Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tenuare 2018

A horoa na tei horoa mai i te mau mea atoa

A horoa na tei horoa mai i te mau mea atoa

“E to matou Atua, te haamaitai nei matou ia oe, te arue nei matou i to oe nei i‘oa hanahana.”—PAR. 1, 29:13.

HIMENE: 80, 50

1, 2. No te aha e parau ai e Atua horoa noa o Iehova?

E ATUA horoa noa o Iehova. Te mau mea atoa, no ǒ mai ïa ia ’na ra. O ’na te fatu o te mau faufaa atoa o te fenua e te faaohipa ra oia i te reira no te aupuru i te mau mea atoa ta ’na i poiete. (Sal. 104:13-15; Hag. 2:8) Te faaite ra te Bibilia ua faatupu o Iehova i te semeio i te tahi mau taime no te aupuru i to ’na nunaa.

2 A hi‘o na, ua horoa o Iehova i te mâna e te pape na te nunaa Iseraela i roto i te medebara e 40 matahiti te maoro. (Exo. 16:35) Aita ïa ratou i ere noa ’‘e i te tahi mea. (Neh. 9:20, 21) I muri a‘e, ua horoa o Iehova i te peropheta Elisaia i te mana no te faarahi i te faito hinu iti e toe ra i te tahi vahine ivi haapao maitai. Ua tauturu taua ô ra no ǒ mai i te Atua i tera vahine ia aufau i ta ’na tarahu e ua toe mai te moni no te faatamaa ia ’na e ta ’na na tamarii e piti. (Arii 2, 4:1-7) Maoti atoa te turu a Iehova i faatupu ai Iesu i te semeio no te faatamaa i te taata e no te horoa i te moni i  hinaarohia i roto i te tahi tupuraa.—Mat. 15:35-38; 17:27.

3. Eaha ta tatou e hi‘opoa i roto i teie haapiiraa?

3 E nehenehe o Iehova e faaohipa i ta ’na e hinaaro no te aupuru i te mau mea ta ’na i poiete. Noa ’tu râ, te ani ra oia i ta ’na mau tavini ia horoa ia au i te maraa ia ratou no te turu i te ohipa a ta ’na faanahonahoraa. (Exo. 36:3-7; a taio i te Maseli 3:9.) Eaha te tumu o Iehova e titau mai ai ia faaohipa i ta tatou mau faufaa no te tavini ia ’na? Mea nafea ta Iehova mau tavini i tahito i te tururaa i ta ’na ohipa? I teie mahana, e nafea te faanahonahoraa e faaohipa ’i i te mau ô horoa-noa-hia? E pahonohia tera mau uiraa i roto i teie haapiiraa.

NO TE AHA E HOROA ’I NA IEHOVA?

4. Ma te turu i ta ’na ohipa, eaha ta tatou e faaite ra ia Iehova?

E horoa tatou na Iehova no to tatou here ia ’na

4 E horoa tatou na Iehova no to tatou here e mauruuru ia ’na. A feruri ai i te mau mea atoa ta ’na i rave no tatou, e putapû roa te aau. O te huru atoa ïa o te arii Davida i to ’na faaiteraa eaha te hinaarohia no te patu i te hiero. Ua parau o Davida no ǒ mai te mau mea atoa ia Iehova e te mau mea atoa ta tatou e horoa ’tu, na ’na i horoa a‘ena mai.—A taio i te Paraleipomeno 1, 29:11-14.

