Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! NOVEMA 2015

 TAUTURU NO TE UTUAFARE | NO TE FEIA APÎ

Ia titauhia ia ho‘i e ora e te metua

Ia titauhia ia ho‘i e ora e te metua

TE FIFI

E ite-pinepine-hia i teie mahana te feia apî ia faarue i te fare e ia ho‘i e ora e te metua i muri a‘e i te tahi fifi moni. Tera anei to oe tupuraa?

E ere i te mea ohie ia ho‘i i te fare o te metua noa ’tu to oe here ia raua. Te na ô ra te taurearea Sarah *: “I to ’u faarueraa ’tu, ua oaoa roa vau, na ’u iho e faaoti no ’u. A ho‘i ai râ, ua riro faahou vau ei tamarii.” Hoê â mana‘o to te taurearea Richard tei na ô: “Aita vau i hinaaro e ho‘i e ora e to ’u na metua, eita râ ta ’u e nehenehe e amo i te mau haamâu‘araa atoa o to ’u oraraa. Aita hoê a‘e ohipa maitai ta ’u.”

Mai te peu tei roto atoa oe i tera tupuraa, e tauturu atu teie tumu parau ia ite nafea ia faaineine maitai ia oe no te faarue roa i te fare o to oe na metua.

EAHA TE TUMU?

Te fifi moni. Ua araara roa te mata o te mau taurearea e rave rahi i to ratou iteraa i te rahi o te mau haamâu‘araa i roto i te oraraa. Te na ô ra Richard faahitihia i te omuaraa: “Ua pau roa te moni ta ’u i tuu i te hiti no te faatamaa ia ’u.” Tera atoa no Shaina tei faarue i te fare i te 24raa o to ’na matahiti e ua ho‘i i te metua ra hoê matahiti e te afa i muri a‘e. Ua na ô oia: “Aita e moni ta ’u i te faarueraa i te fare, i te ho‘iraa ’tu râ, e tarahu ta ’u. Ahiri iho â vau i haapao maitai a‘e i ta ’u moni.” *

Te fifi o te ohipa. Ia ere oe i ta oe ohipa, e nehenehe te reira e haafifi roa i te oraraa noa ’tu te faaineineraa maitai roa ’‘e. E tera ta Shaina i ite. Te na ô ra oia: “Ua noaa mai ta ’u parau tuite i te pae o te tuatiraa ma‘i. Ua tauturuhia vau e te hoê pu no te imi i te ohipa. I to ’u râ ereraa i te reira, aita vau i ite faahou eaha te rave. Aita e ohipa i roto i to ’u toroa i te oire iti i reira vau e noho ai!”

Te mau mana‘o hape. Aita vetahi taurearea i faaineinehia no te rave i te ohipa e faatamaa ia ratou. I te rahiraa o te taime, e ere roa ’tu te ohipa i te mea ohie mai ta ratou i mana‘o. Ua taa ma te peapea, ua titau oioi ratou i te tiamâraa e ua ite atura mai te aha te oraraa mau. Aita roa ratou i feruri a‘enei mea rohirohi roa ia rave i te ohipa.

 TA OE E NEHENEHE E RAVE

A aparau e to oe na metua no te ho‘i atu i te fare. A hi‘opoa i te mau mana‘o mai teie: Ehia taime oe e faaea ’i i ǒ raua? Eaha te mau haamâu‘araa e maraa ia oe ia aufau? Eaha te ohipa ta oe e nehenehe e rave i te fare? Eaha ta oe e rave no te faaafaro i te fifi moni ta oe i farerei? Noa ’tu ehia matahiti to oe, a haamana‘o ua ho‘i oe i te fare o to oe na metua. E tia ïa ia farii i ta raua faatereraa.—Aratairaa Bibilia: Exodo 20:12.

A haapii nafea ia haapao i ta oe moni. Teie ta te tahi buka e parau ra: “Mea faufaa te tino moni ta oe e haamâu‘a no te ite e nehenehe anei ia oe e haapao maitai i ta oe moni. . . . Mea faufaa roa ia farii na mua eiaha ia haamâu‘a i ta oe moni no te mau mea faufaa ore.”—Buka aratai ia haapao i te moni: No te feia apî e piahi o te Haapiiraa tuatoru (Beretane); aratairaa Bibilia: Luka 14:28.

A imi i te a‘oraa paari. E nehenehe to oe na metua aore ra te tahi atu taata e tauturu ia oe ia ite nafea ia imi e tarani i te moni, oia atoa ia aufau i te mau haamâu‘araa. Te na ô ra te vahine apî Marie: “Ua titauhia ia haamana‘o faahou ia ’u eaha te rave na mua. Ua tauturu mai te tahi hoa ia hamani i te tapura o te mau mea faufaa ia hoo mai e te mea faufaa ore. Ua maere roa vau, e tao‘a faufaa ore te rahiraa ta ’u i hoo mai! No te faarue i te fare, ua taa atoa ia ’u e tia na mua roa ia haapii: Eiaha e faatia hanoa i to oe hinaaro.”—Aratairaa Bibilia: Maseli 13:10.

E ere te toroa ta oe e maiti te mea faufaa a‘e, te aravihi râ e noaa mai no te rave i te ohipa

A imi i te hoê ohipa. A faataa i te taime no te imi i te reira. A haapao maitai, te vai ra vetahi o te turai atu ia maiti i te ohipa ta oe e au. Eita râ te reira e tauturu atu. I te tahi taime, tei mua noa hoi to oe mata! Eiaha e maiti i te ohipa, eita ïa to taime e mâu‘a. A haamana‘o, e ere te toroa te mea faufaa a‘e, te aravihi râ e noaa mai no te rave i te ohipa. Ua itehia rahi atu â te ite e te aravihi e noaa i te taata, rahi atu â o ’na i te au i ta ’na ohipa. Eita e titauhia ia maiti i te toroa ta oe e hinaaro no te au i ta oe ohipa!

^ par. 5 Ua tauihia te mau i‘oa.

^ par. 8 E pinepine te mau piahi i te haapiiraa tuatoru i Marite i te topa i roto i te hoê â fifi. Ia au i te faatiaraa i roto i te vea The Wall Street Journal, e nehenehe te tarahu a te hoê piahi e raea 33 000 tara Marite (3 663 000 F CFP).