Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiurai 2017

A upootia i te aroraa no te paruru i to feruriraa

A upootia i te aroraa no te paruru i to feruriraa

TEI roto oe i te hoê aroraa. O Satani te enemi e te mauhaa ta ’na e faaohipa ra, mea puai mau. Teie mauhaa, no te aro ïa i to oe feruriraa, eiaha i to oe tino. Eaha teie mauhaa? O te haaparareraa mana‘o ïa!

Ua ite te aposetolo Paulo e mea atâta mau ta Satani ravea haaparareraa mana‘o. E ere râ pauroa te mau Kerisetiano tei ite i te reira. Ei hi‘oraa, e au ra e ua mana‘o vetahi i Korinetia e mea paari maitai ratou i roto i te parau mau, eita roa ’tu ïa e haere ia Satani ia faahema ia ratou. (Kor. 1, 10:12) No reira Paulo i horoa ’i i teie faaararaa: “Mai te ophi hoi i faahema ia Eva i ta ’na ravea paari, te taiâ nei au ia viivii-atoa-hia to outou feruriraa, a ere atu ai outou i te haavare ore e te viivii ore e au i te Mesia.”—Kor. 2, 11:3.

Te faaite mai ra te mau parau a Paulo i te faufaaraa ia ore e tiaturi rahi roa ia tatou iho. No te upootia i te aroraa i nia i ta Satani ravea haaparareraa mana‘o, mea tia ia ite eaha te fifi e ia paruru ia oe.

MEA ATÂTA ROA TE RAVEA HAAPARARERAA MANA‘O

I roto i teie tumu parau, te ravea haaparareraa mana‘o, o te hoê ïa parau hape aore ra o te faahape i te mana‘o. E faaohipahia te reira i nia i te taata ia vare ratou aore ra no te ohipa i nia i to ratou huru feruriraa aore ra haaraa. Ia au i te buka Propaganda and Persuasion, “mea ino, mea atâta e e ere mea tia” tera raveraa. Te parau ra te taata e “e haavare, e parau tavirihia, e punu, [e] e ohiparaa i nia i te feruriraa o te taata” te ravea haaparareraa mana‘o.

Mea atâta roa te ravea haaparareraa mana‘o no te mea e nehenehe te reira e ohipa riirii noa i nia i to tatou feruriraa e eita tatou e ite noa ’‘e i te reira ia tupu mai. E nehenehe e faaauhia te reira i te hoê mâhu taero ta tatou e ore e hau‘a  aore ra e ite. Ua parau Vance Packard, te hoê taata îite i te huru e te haerea o te taata, e e ohipa te ravea haaparareraa mana‘o i nia i ta tatou e rave “hau a‘e i ta tatou e mana‘o ra.” Ua parau te tahi atoa taata îite e, no te ravea haaparareraa mana‘o i ino roa ’i te taata, aita ratou e haa faahou ra ma te au, e ua aratai te reira i te taparahi-pohe-raa o te tahi atu mau nunaa, i te tama‘i e i te hamani-ino-raa, no te au-ore-raa i te tahi atu nunaa aore ra no te haapaoraa.—Easily Led: A History of Propaganda.

Mai te peu e nehenehe te taata e haavare ia tatou na roto i te ravea haaparareraa mana‘o, ua hau a‘e ïa ta Satani e nehenehe e rave i nia ia tatou. Ua hi‘opoa noa oia i te huru o te taata e ta ratou mau haaraa mai te taime a poietehia ’i te taata. Te haavî atoa ra oia i teie nei i “to te ao atoa,” e nehenehe ïa ta ’na e faaohipa i te mau tuhaa atoa o teie ao no te haaparare i ta ’na mau haavare. (Ioa. 1, 5:19; Ioa. 8:44) Ua “haapoiri” hoi Satani “i te feruriraa” o e rave rahi taata i ta ’na ravea haaparareraa mana‘o. Ua haere roa ’tura ïa i teie nei ia ’na ia “haavare . . . i to te ao atoa nei.” (Kor. 2, 4:4; Apo. 12:9) E nafea oe e nehenehe ai e patoi i ta ’na ravea haaparareraa mana‘o?

A HAAPUAI I TO FAAROO

Ua haapii mai Iesu ia tatou i te hoê ravea no te patoi i te haaparareraa mana‘o: “Ite . . . i te parau mau e na te parau mau e faatiamâ ia outou.” (Ioa. 8:31, 32) I roto i te hoê tama‘i, mea tia ia ite te faehau ihea e noaa mai ia ’na te haamaramaramaraa tano, no te mea e haaparare te enemi i te tahi mau parau haavare ia vare te faehau. Ihea roa ïa e noaa mai ia oe te haamaramaramaraa tano? Ua horoa mai Iehova i te reira i roto i ta ’na Parau, te Bibilia. I roto i te Bibilia oe e ite ai i te mau mea atoa hinaarohia e oe no te patoi i te ravea haaparareraa mana‘o a Satani.—Tim. 2, 3:16, 17.

