Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiurai 2017

“Haamaitai ia Iehova,” no te aha?

“Haamaitai ia Iehova,” no te aha?

“Haamaitai ia Iehova; . . . e mea popou ïa; e au hoi te haamaitai ra.”—SAL. 147:1.

HIMENE: 59, 3

1-3. (a) Inafea ra paha te Salamo 147 i te papairaahia? (b) Eaha ta tatou e nehenehe e huti mai i te haapiiraa i te Salamo 147?

E PINEPINE tatou i te haapopou i te hoê taata ia faahiahia tatou i ta ’na i parau aore ra i rave. Hau atu â ïa tatou i te haamaitai, aore ra arue, i te Atua ra Iehova! E arue tatou ia ’na no to ’na puai rahi, o ta tatou e ite ra i roto i te mau mea faahiahia ta ’na i poiete, e e arue tatou ia ’na no to ’na here rahi ia tatou, o ta tatou e ite ra na roto i te tusia taraehara o ta ’na iho Tamaiti.

2 Ia taio tatou i te Salamo 147, mea maramarama maitai to te taata papai hinaaro rahi e arue ia Iehova. Ua faaitoito atoa oia ia vetahi ê ia apiti ia ’na no te arue i te Atua.—A taio i te Salamo 147:1, 7, 12.

3 Aita tatou i ite na vai i papai i te Salamo 147. Eita râ e ore e ua ora te taata papai i te tau a ho‘i ai Iseraela i Ierusalema i muri a‘e i to Iehova faatiamâraa ia ratou ia Babulonia. (Sal. 147:2) Ua haamaitai te fatu salamo ia Iehova no te mea ua nehenehe faahou to ’Na nunaa e haamori i roto i to ratou iho fenua. Ua horoa te fatu salamo hau atu â tumu e haamaitai ai  ia Iehova. Eaha tera mau tumu? E eaha te tahi mau tumu e parau ai tatou “Haamaitai ia Iehova!”?—Sal. 147:1.

E FAAORA IEHOVA I TE AAU OTO

4. Eaha râ te huru o te mau Iseraela i to te arii Kuro faatiamâraa ia ratou, e no te aha?

4 A feruri na i te huru aau o te mau Iseraela i te afairaahia ratou i Babulonia. Ua faaooo te feia i afai ia ratou i reira e ua parau: “A himene mai na i te hoê himene no Ziona.” Aita râ te ati Iuda i hinaaro e himene. Ua haamouhia Ierusalema, te tumu matamua o to te ati Iuda oaoa. (Sal. 137:1-3, 6) Ua oto ratou e ua hinaaro i te tamahanahanaraa. Mai ta te Parau a te Atua râ i tohu, ua tauturu Iehova i to ’na nunaa. E nafea? Ua haru te arii ra o Kuro no Peresia ia Babulonia e ua parau no nia ia Iehova: “Ua poroi mai ia ’u e faatia i te tahi hiero no ’na i Ierusalema.” Ua parau atoa Kuro i te mau Iseraela: “O vai to outou i to ’na atoa ra taata? ei ia ’na to ’na ra Atua o Iehova, a haere ai oia i nia ra.” (Par. 2, 36:23) Eita e ore e ua tamahanahana te reira i te mau Iseraela i Babulonia!

5. Eaha ta te fatu salamo i parau no nia i to Iehova puai no te faaora ia tatou?

5 Ua tamahanahana Iehova eiaha noa i te nunaa Iseraela, i te Iseraela tataitahi atoa râ. Te na reira atoa ra Iehova i nia ia tatou i teie mahana. Ua papai te fatu salamo e e “rapaau oia [te Atua] i te feia aau paruparu ra” e e “taamu i to ratou mau puta.” (Sal. 147:3) Ia ma‘ihia aore ra ia oto tatou, ia papu maitai e te tâu‘a mai ra Iehova ia tatou. E hinaaro rahi to Iehova i te tamahanahana ia tatou e i te faaora i to tatou mau mauiui i te pae aau. (Sal. 34:18; Isa. 57:15) Te horoa mai ra oia i te paari e te puai ia nehenehe tatou e faaruru i te mau fifi atoa.—Iak. 1:5.

