Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Novema 2017

Eiaha e vaiiho i te tahi noa ’‘e mea ia faaere ia oe i te re

Eiaha e vaiiho i te tahi noa ’‘e mea ia faaere ia oe i te re

“Eiaha outou ia faaerehia i ta outou re e te tahi noa ’‘e taata.”—KOL. 2:18.

HIMENE: 122, 139

1, 2. (a) Eaha te re ta te mau tavini a te Atua e tiai nei? (b) Eaha te tauturu ia tatou ia tamau noa i te tiatonu i te re? (A hi‘o i te hoho‘a matamua.)

E TIATURIRAA faufaa rahi roa to te mau Kerisetiano faatavaihia. Te tiai ra ratou i te ora i nia i te ra‘i. Ua pii te aposetolo Paulo i teie tiaturiraa “te re, oia hoi te oraraa i te ra‘i i titau-manihini-hia ’i [oia] e te Atua.” (Phil. 3:14) I nia i te ra‘i, e faatere ratou i pihai iho ia Iesu Mesia i roto i ta ’na Faatereraa arii a ohipa ’tu ai e o ’na no te tauturu i te huitaata ia riro ei huitaata tia roa. (Apo. 20:6) Auê ïa tiaturiraa faahiahia mau! Te tiai ra te mamoe ê atu i te tahi atu re. Te tiaturi nei ratou e ora e a muri noa ’tu i roto i te paradaiso i nia i te fenua, e te mauruuru mau ra ratou i teie tiaturiraa!—Pet. 2, 3:13.

2 Ua hinaaro Paulo e tauturu i to ’na mau hoa Kerisetiano faatavaihia ia vai taiva ore noa a noaa ’tu ai ia ratou te re. Ua  parau atu oia ia ratou: “A mana‘o noa i te mau mea no nia ra.” (Kol. 3:2) Ua titauhia ia tiatonu ratou i ta ratou tiaturiraa faufaa rahi e ora i te ra‘i. (Kol. 1:4, 5) E tauturu te feruriraa i ta Iehova mau haamaitairaa i te taatoaraa o te mau tavini a te Atua ia tiatonu i te re. E parau mau teie, e tiaturiraa e ora i te ra‘i anei to ratou aore ra e tiaturiraa e ora i te fenua nei.—Kor. 1, 9:24.

3. Ua faaara Paulo i te mau Kerisetiano no nia i te aha?

3 Ua faaara atoa Paulo i te mau Kerisetiano no nia i te mau fifi atâta o te nehenehe e faaere ia ratou i te re. Ei hi‘oraa, ua papai oia i to Kolosa no nia i te mau Kerisetiano haavare o tei hinaaro ia mauruuru te Atua ia ratou na roto i te peeraa i te ture a Mose, eiaha râ na roto i te faatupuraa i te faaroo i te Mesia. (Kol. 2:16-18) Ua faahiti atoa Paulo i te mau fifi atâta e ite-atoa-hia ra i teie mahana e o te nehenehe e faaere ia tatou i te re. Ua faataa oia e nafea ia patoi i te mau hinaaro tia ore e eaha te rave ia tupu te fifi i roto i to tatou utuafare aore ra e to tatou mau taeae i roto i te amuiraa. E tauturu mai ta Paulo mau a‘oraa ia tatou i teie mahana. E hi‘opoa ana‘e ïa te tahi mau faaararaa î i te here ta tatou e ite nei i roto i ta ’na rata i to Kolosa.

A HAAPOHE I TE MAU HINAARO TIA ORE

4. No te aha e nehenehe ai te mau hinaaro tia ore e faaere ia tatou i te re?

4 I muri a‘e i to Paulo haamana‘oraa i to ’na mau taeae i to ratou tiaturiraa faahiahia mau, ua papai oia: “No reira, a haapohe i te mau mero o to outou tino no te fenua nei, to roto hoi te mau peu taotoraa tia ore, te peu viivii, te hinaaro faufau vî ore, te hinaaro ino, e te nounou.” (Kol. 3:5) E nehenehe te mau hinaaro tia ore e puai roa mai a faaere atu ai ia tatou i to tatou auhoaraa e o Iehova e to tatou tiaturiraa no a muri a‘e. Te parau ra te hoê taeae o tei rave na i te tahi peu tia ore e o tei ho‘i mai i roto i te amuiraa i muri a‘e e ua puai roa mai to ’na mau hinaaro tia ore e “ua taere roa i to ’na fariu-ê-raa ’tu i te reira.”

