Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tetepa 2017

Faaitoito e a rave i te ohipa!

Faaitoito e a rave i te ohipa!

“Faaetaeta [aore ra faaitoito], eiaha e taiâ, e [a] rave [i te ohipa]: eiaha e mǎta‘u, eiaha e ahoaho: e riro hoi te Atua ra o Iehova . . . ei pihaiiho ia oe.”—PAR. 1, 28:20.

HIMENE: 38, 34

1, 2. (a) Eaha te hopoia taa ê ta Solomona i fana‘o? (b) No te aha Davida i haapeapea ’i no Solomona?

UA FANA‘O Solomona i te hoê hopoia taa ê. Ua maiti Iehova ia ’na no te tiaau i te paturaa o te hiero i Ierusalema, hoê o na paturaa rahi roa ’‘e aore i itehia a‘enei! E hau ê te “unauna” o te hiero, e e matauhia te reira no to ’na nehenehe. Te mea faufaa roa ’tu â, e riro te reira ei “fare o te Atua [mau] ra o Iehova.”—Par. 1, 22:1, 5, 9-11.

2 Ua papu i te arii Davida e e turu iho â te Atua ia Solomona. “E tamaiti apî” râ hoi Solomona, e o tei ore i ite i teie ohipa. E noaa anei ia ’na te itoito no te farii i te hopoia e patu i te hiero? Aore ra e tapea anei to ’na matahiti e to ’na ite ore i te ohipa ia ’na ia na reira? No te manuïa, e titauhia ia itoito Solomona e ia ohipa oia.

3. Eaha te mau mea ta Solomona i nehenehe e haapii mai no nia i te itoito i to ’na metua tane ra?

3 Eita e ore e mea rahi ta Solomona i haapii mai no nia i te itoito i to ’na metua tane ra, o Davida. I to Davida apîraa, ua  taparahi oia i te mau animara o tei haere mai e amu i te mau mamoe a to ’na metua tane. (Sam. 1, 17:34, 35) Ua faaite atoa oia i te itoito rahi i to ’na aroraa i te hoê faehau puai mau e te mǎta‘u ore, te aito ra o Golia. Maoti te tauturu a te Atua e te hoê ofai, ua pau Golia ia Davida.—Sam. 1, 17:45, 49, 50.

4. No te aha i titauhia ’i ia Solomona te itoito?

4 Te taa ra ïa tatou no te aha o Davida te taata e tano no te parau ia Solomona ia faaitoito e ia patu i te hiero. (A taio i te Paraleipomeno 1, 28:20.) Ahani aita Solomona i faaite i te itoito, e nehenehe oia e pohe i te mǎta‘u, te auraa e tapea te mǎta‘u ia ’na ia haamata i te ohipa. Mea ino a‘e te reira i te oreraa e manuïa i roto i ta ’na hopoia.

E hinaaro tatou i ta Iehova tauturu no te faaite i te itoito e no te rave i te ohipa ta ’Na e horoa mai ra

5. No te aha e hinaaro ai tatou i te itoito?

5 Mai ia Solomona, e hinaaro tatou i ta Iehova tauturu no te faaite i te itoito e no te rave i te ohipa ta ’na e horoa mai ra. E hi‘opoa ana‘e ïa i te hi‘oraa o te tahi mau taata o tei faaite i te itoito i tahito ra. I muri mai tatou e feruri ai e nafea ia faaite i te itoito a rave faahope atu ai i ta tatou ohipa.

HI‘ORAA O TE ITOITO

6. Eaha te mea e faahiahia roa ’i tatou ia Iosepha?

6 Ua faaite Iosepha i te itoito i te onoonoraa te vahine a Potiphara ia ’na ia taoto raua. Eita e ore e ua ite o ’na e mea atâta no ’na ia patoi atu. Aita râ o ’na i fati, ua faaite oia i te itoito e patoi vitiviti atura oia ia ’na.—Gen. 39:10, 12.

