Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) MATI 2017

A faatupu i te faaroo: A faaoti ma te paari!

A faatupu i te faaroo: A faaoti ma te paari!

“[A] ani . . . ma te faaroo, eiaha e feaa.”—IAK. 1:6.

HIMENE: 81, 70

1. Eaha te tumu i rave ai Kaina i te hoê faaotiraa tano ore, e eaha te faahopearaa?

E FAAOTIRAA faufaa mau tei titauhia ia Kaina ia rave. E nehenehe ta ’na e maiti ia haavî i to ’na mau huru aau hara. E faahopearaa maitai ïa te itehia. Aore ra e nehenehe oia e vaiiho noa i to ’na mau huru aau ia ohipa i nia i ta ’na mau haaraa. E faahopearaa ino ïa te itehia. Te faaite mai ra te Bibilia e ua rave Kaina i te faaotiraa tano ore. Te faahopearaa o ta ’na faaotiraa, o te pohe ïa o to ’na taeae, o Abela. Hau atu â, ua ino to Kaina auhoaraa e to ’na Atua poiete.—Gen. 4:3-16.

2. No te aha mea faufaa ’i ia rave i te mau faaotiraa maitatai?

2 Mea titau-atoa-hia ia rave tatou pauroa i te mau maitiraa e te mau faaotiraa i roto i to tatou oraraa. Mea faufaa roa te tahi mau faaotiraa, e te tahi atu, e ere ïa. Teie râ, e nehenehe te rahiraa o te mau faaotiraa ta tatou e rave e ohipa atu â i nia i to tatou oraraa. Ia rave tatou i te mau faaotiraa maitatai, e iti mai te mau fifi e e fana‘o atoa tatou i te hoê oraraa hau roa.  Ia rave râ tatou i te mau faaotiraa iino, e farerei ïa tatou e rave rahi fifi e e inoino atoa tatou.—Mas. 14:8.

3. (a) No te rave i te mau faaotiraa î i te paari, e tia ia tatou ia tiaturi i te aha? (b) Eaha te mau uiraa ta tatou e hi‘opoa mai?

3 Eaha te tauturu ia tatou ia rave i te mau faaotiraa î i te paari? Mea titauhia ia faatupu tatou i te faaroo i te Atua, ia tiaturi e e hinaaro oia e tauturu ia tatou e e horoa atoa mai oia i te paari e hinaarohia no te rave i te mau faaotiraa maitatai. E titau-atoa-hia ia faatupu i te faaroo i ta ’na Parau, ia tiaturi i ta ’na mau a‘oraa. (A taio i te Iakobo 1:5-8.) A haafatata ’i tatou ia Iehova e a haafaufaa roa ’tu ai tatou i ta ’na Parau, e tauturu mai te reira ia tatou ia tiaturi e ua ite o ’na eaha te mea maitai roa ’‘e no tatou. I muri iho, e hi‘opoa tatou i ta ’na Parau hou a rave ai i te mau faaotiraa. E nafea râ tatou e nehenehe ai e haamaitai i to tatou aravihi no te rave i te mau faaotiraa maitatai? E e tia anei ia taui tatou i ta tatou mau faaotiraa?

MEA TITAUHIA IA RAVE TATOU I TE MAU FAAOTIRAA

4. Eaha te faaotiraa te titauhia ia Adamu ia rave, e eaha te mau faahopearaa?

4 Ua titauhia ia rave te taata i te mau faaotiraa faufaa mai te omuaraa mai iho â. Ua titauhia ia faaoti Adamu, te taata matamua, e faaroo anei oia i to ’na Atua poiete, ia Iehova, aore ra e faaroo i ta ’na vahine, ia Eva. Ua maiti Adamu e faaroo ia Eva, o tei turai ia ’na ia rave i te hoê faaotiraa ino mau. No reira Iehova i tiavaru ai ia Adamu i rapaeau i te ô i Edene, e ua pohe oia i muri a‘e. I teie mahana, te mauiui atoa ra tatou no te faaotiraa ino a Adamu.