5. E nafea tatou e paruru ai ia tatou iho i te mau tupuraa atâta?

5 Mea titauhia ia vai ara tatou mai te peu e tei roto tatou i te hoê tupuraa o te nehenehe e aratai ia tatou ia ore e faaroo i ta Iehova mau ture aveia morare. Ei hi‘oraa, e haerea paari ia tauaparau na mua te hoê tane e te hoê vahine o te haamatau ra e nafea raua e faaohipa ’i i ta te Bibilia e haapii mai ra no nia i te mau mea mai te tapeapearaa, te apaparaa, e te faaearaa o raua ana‘e. (Mas. 22:3) E nehenehe te tahi mau fifi e fa mai i roto i te hoê tere ohipa aore ra ia ohipa tatou e te hoê taata mero ê. (Mas. 2:10-12, 16) Eaha ta oe e nehenehe e rave no te paruru ia oe? A faaite e e Ite no Iehova oe. Ia tura noa to oe haerea, e a haamana‘o e e nehenehe te faahinaaro e aratai i te ati. Mea titau-atoa-hia ia vai ara tatou mai te peu e te oto ra aore ra te mo‘emo‘e nei tatou. E hinaaro paha tatou ia haafaufaa mai te tahi taata ia tatou. No te rahi o te toaruaru e fariu atu ai paha tatou i nia i te taata o te tâu‘a mai ia tatou. Mea atâta te reira. Mai te peu e e ite noa ’tu oe i tera tupuraa, eiaha e vaiiho i te tahi noa ’‘e mea ia faaere ia oe i te re. A ani ia Iehova e to oe mau taeae e tuahine i te tauturu.—A taio i te Salamo 34:18; Maseli 13:20.

6. Eaha te tia ia haamana‘o ia maiti tatou i te faaanaanataeraa?

 6 No te haapohe i te mau hinaaro tia ore, mea titauhia ia patoi tatou i te mau faaanaanataeraa tia ore. I teie mahana, te haamana‘o mai ra te rahiraa o te faaanaanataeraa i te mau mea tei tupu na i Sodoma e Gomora. (Iuda 7) Te faaô ra te taata i te mau peu taotoraa tia ore i roto i te mau faaanaanataeraa mai te mea ra e e ere te reira i te mea ino. Mea tia ïa ia ara noa tatou. Eita ta tatou e nehenehe e farii i te mau faaanaanataeraa atoa ta teie nei ao e pûpû mai. Mea tia râ ia maiti tatou i te faaanaanataeraa o te ore e faaere ia tatou i te re o te ora.—Mas. 4:23.

“A AHU MAI” I TE HERE E TE HAMANI MAITAI

7. Eaha te mau fifi e nehenehe e tupu mai i roto i te amuiraa Kerisetiano?

7 Te oaoa nei tatou i te mea e tei roto tatou i te amuiraa Kerisetiano. Te haapii ra tatou i te Parau a te Atua i te mau putuputuraa, e te turu ra tatou te tahi i te tahi ma te here. E tauturu te reira ia tatou ia tiatonu noa i te re. Tera râ, i te tahi taime, e tupu te tahi mau taa-ore-raa o te nehenehe e faatupu i te peapea e to tatou mau taeae e tuahine. Mai te peu e eita tatou e faaafaro i teie mau peapea, e ohie roa tatou i te faatupu i te inoino.—A taio i te Petero 1, 3:8, 9.

8, 9. (a) Eaha te mau huru maitatai o te tauturu mai ia noaa ia tatou te re? (b) Eaha te tauturu mai ia vai hau noa mai te peu ua rave hoê hoa Kerisetiano i te tahi mea e riri ai tatou?

8 Eita tatou e nehenehe e vaiiho i te inoino ia faaere ia tatou i te re. Ua faataa Paulo eaha tei titauhia i te mau Kerisetiano ia rave: “Ia ahu mai outou i te here rahi, te aumihi, te hamani maitai, te haehaa, te mǎrû e te faaoromai, mai tei au i te feia maitihia e te Atua, e te mo‘a e te herehia. A faaoromai noa i te tahi e te tahi, e ia hapa noa mai te tahi ia oe, a faaore noa ’tu ïa i ta ’na hapa. Mai ia Iehova i faaore noa mai i ta outou ra, ia na reira atoa ’tu outou. Hau atu â râ i taua mau mea nei, a ahu mai i te here, o te taamu tia roa ïa e tahoê ai te taata.”—Kol. 3:12-14.

9 E tauturu mai te here e te hamani maitai ia faaore i te hapa a vetahi ê. Mai te peu e te mauiui nei tatou no ta te tahi taata i parau aore ra i rave, e feruri ana‘e i te mau taime i parau aore ra i rave ai tatou i te tahi mea tano ore i nia ia vetahi ê e ua faaore mai ratou i ta tatou hapa. Eita e ore e ua mauruuru roa tatou i to ratou here e hamani maitai! (A taio i te Koheleta 7:21, 22.) Te mauruuru nei tatou e te tahoê ra te Mesia i te feia haamori mau. (Kol. 3:15) Te here nei tatou paatoa i te hoê â Atua, te poro nei tatou i te hoê â poroi, e hoê â fifi ta tatou e faaruru nei. Mai te peu e here e e hamani maitai tatou te tahi i te tahi a faaore atu ai i te hapa, e tahoê atu â ïa te amuiraa e e tamau tatou i te tiatonu i te re.

