Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TETEPA 2013

 TUMU PARAU MATAMUA

E faaore anei te patoiraa i te mau fifi?

E faaore anei te patoiraa i te mau fifi?

Aita te mau Ite no Iehova, te feia pia i teie vea, e poritita ra. (Ioane 17:16; 18:36) Ia faahitihia te tahi mau patoiraa, e ere no te turu i te hoê nunaa aore ra pǔpǔ poritita.

I TE 17 no Titema 2010, ua tâhiti roa Mohamed Bouazizi, te tahi taata hoohoo i Tunitia e 26 matahiti. Ua hepohepo ê na oia a ore ai e ite i te tahi ohipa maitai atu â. Ua huru ê atoa a faahepo atu ai te mau tia faatere ia horoa i te moni. I te tahi poipoi, ua tapea te mau mutoi i ta Mohamed haapueraa pea, mei‘a e apara. A haruhia ’i te reira, ua haapaari oia. Ua ite vetahi taata a poara ai te hoê mutoi vahine ia ’na.

No to ’na inoino e riri, haere atura Mohamed i te piha ohipa a te faatereraa piri roa ’‘e no te faaite i te ohipa ino i tupu. Aita râ o ’na i tâu‘ahia. I mua i te tomoraa o tera piha, hopea ore oia i te tutuô, “E nafea vau e tia ’i e faatamaa i to ’u utuafare?” I muri a‘e, manii atura oia i te mori pereoo i nia ia ’na a ui atu ai te mâti. Ua paapaa roa oia, aita i naea e toru hebedoma, ua pohe.

Ua faarooroo to Tunitia e to te tahi atu fenua i te ohipa peapea ta Mohamed Bouazizi i rave. I Tunitia e i te mau tuhaa fenua Arabia, e rave rahi tei mana‘o e ua haamata te tahi patoiraa no te faatahuri i te faatereraa. Ua maiti te Apooraa iriti ture no Europa ia fana‘o Bouazizi e e maha ’tu i te re Sakharov no te tiamâraa o te mana‘o 2011. I Lonedona, no te vea The Times, o Bouazizi te taata faahiahia i 2011.

 Mai tei faatiahia ’tu na, e nehenehe te patoiraa e riro ei ravea puai. No te aha râ te reira e tupu ai i teie mahana? Te vai ra anei te tahi atu ravea no te taui i te mau mea?

No te aha te mau patoiraa i rahi roa ’i?

Te patoi ra e rave rahi no to muri nei mau tumu:

  • No te mauruuru ore i te faatereraa. Ia haapao te faatereraa i te hinaaro o te huiraatira, mea iti te mana‘o e patoi. Ia tupu te fifi, e tamata noa ïa ratou i te faaafaro e vetahi taata toroa. Ia ravehia râ te ohipa ino e tia ore no te maitai noa o vetahi taata, oioi ïa te orureraa hau i te tupu.

  • No ta vetahi ê haaraa. E pinepine na te tahi tupuraa i turai i te taata ia patoi. Eita ’tura ratou e farii hanoa i te ohipa ino e mana‘o râ e taui i te mau mea. Ua riro ta Mohamed Bouazizi haaraa ei hoho‘a no te mau faahuehueraa i tupu i Tunitia. No te patoi i te ohipa ino, ua pee to Anna Hazare mau taata i roto e 450 oire e oire iti i ta ’na haapaeraa maa i Initia.

Mai ta te Bibilia i faaite a‘enei, i roto i teie ao e “pinepine e faahepo te taata i te tahi taata è ei ino nona iho.” (Koheleta 8:9, Te Bibilia Mo’a V.C.J.S., 1976) Mea rahi a‘e iho â te ohipa ino e tia ore i na mua ’‘e. Mea haapao atoa ’tu â te taata e nafea te faatereraa e taviri ai ia ratou. Ma te mau niuniu paraparau apî, Internet e porotarama i roto i te afata teata e 24 hora i nia 24, e nehenehe te feia i te fenua atea e faatupu i te patoiraa no te hoê tumu taa ê i te tahi atu vahi.

Eaha ta te mau patoiraa i faatupu?

