Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiunu 2017

E faaafaro anei oe i te mau peapea a faatupu atu ai i te hau?

E faaafaro anei oe i te mau peapea a faatupu atu ai i te hau?

E HINAARO te Atua ra Iehova ia ite ta ’na feia haamori i te hau. Te hinaaro ra oia ia tapi ratou i te hau te tahi i te tahi. Ia na reira ratou, e vai te hau i roto i te amuiraa Kerisetiano. E aratai teie hau e rave rahi taata i roto i te amuiraa.

Ei hi‘oraa, ua tapao te hoê tahu‘a i Matetata i te hau e vai ra i roto i te nunaa o Iehova e ua mana‘o: ‘Ia hinaaro noa ’tu vau e faaô atu i roto i te hoê haapaoraa, teie ta ’u e maiti.’ I muri a‘e, ua faaea oia i te haamori i te mau demoni, ua rave i te tahi mau tauiraa e to ’na hoa faaipoipo, e ua haamata i te haamori ia Iehova, te Atua o te hau.

Mai tera tane, e tausani taata pauroa te matahiti te riro mai ei mero o te amuiraa Kerisetiano e te ite i te hau ta ratou e hinaaro noa ra. Te taio ra râ tatou i roto i te Bibilia e e nehenehe te “pohehae rahi e te imi hara” e tuino i te mau auhoaraa, a faatupu atu ai i te fifi. (Iak. 3:14-16) Te horoa atoa ra râ te Bibilia i te tahi mau mana‘o tauturu no te ape i tera mau fifi e haapuai i te hau e to tatou mau taeae e tuahine. E hi‘o ana‘e e nafea teie mau mana‘o i manuïa ’i i roto i te tahi mau tupuraa mau.

TE MAU FIFI E TE MAU RAVEA

“Aita vau i afaro maitai i te hoê taeae o tei ohipa e o vau. I te hoê taime, a tatama‘i ai mâua, ua haere mai e piti taata e ua ite mai i ta mâua tatama‘iraa.”—CHRIS.

“Ua faaoti taue te hoê tuahine o tei poro pinepine e o vau i ta mâua pororaa. Ua faaea atoa oia i te paraparau ia ’u. E aita roa ’tu vau i ite no te aha.”—JANET.

“Te paraparau ra vau e toru taata i te hoê â taime i roto i te niuniu. Ua parau mai hoê o ratou ia ’u e te vaiiho nei oia ia ’u e ua mana‘o iho â vau e ua tâpû oia i ta ’na niuniu paraparau. Ua parau atura vau i te tahi mau parau e ere i te mea maitai no nia ia ’na i te tahi atu taata i roto i te niuniu, aita râ te taata matamua i tâpû i ta ’na niuniu paraparau.”—MICHAEL.

“I roto i te amuiraa, ua tupu te fifi i rotopu e piti pionie. Ua tama‘i hoê i te tahi atu. Aita ta raua tatama‘iraa i faaitoito noa ’‘e ia vetahi ê.”—GARY.

E au ra e e ere teie mau peapea i te peapea rahi. E nehenehe râ tera mau tupuraa e faatupu i nia i te feia o te faaruru ra i te reira, i te mauiui i te pae huru aau, o te vai noa, e e nehenehe e faaino i te hau o te amuiraa. Aua‘a râ ua pee teie mau taeae e tuahine i te mau aratairaa Bibilia e ua faatupu faahou i te hau. I to oe mana‘o, eaha te mau aratairaa Bibilia tei tauturu ia ratou?

“Eiaha outou e mârô haere [aore ra e riri te tahi i te tahi] i te e‘atia na.” (Gen. 45:24) Ua horoa Iosepha i teie a‘oraa i to ’na mau taeae a ho‘i ai ratou i to ratou metua tane ra. Ia ore te hoê taata e haavî i to ’na mau huru aau, a vaiiho atu ai ia ’na iho ia riri vave, e nehenehe te hoê tupuraa e ino roa ’tu â. E iria atoa paha vetahi. Ua taa ia Chris e i te tahi taime, ua riro ei mea fifi no ’na ia faahaehaa ia ’na  a pee atu ai i te mau aratairaa. Ua hinaaro oia e taui, ua ani oia ia farii mai te taeae i te tatarahapa. E ua haa rahi Chris no te haavî i to ’na huru. I to te taeae iteraa i te mau tutavaraa a Chris no te taui, ua na reira atoa oia. I teie nei, ua faatupu raua i te hau a tavini amui ai ia Iehova.