5. Mea nafea te Bibilia e faaite ai ua riro te horoaraa i te ô ma te aau tae ei tuhaa faufaa o te haamoriraa mau?

5 E horoa atoa tatou na Iehova no te haamori ia ’na. I roto i te tahi orama, ua faaroo te aposetolo Ioane i te reo o te tavini ra ia Iehova i te ra‘i i te na ôraa: “E au roa ia faahanahanahia e ia faateiteihia oe Iehova to matou Atua puai, no te mea na oe i poiete i te mau mea atoa e no to hinaaro i vai ai e i poietehia ’i te reira.” (Apo. 4:11) I te mea e au roa ia Iehova te hanahana e te tura, e hinaaro tatou e horoa ia ’na i te mea maitai roa ’‘e. Na roto ia Mose, ua faaue o Iehova i te nunaa Iseraela ia faatupu e toru oroa i te matahiti. I tera mau taime, e horoa ratou i te ô na Iehova no te haamori ia ’na. Ua parauhia i te nunaa eiaha “e haere faufaa ore noa i mua i te aro o Iehova.” (Deut. 16:16) I teie atoa mahana, ua riro te horoaraa i te ô ma te aau tae ei tuhaa o ta tatou haamoriraa ia Iehova. Ma te na reira, te haafaufaa e te turu ra tatou i te ohipa a ta ’na faanahonahoraa.

6. No te aha e noaa mai te oaoa ia horoa tatou? (A hi‘o i te hoho‘a matamua.)

6 E oaoa tatou ia horoa na vetahi ê ma te aau tae, eiaha râ na ratou noa e horoa mai. (A taio i te Ohipa 20:35.) A feruri na i te hoê tamarii o te faaohipa i te tahi tuhaa o te moni ta to ’na na metua e horoa na ’na no te hoo mai i te ô na raua. Eaha te huru o na metua ia horoa ’tu oia i ta ’na ô? Aore ra, a feruri na i te tahi taurearea pionie o te ora noa ra i ǒ te metua. E horoa ’tu oia maa moni no te aufau i te fare aore ra te maa na te utuafare. Aita paha na metua i titau ia ’na ia na reira, e farii râ raua i ta ’na ô. Eaha te tumu? No te mea ua hinaaro te taurearea  e faaite i to ’na mauruuru no te mau mea atoa ta raua e rave ra no ’na. Mai tera atoa o Iehova, ua ite oia e noaa mai te oaoa ia horoa tatou ma te faaohipa i ta tatou mau faufaa.

UA HOROA TE MAU TAVINI O TE ATUA I TAHITO I TE Ô

7, 8. I tahito, eaha te hi‘oraa ta te nunaa o Iehova i horoa mai no te turu (a) i te mau opuaraa taa maitai? (b) i ta Iehova ohipa?

7 Te faaite ra te Bibilia ua horoa te nunaa o Iehova i te ô no te turu i ta ’na ohipa. I te tahi taime, ua horoa ratou no te mau opuaraa taa maitai. A hi‘o na, ua faaitoito Mose i te mau Iseraela ia horoa i te ô no te hamani i te sekene. I muri a‘e, ua na reira atoa te arii Davida no te paturaa o te hiero. (Exo. 35:5; Par. 1, 29:5-9) I raro a‘e i te faatereraa a te arii Iehoasa, ua tataî te mau tahu‘a i te hiero ma te faaohipa i te moni horoahia e te nunaa. (Arii 2, 12:4, 5) I te senekele matamua, ua faaroo te mau Kerisetiano te tupu ra te o‘e i Iudea e ua hinaaro te mau taeae i te tauturu. Ua faaoti ihora te mau Kerisetiano i te hapono atu i te ô ia au i te maraa ia ratou tataitahi.—Ohi. 11:27-30.

8 Ua horoa atoa te nunaa o Iehova i te ô no te turu i te feia e hopoia taa ê ta ratou i roto i ta ’na ohipa. I raro a‘e i te ture a Mose, aita ta te mau ati Levi e tufaa mai te toea o te mau opu. No reira te tahi atu mau Iseraela i horoa ’i i te tuhaa ahuru o ta ratou mau faufaa na te mau ati Levi. E nehenehe atura ïa ratou e haapao noa i ta ratou hopoia i te sekene. (Num. 18:21) Ua faaohipa atoa vetahi vahine aau horoa noa i ta ratou mau faufaa no te turu ia Iesu e ta ’na mau aposetolo.—Luka 8:1-3.

