Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) NOVEMA 2016

A tamau i te faaitoito te tahi i te tahi i te mau mahana atoa

A tamau i te faaitoito te tahi i te tahi i te mau mahana atoa

“E teie nei pu’e taeae, e ma’a parau faaitoitoraa ta orua ra, a parau mai.”—OHI. 13:15, Te Faufaa Api.

HIMENE: 121, 45

1, 2. No te aha mea faufaa ia faaitoito ia vetahi ê?

UA PARAU Cristina, 18 matahiti to ’na: “Varavara to ’u na metua i te faaitoito mai, pinepine râ raua i te faahapa ia ’u. Mea mauiui roa ta raua mau parau i te tahi taime. E parau mai raua e tamariirii noa â vau, eita vau e haere i mua, e mea poria roa vau. E pinepine au i te ta‘i. Mea au a‘e na ’u eiaha e paraparau ia raua. E ô mai tera mana‘o e mea faufaa ore au.” [1] Mea fifi roa te oraraa aita ana‘e vetahi ê e faaitoito mai ia tatou!

2 A feruri na i te tauturu ta tatou e nehenehe e horoa ia faaitoito tatou ia ratou. Te parau ra Rubén: “Ua aro vau e rave rahi matahiti i te mau mana‘o e mea faufaa ore au. I te hoê râ mahana, ua poro vau na muri i te hoê matahiapo, tapao atura oia e ua toaruaru vau. Ma te aumihi, ua faaroo mai oia i to ’u faaiteraa i to ’u mau huru aau. I muri a‘e, ua haamana‘o mai oia i te ohipa maitai ta ’u e rave ra. Ua haamana‘o atoa mai oia i te mau parau a Iesu, oia hoi, e faufaa rahi a‘e to tatou tataitahi i to te mau manu e rave rahi. E pinepine au i te haamana‘o i tera irava e te haaputapû noa ra te reira i to  ’u aau. Ua haa rahi te mau parau a teie matahiapo i roto i to ’u oraraa.”—Mat. 10:31.

3. (a) Eaha ta te aposetolo Paulo i parau no nia i te faaitoitoraa ia vetahi ê? (b) Eaha ta tatou e hi‘opoa i roto i teie tumu parau?

3 Te parau ra te Bibilia e mea titauhia ia tamau tatou i te faaitoito te tahi i te tahi. Ua papai te aposetolo Paulo i te mau Kerisetiano Hebera: “E ara, e au mau taeae, o te aau ino faaroo-ore-atoa-hia i roto i te hoê o outou na, i te faarueraa i te Atua ora ra. E a‘o [aore ra faaitoito] maite râ te tahi i te tahi eiaha ei mahana e tuua,” aore ra i te mau mahana atoa. Ua faataa Paulo te tumu: ia ore ratou ia etaeta i te puai haavare o te hara. (Heb. 3:12, 13) A feruri na i te maitai ta oe i ite i to te tahi atu taata faaitoitoraa ’tu ia oe. Eaha ïa te mau tumu e faaitoito ai tatou i to tatou mau taeae? Eaha ta tatou e nehenehe e haapii mai i ta Iehova, Iesu e Paulo huru faaitoitoraa ia vetahi ê? E e nafea tatou e nehenehe ai e faaitoito te tahi i te tahi? E hi‘opoa mai tatou i teie mau uiraa.

E HINAARO TATOU PAUROA I TE FAAITOITORAA

4. (a) O vai te hinaaro i te faaitoitoraa? (b) No te aha te rahiraa o te taata i teie mahana e ore ai e faaitoito ia vetahi ê?

4 E hinaaro tatou pauroa i te faaitoitoraa. Te mau tamarii iho â râ, e hinaaro ratou ia faaitoito to ratou metua ia ratou. Te faataa ra te orometua haapii o Timothy Evans e e hinaaro te mau tamarii i te faaitoitoraa mai te raau tupu e hinaaro i te pape. Te fa‘i ra oia: “Ia faaitoitohia, e ite te tamarii e mea faufaa oia e mea auhia oia.” E no te mea te ora nei tatou i te “anotau hopea,” e rave rahi o te faaite ra i te miimii, e mea iti to ratou “aroha” te tahi i te tahi. (Tim. 2, 3:1-5) Eita vetahi mau metua e faaitoito i ta ratou tamarii no te mea aita roa ’tu to ratou iho metua i faaitoito ia ratou. E hinaaro atoa te feia paari a‘e i te faaitoitoraa. I te rahiraa râ o te taime, e ere tera ta tatou e ite. Ei hi‘oraa, e rave rahi o te amuamu ra e aita roa ’tu ratou e haapopouhia no te ohipa ta ratou e rave ra.

