Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Me 2017

Te oaoa o te hoê oraraa haapae

Te oaoa o te hoê oraraa haapae

UA FAAIPOIPO Daniel raua Miriam i Tetepa 2000. E oraraa fana‘o to raua i Barcelone, Paniora. Te faataa ra Daniel: “Maoti ta mâua ohipa, ua nehenehe mâua e tamaa i te mau fare tamaaraa maitai, ratere na te ara, e oomo i te ahu maitatai roa. Pinepine atoa mâua i roto i te pororaa.” Ua tupu râ te tahi mea.

I te hoê tairururaa i 2006, ua faaroo Daniel i te hoê oreroraa parau o tei faahiti i teie uiraa: “Te rave ra anei tatou i te mau mea atoa no te tauturu i te feia i ‘fatata i te pohe’ ia nehenehe ratou e ora e a muri noa ’tu?” (Mas. 24:11) Ua faataa te oreroraa parau e e hopoia na tatou te haereraa e poro i te poroi o te Bibilia i te taata no te mea maoti noa te reira e ora ’i ratou. (Ohi. 20:26, 27) Te haamana‘o ra o Daniel: “E au ra e te paraparau roa mai ra Iehova ia ’u.” Ua faahiti atoa te oreroraa parau e mea oaoa a‘e tatou ia rave tatou hau atu â i roto i ta Iehova taviniraa. Ua ite Daniel e parau mau te reira inaha ua tapao oia e mea oaoa roa Miriam, o tei haamata ê na ta ’na taviniraa pionie.

Ua putapû roa Daniel i teie oreroraa parau, faaoti ihora oia i te rave i te tahi mau tauiraa i roto i to ’na oraraa. Ua haamata oia ma te faaiti mai i ta ’na hora ohipa, ua rave i te taviniraa pionie, e ua feruri i te oaoa ta raua e ite ia haere raua e tavini i te vahi e hinaaro-rahi-hia ra te feia poro.

HAAMATARAA FIFI, PARAU APÎ OAOA RÂ I MURI IHO

I Me 2007, ua vaiiho Daniel raua Miriam i ta raua ohipa e ua haere i Panama, hoê fenua ta raua i haere na mua ’‘e. Ta raua tuhaa fenua, e rahiraa motu ïa i te taamotu Bocas del Toro i te miti no Caraïbes. E Ngäbe te rahiraa o te taata e ora ra i ǒ. Ua mana‘o o Daniel raua Miriam e nehenehe raua e faaea i Panama piri i te va‘u ava‘e e te moni ta raua i haaputu.

Ua ratere raua na te mau motu na nia i te poti e te pereoo taataahi. Te haamana‘o noa ra raua i te taime matamua raua a taahi ai te pereoo taataahi i nia i te hoê atearaa e 30 kilometera na nia i te mau aivi tia. Mea veavea roa taua mahana ra. Ua oti roa Daniel i te rohirohi, fatata roa oia i te matapoirihia. Tera râ, mea farii maitai roa te mau utuafare Ngäbe ta raua i farerei, i muri a‘e iho â râ i to na hoa faaipoipo haapiiraa i te tahi mau parau na roto i te reo o tera tuhaa fenua. Aita i maoro, ua raea ta raua e 23 haapiiraa Bibilia.

Eaha tei tupu i muri a‘e i te pauraa ta raua moni? Te parau ra Daniel: “Ma te oto, ua haamata mâua i te feruri i te taime e titauhia ia ho‘i mâua i Paniora. Ua oto roa mâua ia vaiiho i ta mâua mau piahi Bibilia.” Hoê râ ava‘e i muri a‘e, ua tae mai te hoê poroi oaoa mau no raua. Te parau ra Miriam: “Ua titau-manihini-hia mâua no te tavini ei pionie taa ê. Ua oaoa roa mâua, e nehenehe mâua e faaea i roto i ta mâua tuhaa taviniraa!”

TO RAUA OAOA RAHI ROA ’‘E

No te tahi râ mau tauiraa i roto i te faanahonahoraa, ua titauhia ia faaea Daniel e Miriam i ta raua taviniraa pionie taa ê i 2015. Eaha ta raua e rave i teie nei? Ua tiaturi raua i te parau fafau i roto i te Salamo 37:5 : “E tuu atu i to parau ia Iehova; e tiaturi ia ’na, e na ’na e faatupu i te reira.” Ua ite raua i te tahi ohipa ia nehenehe raua e amo i ta raua haamâu‘araa ei pionie tamau, e i teie mahana te tavini nei raua i roto i te hoê amuiraa i Veraguas, Panama.

Te parau ra Daniel: “Hou mâua a faarue ai i te fenua Paniora, aita i papu roa ia mâua e nehenehe iho â anei mâua e ora i te hoê oraraa haapae. I teie mahana, tera to mâua oraraa e aita mâua e ere ra i te tahi noa ’‘e mea faufaa mau.” Eaha to raua oaoa rahi roa ’‘e? Te pahono ra raua: “Eita e nehenehe e parau i te oaoa ia tauturu i te feia haehaa ia haapii no nia ia Iehova!”