Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Mati 2017

A tavini ia Iehova ma te aau tia!

A tavini ia Iehova ma te aau tia!

“E Iehova e, e haamana‘o mai oe ia ’u i to ’u nei haerea i mua ia oe ma te parau mau, e ma te aau tia.”—ARII 2, 20:3.

HIMENE: 52, 65

1-3. Eaha te auraa e tavini ia Iehova ma “te aau tia”? A horoa i te hoê hi‘oraa.

E TAATA tia ore tatou e e hape atoa tatou. Ma te mauruuru, ua horoa mai Iehova i te hoê hoo e ua ineine oia i te faaore i ta tatou mau hapa. Ia faaite tatou i te haehaa e te tatarahapa, e nehenehe ïa tatou e ani ia ’na ia faaore i ta tatou mau hapa. Ia papu ia tatou e eita Iehova e tahoo mai ia au “i ta tatou hara.” (Sal. 103:10) Tera râ, mea titauhia ia “haamori . . . ia ’na ma te aau mau,” aore ra tia. (Par. 1, 28:9) E nafea tatou e na reira ’i noa ’tu e taata tia ore tatou?

2 No te tauturu ia tatou, e nehenehe tatou e faaau i te oraraa o te arii Asa i to te arii Amazia. Noa ’tu ua rave na arii e piti i te mea maitai, ua hape atoa raua no te mea e taata tia ore raua. Te parau nei râ te Bibilia e “ua tia . . . te aau o Asa e hope roa a‘era o ’na pue mahana.” (Par. 2, 15:16, 17; 25:1, 2; Mas. 17:3) Ua tutava noa oia i te faaoaoa ia Iehova e ua “haamori” ia ’na ana‘e. (Par. 1, 28:9) Area ia Amazia,  aita to ’na “aau” i “tia maitai mau” i te taviniraa ia Iehova. I muri a‘e i to ’na upootiaraa i nia i te mau enemi o te Atua, ua hopoi mai oia i ta ratou mau idolo e ua haamori i te reira.—Par. 2, 25:11-16.

3 Ia tavini te hoê taata i te Atua ma te hoê “aau tia,” ua here ïa o ’na ia Iehova e ua hinaaro oia e haamori ia ’na e a muri noa ’tu. I roto i te Bibilia, e pinepine te ta‘o “aau” i te faataa i to tatou huru o roto. E ô atoa mai te parau o to tatou huru feruriraa, ta tatou e au, ta tatou e hinaaro e rave i to tatou oraraa e te tumu tatou e rave ai i te mea ta tatou e rave ra. Noa ’tu e taata tia ore tatou, e nehenehe tatou e haamori ia Iehova ma te aau tia. E tavini tatou ia ’na no te mea te hinaaro mau ra tatou e na reira, e ere no te mea ua titauhia ia tatou ia na reira aore ra e peu matauhia tera e tatou.—Par. 2, 19:9.

4. Eaha ta tatou e hi‘opoa mai i teie nei?

4 E taa maitai atu â ia tatou te auraa e tavini i te Atua ma te aau tia ia hi‘opoa tatou i te oraraa o Asa e oia atoa o na arii taiva ore e toru no Iuda, o Iehosaphata, Hezekia e o Iosia. Noa ’tu ua rave teie na arii e maha i te mau hape, ua mauruuru Iehova ia ratou. Ua ite oia e ua tavini ratou ia ’na ma te aau tia. No te aha te Atua i faaite ai i teie huru feruriraa, e nafea tatou e nehenehe ai e pee i to ratou hi‘oraa?

“UA TIA . . . TO ASA RA AAU IA IEHOVA”

5. Eaha ta Asa i rave a riro mai ai oia ei arii?

5 O Asa te toru o te arii no Iuda i muri a‘e a amaha ’i te nunaa Iseraela ei faatereraa arii a Iseraela e ei faatereraa arii a Iuda. A riro mai ai Asa ei arii no Iuda, ua faaoti oia i te faaore roa i te haamoriraa hape e te mau peu taotoraa faufau i roto i ta ’na faatereraa arii. Ua haamou oia i te mau idolo ta te taata i haamori na e ua tiahi i te feia faaturi o te hiero. “Ua faaore a‘era . . . Asa i te i‘oa arii o tana tupuna vahine . . . no te mea ua hamani oia i te idolo” faufau. (Arii 1, 15:11-12; Par. 2, 15:16) Ua faaitoito atoa Asa i te nunaa ia “imi . . . ia Iehova,” e ia auraro “i te ture e te mau parau atoa.” Ua tutava Asa i te tauturu ia vetahi ê ia haamori ia Iehova.—Par. 2, 14:4.

