Eaha to roto?

Mau faaho'iraa ê

Tapura tumu parau

Ite no Iehova

Tahiti

TE PARE TIAIRAA (HAAPIIRAA) TITEMA 2016

E haamaitai Iehova i te feia e imi papu ra ia ’na

E haamaitai Iehova i te feia e imi papu ra ia ’na

“O te haamori i te Atua ra, e faaroo oia e, e Atua, e tia ’i, e o oia te faautua i te feia i imi papu ia ’na.”—HEB 11:6.

HIMENE: 85, 134

1, 2. (a) Eaha te tuatiraa e vai ra i rotopu i te here e te faaroo? (b) Eaha te mau uiraa ta tatou e hi‘opoa mai?

UA FAFAU to tatou Metua ra o Iehova i te haamaitai i ta ’na mau tavini taiva ore. E ravea teie e faaite ai Iehova i to ’na here ia tatou, e ua here tatou ia ’na, no te mea o ’na tei here na mua ia tatou. (Ioa. 1, 4:19) A rahi noa ’tu â ’i to tatou here ia Iehova, e puai atu â to tatou faaroo ia ’na, e hau atu â tatou i te papu e e haamaitai Iehova tei here ia ’na.—A taio i te Hebera 11:6.

2 O Iehova te haamaitai mai! E tuhaa faufaa te reira no to ’na huru e no te mau mea atoa ta ’na e rave. No reira, e papu to tatou faaroo mai te peu noa e tiaturi tatou e e haamaitai oia i te feia o te imi papu ra ia ’na. No te aha? No te mea, “o te faaroo nei, o te tiaturi ïa i te mau mea e tiaihia nei.” (Heb. 11:1) Te faaroo, o te tiaturi-maite-raa ïa e e haamaitai te Atua i ta ’na mau tavini taiva ore. E nafea râ tatou e faufaahia ’i i te tiaturiraa i te hoê haamaitairaa? Mea nafea Iehova i  haamaitai ai i ta ’na mau tavini i tahito ra e i teie tau? Tera ta tatou e hi‘opoa mai.

TE FAFAU RA IEHOVA E HAAMAITAI I TA ’NA MAU TAVINI

3. Eaha tei fafauhia i roto i te Malaki 3:10?

3 Ua fafau te Atua ra o Iehova i te haamaitai i ta ’na mau tavini taiva ore. Te hinaaro nei Iehova ia horoa tatou i te mea maitai roa ’‘e na ’na e ia tiaturi e e haamaitai mai oia ia tatou. Ua parau Iehova ia tamata tatou ia ’na. Te na ô ra oia: “I te oreraa vau i te iritiraa i te mau haamaramarama o te ra‘i ra, a ninii atu ai i te tao‘a rahi roa ei maitai no outou.” (Mal. 3:10) E faaite tatou i to tatou mauruuru no ta ’na i pûpû mai ia farii tatou i ta Iehova aniraa e tamata ia ’na.

4. No te aha e nehenehe ai e tiaturi i ta Iesu i fafau i roto i te Mataio 6:33?

4 Ua fafau Iesu i ta ’na mau pǐpǐ e ia tuu ratou i te Faatereraa arii i te parahiraa matamua, e turu te Atua ia ratou. (A taio i te Mataio 6:33.) E nehenehe iho â Iesu e parau i te reira no te mea ua ite oia e e tupu iho â ta te Atua i fafau. (Isa. 55:11) No reira, e nehenehe atoa tatou e tiaturi e ia faatupu tatou i te faaroo mau ia Iehova, e tapea oia i teie parau fafau: “E ore roa vau e taiva ia oe, e ore roa vau e faarue ia oe.” (Heb. 13:5) E tauturu mai ta Iehova i fafau ia tiaturi i te mau parau a Iesu i roto i te Mataio 6:33.