7. Mea nafea Rahaba i faaite ai i te itoito? (A hi‘o i te hoho‘a matamua.)

7 O Rahaba te tahi atoa hi‘oraa o te itoito. A tomo ai e piti Iseraela i roto i to ’na fare i Ieriko, ua nehenehe te reira e haamǎta‘u ia ’na a patoi atu ai o ’na i te tauturu ia raua. No to ’na râ tiaturi ia Iehova, ua tapuni oia ia raua ma te itoito e ua tauturu atu no te horo ê ma te ore e itehia ’tu. (Ios. 2:4, 5, 9, 12-16) Ua tiaturi Rahaba e o Iehova te Atua mau, e ua papu ia ’na e e horoa iho â oia te fenua i te mau Iseraela. Aita Rahaba i pohe i te mǎta‘u ia vetahi ê, oia atoa i te arii o Ieriko e to ’na mau taata. Ua haa oia ma te itoito e ua faaora ia ’na iho e to ’na utuafare.—Ios. 6:22, 23.

8. Mea nafea to Iesu itoito i te ohiparaa i nia i te mau aposetolo?

8 Ua faaite atoa ta Iesu mau aposetolo haapao maitai i te itoito rahi. Ua ite ratou i te itoito ta Iesu i faaite e ua tauturu te reira ia ratou ia pee i to ’na hi‘oraa. (Mat. 8:28-32; Ioa. 2:13-17; 18:3-5) I to te mau Sadukea tamataraa i te tapea ia ratou ia ore ratou e haapii i te taata no nia ia Iesu, ua patoi atu te mau aposetolo.—Ohi. 5:17, 18, 27-29.

9. E nafea te Timoteo 2, 1:7 e tauturu mai ia taa nohea mai te itoito?

9 Ua faaoti papu Iosepha, Rahaba, Iesu e te mau aposetolo i te rave i te mea tano. Ua faaite ratou i te itoito, eiaha no te mea ua tiaturi ratou i to ratou iho puai, no te mea râ ua turui ratou i nia ia Iehova. Ia hinaaro tatou i te itoito, mea tia ia turui atoa tatou i nia ia Iehova, eiaha i nia ia tatou  iho. (A taio i te Timoteo 2, 1:7.) E hi‘o ana‘e e piti tuhaa o te oraraa e hinaaro ai tatou i te itoito: i roto i to tatou utuafare e i roto i te amuiraa.

TUPURAA E TITAUHIA ’I TE ITOITO

10. No te aha e hinaaro ai te feia apî i te itoito?

10 Mea rahi te tupuraa e hinaaro ai te mau Kerisetiano apî e faaite i te itoito no te tavini ia Iehova. E nehenehe ratou e haapii mai i te hi‘oraa o Solomona, o tei faaite i te itoito a rave ai i te mau faaotiraa î i te paari no te faahope roa i te paturaa o te hiero. Noa ’tu mea tia ia arataihia te feia apî e to ratou mau metua, e titau-atoa-hia ia rave ratou i ta ratou iho mau faaotiraa rahi. (Mas. 27:11) E hinaaro ratou i te itoito no te rave i te faaotiraa î i te paari no nia i te mau hoa ta ratou e maiti, eaha ta ratou e rave no te faaanaanatae ia ratou, e nafea ratou no te vai mâ noa i te pae morare, e afea ratou e bapetizohia ’i. E hinaaro ratou i te itoito inaha e patoi ratou i te hinaaro a Satani, o tei faaooo i te Atua.

11, 12. (a) Mea nafea Mose i faaite ai i te itoito? (b) E nafea te feia apî e pee ai i to Mose hi‘oraa?

11 Hoê faaotiraa rahi te tia i te feia apî ia rave, no nia ïa i te mau fa ta ratou e haamau. I te tahi mau fenua, e turaihia te feia apî ia haere i te haapiiraa teitei e ia noaa mai te hoê ohipa aufau-maitai-hia. I te tahi atu mau fenua, mea fifi te faanavairaa faufaa, e mana‘o paha ïa te feia apî e, te fa matamua te tia ia haamau, o te haereraa ïa e rave i te ohipa no te tauturu i to ratou mau utuafare. Mai te peu e tei roto oe hoê o na piti tupuraa, a feruri ïa i to Mose hi‘oraa. Ua faaamuhia oia e te tamahine a Pharao, ua nehenehe ïa ta ’na e haamau i te fa e riro mai ei taata moni roa aore ra ei taata tiaraa teitei. A feruri na i te mau mea ta to ’na utuafare Aiphiti, ta ’na mau orometua e feia a‘o i nehenehe e turai ia ’na ia rave! Ua faaite râ Mose i te itoito e ua maiti i te apiti i te nunaa o te Atua. I muri a‘e i to ’na faarueraa ia Aiphiti e te mau tao‘a rahi a tera fenua, ua turui maite oia i nia ia Iehova. (Heb. 11:24-26) I te pae hopea, ua haamaitai rahi Iehova ia ’na, e e haamaitai â oia ia ’na a muri a‘e.