Ua horoa mai Iehova i ta ’na Parau, o te haapii mai e nafea ia rave i te mau faaotiraa î i te paari

5. Eaha te mana‘o tano no te hopoia e rave i te mau faaotiraa?

5 Te mana‘o ra vetahi e mea ohie a‘e paha te oraraa ia ore ratou e rave i te mau faaotiraa. Peneia‘e tera atoa to oe mana‘o. Mea maitai râ ia haamana‘o e aita Iehova i hamani i te taata mai te matini o te ore e nehenehe e feruri e e maiti. Ua horoa mai oia i ta ’na Parau, o te haapii mai e nafea ia rave i te mau faaotiraa î i te paari. Te hinaaro ra Iehova ia rave tatou i te mau faaotiraa, e e tauturu mai teie hopoia ia tatou. A feruri na i te mau hi‘oraa i muri nei.

6, 7. Eaha te faaotiraa tei titauhia i te mau Iseraela ia rave, e no te aha e riro ai ei mea fifi no ratou ia na reira? (A hi‘o i te hoho‘a matamua.)

6 A ora ’i ratou i te Fenua tǎpǔhia, ua titauhia ia maiti te mau Iseraela e haamori ia Iehova aore ra e tavini i te tahi atu mau atua. (A taio i te Iosua 24:15.) E au ra e e faaotiraa ohie teie. Tera râ, na roto i ta ratou e maiti e rave, e ora aore ra e pohe ratou. I te tau o te mau haava, ua tamau te mau Iseraela i te rave i te mau maitiraa ino. Ua faaea ratou i te haamori ia Iehova e ua haamata i te haamori i te mau atua haavare. (Tav. 2:3, 11-23) I muri a‘e, i te tau o te peropheta Elia, ua titauhia ia maiti te nunaa o te Atua i te tavini ia Iehova aore ra i te atua haavare o Baala. (Arii 1, 18:21) E nehenehe e mana‘o e e faaotiraa ohie teie no te mea, te taviniraa ia Iehova, tera te mea maitai roa ’‘e. Eita te hoê  taata feruriraa paari e tavini i te hoê atua haavare. Aita râ te nunaa i nehenehe e rave i te hoê faaotiraa. Te parau ra te Bibilia e ua feaa piti te mana‘o o te mau Iseraela. Ma te paari, ua faaitoito Elia i te nunaa ia haamori i te Atua mau, ia Iehova.

7 No te aha e riro ai ei mea fifi no te mau Iseraela ia rave i te hoê faaotiraa î i te paari? A tahi, aita ratou i faatupu i te faaroo ia Iehova e ua patoi ratou i te auraro ia ’na. Aita ratou i tiaturi ia Iehova e aita ratou i faataa i te taime no te haapii no nia ia ’na aore ra no nia i to ’na paari. Ahani ratou i na reira, ua tauturu ïa te mea ta ratou i haapii ia ratou ia rave i te mau faaotiraa î i te paari. (Sal. 25:12) Te piti, ua haafariu-ê-hia te mau Iseraela e te mau taata no te tahi atu mau nunaa. Ua ohipa tera mau taata ěê i nia i te feruriraa o te mau Iseraela e ua rave atoa i te mau faaotiraa no te mau Iseraela. Haamata ’tura te mau Iseraela i te pee i te feia ěê e i te haamori i to ratou mau atua haavare. Ua faaara Iehova i te mau Iseraela no nia i tera mau ohipa e rave rahi matahiti a‘enei.—Exo. 23:2.

E TANO ANEI IA RAVE VETAHI Ê I TE MAU FAAOTIRAA NO TATOU?

8. Eaha te haapiiraa faufaa ta tatou e nehenehe e huti mai i te mau Iseraela?

8 Te haapii mai ra te hi‘oraa o te mau Iseraela e ia rave tatou i te mau faaotiraa î i te paari, mea tia ia faaohipa tatou i te Parau a te Atua. Te haamana‘o mai ra te Galatia 6:5 e na te taata tataitahi e amo i te hopoia no ta ’na iho mau faaotiraa. Mea papu maitai, eiaha tatou e horoa i te tahi atu taata te hopoia e rave i te faaotiraa no tatou. Ia haapii râ tatou tataitahi i ta te Atua i parau mea tia e ia maiti i te rave i te reira.