Ua faaite Iesu i ta ’na mau pǐpǐ e e haamaitai oia ia ratou no ta ratou mau haapaeraa (A hi‘o i te paratarafa 5)

5. No te aha mea faaitoito ta Iesu pahonoraa ia Petero no tatou pauroa?

5 Ua ani te aposetolo Petero ia Iesu:  “Inaha matou, ua faarue i te mau mea atoa e ua pee mai ia oe; e eaha ta matou nei utua [oia hoi haamaitairaa]?” (Mat. 19:27) Aita Iesu i faaafaro ia Petero i to ’na uiraa ’tu ia ’na. Ua parau râ Iesu i ta ’na mau pǐpǐ e e haamaitaihia ratou no te mau haapaeraa ta ratou i rave. E faatere te mau aposetolo e te tahi atu feia taiva ore i pihaiiho ia Iesu i te ra‘i a muri a‘e. Ua parau atoa Iesu e te vai ra te mau haamaitairaa i teie nei â: “E te taata atoa no to ’u nei i‘oa i faarue ai i te fare, e te mau taeae, e te mau tuahine, e te metua tane, e te metua vahine, e te vahine iho, e te tamarii, e te fenua, e hanere atu ïa ta ’na e noaa, e e roaa ia ’na te ora mure ore.” (Mat. 19:29) E nehenehe te mau pǐpǐ a Iesu e fana‘o i te mau metua tane, metua vahine, taeae, tuahine e tamarii i roto i te amuiraa i teie mahana. Mea faufaa roa a‘e te reira i te mau haapaeraa atoa ta tatou i rave no te Faatereraa arii a te Atua.

TE HOÊ TUTAU NO TE VARUA

6. No te aha Iehova e fafau ai e e haamaitai oia i ta ’na mau tavini?

6 Hau atu â i te fana‘oraa e rave rahi haamaitairaa faahiahia i teie nei â, te tiai ru nei tatou i te mau haamaitairaa rahi atu â no a muri a‘e. (Tim. 1, 4:8) Te fafau ra Iehova e e haamaitai oia i ta ’na mau tavini taiva ore, e e tauturu mai te taaraa i te reira ia faaruru i te mau fifi. Mai te peu e te tiaturi maite nei tatou e na Iehova e haamaitai “i te feia i imi papu ia ’na,” e vai taiva ore ïa tatou.—Heb. 11:6.

7. Mea nafea to tatou tiaturiraa i au ai i te hoê tutau?

7 I roto i te A‘oraa i nia i te mou‘a, ua parau Iesu: “A oaoa, e ia ou‘au‘a noa i te oaoa; e utua [aore ra haamaitairaa] rahi hoi ta outou i te ao ra: i na reira hoi ratou i te hamani ino i te mau peropheta ra, o mua ïa ia outou.” (Mat. 5:12) E fana‘o te tahi mau tavini a te Atua i te hoê haamaitairaa i te ra‘i. E vetahi atu, e fana‘o ïa i te haamaitairaa o te ora mure ore i roto i te paradaiso i te fenua nei. E tumu atoa tera ia “oaoa, e ia ou‘au‘a noa i te oaoa.” (Sal. 37:11; Luka 18:30) No tatou pauroa râ, e nehenehe to tatou tiaturiraa e riro ei “tiataro [aore ra tutau] no te varua, e te mahiti ore, e te mau maitai.” (Heb. 6:17-20) Mai te hoê tutau e tapea i te pahi i roto i te hoê vero, e tauturu to tatou tiaturiraa puai ia ore ia aueue. E horoa mai te reira i te puai no te faaoromai i te mau fifi.

Ua fafau Iehova e haamaitai i ta ’na mau tavini taiva ore, ma te ite e e tauturu te reira ia ratou ia faaruru i te mau fifi

8. E nafea te ahoaho e iti mai ai i to tatou tiaturiraa?

8 E nehenehe to tatou tiaturiraa e tauturu ia faaiti i te ahoaho. Mai te hoê raau parai e tamǎrû i to tatou iri, e nehenehe ta te Atua i fafau e tamǎrû i to tatou aau horuhoru. Mea tamahanahana ia ite e e aupuru mai Iehova ia tuu tatou i ta tatou hopoia ia ’na ra. (Sal. 55:22) Ia papu ia tatou e e “hau ê roa ’tu ta ’na [te Atua] ia rave, i te mau mea atoa ta tatou e ani  nei.” (Eph. 3:20) E tauturu Iehova ia tatou. Aita te Bibilia e parau ra e e tauturu rahi mai o ’na, e “hau ê roa ’tu [râ] ta ’na ia rave”!

