahi atu taiete o te hamani ra i te mau tapoˈi buka paari. Ua titauhia râ ia tiai e rave rahi avaˈe ia nehenehe te taiete e nenei i te mau buka. Fifihia ˈtura te ohipa pororaa. Ua ani ïa taeae Rutherford ia taeae Robert Martin, e haapao ra i tera taiete, e nehenehe anei ta ratou e nenei i te mau buka.

Ua turu taeae Martin i tera manaˈo. Te auraa, e titauhia te hoê vahi no te nenei i ta ratou mau buka. Ua tarahu ïa te mau taeae i te hoê piha rahi i Concord Street, Brooklyn e ua noaa mai ia ratou te mau matini neneiraa.

Aita râ vetahi i mauruuru i tera faanahoraa apî. A haere ai te peretiteni o te hoê taiete e nenei ra i ta tatou mau buka e mataitai i tera vahi, ua parau o ˈna: “Mea au roa ta outou mau matini, aita râ outou e ite e nafea ia faaohipa i te reira. Ono avaˈe noa e ino roa teie mau matini ia outou.”

Ua parau taeae Martin: “E au ra e ua tano o ˈna, ua papu râ ia matou e e tauturu mai Iehova.” Ua tano iho â taeae Martin. Ua nenei ratou hau atu 2 000 buka i te mahana.

Hau atu i te neneiraa o te mau buka, ua haamata te nunaa o Iehova i te faaohipa i te radio no te poro i te parau apî oaoa. I te Tapati 26 no Fepuare 1922, ua horoa taeae Rutherford i ta ˈna oreroraa parau matamua na roto i te radio. Teie te tumu parau “E ore roa te mau mirioni taata e ora ra i teie nei  e pohe.” Ua haapurorohia te reira na roto i te pu radio K.O.G no Los Angeles, Kalifonia, Marite.

Ua hau atu i te 25 000 taata tei faaroo i te porotarama taatoa. Ua faatae mai vetahi o ratou i te tahi mau rata o te faaite ra i to ratou mauruuru i te taeae Rutherford. O Willard Ashford no Santa Ana, Kalifonia, hoê o ratou. Ua haapopou o ˈna ia taeae Rutherford no te mea mea oraora e mea anaanatae roa ta ˈna oreroraa parau. Ua parau atoa o ˈna: “I to ˈu fare, e toru feia maˈi matou o te ore e nehenehe e haere na rapae. Ahani aita te porotarama i haapurorohia na roto i te radio, aita ïa matou e nehenehe e fanaˈo i te reira.”

I te mau hebedoma i muri aˈe, e rave rahi atu â oreroraa parau tei haapurorohia na roto i te radio. I te hopea o te matahiti 1922, ua faaite Te Pare Tiairaa e “ua hau i te 300 000 taata tei faaroo i te poroi Bibilia na roto i te radio.”

Ua itoitohia te Feia haapii Bibilia maoti te mau rata haamauruururaa e faaoti atura ratou i te hamani i ta ratou iho pu radio i Staten Island, New York. Tau matahiti i muri aˈe, no te poro i e rave rahi atu â taata i te parau apî oaoa o te Faatereraa arii, ua haamata ratou i te faaohipa i te WBBR.

I roto i Te Pare Tiairaa o te 15 no Tiunu 1922 (Beretane), ua faaitehia e e tupu te hoê tairururaa i Cedar Point, Ohio, i te 5 e tae atu i te 13 no Tetepa 1922. Ua oaoa roa te Feia haapii Bibilia i to ratou taeraa ˈtu i Cedar Point.

I roto i ta ˈna oreroraa parau matamua, ua parau taeae Rutherford i te feia i putuputu mai: “Ua papu ia ˈu e e haamaitai Iehova i teie tairururaa e maoti teie ravea e ite e rave rahi atu â taata i te parau mau Bibilia.” Ua faaitoito te mau taeae orero tataitahi i te mau taeae e tuahine ia tamau i te poro.

I te Mahana pae 8 no Tetepa, ua apiti mai hau atu 8 000 taata no te faaroo i te oreroraa parau a taeae Rutherford. Ua manaˈo ratou e e faataa mai o ˈna i te auraa o te  mau reta “ADV” tei papaihia i nia i ta ratou mau titau-manihini-raa. I to ratou parahiraa, ua ite ratou i te hoê paruai tei taamuhia i nia ˈtu i te tahua. Ua tae atoa mai taeae Arthur Claus no Tulsa, Oklahoma, Marite, i teie tairururaa. Ua parahi o ˈna i te hoê vahi e faaroo maitai ai o ˈna i te mau oreroraa parau. Mea fifi hoi ia faaroo maite, no te mea aita e matini haapuairaa reo.