E nehenehe te feia tao‘a rahi e tae noa ’tu te mea veve roa e horoa i te ô

9. I tahito, nohea mai te mau ô i horoahia?

9 Nohea mai te mau ô i horoahia? No te hamani i te sekene, ua horoa te mau Iseraela i te mau tao‘a ta ratou i hopoi mai mai Aiphiti mai. (Exo. 3:21, 22; 35:22-24) I te senekele matamua, ua hoo vetahi Kerisetiano i ta ratou mau faufaa mai te tâpû fenua aore ra fare e ua horoa i te moni i noaa mai i te mau aposetolo. I muri iho, ua faaohipahia te reira no te mau taeae e tuahine e hinaaro i te tauturu. (Ohi. 4:34, 35) E tuu atoa na te tahi mau Kerisetiano i te hoê tino moni i te hiti no te turu i te ohipa. (Kor. 1, 16:2) E nehenehe ïa te feia tao‘a rahi e tae noa ’tu te mea veve roa e horoa i te ô.—Luka 21:1-4.

E NAFEA TATOU IA HOROA I TEIE MAHANA?

10, 11. (a) E nafea tatou ia pee i te hi‘oraa o te mau tavini o Iehova tei horoa ma te aau tae i tahito? (b) Eaha to tatou huru ia horoa tatou no te turu i te ohipa a te Faatereraa arii?

10 I teie atoa mahana, e anihia mai paha ia horoa i te ô no te tahi opuaraa taa maitai. Peneia‘e, te opua ra ta outou amuiraa e tataî i te Piha a te Basileia aore ra e hamani i te mea apî. E titauhia paha ia tataî i te amaa, ia aufau i te haamâu‘araa no ta tatou mau tairururaa e ia tauturu i te mau taeae o tei faaruru i te ati natura. E turu atoa ta tatou mau ô i te mau  mitionare, pionie taa ê, tiaau haaati e te feia e rave ra i te ohipa i te pu rahi e i te mau amaa na te ao nei. E hapono tamau atoa ta outou amuiraa i te ô no te turu i te paturaa o te mau Piha tairururaa e Piha a te Basileia i te tahi atu mau fenua.

11 E nehenehe tatou paatoa e turu i te ohipa e ravehia ra e te faanahonahoraa a Iehova i teie mau mahana hopea. I te rahiraa o te taime, eita te i‘oa o te feia e horoa i te ô e faaitehia. Ia tuu tatou i te moni i roto i te mau afata ô i te Piha a te Basileia aore ra ia horoa tatou i te ô ma te faaohipa i te reni jw.org, eita tatou e faaite ehia moni ta tatou i horoa. Eaha râ te huru ia mana‘o tatou mea haihai roa ta tatou i horoa? Ia ite mai outou, mea rahi a‘e te ô haihai roa e tae mai i te faanahonahoraa. Te pee ra te mau taeae riirii i te hi‘oraa o te mau Kerisetiano matamua i Makedonia. “Noa ’tu e mea veve roa ratou,” ua onoono tera mau Kerisetiano i te horoa e ua na reira ratou ma te aau tae mau.—Kor. 2, 8:1-4.

