Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! MATI 2014

 IA AU I TE BIBILIA

Mea poietehia te mau mea atoa

Mea poietehia te mau mea atoa

Ua oti iho â anei te mau mea atoa i te poietehia i muri a‘e e ono mahana e 24 hora?

“Hamani ihora te Atua i te ra‘i e te fenua i te matamua ra.”—Genese 1:1.

TA TE BIBILIA E PARAU RA

Mai ta te Genese 1:1 e parau ra, ua poiete te Atua i te ao nui e te fenua “i te matamua ra.” Te farii nei te mau aivanaa e e haamataraa to te ao nui e fatata e 14 miria matahiti to te reira.

Te faataa atoa ra te Bibilia e e ono “mahana” to te Atua poieteraa i te mau mea atoa. E ere râ i te mahana e 24 hora. (Genese 1:31) Te faaohipa nei te Bibilia i te parau “mahana” no te faataa e rave rau roaraa tau. A faahitihia ’i no “te mahana i hamani ai te Atua ra o Iehova i te ra‘i e te fenua,” te parauhia ra ïa no te taime taatoa i poietehia ’i te mau mea atoa. (Genese 2:4) Mea papu e i muri a‘e e rave rahi tausani matahiti te mau mea atoa i te otiraa i te poietehia.—Salamo 90:4.

TE FAUFAARAA IA ITE

Ia tiaturi oe e ua poietehia te mau mea atoa i roto i te area taime e ono mahana e 24 hora, e patoi paha oe i ta te Bibilia e parau ra. Ia haapao râ oe i ta te Parau a te Atua e faatia ra no nia i te tau i poietehia ’i te mau mea atoa, e faufaahia oe i te “aôraa maitai” e vai ra i roto.—Maseli 3:21, Te Bibilia Mo’a V.C.J.S., 1976.

 Mea na roto anei te tauiuiraa o te mau mea ora to te Atua poieteraa i te raau e animara i te fenua nei?

“Ua parau ihora te Atua, Ia fanau mai te fenua nei i te mau mea ora ma to ratou ra huru.”—Genese 1:24.

TA TE BIBILIA E PARAU RA

Aita te Atua i hamani i te hoê noa mea ora a vaiiho atu ai i te reira ia tauiui e ia faatupu e rave rau huru mea ora. Ua poiete râ O ’na i te mau “huru” atoa raau tupu e animara ia nehenehe ratou e faatupu i tei au i “to ratou huru.” (Genese 1:11, 21, 24) E mai tera noa e tae roa mai i teie mahana. No reira te fenua i î roa ’i i tera e tera “huru” raau e animara mai ta te Atua i poiete i te matamua.—Salamo 89:11.

Aita te Bibilia e faaite ra i te mau tauiraa atoa e nehenehe e tupu i nia i te tahi huru animara. Ei hi‘oraa, no te mau animara i faatitohia e te hoê â huru animara, e tia ia ratou ia ora i te vahi ratou e tuuhia ’i. Noa ’tu e no vetahi, te haapapu ra te reira i te tauiuiraa o te mau mea ora, aita te tahi atu huru animara i tupu mai. Ua haapapu te mau maimiraa o teie tau e aita te mau raau e animara i taui rahi roa i te roaraa o te tau.

TE FAUFAARAA IA ITE

Mea tano te faataaraa a te Bibilia no nia i te mau “huru” o te mau mea ora, e mea papu atoa ïa ta ’na e parau ra i te pae o te tuatapaparaa e ta ’na mau parau tohu.

No ǒ mai ia vai te puai i faaohipahia no te poiete i te ao nui?

“Na tau rima i hohora i te ra‘i.”—Isaia 45:12.

TA TE BIBILIA E PARAU RA

No ǒ mai i te Atua te puai hope. (Ioba 37:23) Mea faufaa roa no te mea ua ite te mau aivanaa e e nehenehe te tahi ohipa e tupu i te faaohiparaa i te puai. Te na ô ra te Bibilia e o te Atua iho te tumu o te “puai rahi” i faaohipahia no te poiete i te ao nui. (Isaia 40:26) Ua fafau te Atua i te haapao i te mau mea ta ’na i poiete ma to ’na puai. No te mahana, te ava‘e e te mau fetia, te na ô ra te Bibilia, “ua haamau hoi [te Atua] ia ratou e ia mau e a muri noa ’tu.”—Salamo 148:3-6.

TE FAUFAARAA IA ITE

Ua parau te hoê aivanaa o Allan Sandage te i‘oa i te tahi mahana: “Aita te mau aivanaa e nehenehe e pahono i te mau uiraa faufaa roa. Ia haamata oe i te ani no te eaha te tahi mea i hamanihia ’i, aita ta te mau aivanaa e faataaraa.” Mea tano ta te Bibilia e parau ra no nia i te poieteraa o te mau mea atoa. E ere râ tera ana‘e ta ’na e nehenehe e faaite. Te pahono atoa ra hoi te Parau a te Atua i te mau uiraa ta te mau aivanaa e ore e nehenehe e faataa mai teie, Eaha te opuaraa a te Atua no te fenua e te huitaata? *

^ par. 16 No te ite atu â, a hi‘o i te pene 3 o te buka Eaha ta te Bibilia e haapii mau ra? piahia e te mau Ite no Iehova.

No te ite atu â

Eaha te opuaraa a te Atua no te fenua?

Te faataa ra te Bibilia no te aha te Atua i poiete ai i te fenua, afea te mauiui e ore ai, eaha te a muri a‘e o te fenua, e o vai te ora i reira.

O vai te Atua?

E i‘oa anei to te Atua? Te haapeapea maira anei oia?