Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Novema 2015

 TUMU PARAU MATAMUA

Toru uiraa ta te taata e hinaaro e ui i te Atua

Toru uiraa ta te taata e hinaaro e ui i te Atua

E HITU matahiti to Susan, ua haamata oia i te uiui no nia i te Atua a tapeahia ’i to ’na hoa Al e iva matahiti i te fare ma‘i. Ua roohia o ’na i te ma‘i o te haafifi i te mau uaua uira o te tino parauhia polio. Ua tuuhia o ’na i roto i te tahi afata auri ia nehenehe to ’na mahaha ia pâmu i to ’na aho. Ua papai Susan i to ’na aamu i roto i te vea The New York Times i matara i te 6 no Tenuare 2013.

I to ’na haereraa e hi‘o ia Al i te fare ma‘i, ua ani Susan i to ’na mama: “No te aha te Atua e na ô ai i nia i te hoê tamaiti?”

Na ô atu te mama: “Ua parau te perepitero e tumu te Atua i na ô ai, no te ite râ eaha te reira, aita vau i ite.”

E piti matahiti i muri a‘e, i 1954, ua hamani Jonas Salk te raau patia arai i te ma‘i polio. Ua parau to Susan mama, peneia‘e na te Atua i aratai i ta ’na mau maimiraa.

Pahono atura Susan: “Ahiri te Atua i aratai i te mau taote ehia a‘enei matahiti, eita Al e tuuhia i roto i te hoê afata auri no te mahaha.”

No ta ’na i ite i to ’na tamariiraa, teie ta Susan mau parau hopea: “E vau noa matahiti i muri a‘e, ua pohe [Al] e ua faaea roa vau i te tiaturi te vai ra te Atua i tera taime.”

Mai ia Susan, e rave rahi tei mauiui aore ra tei ite ia vetahi ê ia faaruru i te ati. Aita i noaa ia ratou te mau pahonoraa papu i te mau uiraa no nia i te Atua. Ua faaea vetahi i te tiaturi te vai nei o ’Na. Area te tahi atu, eita e parau roa aita e Atua, e mana‘o feaa râ to ratou no nia ia ’Na.

E ere râ te auraa aita e haapaoraa ta teie mau taata na mua ’‘e. E pinepine hoi, na te reira i turai atu ia mana‘o mai tera. No ratou, aita i tia i te mau haapaoraa ia pahono i te mau uiraa faufaa mau o te oraraa. Te mea maere râ, hoê â uiraa ta ratou e ta te feia e parau ra e tiaturi i te Atua. E hi‘o ana‘e e toru uiraa ta te mau taata e rave rahi e hinaaro e ui i te Atua e te mau pahonoraa a te Bibilia.

 1 “NO TE AHA OE E VAIIHO AI IA TUPU TE ATI?”

No te aha tera uiraa?

E rave rahi te mana‘o, ‘Eita te hoê Atua î i te here e vaiiho ia tupu te ati.’

A FERURI NA: Mea huru ê e peneia‘e, mea ino no tatou te peu a te tahi nunaa taata. E hape paha to tatou mana‘o i te hoê ohipa ta ratou e rave. No te tahi nunaa taata, mea maitai ia hi‘o noa ia vetahi ê no te haapapu e taata haavare ore oe. Area no te tahi atu, e tapao no te faatura ore ïa. E ere te auraa, mea ino teie nunaa taata. E titauhia râ ia haamatau atu â ia ratou.

E tano atoa tera hi‘oraa no te Atua. E rave rahi te tiaturi aita e Atua no te mau ati e itehia nei. No te tahi atu râ, te vai mau nei oia no te mea ua taa ia ratou i te tumu i vaiiho ai te Atua ia tupu te ati.

TA TE BIBILIA E PARAU RA: Mea taa ê roa te mau mana‘o e haerea o te Atua i to tatou. (Isaia 55:8, 9) No reira, i te haamataraa, mea huru ê paha ta ’na mau haaraa, oia atoa te tumu e ore ai oia e ohipa oioi.

Aita râ te Bibilia e ani mai ra ia farii i te mau parau huru ê mai teie: “Eita e nehenehe e ite mea nafea te Atua ia ohipa.” Te faaitoito mai ra râ ia haapii atu â no nia i te Atua e te faataa ra no te aha e afea oia e ohipa ’i. * Ia au atoa te Bibilia, e nehenehe tatou e haafatata ’tu ia ’Na.—Iakobo 4:8.