Ua ite iho â Satani i te reira. No reira oia e faaohipa ’i i te ao ta ’na e faatere ra no te haafariu ê ia tatou e no te faatoaruaru ia tatou ia ore tatou e taio e e haapii i te Bibilia. Eiaha roa ’tu e vare i te “mau opuaraa [ino] a te Diabolo.” (Eph. 6:11, nota) Eita te ite o te parau mau i noaa mai i te mau haapiiraa matamua e navai noa. Mea titauhia ia tutava tatou no te faahohonu atu â i to tatou ite no nia i te parau mau. (Eph. 3:18) Mai ta te taata papai ra o Noam Chomsky i parau: “Aita e taata e haere mai e tuu i te parau mau i roto i to oe feruriraa. E mea tera te tia ia oe ia imi.” No reira, a “imi” ma te “hi‘opoa maitai . . . i te mau Papai i te mau mahana atoa.”—Ohi. 17:11.

No te upootia i te aroraa no te paruru i to oe feruriraa, mea tia ia ite eaha te fifi e ia paruru ia oe

Eita Satani e hinaaro ia maramarama oe, a ite roa ’tu ai oe i te parau mau no nia i ta oe e faaroo  ra. No te aha? No te mea “mea manuïa a‘e” te ravea haaparareraa mana‘o mai te peu “ua toaruaru [te taata] i te feruri-noa-raa ma te feaa.” (Media and Society in the Twentieth Century) Eiaha e tiaturi noa i te mau mea atoa ta oe e faaroo ra ma te ore e feruri maite i te reira. (Mas. 14:15) Ua horoa ’tu te Atua i te aravihi ia feruri, a faaohipa ïa i te reira no te haapuai i to faaroo.—Mas. 2:10-15; Roma 12:1, 2.

A VAI TAHOÊ NOA

Ia ohipa te ravea haaparareraa mana‘o i nia i te mau faehau, e mǎta‘u ratou a ore atu ai e hinaaro faahou e aro. E turai atoa paha te ravea haaparareraa mana‘o i te mau faehau ia aro i rotopu noa ia ratou iho aore ra ia faaatea ê i te toea o te nuu. Ia au i te hoê raatira Heremani, o te ravea haaparareraa mana‘o te tahi tumu i pau ai te fenua Heremani i te Tama‘i rahi matamua. Ua parau oia e ua rahi roa hoi te ravea haaparareraa mana‘o i te ohiparaa i nia i te feruriraa o te taata, mai te huru ra e tera noa to roto i to ratou feruriraa, aita e mea ê atu. Te faaohipa ra Satani i te hoê â mau ravea no te tuino i te auhoêraa o te mau Kerisetiano i teie mahana. Ei hi‘oraa, e tamata oia i te faatupu i te peapea i rotopu i te mau taeae. Aore ra e tamata oia i te turai ia ratou ia faarue i ta Iehova faanahonahoraa ma te tuu i roto i to ratou feruriraa te mana‘o e ua rave te faanahonahoraa i te tahi mea tia ore aore ra hape.

Eiaha e vare! A pee i te mau a‘oraa Bibilia e a vai tahoê noa e to oe mau taeae. Ei hi‘oraa, te faaitoito nei te Bibilia ia tatou ia tamau i te faaore noa ’tu i te hapa e ia vitiviti tatou i te faaafaro i te mau peapea atoa. (Kol. 3:13, 14; Mat. 5:23, 24) Te faaara atoa mai ra te Bibilia eiaha e faaatea ê i te amuiraa. (Mas. 18:1) Ia papu ia oe ua ineine maitai oe no te patoi i ta Satani ravea haaparareraa mana‘o. A ui ia oe iho: ‘I te taime hopea te hoê taeae i te raveraa i te tahi mea o ta ’u i ore i au, ua pee anei au i te huru ta te Atua e au aore ra i te huru ta Satani e au?’—Gal. 5:16-26; Eph. 2:2, 3.

EIAHA OE IA ERE I TO OE TIATURIRAA

Eita te hoê faehau o te taiva i to ’na raatira e aro maitai. No reira te mau enemi e faaohipa ’i i te ravea haaparareraa mana‘o, ia faaea te hoê faehau i te tiaturi i to ’na mau raatira. Ia hape te mau raatira, e tamata te mau enemi i te faaohipa i te reira ma te parau: “Eita outou e nehenehe e tiaturi ia ratou!” e “Eiaha outou e vaiiho ia ratou ia aratai ia outou i te ati!” Tera atoa ta Satani e rave ra. Te tamata ra oia i te tuino i to oe tiaturi i te mau taeae ta Iehova e faaohipa ra no te aratai i to ’na nunaa.