Ia vaiiho tatou ia vetahi ê ia rave i te mau faaotiraa no tatou, ua maiti ïa tatou i te pee ia ratou

9. No te aha mea atâta ia vaiiho ia vetahi ê ia rave i te mau faaotiraa no tatou?

9 E nafea tatou e vaiiho ai ia vetahi ê ia rave i te mau faaotiraa no tatou? Ma te vaiiho ïa ia ratou ia faahepo ia tatou ia rave i te hoê faaotiraa ino. (Mas. 1:10, 15) Mea atâta râ te reira. E hopoia na tatou te peeraa i to tatou mana‘o haava haapiihia e te Bibilia. Ia vaiiho tatou ia vetahi ê ia rave i te mau faaotiraa no tatou, ua maiti ïa tatou i te pee ia ratou. E nehenehe tera maitiraa e aratai i te faahopearaa ino mau.

10. Eaha te faaararaa ta Paulo i horoa i to Galatia?

10 Ua faaara te aposetolo Paulo i to Galatia eiaha e vaiiho ia vetahi ê ia rave i te faaotiraa no ratou. (A taio i te Galatia 4:17.) Ua tamata te tahi mau taeae i Galatia i te rave i te mau faaotiraa no vetahi ê i roto i te amuiraa. Eaha ta ratou fa? Ua hinaaro teie feia miimii ia pee to ratou mau taeae ia ratou, eiaha râ i te mau aposetolo. Aita ratou i faaite i te haehaa, e aita ratou i faatura i te tiaraa o to ratou mau taeae e rave i ta ratou iho mau faaotiraa.

11. E nafea tatou e tauturu ai ia vetahi ê ia titauhia ia ratou ia rave i te mau faaotiraa?

11 E nehenehe tatou pauroa e haapii mai i te hi‘oraa maitai o te aposetolo Paulo. Ua ite oia e e tiaraa to to ’na mau taeae e rave  i ta ratou iho mau faaotiraa e ua faatura oia i te reira. (A taio i te Korinetia 2, 1:24.) I teie mahana, e nehenehe te mau matahiapo e pee i teie hi‘oraa ia horoa ratou i te tauturu no te hoê tupuraa e titauhia ’i i te hoê Kerisetiano ia rave i ta ’na iho faaotiraa. E oaoa ratou i te horoa i te mau haamaramaramaraa niuhia i nia i te Parau a te Atua i to ratou mau taeae e tuahine. E vai ara râ te mau matahiapo ia vaiiho i te Kerisetiano tataitahi ia rave i ta ’na iho mau faaotiraa, no te mea na ’na iho e amo i te faaotiraa ta ’na i rave. Teie te tahi haapiiraa faufaa: E nehenehe tatou e tauturu ia vetahi ê ia taa i te a‘oraa Bibilia o te tano i to ratou tupuraa. Teie râ, e tiaraa e e hopoia na to tatou mau taeae e tuahine te raveraa i ta ratou iho mau faaotiraa. Ia rave ratou i te mau faaotiraa î i te paari no ratou iho, e maitaihia ratou. Mea papu, eiaha roa ’tu e mana‘o e e mana to tatou no te faaoti eaha te tia i te tahi atu mau taeae e tuahine ia rave.

E tauturu te mau matahiapo î i te here ia vetahi ê ia rave i ta ratou iho mau faaotiraa (A hi‘o i te paratarafa 11)

EIAHA E VAIIHO I TO OE MAU HURU AAU IA OHIPA I NIA I TA OE MAU FAAOTIRAA

12, 13. No te aha mea atâta ia rave i te mau faaotiraa ua iria aore ra ua toaruaru ana‘e tatou?

12 I teie mahana, e rave rahi o te pee nei i te hinaaro o to ratou aau ia rave ratou i te mau faaotiraa. Mea atâta râ te reira. Te faaara mai ra te Bibilia e eiaha e niu i ta tatou mau faaotiraa i nia i to tatou aau tia ore aore ra mau huru aau. (Mas. 28:26) Eita tatou e nehenehe e tiaturi i to tatou aau no te mea “e haavare rahi to te aau i te mau mea atoa nei” e mea “ino roa.” (Ier. 17:9) E rave rahi hi‘oraa i roto i te Bibilia o te faaite ra i te mau faahopearaa iino ia tiaturi i nia i to tatou aau tia ore. (Arii 1, 11:9; Ier. 3:17; 13:10) Eaha ïa te tupu ia pee tatou i to tatou aau ia rave tatou i te mau faaotiraa?