Ua faaoti Asa i te faaore roa i te haamoriraa hape i roto i to ’na basileia

6. Ua aha Asa a haere mai ai to Etiopia e aro i to Iuda?

6 I te roaraa o na ahuru matahiti matamua a faatere ai Asa, aita i itehia te tama‘i i te faatereraa arii a Iuda. I muri a‘e, ua haere mai hoê mirioni faehau e 300 pereoo no Etiopia mai e aro i to Iuda. (Par. 2, 14:1, 6, 9, 10) Eaha ta Asa i rave? Ua papu ia ’na e e nehenehe Iehova e tauturu i to ’na nunaa. No reira, ua pure oia ia Iehova ia tauturu ia ’na ia upootia mai i te tama‘i. (A taio i te Paraleipomeno 2, 14:11.) I te tahi taime, ua maiti Iehova i te horoa i te upootiaraa i to ’na nunaa i nia i to ratou mau enemi, noa ’tu ua taiva te mau arii ia ’na.  Ua na reira oia no te faaite e o ’na te Atua mau. (Arii 1, 20:13, 26-30) I tera râ taime, ua tauturu Iehova i to ’na nunaa no te mea ua tiaturi Asa ia ’Na. Ua pahono Iehova i te pure a Asa e ua upootia mai ratou. (Par. 2, 14:12, 13) I muri a‘e, e hape rahi ta Asa i rave a ani ai oia i te tauturu a te arii no Arama, eiaha râ ia Iehova. (Arii 1, 15:16-22) Noa ’tu râ te reira, ua ite Iehova e ua here Asa ia ’na. “Ua tia . . . to Asa ra aau ia Iehova e hope roa a‘era o ’na pue mahana.” E nafea tatou e nehenehe ai e pee i te hi‘oraa maitai o Asa?—Arii 1, 15:14.

7, 8. E nafea oe e nehenehe ai e pee i te hi‘oraa o Asa?

7 E nafea tatou e ite ai e te haamori ra anei tatou ia Iehova ana‘e? E nehenehe tatou e uiui ia tatou iho: ‘E auraro anei au ia Iehova noa ’tu te tahi taime mea fifi? Ua faaoti papu ra anei au eiaha e haaviivii i ta ’na amuiraa?’ A feruri na i te itoito i titauhia ia Asa no te tatara i te tiaraa o to ’na tupuna vahine! I te tahi taime, e hinaaro paha oe i te itoito mai i to Asa. Ei hi‘oraa, mai te peu ua hara te hoê mero o to oe utuafare aore ra hoê hoa rahi, aita i tatarahapa e ua tiavaruhia oia i te amuiraa, ua faaoti papu ra anei oe i te ore e amui i teie taata? E turai to oe aau ia oe ia aha?

8 Mai ia Asa, i te tahi taime, e nehenehe tatou e mana‘o e aita te taata e au mai ia tatou. Peneia‘e e faaooo mai to oe mau hoa haapiiraa aore ra te mau orometua no te mea e Ite no Iehova oe. Aore ra e mana‘o paha te feia i te raveraa ohipa e mea maamaa oe no te mea e rave oe i te mahana faafaaearaa no te haere i te tairururaa aore ra eita oe e rave pinepine i te hora hau. I roto i tera mau tupuraa, a tiaturi i te Atua, mai ia Asa. A pure ia Iehova, a faaitoito e a tamau i te rave i te mea tano. A haamana‘o, ua haapuai te Atua ia Asa e e haapuai atoa oia ia oe.

9. E nafea tatou e faaoaoa ’i ia Iehova ia poro tatou?

9 Aita o Asa i mana‘o noa ia ’na, ua faaitoito oia ia vetahi ê ia “imi . . . ia Iehova.” E tauturu atoa tatou i te taata ia haamori ia Iehova. Te ite ra oia ia paraparau tatou ia vetahi ê no nia ia ’na. E oaoa oia ia ite e te na reira ra tatou no to tatou here ia ’na e no te mea te haapeapea ra tatou no vetahi ê e no to ratou ananahi!