9. E nafea tatou e papu ai e e fana‘o tatou i ta Iehova haamaitairaa?

9 No te fana‘o i te haamaitairaa, e titauhia i te hoê faaroo mau ia Iehova e ia auraro tatou i ta ’na mau aratairaa. Ua parau Mose i te nunaa Iseraela: “E haamaitai roa hoi Iehova ia oe i nia i te fenua ta to Atua ra ta Iehova e horoa no oe nei ei parahiraa: ia faaroo maite oe i te reo o to Atua ra o Iehova, e ia haapao oe i te rave i teie atoa nei mau parau ta ’u e parau atu ia oe na i teie nei mahana. E haamaitai mai hoi to Atua ra o Iehova ia oe, ta ’na hoi i parau mai ia oe ra.” (Deut. 15:4-6) Ua papu maite anei ia oe e e haamaitai Iehova ia oe ia tamau oe i te tavini ia ’na ma te taiva ore? Mea maitai roa ia tiaturi oe i te reira.

O IEHOVA TEI HAAMAITAI IA RATOU

10, 11. Mea nafea Iehova i te haamaitairaa ia Iosepha?

10 Ua papaihia te Bibilia no to tatou maitai. E rave rahi hi‘oraa i roto e faaite ra e mea nafea te Atua i te haamaitairaa i ta ’na mau tavini taiva ore i tahito ra. (Roma 15:4) O Iosepha te tahi hi‘oraa maitai roa. A tahi, ua hoo to ’na mau taeae ia ’na ei tîtî. I muri a‘e, ua pari haavare te vahine a to ’na fatu ia ’na e ua afaihia oia i te fare tapearaa i Aiphiti. I te fare tapearaa, ua atea ê anei Iosepha ia Iehova? Aita roa ’tu! Te parau ra te Bibilia: “Tei pihaiiho râ Iehova ia Iosepha, e ua hamani maitai maira ia ’na” e “tei ia ’na hoi Iehova, e te mau mea atoa ta ’na i rave ra, na Iehova ïa i faariro ei mea maitai.” (Gen. 39:21, 23) Noa ’tu tei roto oia i teie mau fifi, ua tamau Iosepha i te tiai i to ’na Atua.

11 E rave rahi matahiti i muri a‘e, ua tuu Pharao ia Iosepha i rapae i te fare tapearaa, e ua riro mai teie tavini haehaa te piti o te taata puai roa ’‘e i Aiphiti. (Gen. 41:1, 37-43) A fanau mai ai Iosepha e ta ’na vahine e piti tamaiti, “mairi ihora Iosepha i to te matahiapo ra i‘oa, o Manase: ua na ô a‘era hoi oia, Ua moe na to ’u ra mau ati, e te utuafare atoa o to ’u ra metua ia ’u, i te Atua. E mairi ihora oia i te i‘oa o te toopiti ra o Epheraima: ua na ô a‘era hoi oia, Ua hotu vau i te Atua i te fenua i ati ai au nei.” (Gen. 41:51, 52) Ua haamaitai Iehova i to Iosepha taiva ore e ua nehenehe oia e faaora i te mau Iseraela e to Aiphiti i te o‘e. Ua taa ia Iosepha e na Iehova i haamaitai ia ’na.—Gen. 45:5-9.

