Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiunu 2017

A mana‘o noa i te parau faufaa roa ’‘e

A mana‘o noa i te parau faufaa roa ’‘e

“Ia ite te taata atoa e, o Iehova to oe i‘oa, e o oe ana‘e tei Teitei i te fenua atoa nei.”—SAL. 83:18.

HIMENE: 9, 22

1, 2. (a) Eaha te parau faufaa roa ’‘e no te huitaata? (b) No te aha e mea faufaa ’i teie parau no tatou?

O TE moni te parau faufaa roa ’‘e no e rave rahi taata. Ua riro te reira ei mana‘ona‘oraa e ei haapeapearaa na ratou. E pau rahi to ratou taime ia rahi atu â ta ratou moni e ia faaherehere i te moni e vai ra ia ratou. Te parau faufaa roa ’‘e râ o vetahi atu, o to ratou ïa utuafare, to ratou ea aore ra ta ratou mau fa i roto i te oraraa.

2 Te vai ra te hoê parau faufaa roa ’tu â i te reira. O te haapapuraa ïa i te tiaraa Arii hau ê o Iehova. E mea faufaa roa ia tamau noa tatou i te feruri i te reira. Ia ore tatou ia vai ara, e rahi ta tatou ohipa i tera e tera mahana aore ra e haapeapea tatou no to tatou iho mau fifi a mo‘e atu ai ia tatou te parau faufaa roa ’‘e. Ia paturu tatou i to Iehova tiaraa Arii hau ê, e ohie atu â tatou i te faaruru i te mau fifi o te mau mahana atoa e e piri atu â tatou ia Iehova.

NO TE AHA E MEA FAUFAA ’I TEIE PARAU?

3. Eaha ta Satani mau pariraa i te huru faatereraa a te Atua?

3 Ua faahiti Satani te Diabolo i te uiraa e e tiaraa anei to  Iehova ia faatere mai. Te hinaaro ra Satani ia mana‘o te taata e e Faatere pi‘o o Iehova e aita oia e hinaaro ra i te mea maitai a‘e no tatou. Ua faaô Satani i te mana‘o e mea oaoa a‘e te taata ia faatere ratou ia ratou iho. (Gen. 3:1-5) Ua horoa atoa oia i te mana‘o e eita te taata e vai taiva ore i te Atua, ia rahi roa râ te fifi, eita ratou e auraro faahou ia ’na ei Faatere. (Ioba 2:4, 5) Te vaiiho nei ïa Iehova i te taime no te haapapu e e fifihia te oraraa ia ore te Atua ia faatere mai.

4. No te aha e mea tia ’i ia faatitiaifarohia te parau o te tiaraa Arii hau ê?

4 Ua ite iho â Iehova e pariraa haavare ta te Diabolo. Eaha ïa o ’na e vaiiho ai ia Satani i te taime no te tamata i te haapapu i to ’na mana‘o? Mea faufaa te pahonoraa no to te ra‘i e to te fenua. (A taio i te Salamo 83:18.) Aita Adamu raua Eva i auraro faahou i te faatereraa a Iehova, e mai reira mai e rave rahi â taata tei na reira atoa. No reira ïa vetahi e nehenehe ai e mana‘o e ua tano te Diabolo. Eita te hau e te auhoêraa mau e tupu ia ore teie parau ia faatitiaifarohia i roto i te feruriraa o te taata e to te melahi. Ua haapapu-ana‘e-hia râ te tiaraa Arii hau ê o Iehova, e ora ïa te taata e te mau melahi atoa i raro a‘e i ta ’na faatereraa maitai roa a muri noa ’tu. I reira te hau e vai noa ’i na te ao taatoa.—Eph. 1:9, 10.

5. Eaha ta tatou e haapapu atu no nia i te tiaraa Arii hau ê?

5 E paturuhia te tiaraa Arii hau ê o te Atua. Eita te faatereraa a Satani e te taata e manuïa a haamouhia ’tu ai te reira. E upootia mai te faatereraa a te Atua na roto i ta ’na Faatereraa arii Mesia. E haapapu mai te feia taiva ore e e nehenehe te taata e vai hapa ore e e paturu i te faatereraa a te Atua ma te taiva ore. (Isa. 45:23, 24) Te hinaaro ra anei tatou ia ite-atoa-hia tatou i roto i teie feia taiva ore? E! No reira, mea titauhia ia taa ia tatou te faufaaraa mau o teie nei parau.

MEA FAUFAA A‘E TE HAAPAPURAA I TE TIARAA ARII HAU Ê O IEHOVA I TE FAAORARAA

6. Mai te aha te faufaa o te haapapuraa i te tiaraa Arii hau ê o Iehova?

6 Mea faufaa a‘e te patururaa i te tiaraa Arii hau ê o Iehova i to tatou iho maitai. Eiaha râ e mana‘o e e ere to tatou faaoraraa i te mea faufaa aore ra aita Iehova e tâu‘a mau ra ia tatou. Mea nafea tatou i ite ai i te reira?

Mea faufaa a‘e te patururaa i te tiaraa Arii hau ê o Iehova i to tatou iho maitai e faaoraraa

7, 8. E nafea tatou e faufaahia ’i na roto i te haapapuraa i te tiaraa Arii hau ê o te Atua?

7 Mea here roa na Iehova i te taata. Inaha, mea faufaa roa hoi tatou no ’na i horoa mai ai oia i ta ’na Tamaiti ia roaa ia tatou te ora mure ore. (Ioa. 3:16; Ioa. 1, 4:9) Ahiri aita Iehova i tapea i ta ’na mau parau fafau no to tatou ananahi, ua tano ïa Satani e te tahi atu mau enemi. Ua pari Satani e e Atua haavare Iehova o te ore e horoa i te mea maitai i te taata, e aita e tano ra ta ’na faatereraa. Te faaooo nei te mau enemi i te mau parau fafau a Iehova  a na ô ai: “Teihea ’tura te tau o to ’na ho‘iraa mai i fafauhia? Mai te mahana i taoto ai to tatou mau tupuna i roto i te pohe, te vai noa nei â te mau mea atoa te huru â te huru, mai te omuaraa mai â i to te Atua poieteraa i te taata.” (Pet. 2, 3:3, 4) E faatupu râ Iehova i ta ’na mau parau fafau. Ua haapapu oia e te faaoraraa i te feia e auraro ia ’na, e tuhaa ïa no te parau o te haapapuraa i to ’na tiaraa Arii hau ê. (A taio i te Isaia 55:10, 11.) Ua niuhia te tiaraa Arii hau ê o Iehova i nia i te here. No reira tatou e papu ai e here noa e e haafaufaa o ’na i ta ’na mau tavini taiva ore.—Exo. 34:6.

8 Parau mau e mea faufaa roa te parau o te tiaraa Arii hau ê o Iehova, e ere râ te auraa e mea faufaa ore to tatou faaoraraa no ’na. Te tâu‘a mau ra Iehova ia tatou. Mea titauhia ia mana‘o noa tatou i te mea faufaa roa ’‘e a turu ai i ta Iehova faatereraa ma te taiva ore.

MEA NAFEA IOBA I TE TAUIRAA I TA ’NA HURU HI‘ORAA

9. Eaha ta Satani i parau no Ioba? (A hi‘o i te hoho‘a matamua.)

9 Mea faufaa ia tano ta tatou huru hi‘oraa i te tiaraa Arii hau ê o Iehova. Ta tatou ïa e ite ra ia taio tatou i te buka o Ioba, hoê o te mau buka Bibilia tei papai-matamua-hia. Ua parau Satani e e faarue Ioba i te Atua ia rahi roa to ’na mauiui. Ua ani atoa Satani i te Atua ia haamauiui ia Ioba. Aita Iehova i farii, ua vaiiho râ oia ia Satani ia tamata ia Ioba a na ô ai: “Ta ’na atoa ra mau tao‘a tei to rima ïa.” (A taio i te Ioba 1:7-12.) Ua ere ihora Ioba i ta ’na mau tao‘a e ua pohe ta ’na mau tavini. Faaitehia maira oia e ua pohe ta ’na e ahuru tamarii i roto i te hoê ati. Ua rave o Satani i te reira ia mana‘ohia e o te Atua te tumu o teie mau ati. (Ioba 1:13-19) Tairi atura Satani ia Ioba i te hoê ma‘i mauiui mau e te faufau. (Ioba 2:7) Hau atu â, ua faaino e ua faatoaruaru mai te vahine iho a Ioba e to ’na e toru hoa haavare i ta ratou mau parau.—Ioba 2:9; 3:11; 16:2.

10. (a) Mea nafea Ioba i te tapea-noa-raa i to ’na hapa ore i mua i te Atua? (b) No te aha e mea titauhia ’i ia faatitiaifarohia Ioba?

10 Ua tano anei te pariraa a Satani? Aita. Noa ’tu ua mauiui Ioba no teie mau ati, aita oia i faarue noa ’‘e ia Iehova. (Ioba 27:5) No te hoê taime poto râ, ua mo‘e ia Ioba eaha te mea faufaa roa ’‘e e ua haapeapea roa oia no ’na iho. Ua tamau noa oia i te parau e aita oia i rave noa ’‘e i te tahi hape. Ua mana‘o atoa Ioba e mea tia ia ite oia no te aha oia e mauiui ai. (Ioba 7:20; 13:24) E taa paha ia tatou to Ioba mau huru aau. Ua ite râ Iehova e ua hape te huru hi‘oraa a Ioba i faatitiaifaro ai oia ia ’na. Mea nafea hoi?