UA IMI IEHOSAPHATA IA IEHOVA

10, 11. E nafea tatou e nehenehe ai e pee i te hi‘oraa o Iehosaphata?

10 Ua tamau te tamaiti a Asa o Iehosaphata i te “haapao . . . i te parau a tana metua a Asa.” (Par. 2, 20:31, 32) Mea nafea ïa? Mai to ’na metua tane, ua faaitoito Iehosaphata i te nunaa ia tamau i te haamori ia Iehova. Ua tono oia i te tahi mau tane i te mau oire no Iuda no te haapii i te nunaa te “buka ture a Iehova.” (Par. 2, 17:7-10) Ua haere atoa oia i te mau tuhaa fenua o te faatereraa  arii a Iseraela i apatoerau, i te nunaa ra i te mau mou‘a o Epheraima, no te “faaho‘i mai ia ratou . . . ia Iehova ra.” (Par. 2, 19:4) E arii Iehosaphata “o tei imi ia Iehova ma te aau atoa.”—Par. 2, 22:9.

Ua faaitoito Iehosaphata i te nunaa ia tamau i te haamori ia Iehova

11 I teie mahana, te hinaaro ra Iehova ia haapiihia te taata na te ao atoa nei no nia ia ’na e e nehenehe tatou pauroa e tauturu i roto i tera ohipa. E fa anei na oe te pororaa i te mau ava‘e atoa? E hinaaro anei oe e haapii i te Bibilia ia vetahi ê ia nehenehe atoa ratou e haamata i te haamori ia Iehova? Te pure ra anei oe no nia i te reira? Ia rave oe i te mau tutavaraa, e tauturu mai Iehova ia oe ia haamata i te hoê haapiiraa Bibilia. Ua ineine anei oe i te haapii i te hoê taata noa ’tu e titauhia ia horoa oe i to taime vata no te reira? Mai ia Iehosaphata o tei tamata i te tauturu ia vetahi ê ia haamata faahou i te tavini ia Iehova, e nehenehe tatou e tamata i te tauturu i te feia aita i haere faahou i te mau putuputuraa e i te pororaa. E faanaho atoa te mau matahiapo o te amuiraa no te farerei e no te tauturu i te mau taata tiavaruhia o te ora ra i roto i te tuhaa fenua a te amuiraa, o tei faaea i te rave i te hara.

12, 13. (a) Eaha ta Iehosaphata i rave a riaria ai oia? (b) No te aha e tia ia pee tatou i te hi‘oraa o Iehosaphata?

12 Mai to ’na metua tane, o Asa, ua tiaturi Iehosaphata ia Iehova a haere mai ai te hoê nuu rahi e aro i to Iuda. (A taio i te Paraleipomeno 2, 20:2-4.) Ua riaria oia e ua ani i ta Iehova tauturu. I roto i ta ’na pure, ua fa‘i oia e eita ta ratou e nehenehe e aro i te enemi. Ua parau atoa oia e aita ta ’na e ta to ’na nunaa e ravea. Ua papu ia Iehosaphata e e tauturu Iehova ia ratou. Ua parau oia: “Tei ia oe . . . to matou mata.”—Par. 2, 20:12.

13 Mai ia Iehosaphata, i te tahi mau taime, eita paha tatou e ite e nafea i mua i te hoê fifi, e mǎta‘u atoa paha tatou. (Kor. 2, 4:8, 9) A haamana‘o râ i ta Iehosaphata i rave. I mua i te taatoaraa o te nunaa, ua pure oia ia Iehova e ua faaite atu oia i to ratou mana‘o paruparu. (Par. 2, 20:5) E nehenehe te mau upoo o te utuafare e pee i te hi‘oraa o Iehosaphata. A ani ia Iehova ia tauturu ia oe e to oe utuafare ia faaruru i te fifi e no te ite eaha te rave. Eiaha e haama ia faaroo to oe utuafare i teie mau pure. E taa ia ratou e te tiaturi ra oe ia Iehova. Ua tauturu oia ia Iehosaphata e e tauturu atoa oia ia oe.

UA RAVE HEZEKIA I TE MEA TANO

14, 15. Mea nafea Hezekia i te tiaturi-maite-raa i te Atua?