A haapopou ia vetahi ê no te mau ohipa ta ratou i rave

5. E nafea ia faaitoito ia vetahi ê?

5 E nehenehe tatou e faaitoito ia vetahi ê ma te haapopou ia ratou no te ohipa maitai ta ratou i rave. E faaitoito atoa paha tatou ia vetahi ê ma te parau atu e e mau huru maitatai au mau to ratou. Oia atoa, ma te tamahanahana ’tu, ia oto aore ra ia paruparu ratou. (Tes. 1, 5:14) No te mea e ite pinepine tatou i to tatou mau taeae e tuahine, mea rahi te taime e nehenehe ai tatou e faaitoito ia ratou. (A taio i te Koheleta 4:9, 10.) A ui ïa: ‘Te faaite ra anei au ia vetahi ê no te aha vau e here e e haafaufaa ’i ia ratou? E na reira anei au i te mau taime atoa e nehenehe ai au?’ A feruri na i ta te Bibilia e parau ra: “E maitai rahi hoi to te parau ia au te parauraa.”—Mas. 15:23.

6. No te aha Satani e hinaaro ai e haaparuparu i te nunaa o te Atua? A horoa i te hoê hi‘oraa e nafea oia.

6 Te na ô ra te Maseli 24:10: “Ia paupau to aho i te mahana e ati ai ra, te iti hua ra  to oe itoito.” Ua ite Satani e ia faatoaruaru oia ia tatou, e nehenehe ïa oia e haaparuparu i to tatou auhoaraa e o Iehova. Ua tamata oia i te faatoaruaru ia Ioba ma te haamauiui maitai ia ’na. Aita râ te opuaraa a Satani i manuïa. Ua vai taiva ore Ioba ia Iehova. (Ioba 2:3; 22:3; 27:5) E nehenehe tatou e aro ia Satani a ore atu ai oia e upootia. Ia tamau tatou i te faaitoito i te mau mero o to tatou utuafare e to tatou mau taeae e tuahine o te amuiraa, e tauturu tatou te tahi i te tahi ia oaoa e ia vai piri ia Iehova.

TE MAU HI‘ORAA E PEE

7, 8. (a) Mea nafea Iehova i te faaitoitoraa i te taata? (b) E nafea te mau metua e pee ai i to Iehova hi‘oraa? (A hi‘o i te hoho‘a matamua.)

7 E faaitoito Iehova i te taata. Ua papai te fatu salamo: “Te fatata nei Iehova i te feia aau paruparu ra; e te faaora nei oia i te taata aau taiâ.” (Sal. 34:18) I te taime a mǎta‘u e a toaruaru ai te peropheta Ieremia, ua fafau Iehova e tauturu ia ’na. (Ier. 1:6-10) Ua tono Iehova i te hoê melahi no te faaitoito i te peropheta Daniela. Ua pii teie melahi ia Daniela “taata here-rahi-hia.” (Dan. 10:8, 11, 18, 19) E nehenehe anei oe e pee teie hi‘oraa a faaitoito ai oe i to mau taeae e tuahine, te mau pionie, oia atoa te feia paari o te ore e nehenehe e ohipa mai i na mua ’‘e?

A tauturu i ta outou mau tamarii ia faaoromai i te mau faahemaraa

8 Noa ’tu ua faaea noa Iesu i pihaiiho ia Iehova e rave rahi matahiti, i to Iesu haereraa mai i te fenua nei, ua ite Iehova e e titauhia ia faaitoito o ’na i ta ’na Tamaiti. Ua faaroo Iesu i to ’na Metua i te paraparauraa mai ia ’na mai te ra‘i mai i te taime a haamata ’i oia i ta ’na ohipa pororaa e i te matahiti hopea oia i te fenua nei. E piti taime to Iehova parauraa: “Tau Tamaiti here teie, ua mauruuru roa vau ia ’na.” (Mat. 3:17; 17:5) Mea papu e ua itoito-roa-hia Iesu a faaroo ai oia i to ’na Metua i te parauraa e ua here oia ia ’na e ua oaoa oia ia ’na. I muri a‘e, i te po hou Iesu a pohe ai, ua hepohepo roa oia. Ua faaitoito Iehova ia ’na ma te tono i te hoê melahi no te haapuai e no te tamahanahana ia ’na. (Luka 22:43) E te mau metua, e pee outou i to Iehova hi‘oraa ma te faaitoito tamau i ta outou tamarii. Ia rave ratou i te ohipa maitai, a haapopou atu. Ia farerei ratou i te faahemaraa i te fare haapiiraa, a tutava no te faaitoito e no te tauturu ia ratou ia faaoromai.