13 Ua faaue mai Iehova ia here ia ’na ma to tatou aau atoa e ia here i to tatou taata  tupu mai ia tatou iho. (Mat. 22:37-39) Mea titauhia râ ia vai ara tatou. Ua faaite mai te mau Papai i roto i te paratarafa na mua ’tu e mea atâta ia vaiiho i to tatou huru aau ia ohipa i nia i to tatou feruriraa e ta tatou mau haaraa. Ei hi‘oraa, mea fifi no te hoê taata iria ia rave i te hoê faaotiraa maitai. (Mas. 14:17; 29:22) Mea fifi atoa no te hoê taata o tei toaruaru ia rave i te hoê faaotiraa î i te paari. (Num. 32:6-12; Mas. 24:10) Mea tia ia vaiiho tatou i te ture a te Atua ia aratai i to tatou feruriraa. (Roma 7:25) Ia rave tatou i te mau faaotiraa faufaa, eiaha roa ’tu e vaiiho i to tatou mau huru aau ia ohipa i nia i ta tatou e rave ra.

EAHA TE TAIME E TAUI AI OE I TA OE MAU FAAOTIRAA

14. E nafea tatou e ite ai e mea tano ia taui i te tahi mau faaotiraa?

14 Mea titauhia ia rave tatou i te mau faaotiraa î i te paari. Ua ite râ te hoê taata î i te paari e e titauhia ia ’na i te tahi taime ia hi‘opoa faahou i te faaotiraa i ravehia na mua ’‘e e peneia‘e ia taui i te reira. Ua vaiiho mai te Atua ra o Iehova i te hi‘oraa tia roa no tatou. A tapao na eaha ta ’na i parau i to Nineve i te tau o Iona: “Ua hi‘o maira te Atua i ta ratou i rave ra, e ua faarue ana‘e ratou i ta ratou parau ino; e ua tatarahapa ihora te Atua i te ino ta ’na i parau ra e, e tuu mai i nia ia ratou, e aore a‘era oia i na reira mai.” (Iona 3:10) I to Iehova iteraa e ua taui to Nineve e ua faaea i te rave i te mea ino, ua taui o ’na i ta ’na faaotiraa. Te faaite ra te reira i te huru au noa, te haehaa e te aumihi o Iehova. Taa ê atu i te taata e rave rahi, eita Iehova e rave i te mau faaotiraa feruri-ore-hia, noa ’tu ua riri oia.

I to Iehova iteraa e ua taui to Nineve e ua faaea i te rave i te mea ino, ua taui o ’na i ta ’na faaotiraa

15. No te aha e titauhia ia taui tatou i te hoê faaotiraa?

15 Te vai ra paha te tahi mau taime mea maitai ia hi‘opoa faahou i te hoê faaotiraa, ei hi‘oraa, ia taui te mau tupuraa. A haamana‘o, ua taui Iehova i te tahi mau taime i ta ’na mau faaotiraa. (Arii 1, 21:20, 21, 27-29; Arii 2, 20:1-5) E faatano atoa paha tatou i te hoê faaotiraa ia au i te mau haamaramaramaraa apî tei noaa mai ia tatou. A feruri na i te hi‘oraa o te arii Davida. Ua rave oia i te hoê faaotiraa no nia i te mootua a Saula, o Mephiboseta, o tei niuhia i nia i te haamaramaramaraa hape horoahia ia ’na ra. I muri a‘e, i te noaaraa ia Davida te mau haamaramaramaraa papu, ua taui atura oia i ta ’na faaotiraa. (Sam. 2, 19:24-29) I te tahi taime, e haerea paari ia na reira atoa tatou.

16. (a) Eaha te mau mana‘o o te tauturu mai ia rave tatou i te mau faaotiraa? (b) No te aha e tia ’i ia hi‘opoa faahou tatou i te mau faaotiraa ravehia na mua ’‘e, e e nafea tatou e na reira ’i?