14 O Hezekia te tahi arii o tei “ati maite . . . i[a] Iehova.” Ua na reira oia noa ’tu ua horoa to ’na metua tane i te hi‘oraa ino e ua haamori i te mau idolo. “Ua faarue oia i te mau vahi teitei, e ua haaparari i te mau tii, e ua tâpû i te mau . . . idolo.” “Ua vavahi hoi i te ophi veo ra, i hamanihia e Mose” no te mea i haamori noa na te mau Iseraela i te reira. Ua haamori Hezekia ia Iehova ana‘e. “Ua haapao . . . oia i ta ’na parau, ta Iehova i parau mai ia Mose ra.”—Arii 2, 18:1-6.

15 A arii ai Hezekia, ua haere mai te nuu puai no Asura i Iuda e ua opua e haamou ia Ierusalema. Ua faaooo te arii  no Asura o Senakeriba ia Iehova e ua hinaaro oia ia tuu Hezekia. I tera taime atâta mau, ua tiaturi maite Hezekia ia Iehova e ua ani i ta ’na tauturu. Ua ite oia e mea puai a‘e te Atua i te feia no Asura e e nehenehe ta ’na e faaora i to ’na nunaa. (A taio i te Isaia 37:15-20.) Ua pahono te Atua i ta ’na pure ma te tono i te hoê melahi no te haapohe 185 000 faehau no Asura.—Isa. 37:36, 37.

16, 17. E nafea tatou e nehenehe ai e pee i te hi‘oraa o Hezekia?

16 I muri a‘e, ua roohia Hezekia i te ma‘i e ua fatata roa o ’na i te pohe. I tera taime fifi mau, ua taparu oia ia Iehova ia haamana‘o i to ’na taiva ore e ia tauturu mai ia ’na. (A taio i te mau Arii 2, 20:1-3.) Ua faaroo Iehova i te pure a Hezekia e ua faaora mai ia ’na. I teie mahana, ua ite tatou mai roto mai i te Bibilia e eita tatou e nehenehe e tiai ia faaora-semeio-hia mai tatou e te Atua aore ra ia ora maoro atu â tatou. Mai ia Hezekia râ, e nehenehe tatou e tiaturi i ta Iehova tauturu. E nehenehe tatou e parau ia ’na: “Teie tau parau ia oe, e Iehova e, e haamana‘o mai oe ia ’u i to ’u nei haerea i mua ia oe ma te parau mau, e ma te aau tia.” E tiaturi anei oe e e haapao noa iho â Iehova ia oe, i roto atoa i te ma‘i?—Sal. 41:3.

17 E nafea â tatou e nehenehe ai e pee i te hi‘oraa o Hezekia? Peneia‘e e haafifi te tahi ohipa i to tatou auhoaraa e o Iehova aore ra e rave te reira i te taime i nia i ta tatou taviniraa ia ’na. Ei hi‘oraa, e rave rahi taata i teie mahana o te faariro ra i te tahi atu mau taata ei idolo. Ua faahiahia roa ratou i te feia tuiroo e te tahi atu mau taata ta ratou i ore i matau. E rave rahi o te faataa i te taime no te taio no nia i te tahi mau taata e no te mataitai i ta ratou mau hoho‘a. Aore ra e pinepine ratou i te faaohipa i te mau reni faahoaraa aore ra i te tahi atu mau ravea no te paraparau i te taata i nia i te Internet. Mea papu, mea au paha na tatou e paraparau i to tatou mau fetii aore ra hoa rahi ma teie mau ravea. E mâu‘a râ paha to tatou taime i nia i te mau reni faahoaraa i nia i te Internet. E nehenehe atoa tatou e faaoru ia rahi te taata tei au i te mau hoho‘a aore ra mana‘o ta tatou i pia i nia i te Internet. Aore ra, aita ana‘e vetahi e mataitai faahou ra i te reira, e inoino paha tatou. E nehenehe tatou e haapii mai i te mau hi‘oraa o te aposetolo Paulo, o Akuila e Perisila. Te mana‘o ra anei oe tera ta ratou ohipa pauroa te mahana: hi‘o i te mau mea atoa ta te taata e rave ra, hau atu â te taata o te ore e haamori ia Iehova? Te parau ra te Bibilia e ua poro noa Paulo. E ua faaohipa Perisila raua Akuila i to raua taime no te poro e “ua faaite maite atura . . . i te parau a te Atua” ia vetahi ê. (Ohi. 18:4, 5, 26) A uiui: ‘Te haapao maite ra anei au eiaha e faariro i te taata ei idolo? Te ape anei ra tatou i te faataa i te rahiraa o to tatou taime no te rave i te mau mea e ere i te mea faufaa mau?’—A taio i te Ephesia 5:15, 16.