E hinaaro rahi to Iehova i te tamahanahana ia tatou e i te faaora i to tatou mau mauiui i te pae aau

6. E nafea tatou e faufaahia ’i i te mau parau a te fatu salamo i roto i te Salamo 147:4? (A hi‘o i te hoho‘a matamua.)

6 Ua hi‘o atura te fatu salamo i te ra‘i e ua parau e “ua hope te mau fetia i te taiohia” e Iehova e “na ’na i mairi i to ratou i‘oa.” (Sal. 147:4) Mea papu, ua hi‘o te fatu salamo i te mau fetia, aita râ oia i ite ehia rahiraa fetia e vai mau ra. I teie mahana, ua ite te mau aivanaa e e rave rahi miria fetia to roto i to tatou haapueraa fetia. Te mana‘o-atoa-hia ra e e miria i te miriaraa haapueraa fetia i roto i te ao nui! Eita ta te taata e nehenehe e taio i te taatoaraa o te mau fetia, te Atua poiete râ, oia ïa. Inaha, ua ite maitai oia i te fetia tataitahi, horoa roa ’tura oia i te i‘oa no ratou tataitahi. (Kor. 1, 15:41) Te Atua o te ite teihea roa te fetia tataitahi, ua ite atoa ïa ia oe. Ua ite oia teihea roa oe, eaha to oe huru e eaha ta oe e hinaaro mau ra.

7, 8. (a) Eaha ta Iehova e taa ra no nia ia tatou? (b) A horoa i te hoê hi‘oraa o te faaite ra i to Iehova aumihi.

7 Te taa ra ia Iehova i ta oe e faaruru ra e e puai to ’na no te tauturu ia oe i roto i to oe mau fifi. (A taio i te Salamo  147:5.) E mana‘o paha oe e mea fifi roa to oe tupuraa e eita ta oe e nehenehe e faaruru i te reira. Ua ite râ te Atua i to tatou mau taotiaraa e te haamana‘o ra oia e “e repo tatou.” (Sal. 103:14) E taata tia ore tatou, e na nia iho noa ïa tatou i te rave i te hoê â mau hape, e e nehenehe paha tatou e toaruaru. Auê tatou i te tatarahapa no te tahi mau mea ta tatou i parau, te mau mana‘o ino aore ra pohehae ta tatou i faatupu! Aita to Iehova e paruparu, ua taa maitai râ ia ’na i to tatou huru aau.—Isa. 40:28.

8 Ua ite a‘ena anei oe i te rima puai o Iehova i te tautururaa ia oe ia maitai mai i muri a‘e i to oe mau fifi? (Isa. 41:10, 13) Teie tei tupu no te hoê pionie o Kyoko te i‘oa. I muri a‘e i to ’na haereraa i roto i te hoê tuhaa taviniraa apî, ua toaruaru roa oia. Mea nafea to Kyoko iteraa e ua taa ia Iehova i to ’na mau fifi? I roto i ta ’na amuiraa apî, e rave rahi tei taa i to ’na mau huru aau. No ’na, mai te huru ra e te parau ra Iehova ia ’na: “Mea here na ’u ia oe, eiaha noa no te mea e pionie oe, no te mea râ e tamahine oe na ’u e ua pûpû oe ia oe no ’u. Te hinaaro ra vau ia oaoa oe ei Ite no ’u.” Mea nafea to Iehova faaiteraa ia oe e “mea itea ore ia imi,” aore ra mea faito ore, “to ’na ite”?

E HOROA MAI IEHOVA I TA TATOU E HINAARO MAU RA

9, 10. Eaha te mea faufaa roa ’‘e ta Iehova e rave no te tauturu ia tatou? A horoa i te hoê hi‘oraa.

9 E hinaaro tatou pauroa i te mau mea mai te maa, te ahu e te nohoraa. Peneia‘e e haapeapea oe e eita ta oe maa e navai. Ua poiete râ Iehova i te fenua no te faatupu i te maa ia navai no te taatoaraa, oia atoa no “te oreba apî e tiaoro atu ia ’na ra.” (A taio i te Salamo 147:8, 9.) Mai te peu e e faatamaa Iehova i te mau oreba, mea papu ïa e e horoa mai oia i te mau mea ta tatou e hinaaro mau ra i te pae materia.—Sal. 37:25.