 2 “NO TE AHA E FEIA HAAVAREVARE TO ROTO I TE MAU HAAPAORAA?”

No te aha tera uiraa?

E mana‘o vetahi, ‘Ahiri mea au ore na te Atua i te taata haavarevare, eita ratou e itehia i rotopu i te feia e haamori ia ’na.’

A FERURI NA: A hi‘o na i te tamaiti o te patoi i te aratairaa maitai a to ’na metua tane e te faarue i te fare no te hoê oraraa haapaoraa ore. Noa ’tu aita te metua e farii ra, e vaiiho oia i ta ’na tamaiti ia haere. E tiamâraa hoi to ’na ia maiti. Mea tano anei ia parau te feia e farerei atu i te tamaiti, mea ino to ’na papa aore ra aita to ’na e metua tane? Eita! Ia itehia te feia haavarevare i roto i te haapaoraa, e haapapuraa noa te reira ua vaiiho te Atua ia maiti i te oraraa ta ratou i hinaaro.

TA TE BIBILIA E PARAU RA: Mea au ore na te Atua te feia haavarevare. (Ieremia 7:29-31; 32:35) E vaiiho râ o ’na i te taata ia faaohipa i to ratou tiamâraa ia maiti. E rave rahi taata tiaturi i te Atua o tei faaoti i te haapao i te mau haapiiraa a te taata. Ua maiti atoa i te ora mai ta ratou e hinaaro.—Mataio 15:7-9.

Eita râ e itehia tera huru haavarevare i roto i te haapaoraa ta te Atua e farii ra. * Ua na ô Iesu: “O te mea teie e ite ai te taata atoa e, e pǐpǐ outou na ’u, ia aroha outou ia outou iho.” (Ioane 13:35) Ia riro tera here ei mea “haavare ore.” (Roma 12:9) Aita te rahiraa o te mau haapaoraa i haapao i tera faaueraa. I 1994 i Rwanda, ahuru tausani taata tei haapohehia e te feia o ta ratou iho haapaoraa no te mea noa, no te tahi atu opu ratou. Area te mau Ite no Iehova, aita i na reira. E rave rahi hoi tei paruru i to ratou mau hoa Kerisetiano e te tahi atu mau taata noa ’tu e haapohehia ratou. Te haapapu ra te reira mea haavare ore te feia o tera haapaoraa.

 3 “NO TE AHA TE TAATA I POIETEHIA ’I?”

No te aha tera uiraa?

E uiui paha vetahi, ‘No te aha te taata e ora noa ’i 80 aore ra 90 matahiti a pohe atu ai? Eaha te faufaaraa o te hoê oraraa poto mai tera?’

A FERURI NA: E farii e rave rahi taata o te ore e tiaturi i te Atua mea faahiahia e maere mau te hamaniraa e te nahonaho o te mau mea atoa e vai nei. Ua ite ratou mea faaineine-maitai-hia to tatou fenua, te tahi atu mau paraneta e te ava‘e. Te farii atoa ra mea tano maitai te mau ture o te natura no te aratai i te ao nui. Ahiri e hauti-rii-hia a‘e te reira, eita roa hoê mea e nehenehe e ora aore ra e tupu i nia i te fenua.

TA TE BIBILIA E PARAU RA: Te mana‘o ra te rahiraa, aita e Atua no te mea e oraraa poto to te taata. Te haapapu ra râ te mau mea atoa i roto i te ao, te vai ra hoê Atua poiete. (Roma 1:20) E tumu o ’na i hamani ai i te mau mea atoa. Ua opua oia ia ora te taata e a muri noa ’tu i nia i te fenua e aita te reira i taui.—Salamo 37:11, 29; Isaia 55:11.

E ite tatou te vai mau ra te Atua e e huru maitatai to ’na na roto i te mau mea ta ’na i hamani. E ere râ tera te ravea ta ’Na i maiti no te faaite i ta ’na opuaraa. E titauhia ia faataa mai oia i te reira, oia atoa no te aha tatou i hamanihia ’i. E tera ta ’na i rave ma te haapapai i te mau parau ohie ia taa i roto i te Bibilia. * Te faaitoito atu ra te mau Ite no Iehova ia hi‘opoa i te mau pahonoraa e vai ra i roto.

^ par. 17 No te ite i te tumu e vaiiho ai te Atua ia tupu te ati, a hi‘o i te pene 11 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty.

^ par. 23 No te ite atu â, a hi‘o i te pene 15 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty.

^ par. 29 No te ite atu â, a hi‘o i te pene 3 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty.