Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiunu 2017

A haafaufaa i te mau tao‘a pae varua i roto i to aau

A haafaufaa i te mau tao‘a pae varua i roto i to aau

“Te vahi . . . to reira ta oe tao‘a, to reira atoa to oe aau.”—LUKA 12:34.

HIMENE: 76, 59

1, 2. (a) Eaha na toru tao‘a faahiahia no ǒ mai ia Iehova ra? (b) Eaha ta tatou e hi‘opoa mai i roto i teie tumu parau?

O IEHOVA te mea tao‘a roa ’‘e i roto i te ao nui. Na ’na te mau mea atoa. (Par. 1, 29:11, 12) E Atua horoa noa râ Iehova no te mau taata atoa. Auê tatou i te mauruuru no to ’na horoaraa mai e rave rahi tao‘a pae varua! Eaha te tahi o tera mau tao‘a? Te vai ra (1) ta te Atua Faatereraa arii, (2) ta tatou taviniraa, (3) te pue parau mau faahiahia itehia i roto i ta ’na Parau. Ia ore râ tatou e haapao, a mairi ai te tau, e mo‘e paha ia tatou te faufaaraa o teie mau tao‘a. Ia tamau tatou i te haamana‘o i to ratou faufaaraa a faahohonu atu ai i to tatou here no te reira no te mea, mai ta Iesu i parau: “Te vahi . . . to reira ta oe tao‘a, to reira atoa to oe aau.”—Luka 12:34.

2 E feruri ana‘e e nafea to tatou here e mauruuru no te Faatereraa arii, te taviniraa, e te parau mau ia puai noa. A na reira ’i tatou, a feruriruri e nafea oe iho e faahohonu ai i to here no teie mau tao‘a pae varua.

 E AU TA TE ATUA FAATERERAA ARII I TE HOÊ POE MONI RAHI

3. Ua ineine te taata i roto i ta Iesu aamu i te aha no te hoo mai i te hoê poe? (A hi‘o i te hoho‘a matamua.)

3 A taio i te Mataio 13:45, 46. Ua faatia Iesu i te hoê aamu no nia i te hoê taata o te hoohoo ra i te poe. I te hoê mahana, ua itea mai ia ’na te hoê poe moni rahi a‘e i te tahi atu mau poe ta ’na i ite a‘enei. Ua hinaaro teie taata i taua poe ra, hoo atura o ’na pauroa ta ’na mau mea no te hoo mai i teie poe. E nehenehe anei oe e feruri i te faufaaraa o tera poe no ’na?

Ia haafaufaa tatou i te Faatereraa arii mai ta tera taata i haafaufaa i te poe, e hinaaro roa tatou e vaiiho i te mau mea atoa no te reira

4. Eaha ta tatou e hinaaro e rave no te Faatereraa arii?

4 Eaha te haapii mai i te aamu a Iesu? E au te parau mau o te Faatereraa arii a te Atua i tera poe moni rahi. Ia haafaufaa tatou i te Faatereraa arii mai ta tera taata i haafaufaa i te poe, e hinaaro roa tatou e vaiiho i te mau mea atoa, no te riro e a vai noa ’tu ai, ei huiraatira o te Faatereraa arii. (A taio i te Mareko 10:28-30.) E hi‘o ana‘e mea nafea e piti taata i te na reiraraa.

5. Eaha ta Zakaio i ineine i te rave no te Faatereraa arii?

5 E taata titau tute o Zakaio. Ua monihia o ’na i te taviri-noa-raa i te taata. (Luka 19:1-9) I te hoê râ mahana, ua faaroo Zakaio ia Iesu i te paraparauraa no nia i te Faatereraa arii. Ua au roa o ’na i ta ’na i faaroo, hinaaro roa a‘era o ’na e taui. Ua parau oia: “E te Fatu, te horoa nei au i te afaraa o ta ’u mau faufaa na te feia veve, e te taata ta ’u i taviri, e tataimaha ïa ta ’u e faaho‘i na ’na.” Ua faaho‘i Zakaio i te moni ta ’na i eiâ i te taata e ua faaea i te nounou.