16 Te parau ra te Bibilia eiaha tatou ia rave ru noa i te mau faaotiraa faufaa. (Mas. 21:5) E tia ia rave tatou i te taime no te feruri maite no nia i te mau haamaramaramaraa atoa, ia nehenehe tatou e rave i te hoê faaotiraa î i te paari. (Tes. 1, 5:21) Hou a faaoti ai eaha te rave, e tia i te hoê upoo utuafare ia faataa i te taime no te rave i te  mau maimiraa i roto i te Bibilia e te mau papai Kerisetiano. Mea maitai atoa ia faaroo i te mana‘o o te tahi atu mau mero o te utuafare. A haamana‘o e ua parau te Atua ia Aberahama ia faaroo i ta ’na vahine faaipoipo. (Gen. 21:9-12) E tia ia faataa atoa te mau matahiapo i te taime no te rave i te mau maimiraa. Ia tae mai te tahi mau haamaramaramaraa apî o te titau i te tauiraa i roto i te mau faaotiraa ta ratou i rave na, eita ratou e mǎta‘u e eita vetahi ê e faatura faahou ia ratou. Ia titauhia, e tia ia ineine te mau matahiapo feruriraa au noa i te faatano i to ratou mana‘o e ta ratou mau faaotiraa. Mea maitai atoa ia pee tatou pauroa i to ratou hi‘oraa. E tauturu te reira i te amuiraa ia faatupu i te hau e ia vai hoê noa.—Ohi. 6:1-4.

A RAVE I TA OE I FAAOTI I TE RAVE

17. Eaha te tauturu mai ia rave i te mau faaotiraa maitatai?

17 E titauhia paha ia feruri maitai atu â no te tahi mau faaotiraa. Ei hi‘oraa, mea feruri maitai te faaotiraa e faaipoipo aore ra o vai ta oe e faaipoipo, e ere i te ohipa hauti. Te tahi faaotiraa e titauhia ia feruri maitai, o te faaotiraa ïa e afea ia haamata i te taviniraa ma te taime taatoa. Hou a rave ai i tera mau huru faaotiraa faufaa, mea tia ia feruri maite tatou i te tupuraa e ia pure ia Iehova no te tauturu. E titau paha te reira i te taime. Ia hinaaro râ tatou e rave i te hoê faaotiraa î i te paari, mea tia ia tiaturi tatou ia Iehova, ia faaroo i ta ’na haapiiraa e ia pee i ta ’na aratairaa. (Mas. 1:5) Ua horoa mai Iehova i te a‘oraa maitai roa ’‘e no tatou i roto i ta ’na Parau. Mea faufaa ïa ia rave tatou i te mau maimiraa e ia pure ia Iehova no ta ’na aratairaa. E nehenehe ta ’na e horoa mai i te mau huru maitatai e titauhia ia tatou ia rave tatou i te mau faaotiraa o te tuea i to ’na hinaaro. Hou tatou a rave ai i te mau faaotiraa faufaa, e tia ia ui tatou ia tatou iho: ‘E faaite anei teie faaotiraa e te here ra vau ia Iehova? E hopoi anei te reira i te oaoa e te hau i roto i to ’u utuafare? E faaite anei te reira e e taata faaoromai au e te maitai?’

18. No te aha Iehova e titau ai ia rave tatou i ta tatou iho mau faaotiraa?

18 Eita Iehova e faahepo ia tatou ia here e ia tavini ia ’na. Ua horoa mai oia i te tiamâraa e rave i tera maitiraa. E faatura oia i ta tatou hopoia e to tatou tiaraa e maiti i te tavini ia ’na. (Ios. 24:15; Koh. 5:4) Eita râ o ’na e ani ia rave tatou i ta tatou i faaoti i te rave ia au i ta ’na Parau. Mai te peu e tiaturi tatou i te mau aratairaa a Iehova, a pee atu ai i ta ’na mau faaueraa tumu, e nehenehe ïa tatou e rave i te mau faaotiraa î i te paari. E faaite atoa tatou e e taata papu tatou i roto i to tatou mau haerea atoa.—Iak. 1:5-8; 4:8.