12 Ia haamau te feia apî i te fa ma te itoito i roto i te taviniraa ia Iehova a tuu atu ai i te mau ohipa a te Faatereraa arii i te parahiraa matamua i roto i to ratou oraraa, e haamaitai Iehova ia ratou. E tauturu oia ia ratou ia aupuru i to ratou utuafare. I te senekele matamua, ua haamau te taurearea ra o Timoteo i to ’na oraraa i nia i te taviniraa i te Atua. E nehenehe atoa oe e na reira! *A taio i te Philipi 2:19-22.

Ua faaoti papu anei oe i te faaite i te itoito i roto i te mau tuhaa atoa o te oraraa? (A hi‘o i te paratarafa 13-17)

13. Mea nafea, maoti te itoito, i raea ’i i te hoê tuahine ta ’na mau fa?

13 Ua hinaaro te hoê tuahine i Alabama, Marite, i te itoito no te haamau i te fa i roto i te taviniraa i te Atua. Tera ta ’na i papai: “Mea mamahu roa vau i to ’u apîraa. Mea fifi roa no ’u ia paraparau i te taata i te Piha a te Basileia. Mea ino roa ’tu â no te haere e patoto i te opani o te feia ta ’u i ore i matau.” Maoti te tauturu a to ’na na metua e a vetahi i roto i te amuiraa, ua raea i teie Kerisetiano apî ta ’na fa e riro mai ei pionie tamau. Te parau ra oia: “Te faariro nei te ao a Satani i te haapiiraa teitei, te hanahana, te moni, e te noaaraa i te tao‘a materia e rave rahi ei fa maitatai.”  Ua taa atoa râ ia ’na e eita roa ’tu e raea tera mau fa i te rahiraa o te taata, o te ahoaho noa e te mauiui ta te reira e hopoi mai. Te na ô faahou ra oia: “Ua hopoi mai râ te taviniraa ia Iehova i te oaoa rahi roa ’‘e e te mâharaa.”

14. Afea te mau metua Kerisetiano e hinaaro ai i te itoito?

14 E hinaaro atoa te mau metua Kerisetiano i te itoito. Ei hi‘oraa, e pinepine paha ta oe paoti i te ani ia rave oe i te hora hau i te mau mahana ta oe i faataa no te haamoriraa utuafare, te pororaa, e te mau putuputuraa a te amuiraa. E hinaaro oe i te itoito no te patoi i te aniraa a te paoti e no te horoa i te hi‘oraa maitai i ta oe mau tamarii. Aore ra peneia‘e e vaiiho te tahi mau metua i ta ratou tamarii ia rave i te mau mea eita oe e hinaaro ia rave ta oe mau tamarii. Ia ani mai tera mau metua ia oe te tumu, e itoito anei oe no te faataa ’tu ma te faatura?

15. E nafea te Salamo 37:25 e te Hebera 13:5 e tauturu ai i te mau metua?

15 E titauhia te itoito no te tauturu i ta oe mau tamarii ia haamau i te fa i roto i te taviniraa i te Atua, e ia naea te reira ia ratou. Ei hi‘oraa, e mǎta‘u paha te tahi mau metua i te faaitoito i ta ratou mau tamarii ia haere i roto i te taviniraa pionie, ia tavini i te vahi e hinaaro-rahi-hia ra te tauturu, ia tavini i te Betela, aore ra ia ohipa i roto i te paturaa i te mau Piha a te Basileia e piha tairururaa. Peneia‘e te mǎta‘u ra ratou eita e haere i ta ratou mau tamarii ia aupuru ia ratou iho ia paari ratou. E faaite râ te mau metua î i te paari i te itoito e i to ratou tiaturiraa e e tapea  Iehova i ta ’na i fafau. (A taio i te Salamo 37:25; Hebera 13:5.) Te mau metua o te faaite ra i tera huru itoito e o te turui ra i nia ia Iehova, e tauturu ïa ratou i ta ratou mau tamarii ia na reira atoa.—Sam. 1, 1:27, 28; Tim. 2, 3:14, 15.

