Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Atopa 2017

Hoê ohipa o te faaite ra i te hamani maitai Kerisetiano

Hoê ohipa o te faaite ra i te hamani maitai Kerisetiano

I TE hoê oire iti i Gujarat, Initia, ua bapetizohia to John metua tane ei Ite no Iehova i te pae hopea o te mau matahiti 1950. E Katolika Roma râ o John, to ’na mau taeae e tuahine e pae, e to ’na metua vahine, e mea haere roa ratou i te pureraa. No reira ratou i patoi ai i te faaroo a to ratou metua tane.

I te hoê mahana, ua faaue to John metua tane ia ’na ia afai i te hoê rata i te hoê taeae o te amuiraa. I tera râ poipoi, ua mutu te rima o John a tamata ’i oia i te tatara i te hoê punu auri rahi. Ua hinaaro râ oia e rave i ta to ’na metua tane i faaue ia ’na, taamu atura oia i te hoê ahu i nia i to ’na manimani rima mutu e afai atura i taua rata ra.

I to John taeraa ’tu i ǒ, horoa ’tura oia te rata i te vahine a te taeae. E Ite no Iehova o ’na. Ite a‘era taua vahine ra i te manimani rima pêpê o John e hinaaro atura e rapaau i to ’na rima. Rave atura oia i ta ’na vairaa tauihaa utuuturaa ma‘i, tamâ ’tura te vahi pêpê, e tapiri atura i te taamu ma‘i i nia iho i te manimani rima. Hamani atura oia i te hoê au‘a ti veavea na John. I te taatoaraa o te taime, ua paraparau noa te vahine ia ’na ma te hamani maitai no nia i te Bibilia.

No to ’na hamani maitai, ua haamata to John mana‘o no nia i te mau Ite no Iehova i te taui. Ua ui ïa oia e piti uiraa no nia i ta te mau Ite no Iehova mau tiaturiraa o te ore e tuati ra i te mau tiaturiraa a te mau Katolika. Ua ui oia o Iesu anei te Atua e e mea tano anei ia pure ia Maria. Ua haapii te tuahine i te reo Gujarati, ua nehenehe ïa oia e pahono ia John na roto i to ’na iho reo. Ua faaite atu oia i te mau pahonoraa i roto i te Bibilia e ua horoa ’tu i te buka rairai “Teie parau apî oaoa o te Basileia” (Beretane).

I muri a‘e, i to John taioraa i te buka rairai, taa ’tura ia ’na e tera te parau mau. Haere atura oia e farerei i to ’na perepitero e ui atura hoê â na uiraa. Riri roa a‘era te perepitero e taora ’tura te Bibilia i nia ia John ma te tutuô: “Satani oe! A faaite mai ihea roa te papairaahia e ere o Iesu te Atua. A faaite mai ihea roa te papairaahia e ere mea tano ia haamori ia Maria. A faaite mai!” Ua huru ê roa John i ta te perepitero i rave. Parau atura oia i te perepitero e eita roa ’tu oia e tomo faahou i roto i te hoê fare pure Katolika. Aita iho â oia i haere faahou!

Ua haamata ’tura John i te haapii na muri i te mau Ite no Iehova, ua farii i te parau mau, e ua haamata i te tavini ia Iehova. I muri mai, ua na reira atoa te tahi mau mero o to ’na utuafare. E 60 matahiti i muri a‘e, te haamana‘o noa ra te pêpê i nia i to John manimani rima ia ’na, te ohipa o te hamani maitai Kerisetiano o tei turai ia ’na ia tavini ia Iehova.—Kor. 2, 6:4, 6.