Aita e ore e ua oaoa Iesu i te haamo‘a i to te Atua i‘oa

12. Mea nafea Iesu i te vai taiva-ore-raa i mua i te tamataraa?

12 Ua auraro noa atoa Iesu Mesia i te Atua noa ’tu e rave rahi tamataraa, e ua haamaitai Iehova ia ’na. Eaha tei tauturu ia Iesu ia vai taiva ore? Te faataa ra te Parau a te Atua: “O tei faaoromai i te satauro [aore ra pou haamauiuiraa], aore i haapao i te haama, i te maitai i tuuhia mai i mua i tana aro.” (Heb. 12:2) Aita e ore e ua oaoa Iesu i te haamo‘a i to te  Atua i‘oa. Ua haamaitaihia Iesu ma te farii maitai a to ’na Metua e te mau fana‘oraa taa ê faahiahia mau. Te parau ra te Bibilia no Iesu e “te parahi ra [oia] i teie nei i te pae atau i te terono o te Atua ra.” Te taio atoa ra tatou: “I faateitei roa ’tu ai te Atua ia ’na, e ua horoa hoi i te i‘oa i hau ê roa i te mau i‘oa atoa nei no ’na.”—Phil. 2:9.

EITA IEHOVA E HAAMOE I TA TATOU E RAVE RA

13, 14. Eaha to Iehova huru no nia i ta tatou e rave ra no ’na?

13 E nehenehe tatou e tiaturi e e haafaufaa Iehova i te mau mea atoa ta tatou e rave ra no te tavini ia ’na. Te taa ra ia ’na aita ana‘e tatou e tiaturi ra ia tatou iho aore ra ia feaa tatou no nia i to tatou aravihi. Te haapao mai ra oia ia haapeapea tatou no ta tatou ohipa aore ra no te aupuru i to tatou utuafare. Te taa ra ia ’na aita ana‘e tatou e nehenehe faahou e rave mai i na mua ’‘e i roto i ta ’na taviniraa no te ma‘i aore ra te oto. E nehenehe tatou e tiaturi papu e te haafaufaa ra Iehova i to tatou taiva ore noa ’tu to tatou mau fifi.—A taio i te Hebera 6:10, 11.

14 A haamana‘o atoa e o Iehova “tei faaroo i te pure.” Papu maitai e ia pure tatou ia ’na, e faaroo mai oia. (Sal. 65:2) E horoa mai “te tumu o te aroha [hamani maitai] e o te Atua no ’na ana‘e te mahanahana” i te mau mea atoa o ta tatou e hinaaro ra ia vai piri noa tatou ia ’na. I te tahi taime, e faaohipa oia i to tatou mau taeae e tuahine no te rave i te reira. (Kor. 2, 1:3) E oaoa Iehova ia faatupu tatou i te aumihi no vetahi ê. “O tei hamani maitai i te taata rii ra, ua horoa oia i te tao‘a na Iehova; e na ’na e hopoi mai i ta ’na utua [oia hoi, haamaitairaa].” (Mas. 19:17; Mat. 6:3, 4) Ia faaite tatou i te aau horoa noa e ia tauturu tatou i to tatou mau taeae, e faariro Iehova i te maitai ta tatou i rave mai te hoê tarahu ta tatou i horoa na ’na. E ua fafau oia e haamaitai i to tatou hamani maitai.

TE MAU HAAMAITAIRAA I TEIE NEI E A MURI A‘E

15. Eaha te mau haamaitairaa ta oe e tiai ru nei? (A hi‘o i te hoho‘a matamua.)

15 E fana‘o te mau Kerisetiano faatavaihia i te “korona o te parau-tia,” te hoê haamaitairaa no ǒ mai ia Iesu ra. (Tim. 2, 4:7, 8) E ere râ te auraa e mea faufaa a‘e ratou ia oe i mua i te Atua, mai te peu, e tiaturiraa ê to oe. Te tiai ru nei e mirioni “mamoe ê atu” a Iesu i te haamaitairaa o te ora mure ore no a muri a‘e i roto i te hoê paradaiso i te fenua nei. I reira, “e oaoa ratou i te rahi o te hau.”—Ioa. 10:16; Sal. 37:11.