16. (a) Mea nafea te tahi mau metua i tauturu ai i ta ratou mau tamarii ia haamau i te fa i roto i te taviniraa i te Atua? (b) Mea nafea te mau tamarii i faufaahia ’i i te reira?

16 Ua tauturu te hoê tane e ta ’na vahine faaipoipo no Marite i ta raua mau tamarii ia haamau i to ratou feruriraa i nia i te taviniraa ia Iehova. Te parau ra te tane: “Hou ta mâua mau tamarii a haapii ai i te haere e i te paraparau, ua paraparau mâua ia ratou no nia i te oaoaraa o te taviniraa pionie e te taviniraa i roto i te amuiraa. I teie nei, tera ta ratou fa.” Te parau faahou ra oia e i te mea ua haamau e ua naea i ta raua mau tamarii tera mau huru fa, ua tauturu ïa te reira ia ratou ia patoi i te mau faahemaraa a ta Satani faanahoraa e ia haamau i to ratou feruriraa i nia i te taviniraa ia Iehova. Ua papai te hoê taeae e piti tamarii ta ’na: “Mea rahi te metua o te tutava rahi ra i te tauturu i ta ratou mau tamarii ia naea te mau fa ta ratou i haamau i te pae o te tuaro anei, te faaanaanataeraa e te haapiiraa. Mea hoona a‘e hoi ia tutava i te tauturu i ta outou mau tamarii ia naea ia ratou te mau fa o te tauturu ia ratou ia tapea i te hoê roo maitai i mua ia Iehova. E oaoa rahi ta mâua i ite i te iteraa e ua naea i ta mâua nau tamarii te mau fa pae varua ta raua i haamau, i te apiti-atoa-raa ’tu ia tapae raua i tera faito.” Ia papu maitai ia oe e, te mau metua o te tauturu i ta ratou mau tamarii ia haamau i te fa i roto i te taviniraa i te Atua e ia naea te reira, e fana‘o ratou i ta ’na farii maitai.

TE ITOITO I ROTO I TE AMUIRAA

17. A horoa i te tahi mau hi‘oraa o te itoito i roto i te amuiraa Kerisetiano.

17 E titau-atoa-hia ia faaite tatou i te itoito i roto i te amuiraa. Ei hi‘oraa, e hinaaro te mau matahiapo i te itoito ia hi‘opoa ratou i te tahi mau hara rahi aore ra ia tauturu ratou i tei roohia i te ati no te hoê rapaauraa ru. E tere te tahi mau matahiapo na te mau fare auri no te haapii i te feia anaanatae aore ra no te faatere i te mau putuputuraa. E no te mau tuahine taa noa? Mea rahi te ravea no te faaite i te itoito e no te tavini ia Iehova. E nehenehe ratou e riro mai ei pionie, e haere i te vahi e hinaaro-rahi-hia ra te tauturu, e ohipa i roto i te tuhaa o te paturaa (LDC), e tapao i te i‘oa no te apiti i te Haapiiraa no te feia poro i te parau apî oaoa o te Basileia. E titau-manihini-atoa-hia vetahi no te Haapiiraa no Gileada.

18. E nafea te mau tuahine paari a‘e e faaite ai i te itoito?

18 Mea here na tatou to tatou mau tuahine paari a‘e, e te mauruuru ra tatou e te vai ra ratou i roto i te amuiraa! Noa ’tu aita vetahi e nehenehe faahou e ohipa mai i na mua ’‘e i roto i te taviniraa i te Atua, e nehenehe â râ ratou e faaite i te itoito a ohipa ’tu ai. (A taio i te Tito 2:3-5.) Ei hi‘oraa, e hinaaro te hoê tuahine paari a‘e i te itoito mai te peu e farerei atu te mau matahiapo ia ’na no te haere e paraparau i te hoê tuahine apî a‘e no nia i te faaahuraa ma te au noa. Eita o ’na e tama‘i i te tuahine no te ahu ta ’na i oomo mai, e tauturu râ oia ia ’na ma te hamani maitai ia feruri e nafea to ’na faaahuraa e ohipa ’i i nia ia vetahi. (Tim. 1, 2:9, 10) Ia na reira te mau tuahine paari a‘e i te faaite i to ratou here, e haapuai ratou i te amuiraa.