9. Eaha ta tatou e nehenehe e haapii mai i to Iesu huru i nia i ta ’na mau aposetolo?

9 Ua vaiiho mai Iesu i te hoê hi‘oraa maitai ia pee tatou. I te po hou oia a pohe ai, ua horoi Iesu i te avae o ta ’na mau aposetolo e ua haapii atu i te faufaaraa ia faatupu i te haehaa. Ua faatupu râ ratou i te teoteo, mârô atura o vai tei rahi a‘e i rotopu ia ratou, e o Petero, ua faatietie ïa ia ’na ma te parau e eita roa ’tu oia e faarue ia Iesu. (Luka 22:24, 33, 34) Aita râ Iesu i faaea i nia i to ratou mau hape. Ua haapopou oia ia ratou i te taiva-ore-raa ia ’na. Ua fafau oia e e rave ratou i te mau ohipa rahi a‘e i ta ’na iho i rave e ua haapapu atu e ua here Iehova ia ratou. (Luka 22:28; Ioa. 14:12; 16:27) E nehenehe tatou e ui, ‘Te pee ra anei au i to  Iesu hi‘oraa, a haapopou atu ai ia vetahi ê no to ratou huru maitatai au mau, ma te ore e hi‘o i to ratou mau hape?’

10, 11. Mea nafea Paulo i te faaitoitoraa i to ’na mau taeae, e ua ineine oia i te aha?

10 E pinepine te aposetolo Paulo i te faahiti i te mau parau maitatai no to ’na mau taeae. I roto i to ’na mau tere, ua apiti oia e rave rahi matahiti e vetahi o ratou. Ua matau maitai ïa Paulo ia ratou. Aita râ oia i papai no nia i to ratou mau hape. Ua haapopou Paulo ia ratou. Ei hi‘oraa, ua parau Paulo e ua riro Timoteo ei “tamaiti here” na ’na “e te haavare ore i te Fatu,” e ua papu ia ’na e e haapao Timoteo i te hinaaro o vetahi ê. (Kor. 1, 4:17; Phil. 2:19, 20) Ua parau Paulo i te mau Kerisetiano no Korinetia e e “hoa” Tito no ’na e “te tauturu ia ’u ia outou na.” (Kor. 2, 8:23) Mea papu, ua itoitohia Timoteo raua Tito a ite ai raua i ta Paulo i mana‘o no raua!

11 Ua ineine Paulo raua to ’na hoa Baranaba i te pohe no te faaitoito i to raua mau taeae. Ei hi‘oraa, ua ite raua e mea rahi te taata i te oire no Lusetera o tei hinaaro e haapohe ia raua. Ua haere faahou râ raua i ǒ no te faaitoito i te mau pǐpǐ apî e no te tauturu ia ratou ia vai taiva ore ia Iehova. (Ohi. 14:19-22) I muri a‘e, i Ephesia, ua fifihia Paulo no te nahoa taata riri. Ua faaea maoro râ oia i reira no te faaitoito i to ’na mau taeae. Te parau ra te Ohipa 20:1, 2 (Te Faufaa Api): “Ua haaputuputu maira Paulo i te mau pipi, ’e ua faaitoito atura oia ia ratou. ’E oti a’era, ua aroha atura oia ia ratou, ’e ua reva atura i Makedonia. Haere atura oia na taua mau pae fenua ra ma te faaitoito hua i te mau taeae, ’e ua tae atura i Heleni.”