10, 11. (a) No te aha mea atâta ’i te pohehae? (b) E nafea tatou e patoi ai i te pohehae ia ore te reira ia faaere ia tatou i te re?

10 E faaere te pohehae ia tatou i te re. Te faaite mai ra te tahi mau aamu Bibilia e mea atâta roa te pohehae. Ei hi‘oraa, ua pohehae Kaina ia Abela e taparahi pohe atura ia ’na. Ua pohehae Kora, Datana e Abirama ia Mose e orure hau atura ratou ia ’na. Ua pohehae Saula ia Davida e tamata ’tura i te taparahi pohe ia ’na. E parau mau iho â ta te Parau a te Atua e faaite ra: “I te mau vahi . . . te vai ra te pohehae e te  imi hara, tei reira atoa ïa te faahuehueraa e te mau mea iino atoa.”—Iak. 3:16.

11 Mai te peu e tutava tatou i te faatupu i te here e te hamani maitai, eita tatou e pohehae ohie noa. Te na ô ra te Parau a te Atua: “E faaoromai e e hamani maitai te here. Eita te here e pohehae.” (Kor. 1, 13:4) Ia ore te pohehae ia riro mai ei tuhaa o to tatou huru taata, mea tia ia hi‘o tatou i te mau mea mai ta Iehova e hi‘o ra. Mea tia ia hi‘o tatou i to tatou mau taeae e tuahine ei mero o te hoê â tino, te amuiraa. Te parau ra te Bibilia: “Ia haapopouhia te hoê, o te mau mero atoa ïa o te tino te oaoa.” (Kor 1, 12:16-18, 26) Mai te peu e ohipa maitai te tupu no te hoê taeae, e oaoa tatou no ’na, eita tatou e pohehae atu. A feruri na i te hi‘oraa o Ionatana, te tamaiti a Saula. Aita Ionatana i pohehae i te maitiraahia Davida no te riro mai ei arii. Ua faaitoito râ e ua turu noa oia ia Davida. (Sam. 1, 23:16-18) E nehenehe anei tatou e faaite i te hamani maitai e te here mai ia Ionatana?

IA NOAA I TO UTUAFARE TE RE

12. Eaha te a‘oraa Bibilia te tauturu i to tatou utuafare ia noaa i te re?

12 Ia pee te mau mero atoa o to tatou utuafare i te mau aratairaa Bibilia, e hau ïa e e oaoa to tatou utuafare, e e noaa ia tatou te re. Ua horoa Paulo i teie a‘oraa î i te paari i te mau utuafare: “Outou te mau vahine faaipoipo, a auraro i ta outou iho tane mai tei au i te Fatu. Outou te mau tane faaipoipo, a here noa i ta outou iho vahine e eiaha e iria ’tu ia ratou. Outou te mau tamarii, a faaroo i to outou na metua i te mau mea atoa, e mauruuru hoi te Fatu i te reira. Outou te mau metua tane, eiaha e faariri i ta outou mau tamarii, a toaruaru roa ’tu ai ratou.” (Kol. 3:18-21) Te ite ra anei tatou e nafea teie a‘oraa e tauturu ai i to tatou utuafare?

13. E nafea te hoê tuahine Kerisetiano e horoa ’i i ta ’na tane e ere i te Ite no Iehova, i te hinaaro e tavini ia Iehova?

 13 Peneia‘e e tuahine oe e aita ta oe tane faaipoipo e tavini ra ia Iehova. Eaha ta oe e rave mai te peu aita o ’na e haa ra ma te tano i nia ia oe, mai tei titauhia i te hoê tane faaipoipo? E iria paha oe, a tatama‘i atu ai e o ’na. E maitai râ anei te tupuraa? E noa ’tu o oe te upootia mai, e turai anei te reira ia ’na ia hinaaro e tavini ia Iehova? Eita paha. Ia faatura râ oe ia ’na ei upoo o te utuafare, e tauturu oe i to utuafare ia faatupu atu â i te hau e e faahanahana oe ia Iehova. E turai atoa paha to oe hi‘oraa maitai i ta oe tane ia tavini ia Iehova. I reira, o orua toopiti ïa te nehenehe e fana‘o i te re.—A taio i te Petero 1, 3:1, 2.

14. Eaha te titauhia i te hoê tane faaipoipo Kerisetiano mai te peu e aita ta ’na vahine e ere i te Ite no Iehova e faatura ra ia ’na?