6. Eaha ta te hoê vahine i rave, e no te aha oia i na reira ’i?

6 A faaroo ai te hoê vahine no nia i te Faatereraa arii tau matahiti i teie nei, te faaea noa ra o ’na i te hoê vahine. O ’na atoa te peretiteni o te hoê faanahonahoraa o te turu i te mau tiaraa o te feia mahu. A haapii ai râ oia i te Bibilia e a ite ai i te faufaaraa o te Faatereraa arii a te Atua, taa a‘era ia ’na e e titauhia ia rave oia i te mau tauiraa rahi i roto i to ’na oraraa. (Kor. 1, 6:9, 10) No to ’na here ia Iehova, ua faarue oia i tera faanahonahoraa e ua faaea i te rave i te peu mahu. Ua bapetizohia oia i 2009 e i te matahiti i muri iho, ua riro mai oia ei pionie. Ua rave oia i teie mau tauiraa rarahi no te mea ua puai a‘e to ’na here ia Iehova i te tahi atu o to ’na mau hiaai tia ore.—Mar. 12:29, 30.

7. E nafea tatou ia puai noa to tatou here no te Faatereraa arii a te Atua?

7 No te riro mai ei huiraatira o te Faatereraa arii a te Atua, ua titauhia ia taui roa e rave rahi i rotopu ia tatou i to ratou oraraa. (Roma 12:2) Aita râ ta tatou aroraa i hope. Eiaha tatou e vaiiho i to tatou here no te Faatereraa arii ia haaparuparuhia e te tahi noa ’‘e mea, mai te here no te mau tao‘a materia aore ra te mau hinaaro i te mau peu taotoraa tia ore. (Mas. 4:23;  Mat. 5:27-29) No te tauturu ia tatou ia puai noa to tatou here no te Faatereraa arii a te Atua, ua horoa mai Iehova i te tahi atu tao‘a faufaa roa.

E FAAORA TA TATOU TAVINIRAA

8. (a) No te aha te aposetolo Paulo i parau ai e e “tao‘a” ta tatou taviniraa i “roto i te farii repo”? (b) Mea nafea Paulo i te faaiteraa e ua haafaufaa o ’na i te taviniraa?

8 Ua horoa mai Iesu i te hopoia e poro e e haapii i te taata te mau parau apî oaoa o te Faatereraa arii a te Atua. (Mat. 28:19, 20) Ua parau te aposetolo Paulo e e tao‘a tuuhia i roto i te farii repo, aore ra farii araea, te pororaa. (Kor. 2, 4:7; Tim. 1, 1:12) No te mea e feia tia ore tatou, mai tera mau farii araea ïa tatou. E au râ te poroi ta tatou e faaite ra i te hoê tao‘a moni rahi no te mea e nehenehe tatou e te feia e faaroo mai e ora e a muri noa ’tu. No reira Paulo i parau ai: “No te parau apî oaoa e no te poro i taua parau ra ia vetahi ê i faariro ai au ia ’u mai te mau huru taata atoa.” (Kor. 1, 9:23) Ua haa rahi Paulo no te haapii ia vetahi ê no nia i ta te Atua Faatereraa arii. (A taio i te Roma 1:14, 15; Timoteo 2, 4:2.) Ua tauturu te here no te mau parau apî oaoa ia Paulo ia tamau noa i te poro noa ’tu te hamani-ino-raa u‘ana. (Tes. 1, 2:2) E nafea tatou e pee ai i to Paulo haafaufaaraa i te taviniraa?

E au te poroi ta tatou e faaite ra i te hoê tao‘a moni rahi no te mea e nehenehe tatou e te feia e faaroo mai e ora e a muri noa ’tu

9. Eaha te tahi mau ravea e nehenehe ai tatou e faaite e te haafaufaa ra tatou i te taviniraa?

9 Hoê ravea i faaite ai Paulo e ua haafaufaa oia i te taviniraa, mea na roto ïa i te faaohiparaa i te mau ravea atoa no te paraparau ia vetahi ê. Mai ia Paulo e te mau Kerisetiano matamua, te faaite nei tatou i te parau apî oaoa i te taata i tera e tera fare, i te mau vahi taata, e i te mau vahi atoa e ite ai tatou i te taata. (Ohi. 5:42; 20:20) Te imi nei tatou i te ravea no te poro i e rave rahi taata. Mai te peu e nehenehe, e rave paha tatou i te taviniraa pionie tauturu aore ra pionie tamau. Aore ra e haapii paha tatou i te hoê reo ê, tere i te hoê vahi atea i roto i to tatou iho fenua aore ra i te hoê fenua ê.—Ohi. 16:9, 10.