19. (a) E nafea te mau taeae bapetizohia e faaite ai i te itoito? (b) E nafea te Philipi 2:13 e 4:13 e tauturu ai i te mau taeae ia faatupu i te itoito?

 19 E hinaaro atoa te mau taeae bapetizohia e faaite i te itoito a ohipa ’tu ai. Ia hinaaro ratou e ohipa ei tavini tauturu aore ra matahiapo, e faufaa-roa-hia ïa te amuiraa. (Tim. 1, 3:1) Tera râ, e taiâ paha vetahi i te na reira. Peneia‘e ua rave te hoê taeae i te tahi mau hape na mua a‘e, e i teie nei te mana‘o ra oia e aita e tano ia riro mai oia ei tavini tauturu aore ra ei matahiapo. E mana‘o paha te tahi taeae e aita o ’na i aravihi roa ’tura no te tavini i te amuiraa. Mai te peu e tera to oe mana‘o, e nehenehe Iehova e tauturu ia oe ia faatupu i te itoito. (A taio i te Philipi 2:13; 4:13.) A haamana‘o i te hi‘oraa o Mose. Ua mana‘o atoa oia e aita e haere ia ’na ia rave i ta Iehova i faaue ia ’na. (Exo. 3:11) Ua tauturu râ Iehova ia ’na ia faatupu i te itoito a rave atu ai i te mea i titauhia ia ’na. E nafea te hoê taeae bapetizohia e ite mai ai i tera itoito? E pure paha oia ia Iehova no te ani i te tauturu e e taio oia i te Bibilia i te mau mahana atoa. E feruriruri paha oia i te hi‘oraa o te tahi mau taata o te Bibilia o tei faaite i te itoito. E nehenehe ta ’na e ani ma te haehaa i te mau matahiapo ia faaineine ia ’na, a nehenehe atu ai oia e tauturu i te amuiraa i roto i te mau tupuraa e hinaarohia ’i te tauturu. Te faaitoitohia nei te mau taeae bapetizohia ia faaite i te itoito a rohi atu ai i te ohipa no te amuiraa!

EI PIHAI IHO IEHOVA IA OE!

20, 21. (a) Eaha ta Davida i haamana‘o ia Solomona? (b) Eaha te mea ta tatou e papu nei?

20 Ua haamana‘o te arii Davida ia Solomona e ei pihai iho Iehova ia ’na e hope roa ’tu ai te hiero i te patuhia. (Par. 1, 28:20) Eita e ore e ua feruriruri Solomona i teie mau parau, e aita ’tura oia i vaiiho i to ’na matahiti apî e to ’na aravihi ore e tapea ia ’na ia rave i te ohipa. Ua faaite râ oia i te itoito rahi e, maoti ta Iehova tauturu, ua hope te paturaa o teie hiero nehenehe mau i muri a‘e e hitu matahiti e te afa.

21 Ua tauturu Iehova ia Solomona, e nehenehe atoa ïa ta ’na e tauturu ia tatou ia faaite i te itoito e ia rave i ta tatou ohipa, i roto i to tatou utuafare aore ra i roto i te amuiraa. (Isa. 41:10, 13) Ia faaite tatou i te itoito a tavini ai ia Iehova, papu maitai e e haamaitai Iehova ia tatou i teie nei â e a muri a‘e. Ia itoito ïa oe, e a rave i te ohipa!

^ par. 12 E ite oe i te tahi mau mana‘o tauturu no te haamau i te fa no te taviniraa i te Atua i roto i te tumu parau “A faahanahana i to Atua poiete ma te haamau i te fa pae varua,” piahia i roto i Te Pare Tiairaa o te 15 no Tiurai 2004 (Farani).