12. Eaha ta te faanahonahoraa e rave ra no te faaohipa maitai i te mau ô e horoahia?

12 Mea haapao maitai e mea paari atoa te Tino aratai a faaohipa ’i i te mau ô. (Mat. 24:45) E pure ratou no te rave i te mau faaotiraa maitai e e feruri maite ratou e nafea ia faaohipa i te moni. (Luka 14:28) Ua ara atoa te mau tavini taiva ore i tahito ia faaohipahia te mau ô no ta Iehova ana‘e haamoriraa. I to Ezera ho‘iraa i Ierusalema, mea rahi te ô ta te arii o Peresia i horoa ’tu mai te auro, te ario e te tahi atu mau tauihaa. Ua hau atu i te 10 000 mirioni farane te faito moni o te reira i teie mahana. No Ezera, e ô te reira na Iehova. Ua horoa ïa oia i te mau aratairaa taa maitai ia ore te reira ia haruhia a ratere ai ratou na te mau fenua atâta. (Ezr. 8:24-34) E rave rahi matahiti i muri a‘e, ua haaputu te aposetolo Paulo i te moni i horoahia no te tauturu i te mau taeae i Iudea. Ua ara oia ia rave te feia e hopoi atu i te reira “i te mau mea atoa ma te afaro, eiaha noa i mua ia Iehova, i mua atoa râ i te taata.” (A taio i te Korinetia 2, 8:18-21.) I teie mahana, te pee atoa ra ta tatou faanahonahoraa i te hi‘oraa o Ezera e to Paulo ma te faaohipa maitai i te mau ô e horoahia.

13. No te aha te faanahonahoraa i rave ai i te tahi mau tauiraa?

13 E rave paha te hoê utuafare i te tahi mau tauiraa no te faaohipa maitai i ta ratou moni e ia ore te mau haamâu‘araa ia rahi a‘e i te moni i noaa mai. E imi atoa paha ratou i te mau ravea no te rave i te mau haapaeraa no te tavini atu â ia Iehova. Tera atoa ta te faanahonahoraa a Iehova e rave ra. Aita i maoro a‘enei, mea rahi te mau opuaraa apî i ravehia e i te tahi taime, ua rahi a‘e te moni i haamâu‘ahia i tei horoahia mai. Mai te utuafare i roto i te hi‘oraa, e imi atoa te faanahonahoraa i te mau ravea no te faaiti i te mau haamâu‘araa e no te faaohie i te ohipa. Ma te na reira, e faaohipa maitai atu â te faanahonahoraa i te mau ô horoahia ma te aau tae.

TE MAU MAITAI I ITEHIA NA ROTO I TA TATOU MAU Ô

Te turu ra outou i te ohipa na te ao na roto i ta outou mau ô horoa noa (A hi‘o i te paratarafa 14-16)

14-16. (a) Te faaohipahia ra ta tatou mau ô no te aha? (b) Mea nafea te mau ohipa i ravehia i te tautururaa ia outou?

14 Ua parau e rave rahi mea maoro ratou i roto i te parau mau, mea rahi a‘e te  ô no ǒ mai i te faanahonahoraa i teie mahana i na mua ’‘e. Te vai ra te reni jw.org e te JW Haapurororaa teata. Ua piahia te Bibilia Huriraa o te ao apî o te mau Papai Mo‘a na roto e rave rahi atu â reo. I 2014 e 2015, ua faatupuhia te tairururaa nunaa rau “E mata na i te imi i te Basileia o te Atua!” i te mau tahua tuaro rahi i roto 14 oire na te ao. Ua oaoa roa te feia atoa o tei tae atu!

15 Mea rahi tei faaite i to ratou mauruuru no tera mau ô no ǒ mai i ta Iehova faanahonahoraa. A hi‘o na ta teie na hoa faaipoipo o te tavini ra i Asia i papai: “Te poro ra mâua i roto i te tahi oire iti. No te atea, mea ohie ia haamo‘e i ta Iehova ohipa na te ao atoa nei. Ia mataitai râ mâua i te mau faanahoraa i nia JW Haapurororaa teata, e haamana‘o mai te reira e mero atoa mâua no te fetii taeae na te ao nei. Hope roa to ǒ nei mau taeae e tuahine i te oaoa no te JW Haapurororaa teata. Ia oti ratou i te mataitai i te faanahoraa o te ava‘e, e pinepine ratou i te parau ua piri atu â ratou i te mau mero o te Tino aratai. I teie nei, e haapeu roa ’tu â ratou i te riro ei mero o te faanahonahoraa a te Atua.”