10. Eaha te mau maitai ta Irene i ite no te ohipa rahi ta ’na i rave no te faaite i te parau apî oaoa?

10 Ua hinaaro Irene, te hoê tuahine faaea taa noa i te fenua Marite, e poro i te parau apî oaoa i te feia e paraparau ra i te reo Rusia. No reira, i 1993, ua apiti oia i te hoê pǔpǔ reo Rusia i te oire no New York. I tera taime, e 20 noa taata poro i roto i tera pǔpǔ. E 20 matahiti i muri a‘e, ua parau Irene: “Aita â vau i paraparau maitai roa ’tura i te reo Rusia.” Tera râ, ua tauturu Iehova ia ’na e te tahi atu feia ia poro i te taata na roto i tera reo. I teie mahana, te vai ra e ono amuiraa reo Rusia i te oire no New York. Ua haapii Irene i te Bibilia i e rave rahi taata, e 15 o ratou tei bapetizohia. Te tavini ra vetahi o ratou i te Betela, ei pionie, e ei matahiapo. Te parau ra Irene: “Ia feruri au i te tahi mau fa ta ’u i nehenehe e tapi, aita vau e mana‘o ra e nehenehe hoê noa ’‘e e hopoi mai hau atu â oaoaraa.”  Ua haafaufaa mau â Irene i ta ’na taviniraa!

Te haafaufaa ra anei oe i ta oe taviniraa, a faataa ’tu ai i te taime no te reira i roto i ta oe tapura hebedoma? (A hi‘o i te paratarafa 11, 12)

11. Eaha te itehia ia tamau tatou i te poro noa ’tu te hamani-ino-raa?

11 Ia haafaufaa tatou i ta tatou taviniraa, e riro ïa tatou mai te aposetolo Paulo, a tamau atu ai i te poro noa ’tu te hamani-ino-raa. (Ohi. 14:19-22) Ei hi‘oraa, i te area matahiti 1930 tae atu 1944, ua hamani-ino-hia to tatou mau taeae no Marite. Ua tamau noa râ ratou i te poro. A tamata ’i te feia mana toroa i te tapea ia ratou, ua haere to tatou mau taeae i mua i te tiripuna e ua upootia mai i roto e rave rahi haavaraa. I 1943, ua faahiti taeae Knorr hoê o te mau haavaraa ta tatou i upootia i mua i te Tiripuna teitei no te Hau Amui no Marite. Ua parau oia e eita tatou e haere i mua i tera Tiripuna ahani te mau taeae i faaea i te poro. Ua parau â oia e no te mea ua tamau noa te mau taeae na te ao nei i te poro, ua faaite ratou e eita te patoiraa e manuïa. Ua upootia atoa te tahi mau taeae o te tahi atu mau fenua i te hoê â mau huru haavaraa. Papu maitai e ia haafaufaa tatou i te taviniraa, eita tatou e faaea i te poro i mua i te hamani-ino-raa.

12. Eaha ta oe e faaoti i te rave?

12 Ia haafaufaa mau tatou i ta tatou taviniraa, eita tatou e haapao noa i te mau hora ta tatou e papai i nia i ta tatou tapura. E rave tatou i te mau mea atoa no te “faataa maitai i te parau apî oaoa.” (Ohi. 20:24; Tim. 2, 4:5) Eaha râ ta tatou e haapii atu ia vetahi ê? A hi‘o na i te tahi atu tao‘a no ǒ mai i te Atua ra.

TE PUE PARAU MAU FAUFAA TA TATOU E HAAPII RA

13, 14. Eaha te mau “tao‘a” ta Iesu i faahiti i roto i te Mataio 13:52, e e nafea tatou e faaî ai i te reira?

