Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Novema 2015

 MEA POIETEHIA ANEI?

Te iri ote pape o teie moo no Auteralia

Te iri ote pape o teie moo no Auteralia

E OTE te moo iri taratara no Auteralia (Moloch horridus) i te pape i roto i te rupehu, te haumi e te one rarirari. E faahaere oia i te pape ta ’na i ote mai i to ’na vaha no te haamâha i to ’na poihâ. No te aha e tia ia ’na ia na reira? No te faahiahia o to ’na iri.

I te niaraa o to ’na iri, te vai ra te mau faataheraa o te faahaere i te pape i roto i te tahi atu mau faataheraa i raro a‘e mai, i roto roa i to ’na iri, a tae atu ai i na pae e piti o to ’na vaha

A hi‘o na: Ua î roa to ’na iri i te poa mai to te moo taehae. Te mana‘o ra vetahi aivanaa e tahe na mua te pape i otehia mai i nia to ’na mau poa. I muri iho, e haere i nia i to ’na iri taratara a ô atu ai i roto i te mau faataheraa pape e vai ra i ropu i te mau poa. Mai reira ’tu, e afaihia ’tu ai te pape i na pae e piti o to ’na vaha.

E nafea râ oia ia faahaere i te pape mai to ’na na avae, na roto atu i to ’na tino a tae atu ai i to ’na vaha? E ere hoi mai tera te faanahoraa e ite-pinepine-hia! No te aha e tia ’i i teie moo ia ote mai i te pape ma te oro noa to ’na opu i nia i te mau vahi haumi?

E au ra ua tia i te mau aivanaa ia faataa i te reira. I te niaraa o to ’na iri, te vai ra te mau faataheraa o te faahaere i te pape i roto i te tahi atu mau faataheraa i raro a‘e mai i roto roa i to ’na iri. E haa tera mau faataheraa mai te mau uaua e faahaere i te toto i roto i te tino o te taata. No reira e tia ’i ia ’na ia faahaere i te pape na roto i te area haihai roa, mai te avae e tae atu i to ’na vaha. E au ïa te iri o teie moo mai te rimu o te ote i te pape.

E peretiteni Janine Benyus no te pu e rave i te mau maimiraa no te hamani i te mau tao‘a apî ia au i te vai ra i roto i te natura. Te na ô ra oia e nehenehe te faanahoraa o te iri o teie moo e tauturu i te mau aivanaa. E ite ïa ratou nafea ia hamani hoê ravea maitai a‘e no te faahaumaru i te mau fare tahua na roto i te haumi e vai ra i roto i te reva. E e nafea atoa ia faariro i te reira ei pape inu.

Eaha to oe mana‘o? Mea tupu noa anei te iri ote pape o teie moo no Auteralia aore ra mea poietehia?