14 Peneia‘e e taeae oe e aita ta oe vahine faaipoipo e tavini ra ia Iehova. Eaha ta oe e rave mai te peu aita o ’na e faatura ra ia oe? Mai te peu e tamata oe i te faaite atu ia ’na na vai e faatere ma te tutuô i nia ia ’na, e faatura anei o ’na ia oe? Eita roa ’tu! Te tiai ra te Atua ia riro oe ei tane here o te pee i to Iesu hi‘oraa. (Eph. 5:23) Mea faaoromai noa e mea here o Iesu, te upoo o te amuiraa. (Luka 9:46-48) Mai te peu e pee oe i to Iesu hi‘oraa, e hinaaro atoa paha ïa ta oe vahine i muri a‘e e tavini ia Iehova.

15. E nafea te hoê tane Kerisetiano e faaite ai i ta ’na vahine e mea here na ’na ia ’na?

15 Te haapii ra Iehova i te mau tane faaipoipo: “A here noa i ta outou iho vahine e eiaha e iria ’tu ia ratou.” (Kol. 3:19) E faatura te hoê tane î i te here i ta ’na vahine. E nafea? E faaroo o ’na i to ’na mau mana‘o e e faaite atoa o ’na e mea faufaa no ’na ta ’na e parau ra. (Pet. 1, 3:7) Noa ’tu aita ta te tane e nehenehe e rave i te  mau mea atoa ta ta ’na vahine e parau, e nehenehe te faarooraa ia ’na e tauturu atu ia rave i te faaotiraa maitai a‘e. (Mas. 15:22) Eita te hoê tane î i te here e titau ia faatura ta ’na vahine ia ’na. E tutava râ o ’na ia noaa mai ia ’na te faatura a ta ’na vahine. Ia here te hoê tane i ta ’na vahine e ta ’na mau tamarii, e oaoa a‘e ratou a tavini ai ia Iehova, e e noaa ia ratou te re o te ora.

E nafea te re e noaa ’i ia tinai tatou i te mau fifi utuafare? (A hi‘o i te paratarafa 13-15)

FEIA APÎ, EIAHA E VAIIHO I TE TAHI NOA ’‘E MEA E FAAERE IA OUTOU I TE RE!

16, 17. Ei taata apî, eaha te rave ia ore oe e iria i to oe na metua?

16 Peneia‘e e taurearea oe e te mana‘o ra oe e aita to oe na metua e taa ra ia oe aore ra mea etaeta roa ratou i nia ia oe. E riri paha oe e e turai te reira ia oe ia uiui ia oe e te hinaaro ra iho â anei oe e tavini ia Iehova. Ia faarue râ oe ia Iehova, e ite oe e aita ’tu e taata te here mau ra ia oe maori râ to oe na metua Kerisetiano e to oe mau hoa i roto i te amuiraa.

17 A feruri na: ahani aita to oe na metua i a‘o ia oe, e nafea ïa oe e ite ai e mea here anei na raua ia oe? (Heb. 12:8) Parau mau, e feia tia ore raua, e nehenehe iho â oe e riri i ta raua huru a‘oraa. Eiaha râ e tamau i to oe feruriraa i nia i te reira. A tamata i te taa i te mau tumu e na reira ’i raua. A faaea hau noa, e eiaha e iria. Te na ô ra te Parau a te Atua: “O tei ore e ru i te parau, ua noaa ia ’na te ite; e te taata i noaa ia ’na te ite ra e aau maitai to ’na.” (Mas. 17:27) Ia riro mai oe ei taata feruriraa paari o te farii i te a‘oraa a huti atu ai i te haapiiraa, aita e hi‘oraa mea nafea te a‘oraa i te horoaraahia mai. (Mas. 1:8) Eiaha e haamo‘e e e ô faufaa rahi te mau metua o te here ra ia Iehova. Te hinaaro ra ratou e tauturu ia oe ia ora e a muri noa ’tu.

18. No te aha oe e faaoti papu ai i te tamau noa i te tiatonu i te re?

18 E tiaturiraa e ora e a muri noa ’tu i te ra‘i anei to tatou aore ra i nia i te fenua paradaiso, e nehenehe tatou tataitahi e tiai ru i te hoê a muri a‘e faahiahia mau. Mea mau ta tatou tiaturiraa. Ua niuhia te reira i nia i te parau fafau a te Atua poiete o te ao taatoa, o te faaite ra: “E î hoi te fenua i te ite ia Iehova.” (Isa. 11:9) Fatata roa te mau taata atoa i nia i te fenua i te haapiihia e te Atua. Mea hoona ia ohipa tatou ia noaa ia tatou i teie re. A haamana‘o noa ïa eaha ta Iehova i fafau ia oe, e eiaha e vaiiho i te tahi noa ’‘e mea e faaere ia oe i te re!