13 Te toru o na tao‘a ta Iehova i horoa mai, o te pue parau mau atoa ïa ta tatou i haapii. O Iehova te tumu o te parau mau. (Sam. 2, 7:28; Sal. 31:5) E ei Metua horoa noa, te hinaaro nei oia e faaite mai i teie pue parau mau. Ua haapii mai tatou e rave  rahi parau mau ma te taioraa i ta ’na Parau e ta tatou mau papai, e ma te apitiraa i ta tatou mau tairururaa e putuputuraa. A haaputu atu â ’i tatou i te pue parau mau, e noaa ia tatou i ta Iesu i parau, te hoê pueraa “tao‘a” parau mau, “te mea apî e te mea tahito.” (A taio i te Mataio 13:52.) E tauturu Iehova ia tatou ia faaî i ta tatou mau “tao‘a” mai te peu e maimi tatou i te pue parau mau mai ta tatou e imi i te tao‘a huna. (A taio i te Maseli 2:4-7.) E nafea tatou e na reira ’i?

14 Mea titauhia ia haapii tamau tatou i te Bibilia e ta tatou mau papai e ia rave atoa i te mau maimiraa. E tauturu te reira ia tatou ia ite mai i te pue parau mau “apî,” ta tatou i ore i ite a‘enei na mua ’‘e. (Ios. 1:8, 9; Sal. 1:2, 3) I roto i te vea matamua o Te Pare Tiairaa piahia i Tiurai 1879 (Beretane), ua faaauhia te parau mau i te hoê tiare tei tupu i roto i te aihere. No te ite mai i te hoê tiare mai teie, mea tia i te hoê taata ia imi maitai. Ia itea mai ia ’na hoê, eiaha oia e faaea i nia i teie noa tiare. Ia tamau râ oia i te imi no te ite mai hau atu â tiare. Hoê â huru no tatou, eiaha tatou e faaea i nia i te hoê noa parau mau. Ia tamau râ tatou i te imi i te tahi atu â pue parau mau.

15. No te aha e parau ai paha tatou e mea “tahito” te tahi pue parau mau, e eaha hoê parau mau ta oe e haafaufaa roa?

15 A haamata ’i tatou i te haapii i te Bibilia, ua haapii mai tatou i te tahi pue parau mau faahiahia roa. E parau paha tatou e parau mau “tahito” te reira no te mea tera ta tatou i haapii na mua roa. Eaha te tahi pue parau mau ta tatou i haapii na mua roa? Ua haapii mai tatou e o Iehova to tatou Atua poiete e e opuaraa ta ’na no te huitaata. Ua haapii atoa mai tatou e ua tono te Atua i ta ’na Tamaiti i te fenua nei ia pohe oia ei tusia taraehara, ia nehenehe tatou e tiamâ mai i te hara e te pohe. E ua haapii mai tatou e e faaore te Faatereraa arii a te Atua i te mau mauiui atoa, a nehenehe atu ai tatou e ora e a muri noa ’tu i nia i te fenua i roto i te hau e te oaoa.—Ioa. 3:16; Apo. 4:11; 21:3, 4.

16. Eaha te titauhia ia rave e faatanoraa ana‘e to roto i ta tatou i taa no nia i te pue parau mau Bibilia?

16 I te tahi taime, e faatanohia paha te haapiiraa no nia i te hoê parau tohu Bibilia aore ra irava. Ia na reirahia, mea faufaa ia rave i te taime no te hi‘opoa i te faatanoraa e ia feruriruri i te reira. (Ohi. 17:11; Tim. 1, 4:15) Eita noa e titauhia ia taa i te mau taa-ê-raa rahi i rotopu i te haamaramaramaraa tahito e te mea apî, ia haapao maitai atoa râ tatou i te mau tuhaa rii o te haamaramaramaraa apî. Ia na reira tatou, papu maitai e e ô te parau mau apî i roto i ta tatou pue parau mau Bibilia. No te aha e mea maitai ai no tatou ia tutava i te na reira?

17, 18. E nafea te varua mo‘a e tauturu ai ia tatou?