Aita ana‘e e aparauraa, eita te mau opuaraa e manuïa. (Mas. 15:22) A faaea ’i to Janet hoa i te paraparau ia ’na, faaoti ihora Janet i te pee i teie irava Bibilia. Ua haere oia e farerei i te tuahine no te tauaparau. Ua ani Janet e ua rave anei oia i te tahi ohipa o tei haamauiui aore ra o tei faariri ia ’na. I te omuaraa, ua huru ê rii raua. A tamau noa ’i râ i te tauaparau ma te mǎrû, aita ’tura raua i huru ê atu â mai i te omuaraa. Taa a‘era i te tuahine e ua hape to ’na mana‘o no nia i te tahi mea tei tupu na mua a‘e e aita Janet i rave i te tahi mea no te haamauiui ia ’na. Ua tatarahapa oia i mua ia Janet, e e hoa faahou raua i teie mahana a tavini amui ai ia Iehova.

“Ia hopoi oe i ta oe ô i te fata e haamana‘o ihora oe e ua inoino to taeae ia oe, a vaiiho i ta oe ô i mua i te fata e a haere e farerei i to taeae.” (Mat. 5:23, 24) Ua horoa Iesu i teie aratairaa i roto i ta ’na A‘oraa i nia i te mou‘a. I muri a‘e i to Michael parauraa i te tahi parau tano ore no nia i te tahi atu taeae, ua mauiui roa oia. Faaoti ihora oia i te rave i te mau mea atoa no te faaafaro i teie fifi. Ua haere ïa oia e farerei i te taeae e ua faaite i to ’na tatarahapa. Eaha tei tupu? Te parau ra Michael: “Ua faaore noa to ’u taeae i ta ’u hapa.” Ua hoa faahou raua.

“A faaoromai noa i te tahi e te tahi, e ia hapa noa mai te tahi ia oe, a faaore noa ’tu ïa i ta ’na hapa.” (Kol. 3:12-14) Te haamana‘o ra oe i na piti pionie o tei tatama‘i i roto i te pororaa? Ua tauturu te hoê matahiapo ia raua ia ite e te fiu mai ra vetahi ê ia raua e te huru ê atoa ra. Ua haamana‘o atoa oia ia raua ia faaoromai te tahi i te tahi a tauturu atu ai ia vai te hau i roto i te amuiraa. Ua farii e ua pee raua i ta ’na a‘oraa. I teie nei, mea afaro roa raua a poro noa ’i raua i te parau apî oaoa.

E nehenehe atoa te a‘oraa i roto i te Kolosa 3:12-14 e tauturu ia oe ia haehaa noa e ia faaore i te hapa a te tahi atu taata o tei haamauiui ia oe e ia faaea i te mana‘o noa i te reira. E mai te peu ua tamata tatou i te faaore i te hapa, aita râ i manuïa? Te vai ra hoê faaueraa tumu Bibilia i te Mataio 18:15 o te nehenehe e tauturu mai. Noa ’tu no te mau hara rahi na mua roa teie parau ta Iesu i faahiti, ua faataa oia i te tahi mea o ta tatou e nehenehe e rave i te mau taime e tupu ai te fifi e te hoê taeae aore ra tuahine. Ma te hamani maitai e te haehaa, e nehenehe tatou e haere e aparau e tera taata no nia i te fifi e e tamata i te faaafaro i te reira.

