Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiurai 2017

Uiraa a te feia taio

Uiraa a te feia taio

E nehenehe anei te hoê Kerisetiano e rave i te hoê pupuhi no te paruru ia ’na iho i te tahi atu mau taata?

E pee te mau Kerisetiano i te mau faaueraa tumu Bibilia ia maiti ratou e nafea ia paruru ia ratou iho. Te faaite ra teie mau faaueraa tumu e ere i te mea tano no te mau Kerisetiano ia faaohipa i te pupuhi no te paruru ia ratou iho i te tahi atu mau taata. A feruri na i teie mau tuhaa i muri nei:

No Iehova, mea mo‘a te ora o te taata. Ua papai te fatu salamo Davida no nia ia Iehova: “Tei ia oe hoi te tumu o te ora.” (Sal. 36:9) Ia maiti te hoê Kerisetiano i te paruru ia ’na e i to ’na faaearaa, e imi oia i te ravea ia ore oia e haamanii i te toto, oia hoi, e taparahi pohe i te tahi atu taata.—Deut. 22:8; Sal. 51:14.

Parau mau, e nehenehe te hoê taata e haamanii i te toto i te mau mauhaa atoa ta ’na e faaohipa no te paruru ia ’na. Tera râ, mea ohie atu â ia haapohe i te hoê taata i te hoê pupuhi, ma te opua-ore-hia aore ra ma te opuahia. * E taiâ atoa paha te taata hamani ino. A ite ai oia i te pupuhi, e nehenehe te tupuraa e riro ei mea atâta ’tu â, e e nehenehe te tahi taata e pohe roa.

I parau ai Iesu i ta ’na mau pǐpǐ ia rave i te ‘o‘e i te po hou oia a pohe ai, e ere no te paruru ia ratou iho. (Luka 22:36, 38) Ua hinaaro râ Iesu e horoa i te hoê haapiiraa ia ratou: Eiaha ta ’na mau pǐpǐ e taparahi i te taata, noa ’tu e titauhia ia tia ratou i mua i te hoê nahoa taata e mauhaa tama‘i ta ratou. (Luka 22:52) I muri a‘e i to Petero faaohiparaa i ta ’na ‘o‘e i nia i te tavini a te tahu‘a rahi, ua parau Iesu ia Petero: “A faaho‘i i ta oe ‘o‘e i roto i te vehî.” Ua faahiti atura Iesu i te hoê faaueraa tumu o te aratai i te mau Kerisetiano i teie atoa mahana: “Te feia atoa . . . e rave i te ‘o‘e, e pohe ïa i te ‘o‘e.”—Mat. 26:51, 52.

Mai tei tohuhia i roto i te Mika 4:3, e tupai te nunaa o te Atua i “ta ratou ‘o‘e ei auri arote, e ta ratou mau mahae ei tipi tope vine.” Ua matauhia te mau Kerisetiano mau ei feia hau. Te pee ra ratou i te mau faaueraa ta te Atua i horoa na roto i te aposetolo Paulo: “Eiaha te ino ia tahoohia ’tu i te ino i te taata atoa. A . . . parahi hau noa e te taata atoa.” (Roma 12:17, 18) Noa ’tu ua faaruru Paulo i te mau tupuraa fifi mau mai “te eiâ,” aita roa ’tu oia i patoi i te mau faaueraa tumu Bibilia no te paruru ia ’na iho. (Kor. 2, 11:26) Ua tiaturi râ oia i te Atua e ua ite e mea maitai a‘e te a‘oraa î i te paari o te Bibilia i “te mauhaa tama‘i.”—Koh. 9:18.

No te mau Kerisetiano, mea faufaa roa ’tu â te ora i te mau tao‘a materia. Ua ite tatou e “noa ’tu e mea rahi te tao‘a a te hoê taata, eita oia e ora i te reira.” (Luka 12:15) No reira, mai te peu e paraparau tatou ma te mǎrû i te hoê taata eiâ e pupuhi ta ’na, e eita râ o ’na e faaea, e pee ïa tatou i ta Iesu a‘oraa: “Eiaha e aro i te taata ino.” Te auraa paha ïa e e vaiiho tatou ia ’na ia ohi i te mau mea atoa ta ’na e hinaaro. (Mat. 5:39, 40; Luka 6:29) * Mea papu, mea maitai a‘e ia ore tatou e riro ei fa na te feia ohipa ino. Eita paha ïa ratou e hamani ino mai mai te peu e  pee tatou i te a‘oraa Bibilia a ape atu ai i “te faaiteiteraa ahaaha i ta [tatou] mau faufaa.” (Ioa. 1, 2:16) E riro atoa te reira ei paruru no tatou ia ite to tatou mau taata tapiri e e Ite no Iehova tatou o te faatupu i te hau.—Mas. 18:10.