Ia ore te oreroraa parau a taeae Rutherford e haafifihia, ua faaara te peretiteni ia haamata te reira, eita te taata e farii-faahou-hia ia tomo mai. I te hora iva e te afa i te poipoi, ua haamata taeae Rutherford i ta ˈna oreroraa parau ma te faahiti i te mau parau a Iesu papaihia i roto i te Mataio 4:17: “Ua fatata hoi te basileia o te rai.” (V.C.J.S.) I to taeae Rutherford faataaraa e nafea te taata e faaroo ai i te poroi o te Basileia, teie ta ˈna i parau: “Na Iesu iho i parau, i te tau o to ˈna hoˈiraa mai e aratai o ˈna e rave rahi taata e i rotopu ia ratou e maiti o ˈna i te feia taiva ore anaˈe.”

Te haamanaˈo ra taeae Arthur: “Ua faaroo maite matou i te oreroraa parau.” Tera râ, maui aˈera to ˈna opu. Titauhia ˈtura ia ˈna ia haere i rapae noa ˈtu ua ite o ˈna e aita o ˈna e nehenehe e hoˈi mai i roto.

Tau minuti i muri aˈe, maitai mai nei Arthur. A hoˈi ai i te vahi putuputuraa, faaroo atura o ˈna i te taata e popo ra. E 23 matahiti to Arthur i tera taime, faaoti atura ïa o ˈna e pauma na nia i te hoê patu e maha metera te teitei no te haere i nia i te tafare, ia nehenehe o ˈna e faaroo i te toea o te oreroraa parau. I te mea e ua matara noa te mau haamaramarama, ua nehenehe ïa o ˈna e faaroo maite i te oreroraa parau.

I to ˈna taeraa ˈtu i nia i te tafare, ite atura o ˈna i te tahi o to ˈna mau hoa. Ani atura o Franck Johnson ia ˈna: “E tipi anei ta oe?”

 Pahono atura Arthur: “E.”

Parau atura Franck: “Tano maitai, o oe ta Iehova i tono mai. Te ite ra oe tera paruai taamuhia? A faaroo maite, ia parau te haava * ‘A poro, a poro’ e tâpû oe i te taura.”

Tiai noa ˈtu ra ïa Arthur e to ˈna mau hoa i tera taime faufaa mau. Ma te reo puai, parau atura taeae Rutherford: “Ia riro outou ei ite mau e te haapao maitai no Iehova. A haere i mua i roto i te aroraa e ia ano roa o Babulonia. A faaite i te poroi i te mau vahi atoa. Ia ite te ao nei e o Iehova te Atua e o Iesu Mesia te Arii o te mau arii e te Fatu o te mau fatu. Teie te mahana hoê roa. Inaha, te faatere ra te Arii! E vea outou na ˈna. No reira, a poro, a poro, a poro i te Arii e i to ˈna basileia!”

Te haamanaˈo ra Arthur i te taime a tâpû ai o ˈna e to ˈna mau hoa i te taura. A mahora mǎrû noa ˈi te paruai, itehia ˈtura te papairaa: “A poro i te Arii e i to ˈna basileia!” (ADV) *

Ua tauturu te tairururaa i Cedar Point i te mau taeae ia ite i te faufaaraa ia poro i te Faatereraa arii e ua oaoa roa ratou i te apiti i tera ohipa pororaa. Ua papai te hoê pionie no Oklahoma, Marite: “I te vahi ta matou i poro, mea rahi te taata e ohipa ra i roto i te mau vahi heruraa arahu. Mea veve roa ratou.” Ua faatia o ˈna e e taˈi roa te taata a taio ai i te vea Te tau auro (Beretane). Ua parau atoa o ˈna: “Ua oaoa roa matou i te tamahanahanaraa ia ratou.”

Ua taa i te Feia haapii Bibilia i te faufaaraa o ta Iesu mau parau i roto i te Luka 10:2: “Te rahi mau nei te auhune, mea iti râ te rave ohipa.” I te hopea o te matahiti 1922, ua faaoti papu ratou i te horoa i te mea maitai roa ˈˈe no te poro i te parau apî oaoa o te Faatereraa arii ati aˈe te ao nei.