10 Te mea faufaa roa ’‘e, e horoa mai Iehova i ta tatou e hinaaro mau ra no te haapuai noa i to tatou faaroo e e horoa mai oia i “te hau o te Atua, tei hau ê i te mau mana‘o atoa.” (Phil. 4:6, 7) Ua ite te hoê taeae o Mutsuo te i‘oa, e ta ’na vahine i ta Iehova tauturu. A tupu ai te miti faaî i te fenua Tapone i 2011, ua ora mai raua ma te paiuma i nia i te tafare o to raua fare. I tera mahana, ua ere raua fatata pauroa ta raua mau tauihaa. Ua faaea raua i tera po taatoa i roto i te hoê piha poiri e te toetoe i te piti o te tahua o to raua fare. I te poipoi a‘e, ua imi raua i te tahi mea no te faaitoito ia raua. O te Buka matahiti a te mau Ite no Iehova 2006 (Farani) noa ta raua i ite mai. A huri ai Mutsuo i te mau api, ua ite oia i te tumu parau “Te mau miti faaî haapohe roa ’‘e aita i itehia a‘enei.” Tera tuhaa, no nia ïa i te hoê aueueraa fenua i Sumatra i 2004 o tei faatupu i te miti faaî haapohe roa ’‘e aita i itehia a‘enei. Ua ta‘i Mutsuo raua ta ’na vahine a taio noa ’i raua i te mau aamu o to raua mau taeae e tuahine. No raua, ua horoa mai Iehova i te mau faaitoitoraa tano hinaarohia e raua. Ua aupuru atoa Iehova ia raua ma te tahi atu mau ravea. Ua horoa mai to raua mau taeae no te tahi atu mau vahi i Tapone i te maa e te ahu na raua. Te mea râ i haapuai roa ’‘e ia raua, o te mau tere farereiraa ïa i te amuiraa tei ravehia e te tahi mau taeae tonohia e te faanahonahoraa a te Atua. Te parau ra Mutsuo: “Ua ite au e tei pihaiiho  noa iho â Iehova ia matou tataitahi no te aupuru ia matou. Mea tamahanahana mau â!” E horoa na mua te Atua i ta tatou e hinaaro mau ra no te haapuai noa i to tatou faaroo e i muri iho e haapao oia i ta tatou e hinaaro mau ra i te pae materia.

IA FAUFAAHIA I TA TE ATUA TAUTURU

11. Eaha te titauhia ia rave ia faufaahia tatou i ta te Atua tauturu?

11 “Te tauturu nei Iehova i tei haehaa ra.” Te here ra oia ia tatou e ua ineine noa oia i te tauturu ia tatou. (Sal. 147:6a) E nafea tatou e faufaahia ’i i ta ’na tauturu? Mea titauhia ia faatupu tatou i te hoê auhoaraa puai e o ’na. No te faatupu i te reira, e titauhia ia tatou te haehaa. (Zeph. 2:3) E tiaturi te feia haehaa ia Iehova no te faaafaro i te mau ohipa parau-tia ore atoa e no te faaore i to ratou mau mauiui. Mea au na Iehova ia ratou.

12, 13. (a) No te fana‘o i ta te Atua tauturu, eaha te tia ia tatou ia ape? (b) Te mauruuru nei Iehova ia vai?

 12 I te tahi a‘e pae, “te huri nei” te Atua “i te paieti ore i raro i te repo.” (Sal. 147:6b) Eita roa ’tu tatou e hinaaro ia na reirahia tatou! Te hinaaro nei tatou ia faaite te Atua i to ’na here taiva ore ia tatou. Mea titauhia ïa ia riri tatou i ta ’na e riri. (Sal. 97:10) Ei hi‘oraa, mea titauhia ia riri tatou i te mau peu taotoraa tia ore. Te auraa ïa e e titauhia ia ape tatou i te mau mea atoa o te nehenehe e aratai ia tatou i roto i te reira, oia atoa te mau hoho‘a faufau. (Sal. 119:37; Mat. 5:28) Mea fifi paha ia aro i te reira, mea hoona râ te tutavaraa no te mea e fana‘o tatou i te haamaitairaa a Iehova.

13 Eita ta tatou e nehenehe e aro i te reira o tatou ana‘e. Mea tia ia tiaturi tatou ia Iehova. E mauruuru anei oia mai te peu e tiaturi tatou i te mau mea ta te taata e tiatonu nei no te ite mai i te tauturu? Eita, “e ore [Iehova] e popou i te itoito o te puaahorofenua.” Mea maitai anei ia tiaturi tatou i to tatou iho puai aore ra i te tahi atu taata? “E ore [Iehova] e mauruuru [aore ra maere] i te avae [puai] o te taata.” (Sal. 147:10) Mea tia râ ia tamau tatou i te ani ia Iehova te tauturu e i te taparu ia ’na ia faaora mai ia tatou i to tatou mau paruparu. Eita Iehova e fiu i te faaroo i teie mau pure. “E au râ Iehova i te feia e mǎta‘u ia ’na ra; i te feia i tiaturi i to ’na aroha,” aore ra here taiva ore. (Sal. 147:11) No to ’na taiva ore e here no tatou, ua ite tatou e e tamau oia i te tauturu ia tatou ia upootia mai i nia i to tatou mau hinaaro tano ore.

