Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Me 2014

Mea faahiahia mau to oe roimata!

Mea faahiahia mau to oe roimata!

MAI te aiûraa mai â, e ta‘i tatou. O te ravea matamua tera e itehia ’i e mea oraora roa te pêpe. Ua faataa te tahi taata îite e e ta‘i te taata no te faaite i to ’na hinaaro ia haapaohia o ’na mai te aiû. No te aha râ te roimata e tahe ai a paari noa ’i tatou? Te vai ra hoi te tahi atu â ravea no te faaite i to tatou huru!

E tahe to tatou roimata no te mau tumu e rave rau. E ta‘i paha tatou no te ati, inoino, mauiui aore ra no te hepohepo. E ta‘i atoa râ ia oaoa rahi, ia tamahanahanahia mai e ia manuïa te tahi opuaraa. E roimata no te oaoa ïa te reira. E nehenehe atoa te taata e ta‘i a ite ai ia vetahi ê ia na reira. Te na ô ra María: “Noa ’tu eaha te tumu te tahi taata e ta‘i ai, ia hi‘o vau ia ’na, e ta‘i atoa vau.” A mataitai ai i te hoho‘a tavirihia aore ra a taio ai i te hoê buka, e ta‘i atoa paha oe.

Te faataa ra te buka Adult Crying, “e nehenehe e faaite oioi i te tahi mea faufaa ma te tahi atu mau ravea.” Ma te ore ïa e paraparau, e ravea te roimata no te faaite i te tahi poroi. E hinaaro iho â tatou e rave i te tahi mea a ite ai ia vetahi ê ia ta‘i. Ei hi‘oraa, e tâu‘a te rahiraa o tatou ia ta‘i te tahi taata no te ati, te faaite mai ra hoi e te mauiui ra o ’na. E tamata ïa tatou i te tamahanahana aore ra i te tauturu i te taata e ta‘i ra.

No vetahi taata îite, e maitaihia te taata ia ta‘i, te auraa ïa, ia ore vetahi ia na reira, e fifi to ratou ea. Te na ô ra te tahi atu e aita te mau aivanaa i haapapu atura e maitai te tino aore ra te feruriraa ia ta‘i tatou. Ia au i te tahi uiuiraa mana‘o, e 85 i nia i te hanere o te mau vahine e 73 i nia i te hanere o te mau tane tei faaite e ua maitai mai ratou i muri a‘e. Te faataa ra Noemí, “No ’u, mea maitai ia ta‘i. Te na reira nei au i te tahi taime. I muri a‘e, e nehenehe au e huti maitai i te aho e e feruri maite.”

Ia au i te tahi uiuiraa mana‘o, e 85 i nia i te hanere o te mau vahine e 73 i nia i te hanere o te mau tane tei faaite e ua maitai mai ratou i muri a‘e i to ratou ta‘iraa

 E ere râ no te mea ua ta‘i te tahi taata, e maitai mai iho â ïa o ’na. Mea faufaa atoa to vetahi ê huru a ite ai ia ’na ia ta‘i. Ia tamahanahana aore ra ia tauturu mai vetahi ê, e maitai mai tatou. Ia ore, e haama aore ra e inoino paha.

Aita ïa tatou i ite i te mau mea atoa no nia i te ta‘i. Te mea papu, hoê tera o te mau ravea ta te Atua i horoa mai no te faaite i to tatou huru.