E FAAITOITO TE TAHI I TE TAHI

12. No te aha mea maitai no tatou ia haere i te mau putuputuraa?

12 Te hinaaro ra Iehova i te mea maitai roa ’‘e no tatou. No reira oia i parau mai ai ia tamau i te putuputu. I ta tatou mau putuputuraa, e haapii mai tatou no nia ia ’na e e faaitoito tatou te tahi i te tahi. (Kor. 1, 14:31; a taio i te Hebera 10:24, 25.) Te parau ra Cristina, o tei faahitihia i te omuaraa o teie tumu parau: “Ta ’u e au roa ’‘e i te mau putuputuraa, o te here ïa e te faaitoitoraa ta ’u e fana‘o ra i ǒ. I te tahi taime, e haere au i te Piha a te Basileia e te oto pauroa. E tapiri mai râ te mau tuahine, e tauahi mai ia ’u, a parau atoa mai ai ia ’u e mea nehenehe maitai au. E parau mai ratou e ua here ratou ia ’u e te oaoa nei i te ite e te haere ra vau i mua i te pae varua. Ua faaitoito maitai te reira ia ’u!” Mea faufaa roa ia faaitoito tatou tataitahi ia vetahi ê!—Roma 1:11, 12.

13. No te aha e hinaaro ai te feia o tei tavini maoro ia Iehova i te faaitoitoraa?

13 E hinaaro atoa te feia o tei tavini maoro ia Iehova i te faaitoitoraa. A feruri na ia Iosua. A fatata ’i Iseraela i te tomo atu i te Fenua tǎpǔhia, ua maiti Iehova ia Iosua no te aratai ia ratou. Ua parau râ Iehova ia Mose ia faaitoito ia Iosua, noa ’tu ua tavini oia ia Iehova e rave rahi matahiti. Ua parau Iehova: “E poroi . . . oe ia Iosua, e haamahanahana ’tu, e faaitoito atu ia ’na; oia hoi te haere na mua i taua mau taata nei, e na ’na ratou e faanoho i te fenua ta oe e hi‘o noa i to mata ana‘e na.” (Deut. 3:27, 28) Ua titauhia ia faaitoitohia Iosua, no te mea i muri a‘e, e aro te nunaa ehia aroraa e e pau ratou i roto hoê a‘e aroraa. (Ios. 7:1-9) I teie mahana, e nehenehe tatou e faaitoito i te  mau matahiapo e te mau tiaau haaati o te haa rahi ra no te haapao i to te Atua nunaa. (A taio i te Tesalonia 1, 5:12, 13.) Ua parau te hoê tiaau haaati: “I te tahi taime, e horoa mai te mau taeae i te hoê rata haamauruururaa e faaite ra e ua au roa ratou i to mâua haereraa mai e farerei ia ratou. Tapea maitai mâua i teie mau rata, a taio faahou ai i te tahi taime a paruparu ai mâua. Mea faaitoito mau!”

Ia faaitoito tatou i ta tatou tamarii, e tauturu atu tatou ia piri atu â ratou ia Iehova (A hi‘o i te paratarafa 14)

14. Eaha te mau hi‘oraa o te faaite ra e mea maitai ia haapopou ia vetahi ê ia horoa ’tu tatou i te a‘oraa?

14 I te hoê taime, ua titauhia ia a‘o te aposetolo Paulo i to Korinetia. I to ratou peeraa i tera a‘oraa, ua haapopou Paulo ia ratou. (Kor. 2, 7:8-11) Mea papu, ua faaitoito ta ’na mau parau ia ratou ia tamau i te rave i te mea maitai. I teie mahana, e nehenehe te mau matahiapo e te mau metua e pee i to Paulo hi‘oraa. Te parau ra Andreas, e piti tamarii ta ’na: “E tauturu te faaitoitoraa i te tamarii ia paari mai i te pae varua e i te pae feruriraa. E a‘o oe ma te faaitoito atu. Ua ite ta mâua na tamarii eaha te mea maitai, maoti râ ta mâua faaitoitoraa tamau, ua riro roa ei peu matau na raua te raveraa i te mea maitai.”

NA TE AHA E TAUTURU IA OE IA FAAITOITO IA VETAHI Ê?

