Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiunu 2017

E horoa mai Iehova i te tamahanahanaraa i roto i to tatou mau fifi atoa

E horoa mai Iehova i te tamahanahanaraa i roto i to tatou mau fifi atoa

“Te Atua no ’na ana‘e te mahanahana, o te tamahanahana ia tatou i roto i te mau tamataraa atoa.”—KOR. 2, 1:3, 4.

HIMENE: 33, 41

1, 2. Mea nafea Iehova i te tamahanahanaraa ia tatou i roto i to tatou mau fifi, e eaha te parau fafau ta tatou e ite i roto i ta ’na Parau?

UA FERURI te hoê taeae apî faaea taa noa i te Korinetia 1, 7:28 o te na ô ra: “E fifihia râ [te feia faaipoipo] i te tino.” Ua paraparau te taeae i te hoê matahiapo paari tei faaipoipo e ua ani oia ia ’na: “Eaha taua ‘fifi’ ra, e e nafea vau ia faaruru i te reira ia faaipoipo vau?” Hou a pahono ai i tera uiraa, ua parau te matahiapo i teie taeae apî ia feruri i te tahi atu mana‘o ta te aposetolo Paulo i papai: O Iehova “te Atua no ’na ana‘e te mahanahana, o te tamahanahana ia tatou i roto i te mau tamataraa atoa,” aore ra ati.—Kor. 2, 1:3, 4.

2 Ua ite tatou e te here mai ra Iehova to tatou Metua ia tatou e te tamahanahana mai ra oia ia faaruru tatou i te mau fifi. Te haamana‘o ra paha oe i te tahi mau tupuraa i turu e i aratai na Iehova ia oe maoti ta ’na Parau. Ua papu ia tatou e te hinaaro ra oia i te mea maitai roa ’‘e no tatou, mai ta ’na i rave i nia i ta ’na mau tavini i tahito ra.—A taio i te Ieremia 29:11, 12.

3. Eaha te mau uiraa ta tatou e pahono i roto i teie tumu parau?

 3 Mai tei matauhia, mea ohie a‘e ia faaruru i te mau fifi e ati ia ite tatou mea nafea te reira i te tupuraa mai. No reira, no te aha e faaruru ai tatou i te fifi i roto i te faaipoiporaa aore ra i roto i to tatou utuafare? Eaha te mau hi‘oraa Bibilia i tahito ra e i teie tau o te tauturu mai ia ite i te tamahanahanaraa ta tatou e hinaaro mau ra? E pahono ana‘e i teie na uiraa a hi‘o atu ai e nafea tatou e nehenehe ai e faaruru i te mau fifi.

TE MAU FIFI I ROTO I TE FAAIPOIPORAA

4, 5. Eaha paha te mau fifi ta te hoê tane e vahine e faaruru?

4 I muri a‘e i to Iehova poieteraa i te vahine matamua, ua aratai Oia ia ’na i te tane ra a riro atu ai ei vahine na ’na. Ua parau Iehova: “E faarue . . . te taata i tana metua tane e tana metua vahine, a ati atu ai i ta ’na vahine, e e riro hoi raua ei hoê.” (Gen. 2:24) Mea papu, e taata tia ore tatou pauroa. (Roma 3:23) No reira, e tupu iho â te mau fifi ia faaipoipo te hoê tane e te hoê vahine. Ei hi‘oraa, hou a faaipoipo ai, mea titauhia i te hoê vahine ia auraro i to ’na na metua. Te parau ra râ te Bibilia e i muri a‘e i te faaipoiporaa, o te tane te upoo o ta ’na vahine. (Kor. 1, 11:3) I te omuaraa, mea fifi paha no te tane ia horoa i te aratairaa i ta ’na vahine. E no te vahine, mea fifi paha no ’na ia farii e e ere na to ’na na metua faahou e faatere ia ’na, na ta ’na râ tane. Hau atu, ia faaipoipo te tane e te vahine, e tupu paha te aimârôraa e to raua na metua hoovai e e nehenehe te reira e faatupu i te fifi.

5 A feruri atoa na i te huru aau o te hoê tane e vahine a ite ai e ua hapû te vahine. E oaoa roa paha raua, e riro atoa râ te reira ei haapeapearaa no raua. E ui paha raua e e maitai mai anei te taime hapûraa, e e haapeapea raua no nia i te ea o te pêpe. Ua ite atoa raua e rahi mai te mau haamâu‘araa. I muri a‘e i te fanauraa, e titauhia ia rave na hoa faaipoipo i te tahi atu mau faatanoraa. E faataa ’tu â paha te metua vahine i te taime no te haapao i ta ’na pêpe. Aita ’tura ïa e taime faahou to te tane e ta ’na vahine no te tahi e te tahi mai i na mua ’tu. Mea rahi atu â ïa mau hopoia a te metua tane. E mea tia ia ’na ia papu e te fana‘o ra ta ’na vahine e ta ’na tamarii i ta raua e hinaaro mau ra.