16. Eaha te tamahanahanaraa ta tatou e ite i roto i te Ioane 1, 3:19, 20?

16 I te tahi taime, e mana‘o paha tatou e aita tatou e haa rahi ra i roto i ta Iehova taviniraa aore ra e mana‘o paha tatou e aita Iehova e mauruuru ra i ta tatou e rave ra. E nehenehe atoa tatou e mana‘o e aita tatou e faaî ra i te mau titauraa no te fana‘o i te tahi mau fana‘oraa taa ê. Eiaha râ tatou e haamoe e “rahi [a‘e] te Atua i to tatou aau, e ua ite oia i te mau mea atoa nei.” (A taio i te Ioane 1, 3:19, 20.) Ia tavini tatou ia Iehova no to tatou faaroo e here no ’na, papu roa e e haamaitai mai oia, noa ’tu e mana‘o tatou e mea iti roa ta tatou i rave.—Mar. 12:41-44.

17. Eaha te tahi mau haamaitairaa ta tatou e fana‘o ra i teie mahana?

 17 I roto atoa i teie anotau hopea o te ao ino a Satani, te haamaitai ra Iehova i to ’na nunaa. Te haapao ra oia ia noaa ia tatou te ite e te hau e rave rahi, ei mero no te huitaeae na te ao atoa nei. (Isa. 54:13) Mai ta Iesu i fafau, te haamaitai ra Iehova ia tatou i teie nei i te hoê utuafare taeae e tuahine î i te here na te ao atoa nei. (Mar. 10:29, 30) Oia atoa, e haamaitaihia te feia o te imi papu ra i te Atua ma te rahi o te hau o roto, te mauruuru e te oaoa.—Phil. 4:4-7.

18, 19. Eaha te mana‘o o te mau tavini a Iehova no te mau haamaitairaa ta ratou i fana‘o?

18 Ua ite te mau tavini a Iehova na te ao atoa nei i te mau haamaitairaa faahiahia mau no ǒ mai i to tatou ra Metua. Ei hi‘oraa, te parau ra Bianca no Heremani: “E tamau noa vau i te haamauruuru ia Iehova no to ’na tautururaa ia ’u i roto i to ’u mau hepohepo e to ’na vai piri-noa-raa ia ’u i te mau mahana atoa. Mea huehue e mea peapea teie nei ao. A ohipa piri noa ’i râ vau e o Iehova, aita vau e haapeapea faahou i roto i to ’na rima. I te mau taime atoa a rave ai au i te mau haapaeraa no ’na, e fana‘o vau hau atu â haamaitairaa.”

19 A hi‘o atoa na ia Paula, 70 matahiti, i Kanada, o tei roohia i te ma‘i spina bifida, te hoê ma‘i i roto i te ivi tua. Te parau ra oia e ua taotia to ’na tupuraa ia ’na ia haere, e ere râ te auraa e ua taotiahia ta ’na taviniraa. Te na ô faahou ra oia: “E haafaufaa vau i te tahi atu mau huru taviniraa, mai te pororaa na roto i te niuniu paraparau e ma te faanaho-ore-hia. No te faaitoito ia ’u, e buka papai ta ’u e te mau irava e mana‘o no roto i ta tatou mau papai o ta ’u e hi‘o i te tahi mau taime. Ua pii au i te reira ‘Ta ’u buka papai faaora.’ E taime poto noa te toaruaruraa ia tiatonu tatou i ta Iehova i fafau. Tei pihaiiho noa Iehova no te tauturu ia tatou, noa ’tu to tatou tupuraa.” Mea taa ê roa paha to tupuraa i to Bianca e Paula. E feruri râ paha oe mea nafea Iehova i te haamaitairaa ia oe e te feia i pihaiiho ia oe. Mea maitai ia mana‘o e nafea Iehova e haamaitai ai ia oe i teie nei e a muri a‘e!

20. Eaha te nehenehe e tiai ru ia tamau tatou i te tavini ia Iehova ma te taiva ore?

20 Eiaha roa ’tu e haamoe e e haamaitai-rahi-hia ta tatou mau pure haavare ore. Ia papu e “ua oti ana‘e ia outou te haapao i to te Atua ra hinaaro,” e noaa te haamaitairaa “i parauhia maira.” (Heb. 10:35, 36) E tamau ana‘e ïa i te haapuai i to tatou faaroo e i te rave i te mau mea atoa no te tavini ia Iehova. E haamaitai mai iho â Iehova ia tatou!—A taio i te Kolosa 3:23, 24.