14. Ua papu i te fatu salamo i te aha?

14 Te haapapu mai ra Iehova e e tauturu oia ia tatou ia farerei tatou i te mau fifi. A ho‘i ai te mau Iseraela i Ierusalema, ua haamana‘o te fatu salamo mea nafea to Iehova tautururaa ia ratou. Ua himene te fatu salamo: “Oia tei faaetaeta i te mau te‘a o to oe ra mau uputa [oire]; e ua haamaitai i to mau tamarii ra i roto ia oe. Na ’na i faatupu i te hau i to oe ra mau otia.” (Sal. 147:13, 14) I to Iehova faaetaetaraa  i te mau uputa o te oire, ua topa ’tura te hau o te fatu salamo. Ua haapapu te reira ia ’na e e paruru iho â Iehova i to ’na nunaa.

E nafea te Parau a te Atua e tauturu ai ia haapeapea roa tatou no to tatou mau fifi? (A hi‘o i te paratarafa 15-17)

15-17. (a) Eaha to tatou huru i te tahi taime no nia i to tatou mau fifi, e nafea râ Iehova e faaohipa ’i i ta ’na Parau no te tauturu ia tatou? (b) A horoa i te hoê hi‘oraa o te faaite ra e te horo vitiviti nei te Parau a te Atua no te tauturu ia tatou.

15 Te haapeapea ra paha oe no to oe mau fifi, e nehenehe râ Iehova e horoa i te paari no te faaruru. Ua parau te fatu salamo no te Atua e e “hapono oia i ta ’na parau i te fenua nei, te horo etaeta [aore ra vitiviti] nei ta ’na i faaue.” Ua faahiti te fatu salamo i te hiona, te hau-paari e te vai, aore ra ûa paari, a ani atu ai: “O vai te taata e mau [aore ra e nehenehe e faaruru] i te toetoe na ’na?” Parau atura o ’na e “ua tuu mai oia [Iehova] i ta ’na parau, e ua tarapape ihora.” (Sal. 147:15-18) E nehenehe iho â to tatou Atua, o te ite e o te rave i te mau mea atoa, o te ohipa i nia i te ûa paari e te hiona, e tauturu ia oe ia upootia i nia i te mau fifi atoa.

Ua ite a‘ena anei oe i to Iehova vitiviti i te aratairaa ia oe i roto i to oe oraraa?

16 I teie mahana, te aratai ra Iehova ia tatou maoti ta ’na Parau, te Bibilia. Ua faahiti te fatu salamo e te “horo etaeta,” aore ra vitiviti nei te parau a Iehova no te tauturu ia tatou. Te aratai ra te Atua ia tatou i nia i te e‘a tano e i te taime tano. A feruri na mea nafea oe i te faufaaraahia maoti te Bibilia, te mau papai a te “tavini haapao maitai e te paari,” te JW Haapurororaa teata, te jw.org, te mau matahiapo e to oe mau taeae e tuahine. (Mat. 24:45) Ua ite a‘ena anei oe i to Iehova vitiviti i te aratairaa ia oe i roto i to oe oraraa?

17 Ua ite te hoê tuahine o Simone te i‘oa, mea nafea te Parau a te Atua i te tautururaa ia ’na. Ua mana‘o oia e mea faufaa ore oia e aita Iehova i mauruuru ia ’na. Tera râ, a toaruaru ai oia, ua tamau oia i te pure ia Iehova, a taparu noa ’i i ta ’na tauturu. Ua tamau atoa oia i te haapii i te Bibilia. Ua parau Simone: “I roto i te mau tupuraa atoa, ua ite iho â vau i to Iehova puai e ta ’na aratairaa.” Ua tauturu te reira ia ’na ia faaite i te hoê huru feruriraa tano a‘e.

18. No te aha oe e mana‘o ai e mea piri roa Iehova ia oe, e eaha te mau tumu e haamaitai ai oe ia Iehova?

18 Ua ite te fatu salamo e ua maiti Iehova te nunaa Iseraela i tahito ra no te riro mai ei nunaa no ’na i roto i te mau nunaa atoa i nia i te fenua. O ratou ana‘e te nunaa tei fana‘o i ta te Atua “parau” e “ta ’na mau ture.” (A taio i te Salamo 147:19, 20.) I teie mahana, mea fana‘o tatou i te amoraa i to te Atua i‘oa. Te mauruuru nei tatou i te ite o vai o ’na, i te fana‘o i ta ’na Parau no te aratai ia tatou, a nehenehe atu ai tatou e faatupu i te hoê auhoaraa piri roa e o ’na. Mai te taata papai o te Salamo 147, mea rahi te tumu no te “haamaitai ia Iehova” e no te faaitoito ia vetahi ê ia na reira atoa.