UA AURARO IOSIA I TA IEHOVA MAU FAAUERAA

18, 19. E nafea tatou e riro ai mai ia Iosia?

18 Ua auraro atoa te arii Iosia i ta Iehova mau faaueraa “ma te aau atoa.”  (Par. 2, 34:31) E hina o Iosia na Hezekia. I to ’na taurearearaa, “ua imi . . . oia i te Atua o tana tupuna o Davida.” E i te 20raa o to ’na matahiti, ua haamata oia i te tamâ ia Iuda i te peu haamoriraa idolo. (A taio i te Paraleipomeno 2, 34:1-3.) Ua tutava Iosia ia mauruuru Iehova, ua haa rahi a‘e oia i te mau arii e rave rahi no Iuda. Tae a‘era i te hoê mahana, ua itehia mai e te tahu‘a rahi te buka Ture a te Atua i roto i te hiero. O te buka paha ta Mose iho i papai! A taio ai te papai parau i te reira ia Iosia, ua taa ’tura ia ’na e mea faufaa ia haa rahi atu â no te tavini maite ia Iehova. Ua faaitoito atoa oia ia vetahi ê ia na reira. Aita ’tura te nunaa i “faarue i te pee . . . ia Iehova” a ora noa ’i Iosia.—Par. 2, 34:27, 33.

Ua hinaaro mau Iosia ia mauruuru Iehova ia ’na e ua rave oioi oia i te mau tauiraa

19 Mai te peu e taata apî oe, e nehenehe oe e pee i te hi‘oraa o Iosia e e haapii atu â no nia ia Iehova. Ua haapii mai paha Iosia i to ’na metua tupuna o tei tatarahapa, te arii Manase, e nehenehe ta Iehova e faaore i te mau hapa. E nehenehe atoa oe e haapii mai i te feia ruhiruhia ra o to oe utuafare e ta oe amuiraa. E nehenehe ta ratou e faaite ia oe e rave rahi ohipa maitatai ta Iehova i rave no ratou. A haamana‘o atoa eaha to Iosia huru a haapii ai oia i ta te mau Papai e parau ra. Ua hinaaro mau oia ia mauruuru Iehova ia ’na e ua rave oioi oia i te mau tauiraa. Ma te taio i te mau Papai, e hinaaro atu â paha oe e auraro ia Iehova. E puai mai ïa to oe auhoaraa e o ’na e e oaoa ’tu â oe. I muri iho, e hinaaro oe e paraparau ia vetahi ê no nia ia Iehova. (A taio i te Paraleipomeno 2, 34:18, 19.) Ia haapii oe i te Bibilia, e taa atoa paha ia oe e te vai ra te tahi mau ravea e nehenehe ai oe e haamaitai ia oe i roto i ta oe taviniraa i te Atua. Mai te peu e tera iho â, a tutava i te rave i teie mau tauiraa, mai ia Iosia.

A TAVINI IA IEHOVA MA TE AAU TIA!

20, 21. (a) Eaha te tuearaa e itehia i rotopu i na arii e maha? (b) Eaha ta tatou e hi‘opoa i roto i to muri mai tumu parau?

20 Eaha ta tatou e nehenehe e haapii mai no nia i teie na arii e maha no Iuda o tei tavini ia Iehova ma te aau tia? Ua faaoti papu teie mau tane i te faaoaoa ia Iehova e i te haamori ia ’na no te toea o to ratou oraraa. Ua tiaturi ratou ia ’na a haere mai ai te mau enemi e aro ia ratou. Te mea faufaa roa ’‘e, ua tavini ratou ia Iehova no to ratou here ia ’na.

21 Noa ’tu e taata tia ore teie na arii e maha e ua hape ratou, ua mauruuru Iehova ia ratou. Ua ite oia eaha to roto i to ratou aau e ua papu ia ’na e ua here mau ratou ia ’na. E taata tia ore tatou, e hape atoa tatou. E mauruuru râ Iehova ia tatou ia ite oia e te tavini ra tatou ia ’na ma te aau tia. I roto i to muri mai tumu parau, e hi‘opoa tatou eaha te nehenehe e haapii mai i te mau hape a teie mau arii.