E faatura te mau Kerisetiano i te mana‘o haava o vetahi ê. (Roma 14:21) E huru ê aore ra e turori roa te tahi mau taeae e tuahine ia ite ratou e e pupuhi ta te hoê taeae no te paruru ia ’na i te tahi atu mau taata. E parau faatia paha ta tatou no te tapea i te hoê pupuhi ia tatou ra. No to tatou râ here i to tatou mau taeae, eita roa ’tu tatou e rave i te hoê ohipa o te nehenehe e faaturori ia ratou.—Kor. 1, 10:32, 33; 13:4, 5.

E hinaaro te mau Kerisetiano e riro ei hi‘oraa maitai no vetahi ê. (Kor. 2, 4:2; Pet. 1, 5:2, 3) Mai te peu e e pupuhi ta te hoê Kerisetiano no te paruru ia ’na i te tahi atu mau taata, e horoa ’tu te mau matahiapo i te mau a‘oraa Bibilia. Ia faaoti oia e tapea i te pupuhi ia ’na ra, eita oia e riro ei hi‘oraa maitai. Eita ïa oia e nehenehe e amo i te hopoia aore ra eita e horoahia ia ’na i te hoê fana‘oraa taa ê i roto i te amuiraa. Hoê â titauraa no te hoê Kerisetiano e titauhia ia faaohipa i te pupuhi i roto i ta ’na ohipa. Mea maitai a‘e no ’na ia tamata i te imi i te tahi atu ohipa. *

Mea titauhia ia rave te hoê Kerisetiano i ta ’na iho mau faaotiraa e nafea oia e paruru ai ia ’na iho, to ’na utuafare e ta ’na mau faufaa, oia atoa no te ohipa ta ’na e maiti. Ia rave râ oia i tera huru faaotiraa, ia niuhia te reira i nia i te mau aratairaa Bibilia. Ua horoa mai to tatou Atua î i te paari i teie mau aratairaa no to ’na here ia tatou. No reira, e faaoti te mau Kerisetiano e auhoaraa puai to ratou e o Iehova eiaha e rave i te hoê pupuhi no te paruru ia ratou i te tahi atu mau taata. Ua taa ia ratou e ia tiaturi ratou i te Atua a pee atu ai i te mau aratairaa Bibilia i roto i to ratou oraraa, e fana‘o ratou i te hoê oraraa hau e a muri noa ’tu.—Sal. 97:10; Mas. 1:33; 2:6, 7.

I te roaraa o te ati rahi, e tiaturi te mau Kerisetiano ia Iehova e eita ratou e tamata i te paruru ia ratou iho

^ par. 3 E nehenehe te hoê Kerisetiano e faaoti e rave i te hoê pupuhi no te pupuhi i te animara no te tamaa aore ra no te paruru ia ’na i te mau animara oviri. Aita ana‘e oia e faaohipa i te pupuhi, mea maitai ia tatara oia i te mau ofai pupuhi i roto, e tapuni atoa paha oia i te pupuhi i te hoê vahi papu ponaohia. I te mau vahi e opani te ture ia tapea te hoê taata i te pupuhi ia ’na ra, aore ra e taotia aore ra e faature te hau i te parau faatia e tapea i te pupuhi, e auraro te mau Kerisetiano i te ture.—Roma 13:1.

^ par. 6 No te haapii e nafea ia paruru i te maferaraa, a hi‘o i te tumu parau “Nafea ia paruruhia i te ohipa hamani ino vahine” i roto i te A ara mai na! o te 8 no Mati 1993.

^ par. 2 No te ite hau atu â no nia i te mau ohipa e titauhia ia faaohipa i te pupuhi, a hi‘o i Te Pare Tiairaa no te 1 no Novema 2005, api 31, e te 15 no Atopa 1983, api 25-26 (Farani).