16 Na te ao nei, fatata 2 500 Piha a te Basileia o te hamanihia e te tataîhia ra. I moemoeâ noa na te mau mero o te tahi amuiraa i Honduras i te fana‘o i ta ratou iho Piha a te Basileia. I teie nei râ, ua oti te reira. Teie ta ratou i papai: “Te oaoa mau nei matou i te riro ei mero no te utuafare o Iehova e no te fetii taeae na te ao nei.” E rave rahi tei faaite i te hoê â mauruuru i te matararaa mai te Bibilia e te tahi atu mau papai na roto i to ratou iho reo. Tera atoa te itehia ia fana‘o te mau taeae i te tauturu i muri a‘e i te tahi ati natura aore ra ia ite ratou i te mau maitai o te pororaa na te mau oire rahi e te vahi taata i to ratou fenua.

17. Mea nafea tatou e ite ai te turu ra o Iehova i te ohipa a ta ’na faanahonahoraa i teie mahana?

 17 E rave rahi taata e ere i te Ite no Iehova o te ore e taa mea nafea ta tatou ohipa e haere ai i mua ma te faaohipa noa i te mau ô. Ua haere te tahi tia o te hoê taiete rahi e mataitai hoê o ta tatou mau vahi neneiraa. Ua maere roa oia i te iteraa ua ravehia te mau ohipa atoa e te feia o te horoa ia ratou ma te tamoni ore, na roto i te mau ô e aita hoê noa ’‘e faanahoraa i faatupuhia no te ani i te moni i te taata! Ua parau oia i te tanoraa mau, eita roa e tia ia tatou ia rave i teie mau ohipa atoa. Ua tu roa to tatou mana‘o, e ere anei? Ua ite hoi tatou paatoa maoti noa te turu a Iehova e rave ai tatou i tera mau ohipa.—Ioba 42:2.

TE MAU HAAMAITAIRAA IA HOROA NA IEHOVA

18. (a) Eaha te mau haamaitairaa ta tatou e fana‘o ma te horoa no te turu i te Faatereraa arii? (b) E nafea ia haapii i ta tatou tamarii e i te feia apî i roto i te parau mau ia na reira atoa?

18 Te horoa mai ra o Iehova ia tatou i te fana‘oraa taa ê ia turu i te ohipa rahi ta te Faatereraa arii e rave ra. Te haapapu mai ra o Iehova e haamaitai mai oia ia na reira tatou. (Mal. 3:10) Te fafau ra o ’na ia horoa tatou ma te aau tae, e manuïa ta tatou mau ohipa. (A taio i te Maseli 11:24, 25.) “E rahi a‘e te oaoa ia horoa ’tu i te horoahia mai.” (Ohi. 20:35) Te parau atoa mai ra ïa o Iehova e oaoa te noaa mai ia horoa tatou. Na roto i ta tatou mau parau e ohipa, e haapii ana‘e i ta tatou tamarii e i te feia apî i roto i te parau mau e nehenehe atoa ratou e turu i ta Iehova ohipa e e fana‘o e rave rahi haamaitairaa.

19. Mea nafea teie haapiiraa i te faaitoitoraa ia outou?

19 No ǒ mai ia Iehova te mau mea atoa. Ia horoa tatou i te reira na ’na, te faaite ra tatou mea here na tatou ia ’na e mea faufaa te mau mea atoa ta ’na i rave. (Par. 1, 29:17) I to te mau Iseraela horoaraa no te paturaa o te hiero, “oaoa roa a‘era te taata i te mea, ua horoa noa te taata; e ma te aau maitai i te horoa-noa-raa ia Iehova.” (Par. 1, 29:9) E tamau atoa ana‘e i te oaoa e te faaite i te mauruuru ma te horoa na Iehova i ta ’na i horoa mai.