11, 12. Eaha ta Iehova i tauturu ia Ioba ia taa? Ua nafea o Ioba?

11 E nehenehe e taiohia i ta Iehova i parau ia Ioba i roto i na pene 38 e tae atu i te 41 o te buka o Ioba. Aita Iehova i faataa ia Ioba no te aha oia i mauiui ai. Ua hinaaro râ Iehova e tauturu ia ’na ia taa e mea haihai roa oia ia faaauhia i te Atua. Ua faaite oia ia Ioba e te vai ra te tahi mau parau faufaa ’tu â i to Ioba iho mau fifi. (A taio i te Ioba 38:18-21.) Ua tauturu te mau parau a Iehova ia Ioba ia faatitiaifaro i ta ’na huru hi‘oraa.

12 E mea etaeta anei o Iehova i te na reiraraa i te parau ia Ioba tei mauiui iho nei? E ere, e aita o Ioba i mana‘o mai tera. Ua taa ia Ioba te a‘oraa a Iehova e ua  haafaufaa i te reira. Ua farii oia e ua hape oia i te parauraa ’tu mai tera a na ô atu ai: “Te tatarahapa nei au i raro i te repo e te rehu auahi.” (Ioba 42:1-6) Na mua rii mai, ua tauturuhia Ioba ia faatitiaifaro i to ’na mana‘o e te hoê taata apî ra o Elihu te i‘oa. (Ioba 32:5-10) I muri a‘e i to Ioba faarooraa i te a‘oraa î i te here a Iehova e i to ’na tauiraa i ta ’na huru hi‘oraa, ua faaite Iehova ia vetahi ê e ua mauruuru oia i te taiva ore o Ioba.—Ioba 42:7, 8.

13. Mea nafea paha te a‘oraa a Iehova i te tautururaa ia Ioba i te hoperaa to ’na mau ati?

13 Ua faufaahia â Ioba i te a‘oraa a Iehova i te hoperaa to ’na mau ati. “Maitai roa a‘era to Ioba hopea i tei mutaaihora ia Iehova.” I muri mai, “toohitu hoi a ’na pue tamarii tamaroa, tootoru tamahine” i roaa mai. (Ioba 42:12-14) Noa ’tu e ua here Ioba i teie mau tamarii ta ’na, mea papu e ua mihi oia i ta ’na mau tamarii i pohe. E aita atoa paha i mo‘e ia ’na te mau ati i roohia oia e to ’na utuafare. Mai te peu e ua faaitehia Ioba eaha te tumu oia i roohia ’i i teie mau ati, ua feruri paha oia e no te aha te Atua i vaiiho ai ia roohia oia i teie rahiraa mauiui. Mai te peu e ua mana‘o Ioba mai tera, ua haamana‘o paha oia i ta Iehova i parau ia ’na. Ua tamahanahanahia ïa oia e ua tauturuhia ia tano faahou ta ’na huru hi‘oraa.—Sal. 94:19.

E nehenehe anei e mana‘o noa i te tiaraa Arii hau ê o Iehova, eiaha râ i to tatou iho mau fifi? (A hi‘o i te paratarafa 14)

14. Eaha ta tatou e nehenehe e haapii mai i ta Ioba i faaruru?

14 E tauturuhia tatou ia faatitiaifaro i to tatou mana‘o e e tamahanahanahia tatou i te feruriruriraa i ta Ioba i faaruru. E tuhaa te buka o Ioba i te mau parau ta Iehova i haapapai “ei haapiiraa ia tatou e ia noaa atoa te tiaturiraa na roto i te faaoromai tamau e te tamahanahanaraa a te mau Papai.” (Roma 15:4) Te haapii mai ra te reira e eiaha e haapeapea roa no to tatou iho mau fifi a ore atu ai e mana‘o faahou i te haapapuraa i te tiaraa Arii hau ê  o Iehova. Mai ia Ioba, te faaite ra tatou i to tatou patururaa i te tiaraa Arii hau ê o Iehova a vai taiva ore noa ’i ia ’na noa ’tu e mea fifi te oraraa.

15. Eaha te tupu ia faaoromai tamau tatou ma te taiva ore i roto i te fifi?

15 E nehenehe ta Ioba i faaruru e tamahanahana mai no te mea te faaite mai ra te reira e, ia roohia tatou i te ati, e ere roa ’tu no te mea ua riri Iehova ia tatou. E ravea te mau ati no tatou ia paturu i to Iehova tiaraa Arii hau ê. (Mas. 27:11) Ia faaoromai tamau tatou ma te taiva ore, e mauruuru Iehova ia tatou, e e puai atu â to tatou tiaturiraa no ananahi. (A taio i te Roma 5:3-5.) Te faaite mai ra ta Ioba i faaruru e “e Atua here rahi Iehova e te aroha hamani maitai.” (Iak. 5:11) Ia paturu tatou i to Iehova tiaraa Arii hau ê, e haamaitai mai oia ia tatou. Na te reira e tauturu ia tatou “ia faaruru maite na roto i te faaoromai e te oaoa.”—Kol. 1:11.

A MANA‘O NOA I TE TIARAA ARII HAU Ê O IEHOVA

16. No te aha mea titauhia ’i ia haamana‘o tatou i te faufaa rahi ia haapapu i te tiaraa Arii hau ê o Iehova?

16 Parau mau, e ere iho â i te mea ohie ia mana‘o noa i te haapapuraa i te tiaraa Arii hau ê o Iehova ia faaruru tatou i te mau fifi o te oraraa. Ia tamau tatou i te mana‘o i te mau fifi rii, e nehenehe tatou e faarahi i te reira. Mea titauhia ïa ia haamana‘o noa tatou i te faufaa rahi ia paturu i te tiaraa Arii hau ê o te Atua noa ’tu te mau fifi ta tatou e faaruru.

E tauturuhia tatou ia mana‘o i te mea faufaa roa ’‘e ia tamau tatou i te apiti i te ohipa a Iehova

17. E nafea tatou e tauturuhia ’i ia mana‘o noa i te mea faufaa roa ’‘e ia tamau tatou i te apiti i te ohipa a Iehova?

17 E tauturuhia tatou ia mana‘o i te mea faufaa roa ’‘e ia tamau tatou i te apiti i te ohipa a Iehova. A hi‘o na i te tuahine Renee, ua mauiui noa oia no te mea ua mau te hoê uaua i roto i to ’na roro e ua roo-atoa-hia oia i te ma‘i mariri ai taata. I te  fare ma‘i, ua poro oia i te feia rave ohipa, i te tahi atu feia ma‘i e te feia i haere mai e hi‘o ia ratou. Ia Renee i faaea e piti hebedoma e te afa i te fare ma‘i, ua poro oia e 80 hora. Ite noa â Renee e e pohe oia, aita i mo‘e ia ’na te mea faufaa roa ’‘e. No to ’na patururaa i te tiaraa Arii hau ê o Iehova i roaa ’i ia ’na te hau.

18. Eaha ta te fifi i farereihia e Jennifer e haapii mai ra no nia i te patururaa i te tiaraa Arii hau ê o Iehova?

18 E nehenehe atoa tatou e paturu i te tiaraa Arii hau ê o Iehova ia farerei tatou i te mau fifi rii o te mau mahana atoa. E toru mahana to te hoê tuahine, o Jennifer te i‘oa, faaearaa i te tauraa manureva a tiai ai i te manureva no te ho‘i i ǒ ’na. Ua hepohepo roa o ’na i te faaoreraahia tera e tera revaraa, e ua mo‘emo‘e roa oia. Eita e ore e ua haapeapea oia no ’na iho i te haamataraa. Tera râ, ua pure Jennifer ia tauturu mai Iehova ia faaite i te parau apî oaoa ia vetahi ê a tiai ai i reira. E rave rahi taata ta ’na i poro e ua pûpû atu oia e rave rahi papai. Ua parau Jennifer, “Ua ite au i te haamaitairaa a Iehova noa ’tu teie fifi, e ua horoa mai oia i te puai ta ’u i hinaaro no te amo i to ’na i‘oa ma te haafaufaa i to ’u taime.”

19. E nafea e itehia ’i te feia e haamori mau ra i te Atua?

19 O te nunaa ana‘e o Iehova te taa maitai ra i te faufaa o to Iehova tiaraa Arii hau ê, a itehia ’i te feia e haamori mau ra i te Atua. Ia faaoti papu ïa tatou tataitahi e tamau i te paturu i to Iehova tiaraa Arii hau ê.

20. Eaha to Iehova huru aau i ta outou atoa e rave no te paturu i to ’na tiaraa Arii hau ê?

20 E tâu‘a mai e e haafaufaa Iehova i ta outou atoa e rave no te paturu i to ’na tiaraa Arii hau ê a tavini ai outou ia ’na e a faaoromai tamau ai outou i te ati ma te taiva ore. (Sal. 18:25) E faataa ’tu â to muri nei tumu parau no te aha mea tia ’i ia paturu outou i to Iehova tiaraa Arii hau ê e e nafea outou e paturu atu â ’i i te reira.