E rave rahi atu â mana‘o tauturu i roto i te Bibilia. Ua niuhia te rahiraa i nia i te turuiraa i nia i te varua mo‘a o te Atua, e nehenehe atu ai ïa tatou e faaite i “te mau huru maitatai ta te varua mo‘a e faatupu.” Teie mau huru maitatai, “o te here ïa,  te oaoa, te hau, te faaoromai, te hamani maitai, te maitai, te faaroo, te mǎrû, te haavîraa ia ’na iho.” (Gal. 5:22, 23) A feruri na i teie tupuraa. E tere maitai te hoê matini ia tahinu-maitai-hia te tahi mau tuhaa. Hoê â huru, mea ohie a‘e ia faaafaro i to tatou mau peapea a faatupu atu ai i te auhoaraa maitai ia faaite tatou i te mau huru maitatai o Iehova.

E FAUFAAHIA ’TU Â TE AMUIRAA I TE MAU HURU TAATA TAA Ê

E huru taata to tatou tataitahi. E huru maitatai to tatou tataitahi e mea taa ê ta tatou huru hi‘oraa i te mau mea e ta tatou huru paraparau. E nehenehe te reira e haamaitai i to tatou mau auhoaraa. E nehenehe atoa râ te mau taa-ê-raa o te huru taata e faatupu i te taa-ore-raa e te aimârôraa. Ua horoa te hoê matahiapo aravihi i te hoê hi‘oraa o te faaite ra e nafea te reira e tupu ai, a parau ai oia: “Eita paha te hoê taata mamahu e au ia tapirihia o ’na i pihaiiho i te hoê taata paraparau roa e te faahoa hanoa i te taata. E nehenehe e mana‘o e ere paha teie taa-ê-raa i te mea faufaa. Tera râ, e nehenehe te reira e aratai i te fifi rahi.” E tiaturi anei oe e eita roa ’tu te feia mea taa ê roa to ratou huru e afaro te tahi i te tahi? A hi‘o i te mau hi‘oraa o na aposetolo e piti. Ia mana‘o oe ia Petero, e mana‘o paha tatou i te hoê taata o te faaite noa i to ’na mana‘o. Ia mana‘o tatou ia Ioane, e puta mai te hoho‘a o te hoê taeae î i te here o te feruri na mua hou oia a parau ai aore ra a haa ’i. Mea taa ê to Petero e to Ioane huru. Ua haa amui râ raua a tavini noa ’i ia Iehova. (Ohi. 8:14; Gal. 2:9) E nehenehe atoa tatou e na reira i teie mahana. E nehenehe te mau Kerisetiano mea taa ê roa ino to ratou huru e ohipa amui.

Eaha râ ta tatou e rave ia parau aore ra ia rave te tahi taata o ta tatou amuiraa i te tahi mea o te faariri  ia tatou? Mea maitai ia haamana‘o e ua pohe te Mesia e ere noa no tatou, no tera taeae atoa râ, e te titau mai ra oia ia tatou ia faaite i te here i to tatou taeae. (Ioa. 13:34, 35; Roma 5:6-8) E ere i te mea tano ia faaoti tatou eiaha e faahoa i tera taata aore ra ia ape ia ’na. A uiui: ‘Te rave ra anei to ’u taeae i te tahi mea o te ore e tuati i ta Iehova ture? Te tamata ra anei oia i te haamauiui ia ’u ma te hinaaro mau? Aore ra e huru taata taa ê iho â to mâua? E huru maitatai paha ïa to ’na ta ’u e hinaaro ra e faatupu atoa?’

Ei hi‘oraa, mai te peu e mea au roa na ’na e paraparau, area râ oe e mamû noa ïa, a haere atu paha ïa na muri ia ’na i roto i te pororaa no te hi‘o eaha ta oe e nehenehe e haapii mai? Aore ra eaha te rave mai te peu e taata aau horoa a‘e o ’na ia oe? Ua tapao anei oe i te oaoa ia horoa i te feia ruhiruhia, ma‘i aore ra veve? Eita anei ta oe e nehenehe e haapii mai i tera taata e nafea oe e nehenehe ai e horoa ’tu â? Te mana‘o faufaa roa ia tapea mai noa ’tu mea taa ê oe i to taeae, e nehenehe oe e feruri i to ’na mau huru maitatai. Noa ’tu e eita paha orua e riro ei hoa rahi roa ’‘e, e piri atu â râ orua. E tauturu te reira ia faatupu i te hau, no oe iho e no te amuiraa.

