Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Novema 2015

E ma‘i to tei herehia

E ma‘i to tei herehia

“I te mahana i matara mai ai papa i te fare ma‘i, ua ani matou i te taote ia faataa faahou mai i te parau hi‘opoaraa toto o papa. Ua haapapu mai te taote aita e fifi, ua farii râ i te hi‘o faahou i te reira. Ua maere roa oia i te iteraa e piti ohipa fifi i roto! Ua ani mai oia ia farii i ta ’na tatarahapa e ua niuniu i te tahi taote taa maitai. Mea maitai roa papa i teie nei. Auaa râ matou i ui ai i te taote.”—Maribel.

Na mua ’‘e a farerei ai i te taote, a tapao eaha te mau vahi e mauiui ra te taata ma‘i, oia atoa te i‘oa o te mau raau ta ’na e rave ra

E ere i te mea ohie ia farerei i te taote e ia tapeahia i te fare ma‘i. Mai ta te tupuraa o Maribel e faaite ra, e hinaaro te tahi hoa aore ra fetii i te tauturu i tera mau taime. Aita ana‘e, e nehenehe paha to ratou ea e ino atu â. E nafea ia tauturu atu?

Na mua ’‘e ia farerei i te taote. A ani atu ia tapao eaha te mau vahi e mauiui ra, oia atoa te i‘oa o te mau raau ta ’na e rave ra. A papai atoa i te tia ia ani i te taote. A tauturu i te hoa ia haamana‘o eaha te tupuraa aore ra ma‘i ta to ’na fetii i farerei a‘enei. Eiaha e mana‘o ua ite a‘ena aore ra e ani atu iho â te taote.

A haapao maitai, a ui i te taote ma te faatura e a tapao i te parauhia

I mua i te taote. A hi‘o maitai ua papu anei ia outou i ta te taote e parau ra. A horoa i te mau uiraa, eiaha râ e faahapa ’tu. A vaiiho na te taata ma‘i e ui e e paraparau i te taote. A haapao maitai e a tapao maite i tei parauhia. A ani eaha te mau ravea rapaauraa e vai ra. I te tahi mau taime, mea maitai a‘e ia faaitoito ia farerei i te tahi atu taote.

A haamana‘o atu i ta te taote i parau e a hi‘o maitai eaha te mau raau i horoahia

I muri a‘e. A haamana‘o atu i ta te taote i parau. A ara ua tano maitai anei te mau raau i horoahia. A faaitoito atu ia amu i te raau mai tei papaihia e ia faaara oioi i te taote ia ite oia i te tahi mea huru ê i nia ia ’na. A haamana‘o atu mea faufaa ia faaite i te mana‘o maitai e ia haapao i te mau aratairaa hau i horoahia, mai te tia ia ’na ia rave ia maitai faahou to ’na ea. A tauturu atoa ia ite atu â no nia i to ’na ma‘i.

 I te fare ma‘i

A ara ua faaî-maitai-hia te mau papie atoa

A faaite noa i te mǎrû e a haapao maitai. E haapeapea e e hepohepo paha te tahi ia tapeahia oia i te fare ma‘i. Ma te faaite i te mǎrû e ma te haapao maitai, e tauturu oe i te taatoaraa ia vai hau e ia ore te tahi hape ia ravehia. A ara ua faaî-maitai-hia te mau papie atoa. A faatura i te taata ma‘i ma te faaite atu i te mau faaotiraa atoa a te mau taote. Mai te peu mea ino roa oia, a ara ia haapaohia to ’na mau hinaaro mai ta ’na i tarima. A faatura atoa i te tiaraa o to ’na fetii piri aore ra tei aupuru ia ’na i roto i to ’na ma‘i. *

A faaite i to mana‘o i te mau taote e tuati ma te faatura

Eiaha ia taiâ i te faaite i to oe mana‘o. E nehenehe to oe faaahuraa tura e te mau peu maitatai e turai i te mau taote e tuati ia haapao maitai i te taata ma‘i. E peneia‘e, ia rapaau maitai roa ’tu â ia ’na. E farerei oia e rave rau taote i te fare ma‘i. A tauturu ia ratou ma te faaite i ta te tahi atu mau taote i parau. O oe tei matau i te taata ma‘i, a faaite ïa ia ite oe i te tahi mea tei taui i nia i to ’na tino aore ra feruriraa.

A haapao eiaha ia rave na nia ê i to oe tiaraa

A faatura e a faaite i te mauruuru. E ere te ohipa a te mau taote e tuati i te mea ohie. Mai ta oe e hinaaro ia rave ratou, a na reira atoa ’tu. (Mataio 7:12) A faatura i te mau taote ma te farii e feia aravihi e papu ratou. A haamauruuru atu no ta ratou mau tutavaraa. E nehenehe te reira e faaitoito atu ia rave maitai i ta ratou ohipa.

E ma‘ihia iho â tatou paatoa i te hoê mahana. Maoti râ te tauturu tano e feruri-maitai-hia, e nehenehe te hoa aore ra fetii e faaruru maitai a‘e i te fifi.—Maseli 17:17.

^ par. 8 Mea taa ê te mau ture e faanahoraa no nia i te tiaraa o te taata ma‘i e te titauraa a te ture i tera e tera fenua. A ara ia tarima e ia faaapî noa te taata ma‘i i te parau e faaite ra i to ’na mau hinaaro atoa no nia i te rapaauraa i to ’na ea.