6-8. Eaha te huru aau o na hoa faaipoipo mai te peu e eita ta raua tamarii e noaa?

6 Te faaruru ra te tahi mau tane e vahine faaipoipo i te tahi atu huru fifi. E hinaaro rahi to ratou i te tamarii, eita râ ta ratou e noaa. Mai te peu e eita te vahine e hapû, e mauiui rahi roa paha oia. (Mas. 13:12) I te tau tahito ra, mea faufaa roa no te mau vahine ia faaipoipo e ia fanau i te tamarii. No reira, o Rahela, te vahine faaipoipo a Iakoba i hepohepo roa ’i, no te mea eita o ’na e hapû mai, area râ to ’na tuahine, oia ïa. (Gen. 30:1, 2) I teie mahana, i te tahi mau fenua, e rave rahi o te tiaturi ra e mea faufaa roa ia fanau rahi i te tamarii. E ani pinepine te feia i te mau mitionare o te ora ra i teie mau fenua e no te aha aita ta ratou e tamarii. E tutava te mau mitionare i te faataa ’tu eaha te tumu. Noa ’tu râ, e parau atu vetahi, ‘Êê, e pure matou no orua!’

7 A hi‘o na i te tahi atu hi‘oraa. I hinaaro  noa na te hoê tuahine no Beretane i te tamarii. I to ’na iteraa e eita ta ’na e nehenehe e fanau i te tamarii, ua hepohepo roa o ’na. I muri a‘e, ua faaoti raua ta ’na tane i te faaamu i te hoê tamarii. Ua tamau râ oia i te oto no te hoê tau taime. Ua parau oia, “Ua ite au e e ere hoê â huru ia faaamu oe i te hoê tamarii e ia fanau mai i ta oe iho tamarii.”

8 Te parau ra te Bibilia “e faahereherehia te vahine i te fanauraa i te tamarii.” (Tim. 1, 2:15) E ere râ i te auraa e e fana‘o oia i te ora mure ore no te mea e tamarii ta ’na. Eaha ïa te auraa o teie irava? Mea ohipa roa te hoê metua vahine no te haapao i ta ’na tamarii e no te atuatu i te fare. E nehenehe te reira e tauturu ia ’na ia ape i te tahi mau huru mai te faatia-haere-raa i te parau aore ra te faaôraa ia ’na i roto i te mau mea e ere i te ohipa na ’na. (Tim. 1, 5:13) Noa ’tu te reira, e tupu iho â te fifi i roto i to ’na faaipoiporaa e utuafare.

E rave rahi parau fafau a Iehova o te tamahanahana ia tatou i roto i te mau taime fifi mau

9. Eaha te tahi atu mau fifi ta te feia faaipoipo e faaruru ra?

9 I roto i te mau fifi ta te tahi mau hoa faaipoipo e faaruru ra, o te pohe ïa o to ratou hoa faaipoipo. Noa ’tu ua mana‘o ratou e eita roa ’tu ratou e roohia i te reira, ua faaruru e rave rahi i teie tupuraa fifi mau. Te tiaturi papu nei te mau Kerisetiano i te parau fafau o te tia-faahou-raa, e e tamahanahana mau â te reira ia ratou. (Ioa. 5:28, 29) I roto i ta ’na Parau, e rave rahi parau fafau a to tatou Metua ra Iehova o te tamahanahana ra ia tatou i roto i te mau taime fifi mau. E hi‘o ana‘e e nafea te tahi mau tavini a Iehova i fana‘o ai i teie tamahanahanaraa e e nafea te reira i tauturu ai ia ratou.

E nafea oe e ite ai i te tamahanahanaraa ia pohe to oe hoa faaipoipo? (A hi‘o i te paratarafa 9, 12)

TE TAMAHANAHANARAA IA FAARURU TATOU I TE MAU FIFI

10. Mea nafea Hana i te tamahanahana-raa-hia? (A hi‘o i te hoho‘a matamua.)

10 A hi‘o na i tei tupu no Hana, te vahine here a Elikana. Ua hinaaro oia i te tamarii, aita râ ta ’na tamarii i noaa. Area râ o Penina, te tahi atu vahine a Elikana, mea rahi ïa ta ’na tamarii. (A taio i te Samuela 1, 1:4-7.) Te mea ino roa ’tu, ua faaooo Penina ia Hana i “te mau matahiti atoa” no te reira. Ua haamauiui roa te reira ia Hana. Eaha ta ’na i rave no te ite i te tamahanahanaraa? Ua pure oia ia Iehova. Ua haere atoa Hana i te vahi haamoriraa a Iehova e ua pure maoro oia. Ua ani oia ia Iehova ia horoa mai i te hoê tamaiti na ’na e ua tiaturi o ’na e e tauturu Oia ia ’na. I te otiraa ta ’na pure, ua maitai mai oia e “aita ’tura to ’na mata i hana,” aore ra i oto faahou. (Sam. 1, 1:12, 17, 18) Ua ite oia e e horoa Iehova i te hoê tamaiti na ’na aore ra e tamahanahanahia oia ma te tahi atu ravea.

11. E nafea tatou e tamahanahanahia ’i maoti te pure?

11 I te mea hoi e taata tia ore tatou e te ora nei tatou i roto i te ao a Satani, e tamau tatou i te faaruru i te mau fifi. (Ioa. 1, 5:19) E tauturu râ ta tatou. E nehenehe tatou e pure ia Iehova, “te  Atua no ’na ana‘e te mahanahana.” O ta Hana ïa i rave. Ua faaite Hana ia Iehova i to ’na huru aau mau e ua ani i ta ’na tauturu. Hoê â huru, ia mauiui tatou, mea tia ia rave tatou hau atu i te faaite-noa-raa i to tatou mau fifi ia Iehova. Mea titauhia ia taparu ia ’na i te tauturu e ia faaite atu i to tatou huru aau mau.—Phil. 4:6, 7.

12. Eaha tei tauturu ia Ana ia oaoa noa ’tu to ’na mau fifi?

12 E oto rahi paha tatou no te mea aita ta tatou e tamarii aore ra ua pohe tei herehia e tatou. E nehenehe râ tatou e ite i te tamahanahanaraa. A hi‘o na i te hi‘oraa o Ana, o tei ora i te tau o Iesu. I muri a‘e i to ’na faaipoiporaa e hitu noa matahiti, ua pohe ta ’na tane. E au ra e aita ta ’na e tamarii. Eaha râ tei tauturu ia ’na? “I haere noa na oia i te hiero.” Noa ’tu e 84 matahiti to ’na, ua haere noa oia i te hiero no te pure e no te haamori ia Iehova. (Luka 2:37) Na te reira i tamahanahana e i tauturu ia ’na ia oaoa noa ’tu to ’na mau fifi.

13. E nafea te mau hoa mau e tamahanahana ’i ia tatou mai te peu e haamauiui te mau mero o to tatou utuafare ia tatou?

13 E nehenehe atoa tatou e ite i te tamahanahanaraa i te mau hoa o te amuiraa. (Mas. 18:24) E pae noa matahiti to Paula a faaea ’i to ’na mama i te tavini ia Iehova. Ua oto roa Paula e e mea fifi mau no ’na. Ua faaitoitohia râ oia e te hoê tuahine pionie, o Ann te i‘oa, e ua haapao maitai atoa ia ’na. Te faataa ra Paula: “Noa ’tu e ere mâua Ann i te fetii, ua tauturu mai ta ’na haapeapearaa î i te here ia ’u, ua tauturu te reira ia ’u ia tavini noa ia Iehova.” Mai reira mai, ua ho‘i mai te mama o Paula i te amuiraa, e ua oaoa roa Paula. Ua oaoa atoa Ann no te mea ua nehenehe oia e tauturu ia Paula ia tavini noa ia Iehova.

14. E nafea tatou e faufaahia ’i ia tamahanahana tatou ia vetahi ê?

14 Ia rave tatou i te mau ohipa maitai no te tahi atu mau taata, e pinepine tatou i te ore e haapao i to tatou iho mau fifi. Ei hi‘oraa, ua ite e rave rahi tuahine faaipoipo  aore ra faaea taa noa, e ia faaite ratou i te parau apî oaoa o te Faatereraa arii ia vetahi ê, te ohipa ra ïa ratou e o Iehova e te rave ra ratou i to ’na hinaaro. E faaoaoa te reira ia ratou. Tera râ, e nehenehe tatou pauroa e faaite e te haapeapea ra tatou no vetahi ê ma te poro i te parau apî oaoa ia ratou. E ia rave tatou i te mau mea maitai no to tatou mau taeae e tuahine, e piri atu â tatou ia ratou. (Phil. 2:4) O ta te aposetolo Paulo ïa i rave. Ua haapao oia ia vetahi ê “mai te hoê metua vahine e faatamaa ra e e aupuru ra i ta ’na iho mau tamarii.” Ua tamahanahana e ua faaitoito atoa Paulo i to ’na mau taeae “mai te hoê metua tane ra i ta ’na mau tamarii.”—A taio i te Tesalonia 1, 2:7, 11, 12.

 TE TAMAHANAHANARAA I ROTO I TE UTUAFARE

15. Na vai te hopoia e haapii i te mau tamarii no nia ia Iehova?

15 E nafea tatou e tamahanahana ’i i te mau utuafare o te amuiraa? I te tahi taime, e nehenehe te tahi feia poro apî e ani mai ia tauturu ia ratou ia haapii i ta ratou tamarii no nia ia Iehova aore ra ia haapii i te Bibilia i ta ratou tamarii. Te faaite ra te Bibilia e ua horoa Iehova i te hopoia i te mau metua e haapii e e faaineine i ta ratou tamarii. (Mas. 23:22; Eph. 6:1-4) Noa ’tu i roto i te tahi mau tupuraa e nehenehe paha vetahi ê e tauturu atu, mea faufaa roa ia haapii te mau metua i ta ratou iho tamarii. Mea tia ia paraparau tamau te mau metua i ta ratou tamarii.

Mea tia ia paraparau tamau te mau metua i ta ratou tamarii

16. Eaha te tia ia haamana‘o tatou ia tauturu tatou i te tamarii?

16 Ia ani mai te hoê metua ia tatou ia haapii i ta ’na tamarii i te Bibilia, mea maitai ia haamana‘o e ere hoê â huru hopoia ta tatou e ta te metua. I te tahi taime, e nehenehe paha tatou e haapii e te tamarii e ere te metua i te Ite no Iehova. Ia haapii tatou i te mau tamarii e ere na tatou, e haerea î i te paari ia haapii tatou ia ratou i to ratou fare tei reira ana‘e to ratou metua aore ra te tahi atu Ite no Iehova feruriraa paari aore ra ia haapii i te vahi taata. Ma te na reira, eita te taata e faatupu i te mana‘o hape no nia ia tatou. I muri a‘e, peneia‘e e nehenehe ai te mau metua e haapii i ta ratou tamarii no nia ia Iehova.

17. E nafea te mau tamarii e nehenehe ai e tamahanahana i te tahi atu mero o te utuafare?

17 E nehenehe te feia apî o tei haapii i te here ia Iehova e tamahanahana e e faaitoito i te tahi atu mau mero o to ratou utuafare. E nafea ïa? Ma te faatura i to ratou metua e ma te haa rahi no te tauturu ia ratou ma te tahi atu mau ravea. Hau atu â, ia vai taiva ore te mau tamarii ia Iehova, e faaitoito te reira i te utuafare taatoa. Hou te diluvi, ua haamori Lameha ia Iehova. Ua parau oia no nia i ta ’na tamaiti ra o Noa: “E riro teie nei tamaiti ei haamaharaa aho no tatou, i to tatou rohirohi, e te ohipa a to tatou nei rima, no te fenua i parau-ino-hia [aore ra i faainohia] e Iehova.” Ua tupu tera parau tohu i muri a‘e i te diluvi i te taime i faaore ai Iehova i te faainoraa i te fenua. (Gen. 5:29; 8:21) I teie mahana, e nehenehe atoa te mau tamarii o tei taiva ore ia Iehova e tamahanahana i to ratou utuafare. E nehenehe ratou e tauturu i te taatoaraa o te utuafare ia faaruru i te mau fifi i teie nei e a muri noa ’tu.

18. Eaha te tauturu ia tatou ia faaruru noa ’tu te mau fifi atoa?

18 Te imi ra te nunaa o Iehova i te tamahanahanaraa maoti te pure, te feruriruriraa i te mau hi‘oraa Bibilia e te mau auhoaraa piri e to ratou mau taeae e tuahine. (A taio i te Salamo 145:18, 19.) Ua ite tatou e ua ineine noa Iehova i te tamahanahana ia tatou, e e tauturu iho â oia ia tatou ia faaruru i te mau fifi atoa ta tatou e farerei ra!