Teie ta te mau taata patoi i pahono:

  • Ua tauturuhia te taata. A fifi ai te fenua Marite i 1930, ua tupu te tahi patoiraa i Chicago, Illinois. Ua faataime te feia toroa i te mau parau tiahiraa a faanaho atu ai ia noaa ta vetahi taata ohipa. No te hoê â patoiraa i New York, ua nehenehe e 77 000 taata e fana‘o faahou i to ratou nohoraa.

  • Ua faaitehia te mau ohipa tia ore. I te oire Montgomery, Alabama, Marite, mai 1955 e tae atu 1956, ua tupu te tahi patoiraa a faaea ’i te mau pereoo mataeinaa i ta ratou mau tere. I muri a‘e, ua faaorehia te mau ture e faaue ra ia vaiiho te feia ereere i te parahiraa no te taata uouo i roto i te mau pereoo mataeinaa.

  • Ua tapeahia te mau opuaraa no te paturaa. I Titema 2011, ia ore te reva mata‘i ia viivii atu â, ahuru tausani taata tei patoi i te paturaa o te  hoê pu hamaniraa ito e te arahu, piri atu ia Hong Kong. I muri a‘e, ua faaorehia tera opuaraa.

Noa ’tu e e faatiahia te hinaaro o vetahi taata patoi, e ravea maitai atu â ta te Basileia o te Atua

Eita iho â e ravehia te mau mea atoa ta te feia patoi e ani. E nehenehe te mau tia faatere e haavî atu â. Ma te mana‘o i te feia patoi i to ’na fenua, ua na ô te taata faatere o te tahi pae hitia o te râ o te miti Mediteranea: “E mea tia ia tairi roa ’tu,” i muri a‘e e tausani taata tei pohe i roto i tera orureraa hau.

Noa ’tu e e faatiahia te hinaaro o vetahi taata patoi, e faatupu te patoiraa i te tahi atu â mau fifi. Ua haa te hoê taata ia taui te faatere i te tahi fenua i Afirika. Ma te mana‘o i te faatereraa apî, ua na ô oia i te vea Time: “E moemoeâ noa tera, aita e maoro e tupu faahou te fifi.”

Te vai ra anei te ravea maitai a‘e?

E rave rahi taata matauhia te mana‘o nei e mea titauhia iho â te patoiraa. No reira, i 1985, ua papai Václav Havel, te tahi faatere tahito i Repupirita Tchèque tei tapeahia no ta ’na mau haaraa no te paturu i te mau tiaraa o te taata: “Hoê noa faahopearaa to [te patoiraa], to oe iho ora e tera ana‘e, no te mea aita ’tu â ravea no te paturu i te mea tia.”

Ua tano ta Havel mau parau i te tupuraa hepohepo o Mohamed Bouazizi e te tahi atu. I te tahi fenua i Asia, e ahuru ma piti taata tei tutui ia  ratou ei patoiraa i te tahi aroraa haapaoraa e poritita. Ma te faataa i tera mau ati ino mau, ua na ô te tahi taata i te vea Newsweek: “Aita ta matou e pupuhi. Aita matou e hinaaro ia mauiui te tahi atu taata. Eaha ’tu â ta te taata e rave?”

E ravea ta te Bibilia no te faaore i te haavîraa, ohipa ino e tia ore. E tupu iho â te patoiraa no te mau faanahoraa poritita e faanavairaa faufaa. E monohia râ te reira e ta te Atua faatereraa i te ra‘i. No to ’na Faatere, te na ô ra te tahi parau tohu: “O tei veve ra e ua tiaoro maira, na ’na ïa e faaora; e tei ati ra e aita o ’na e tauturu. E faaora oia ia ratou i te haavare e te rave ino ra.”—Salamo 72:12, 14.

Te tiaturi nei te mau Ite no Iehova e o te Basileia o te Atua ana‘e te ravea e ite ai te huitaata i te hau i te fenua nei. (Mataio 6:9, 10) No reira, eita ratou e apiti i te mau patoiraa. Mea tano anei ia mana‘o e na te Atua e faaore i te mau tumu o te mau patoiraa? E. E rave rahi tei haamata i te tiaturi i ta te Atua faatereraa. No te aha e ore ai e na reira atoa?