 E nafea oe e nehenehe ai e paruru ia oe? A faaoti papu i te faaea noa i roto i te faanahonahoraa a Iehova. A tamau i te vai taiva ore e i te turu i te mau tane o te aratai ra i te nunaa o te Atua, noa ’tu e taata tia ore ratou. (Tes. 1, 5:12, 13) E aro paha te mau apotata e te feia parau haavare i te faanahonahoraa. (Tito 1:10) Noa ’tu e au ra e mea mau ta ratou e parau, eiaha roa “to outou feruriraa ia oioi i te feaa.” (Tes. 2, 2:2) A pee i te a‘oraa ta Paulo i horoa ia Timoteo: “A tamau i roto i te mau mea i haapiihia ia oe,” e a haamana‘o “na vai i haapii atu ia oe.” (Tim. 2, 3:14, 15) A feruri i te mau haapapuraa atoa o te faaite ra e nehenehe oe e tiaturi i te tavini haapao maitai ta Iehova e faaohipa ra fatata 100 matahiti i teie nei no te haapii ia tatou i te parau mau.—Mat. 24:45-47; Heb. 13:7, 17.

EIAHA E MǍTA‘U

Te tamata atoa ra Satani i te ohipa i nia ia oe na roto i te tahi atu mau ravea papu roa ’tu â. I te tahi taime, e haamǎta‘u oia ia oe. Ia au i te buka Easily Led: A History of Propaganda, te haamǎta‘uraa “hoê o na ravea haaparareraa mana‘o tahito roa ’‘e.” Ua papai te hoê orometua haapii Beretane o Philip Taylor te i‘oa e, ei hi‘oraa, ua faaohipa to Asura i te haamǎta‘uraa e te haaparareraa mana‘o no te faatere i to ratou mau enemi. E faaohipa Satani i te mǎta‘u, mai te mǎta‘u i te taata, te mǎta‘u i te hamani-ino-raa e te mǎta‘u i te pohe, no te tapea ia oe ia ore oe e tavini faahou ia Iehova.—Isa. 8:12; Ier. 42:11; Heb. 2:15.

Eiaha e vaiiho ia Satani ia na reira ia oe! Ua parau Iesu: “Eiaha e mǎta‘u i te feia e haapohe ia outou. Ia pohe hoi outou, aita ’tu â ta ratou e nehenehe e rave i nia ia outou.” (Luka 12:4) A tiaturi maite e e tapea Iehova i ta ’na i fafau, oia hoi, e haapao oia ia oe, e horoa ’tu oia i “te puai o te hau ê i to te taata nei,” e e tauturu oia ia oe ia patoi i te mau aroraa a Satani.—Kor. 2, 4:7-9; Pet. 1, 3:14.

Papu maitai, i te tahi mau taime e paruparu aore ra e mǎta‘u paha oe. A haamana‘o râ i ta Iehova mau parau faaitoito i nia ia Iosua: “E faaetaeta, e ia itoito roa; eiaha e mǎta‘u, eiaha hoi e amiami; tei pihai-atoa-iho hoi to Atua o Iehova ia oe i to mau haerea atoa ra.” (Ios. 1:9) Mai te peu e te ahoaho ra oe, a pure ia Iehova i tera iho â taime no nia i ta oe mau haapeapearaa. Ia papu maitai ia oe e “na te hau o te Atua, tei hau ê i te mau mana‘o atoa, e tiai i to . . . aau e feruriraa.” E noaa mai ïa ia oe te puai no te patoi i te taatoaraa o ta Satani ravea haaparareraa mana‘o.—Phil. 4:6, 7, 13.

Te haamana‘o ra oe i te ravea haaparareraa mana‘o ta te afai parau a to Asura, o Rabasake, i faaohipa no te faariaria i te nunaa o te Atua? Ua hinaaro oia ia mana‘o ratou e aita e taata e nehenehe e paruru ia ratou i mua i to Asura, aita atoa Iehova. Ua parau atoa oia e na Iehova i faaue i to Asura ia haamou ia Ierusalema. Eaha ta Iehova i parau? “Eiaha e mǎta‘u i te parau ta oe i faaroo a‘enei, ta te mau tavini o te arii o Asura i faaino mai ia ’u ra.” (Arii 2, 18:22-25; 19:6) Ua tono Iehova i te hoê melahi no te haapohe e 185 000 feia no Asura i roto hoê noa po.—Arii 2, 19:35.

A HAA MA TE PAARI, A FAAROO NOA IA IEHOVA

Ua mataitai a‘ena anei oe i te tahi hoho‘a teata aita te hoê taata i roto e ite ra e te haavare-noa-hia ra o ’na? Aita anei oe i hinaaro e parau atu: “Eiaha e tiaturi atu! Te haavare noa ra ratou ia oe!” A feruri na ïa i te mau melahi e parau ra ia oe: “Eiaha e vare i te mau haavare a Satani!”

Eiaha ïa e faaroo i ta Satani ravea haaparareraa mana‘o. (Mas. 26:24, 25) A faaroo ia Iehova e a tiaturi ia ’na i roto i te mau mea atoa ta oe e rave. (Mas. 3:5-7) Mea here na ’na ia oe e te parau ra oia ia oe: “E tau tamaiti, ia paari hoi oe, ia oaoa tau aau.” (Mas. 27:11) Ia na reira oe, e upootia ïa oe i te aroraa no te paruru i to oe feruriraa!