15. Eaha te hoê ravea e nehenehe ai tatou e faaitoito ia vetahi ê?

15 A faaite i to outou mau taeae e tuahine e te haafaufaa ra outou i ta ratou mau tutavaraa e to ratou mau huru maitatai. (Par. 2, 16:9; Ioba 1:8) Ia na reira tatou, e pee tatou i to Iehova e Iesu hi‘oraa. Te haafaufaa nei raua i ta tatou e rave ra no raua, noa ’tu aita e noaa ra ia tatou i te rave mai ta tatou e hinaaro ra. (A taio i te Luka 21:1-4; Korinetia 2, 8:12.) Ei hi‘oraa, ua ite tatou e te tutava nei to tatou mau taeae e tuahine ruhiruhia i te haere tamau i te mau putuputuraa e i roto i te taviniraa. Te faaitoito e te haapopou ra anei tatou ia ratou no te mau ohipa atoa ta ratou e rave ra?

16. I teihea taime e nehenehe ai tatou e faaitoito ia vetahi ê?

16 A faaitoito pinepine ia vetahi ê. Ia tapao tatou i te tahi noa ’‘e ohipa maitai ta te hoê taata i rave, a haapopou ia ’na. I to Paulo e Baranaba haereraa i Anetiohia i Pisidia, ua parau te mau aratai o te sunago: “E te mau taeae nei, te hinaaro na outou i te a‘o mai i te taata nei, a parau  mai.” Ua faaohipa Paulo i tera taime no te faaitoito i te taata. (Ohi. 13:13-16, 42-44) Ia faaitoito tatou ia vetahi ê, e faaitoito atoa mai ratou ia tatou.—Luka 6:38.

17. Eaha te ravea maitai roa ’‘e no te haapopou ia vetahi ê?

17 A faataa maitai atu. I to Iesu haapopouraa i te mau Kerisetiano no Tuatira, mea taa maitai to ’na mau mana‘o e ua faataa oia i te ohipa ta ratou i rave. (A taio i te Apokalupo 2:18, 19.) E nafea tatou e pee ai i to ’na hi‘oraa? Peneia‘e ma te haapopou i te hoê metua vahine faaea taa noa no to ’na aupururaa i ta ’na mau tamarii noa ’tu mea fifi no ’na. Mai te peu e e metua oe, e haapopou oe i ta oe mau tamarii no ta ratou mau tutavaraa no te tavini ia Iehova. A faataa ia ratou eaha te ohipa maitai ta oe i tapao. Mea taa maitai ana‘e ta tatou mau faaitoitoraa ia vetahi ê, e taa ïa ia ratou e ma te aau tae mau tatou i parau ai i te reira.

18, 19. E nafea tatou e nehenehe ai e tauturu te tahi i te tahi ia vai piri noa ia Iehova?

18 Ua parau Iehova ia Mose ia faaitoito e ia haapuai ia Iosua. Mea papu, eita Iehova e paraparau roa mai ia tatou i teie mahana e eita oia e faaue mai ia faaitoito tatou i te tahi taata. Te oaoa nei râ oia ia ite i te mau tutavaraa ta tatou e rave no te faaitoito ia vetahi ê. (Mas. 19:17; Heb. 12:12) Ei hi‘oraa, ia horoa te hoê taeae i te hoê oreroraa parau i roto i ta tatou amuiraa, e nehenehe tatou e parau atu ia ’na i ta tatou i au i roto i ta ’na oreroraa parau. Peneia‘e ua tauturu mai ta ’na mau parau ia faaruru i te hoê fifi aore ra ia taa i te hoê irava. Ua papai te hoê tuahine i te taeae o tei horoa i te hoê oreroraa parau: “Noa ’tu ua paraparau taua tau minuti noa, ua taa ia oe i to ’u ahoaho, ua tamahanahana e ua faaitoito oe ia ’u. Te hinaaro nei au ia ite oe e i to oe paraparauraa ma te hamani maitai, i nia i te tahua e a aparau ai taua, mai te huru ra e e ô no ǒ mai ia Iehova tera.”

19 E tauturu tatou te tahi i te tahi ia vai piri ia Iehova ma te pee i ta Paulo a‘oraa: “E haamahanahana [aore ra e faaitoito] outou ia outou iho, e e faatupu i te maitai te tahi i te tahi, mai ta outou â hoi e rave na.” (Tes. 1, 5:11) Ia tamau tatou i te “a‘o [aore ra faaitoito] maite . . . te tahi i te tahi eiaha ei mahana e tuua,” e faaoaoa tatou ia Iehova!

^ [1] (paratarafa 1) Ua tauihia te tahi mau i‘oa.