I te senekele matamua, ua faahitihia e piti tuahine, o Euodia raua Sunetuhe. E au ra e mea taa ê roa to raua huru, ua faaitoito râ te aposetolo Paulo ia raua “ei mana‘o hoê to raua i roto i te Fatu.” (Phil. 4:2) E hinaaro atoa tatou e haamori amui ia Iehova e to tatou mau taeae e tuahine, a faatupu atu ai i te hau i roto i te amuiraa.

EIAHA TE PEAPEA IA TAMAU NOA

No te aha mea tia ia tinai oioi tatou i te mau mana‘o ino no vetahi ê? E nehenehe tatou e faaau i teie mau mana‘o i te mau aihere ino e tupu ra i roto i te hoê aua tiare nehenehe mau. Ia ore tatou e  hutihuti i tera mau aihere, e mo‘e roa te mau tiare o te aua. Hoê â huru, ia rahi roa mai to tatou mau mana‘o ino no vetahi ê, e nehenehe te reira e faaino i te amuiraa taatoa. Mai te peu râ e mea here na tatou ia Iehova e to tatou mau taeae, e tutava ïa tatou i te paruru i te hau o te amuiraa.

Ia tamata oe ma te haehaa i te faatupu i te hau e vetahi ê, e maere oe i te maitai ta oe e ite

Ia tamata tatou i te faatupu i te hau e vetahi ê, e maere paha tatou i te maitai ta tatou e ite. Ua ite te hoê Ite no Iehova i teie tupuraa. Te faatia ra oia: “Ua mana‘o vau e te faariro ra te hoê tuahine ia ’u ei tamarii. Aita vau i au noa ’‘e i te reira. A rahi noa ’tu â ’i to ’u riri, haamata ’tura vau i te parau iria ia ’na. Ua mana‘o vau: ‘Aita o ’na e faatura mai ra ia ’u, eita atoa ïa vau e faatura ia ’na.’”

Feruri atura teie tuahine i to ’na iho huru: “Ua haamata vau i te ite i to ’u mau hape e huru, e ua inoino roa vau ia ’u iho. Ua taa ia ’u e mea tia ia faatano vau i to ’u feruriraa. I muri a‘e i to ’u pureraa ia Iehova no nia i te reira, ua haere au e hoo mai na teie tuahine i te tahi tao‘a e ua papai au i te tahi parau tatarahapa no to ’u huru tano ore. Ua tauahi mâua te tahi i te tahi e ua farii mâua i te tuu i tera fifi i muri. Aita mâua i peapea faahou â.”

E hinaaro iho â te taata atoa i te hau. E nehenehe râ te papu-ore-raa aore ra te teoteo e aratai i te taata ia haa ma te ore e faatupu i te hau. I roto i teie nei ao, mea matauhia te reira, te titau nei râ Iehova i ta ’na feia haamori i te tahi mea taa ê. I rotopu i te mau Ite no Iehova, mea tia ia itehia te hau e te tahoê. Ua turai Iehova ia Paulo ia papai i te mau Kerisetiano “ia au to [ra]tou haerea” i ta ratou i fana‘o. Ua faaitoito oia ia ratou ia haa “ma te haehaa e te mǎrû e te faaoromai, e na roto i te here, ia faaoromai ïa i ta te tahi e te tahi ra hapa, i te tutava-maite-raa ia vai â te autahoê ta te varua mo‘a e faatupu, e te hau e tahoê ra.” (Eph. 4:1-3) Mea faufaa roa “te hau e tahoê” ta te nunaa a Iehova e fana‘o ra. E tutava ana‘e ïa i te haapuai atu â i te reira e i te faaafaro i te mau fifi atoa e to tatou mau taeae e tuahine.