Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! MATI 2014

 TAUTURU NO TE UTUAFARE | NO TE TAUREAREA

E nafea ia patoi i te faaheporaa a te tahi atu taurearea?

E nafea ia patoi i te faaheporaa a te tahi atu taurearea?

TE FIFI

“Na mua ’‘e, eita te rahiraa taurearea i te fare haapiiraa e hinaaro e faahoa ia ’u, ua hepohepo roa vau. No reira, a haere ai au i te haapiiraa tuarua, ua taui au i to ’u faaneheneheraa e huru, aita atoa iho â râ ratou i farii ia ’u. E hinaaro rahi to ’u i te hoa i rave noa ’i au i ta te mau taurearea i te fare haapiiraa e parau mai.”—Jennifer, 16 matahiti. *

Te faaruru ra anei oe i te faaheporaa a te tahi atu taurearea? Mai te peu e e, e tauturu teie tumu parau ia oe.

Ia fati oe i mua i te faaheporaa a te tahi atu taurearea, ua riro ïa oe mai te hoê matini faaterehia e vetahi ê. No te aha e vaiiho ai ia na reirahia oe?—Roma 6:16.

TE TIA IA ITE

E nehenehe te taata maitai e rave i te ohipa ino i mua i te faaheporaa.

“E ino te parau maitai i te amuiraa iino.”—Korinetia 1, 15:33.

“Ua ite oe e mea ino te tahi haerea, i mua râ i te faaheporaa, o te hinaaro i te hoa te mea puai a‘e e e rave hanoa ïa oe i ta ratou e parau mai!”—Dana.

E ere noa no ǒ mai i te mau hoa te faaheporaa.

“Ia hinaaro vau i te rave i te mea maitai ra, tei pihai iho te ino ia ’u i reira.”—Roma 7:21.

“E pinepine, no ’u noa iho â te hape. Oia, ia faaroo vau i ta ratou mau tauaparauraa, mea oaoa roa ratou e e hinaaro ïa vau e rave mai ia ratou.”—Diana.

E maitai oe ia ore e vaiiho ia vetahi ê ia faaoti no oe.

“Ei aau hapa ore â to outou.”—Petero 1, 3:16.

“Na mua ’‘e, mea fifi roa no ’u ia faaoromai i te faaheporaa a te tahi atu mau taurearea, i teie nei râ aita vau e taiâ i te faaite e mea taa ê au e eita vau e fati faahou i ta ratou mau raveraa. Auê te au i te taoto i te po e te mana‘o haava maitai!”—Carla.

 E NAFEA ÏA?

Ia faahepohia oe e te tahi atu taurearea ia rave i te mea ino, a feruri i to muri nei mau mana‘o:

A feruri i te mau faahopearaa. A uiui: ‘Eaha te tupu ia fati au i mua i te faaheporaa? Eaha ta to ’u na metua e mana‘o no ’u? Eaha to ’u huru i muri a‘e?’—Aratairaa Bibilia: Galatia 6:7.

“Teie te mau uiraa ta to ’u na metua e ui mai: ‘Ia fati oe i mua i te faaheporaa, eaha te nehenehe e tupu?’ E tauturu raua ia ’u ia taa e nafea te faaheporaa a te tahi atu taurearea e turai ai ia ’u ia rave i te mea ino.”—Olivia.

A faaite e mea papu to oe mana‘o. A feruri na: ‘No te aha vau i papu ai e e mauiui au aore ra vetahi ê i tera haerea?’—Aratairaa Bibilia: Hebera 5:14.

“I to ’u nainairaa, e parau vau ‘aita’ aore ra e pahono poto noa vau, i teie nei râ e nehenehe ta ’u e faataa i te tumu e rave ai au i te tahi ohipa aore ra eita. Ua papu ia ’u i te mea maitai e te mea ino. E ere na vetahi ê e pahono, na ’u râ.”—Anita.

A faaite i to oe huru mau. A uiui: ‘Eaha te huru taata ta ’u e hinaaro e riro mai?’ I muri iho, a feruri i te faaheporaa ta oe e faaruru ra e a uiui: ‘Eaha ta teie huru taata e rave i roto i tera tupuraa?’—Aratairaa Bibilia: Korinetia 2, 13:5.

“Te oaoa nei au i to ’u huru i teie nei, aita ïa vau e haapao roa ra i to vetahi ê mana‘o no nia ia ’u. Mea au na te rahiraa mai tera ana‘e vau.”—Alicia.

Eiaha e feruri noa no teie nei. Mai te peu e e te haere noa ra oe i te haapiiraa, tau matahiti aore ra tau ava‘e noa e toe ra, eita paha oe e ite faahou i te feia e faahepo ra ia oe.

“Ia mataitai au i te hoho‘a o to ’u mau hoa haapiiraa, aita vau e haamana‘o ra i te i‘oa o vetahi. I tera râ tau, mea faufaa a‘e to ratou mana‘o i ta ’u mau tiaturiraa. Auê hoi te maamaa e!”—Dawn, 22 matahiti.

A faaineine ia oe. Te na ô ra te Bibilia: “Ia ite outou i te mea tia ia parau atu i te taata atoa.”—Kolosa 4:6.

“E tauturu to ’u na metua ia mâua to ’u tuahine ia feruri e ia hauti roa i te tahi tupuraa e nehenehe e fa mai. Ia tupu te reira, ua ite mâua eaha te rave.”—Christine.

^ par. 4 Ua tauihia te mau i‘oa.