17 Ua haapii Iesu e e nehenehe te varua mo‘a e tauturu mai ia haamana‘o i te tahi mau mea ta tatou i haapii na mua ’‘e. (Ioa. 14:25, 26) E nafea te reira e nehenehe ai e tauturu mai ia poro tatou i te parau apî oaoa? A feruri na i te hi‘oraa o te hoê taeae o Peter te i‘oa. I 1970, e 19 noa matahiti to ’na e ua haamata oia i te tavini i te Betela i Beretane. A poro ai Peter i tera e tera fare, ua farerei oia i te hoê papa piri i te 50 matahiti. Ua ui atu oia i taua taata ra e hinaaro anei oia e taa i te Bibilia. E orometua ati Iuda tera taata, e ua huru ê roa o ’na a feruri ai e te haere mai ra teie taurearea  e haapii ia ’na te Bibilia. No te tamata ia Peter, ua ani te orometua: “Ta ’u tamaiti, ua papaihia te buka Daniela na roto i teihea reo?” Ua pahono Peter: “Ua papaihia te tahi tuhaa na roto i te reo Arama.” Te haamana‘o ra Peter: “Ua maere roa te orometua ua ite au i te pahonoraa. Aita roa ’tu râ vau i maere. Mea nafea vau i te iteraa i te pahonoraa? I to ’u ho‘iraa i te fare e a hi‘o ai au i te mau vea o Te Pare Tiairaa e te A ara mai na! o te mau ava‘e na mua ’tu, ua itea mai ia ’u te tahi tumu parau o te faataa ra e ua papaihia te buka Daniela na roto i te reo Arama.” (Dan. 2:4) E nehenehe iho â te varua mo‘a e haamana‘o mai i te mau mea ta tatou i taio e i haaputu i roto i ta tatou mau tao‘a na mua ’‘e.—Luka 12:11, 12; 21:13-15.

18 Ia haafaufaa tatou i te pue parau mau ta tatou e haapii nei ia Iehova ra e ia mauruuru tatou no te reira, e hinaaro ïa tatou e tamau i te haaputu i te reira i roto i ta tatou mau tao‘a. Hau atu â tatou i te na reira, hau atu â ïa tatou i te hinaaro e haapii ia vetahi ê.

A PARURU I TA OE MAU TAO‘A

19. No te aha mea tia ia paruru tatou i ta tatou mau tao‘a pae varua?

19 I roto i teie tumu parau, ua haapii mai tatou i te faufaaraa no tatou ia haafaufaa i te mau tao‘a pae varua. Mea tia râ ia vai ara tatou eiaha e vaiiho ia Satani e ta ’na ao ia haaparuparu i to tatou hinaaro i teie mau tao‘a. Ia ore tatou e ara, e nehenehe tatou e faafariuhia e te tahi mau mea mai te parau e fana‘o tatou i te hoê ohipa moni maitai roa, te moemoeâ e ite tatou i te hoê oraraa fana‘o, aore ra te hiaai e faaiteite i ta tatou mau tao‘a materia. Te haamana‘o mai ra te aposetolo Ioane ia tatou e fatata roa teie ao e te mau mea atoa ta ’na e pûpû mai ra i te mou. (Ioa. 1, 2:15-17) No reira mea tia ia tamau tatou i te mauruuru no ta tatou mau tao‘a pae varua e ia paruru tatou i te reira.

20. Eaha ta oe e faaoti i te rave no te paruru i ta oe mau tao‘a pae varua?

20 Ia ineine oe i te vaiiho i te mau mea atoa o te nehenehe e haaparuparu i to oe here no te Faatereraa arii a te Atua. A faaoti i te poro ma te itoito rahi, e eiaha roa oe e faaea i te haafaufaa i te taviniraa. A tamau i te imi i te pue parau mau Bibilia. Ia na reira oe, e haaputu ïa oe i te “tao‘a . . . i te ra‘i, a ore atu ai e raea i te eiâ e e pau i te manumanu. Te vahi hoi to reira ta oe tao‘a, to reira atoa to oe aau.”—Luka 12:33, 34.