Eaha to roto?

Mau faaho'iraa ê

Tapura tumu parau

Ite no Iehova

Tahiti

A ARA MAI NA! TETEPA 2013

 IA AU I TE BIBILIA

Te ava

Te ava

Mea ino anei ia inu i te ava?

“E te uaina e oaoa ai te aau o te taata nei; e te mono‘i i hinuhinu ai to ’na mata, e te pane e itoito ai te aau taata nei.”—Salamo 104:15.

TA TE TAATA E PARAU RA

E inu vetahi te ava i te taime tamaaraa, area te tahi atu, eita roa ïa. No te aha? E rave rau tumu. No te ta‘ere, te ma‘i e haapaoraa paha vetahi e faaoti ai e inu aore ra eita.

TA TE BIBILIA E PARAU RA

Eita te Bibilia e opani ra ia inu i te ava ma te tano. O te inu-hua-raa râ a taero roa ’tu ai te faautuahia ra. (Korinetia 1, 6:9, 10) I matau na iho â te mau tane e vahine tavini i te Atua i te inu i te uaina. Ua faahitihia hoi te reira e piti hanere tiahapa taime i roto i te Bibilia. (Genese 27:25) Te na ô ra te Koheleta 9:7: “A haere a amu i ta oe maa ma te oaoa; a inu ai i ta oe uaina ma te rearea o te aau.” I te mea e e faaoaoa te uaina i te aau, i matauhia na ia inu i te reira i te mau tamaaraa. I te tahi oroa faaipoiporaa, ua faatupu Iesu Mesia i ta ’na semeio matamua ma te taui i te pape ei “uaina maitai.” (Ioane 2:1-11) E faaohipa-atoa-hia na te uaina no te rapaau i te ma‘i.—Luka 10:34; Timoteo 1, 5:23.

 Ia au i te Bibilia, eaha te faito ava e tano ia inu?

“Eiaha te inu hua i te uaina.”—Tito 2:3.

FAUFAARAA IA ITE

I te mau matahiti atoa, te mauiui nei e rave rahi melo utuafare a inu hua ’i hoê aore ra na metua i te ava. Mea rahi te pepe, fifi e ati purumu tei tupu no te inu-hua-raa i te ava. E nehenehe atoa te reira e tuino i te roro, mafatu, upaa e vairaa maa.

TA TE BIBILIA E PARAU RA

E titauraa na te Atua ia inu tano noa i te ava e ia amu i te maa ma te au. (Maseli 23:20; Timoteo 1, 3:2, 3, 8) E mea tia ia haavî ia tatou no te fana‘o i ta te Atua farii maitai. Te na ô ra te Bibilia: “E tâhitohito tei te uaina; e hauti rahi tei te ava taero; e ere i te taata paari tei vare i te reira.”Maseli 20:1.

E nafea te reira e tupu ai? E nehenehe te ava e faahuru ê i te feruriraa a turai atu ai ia rave i te ino. Te na ô ra te Bibilia: “Na . . . te uaina, e te taero, e afai è atu i te mafatu.” (Hosea 4:11, Te Bibilia Mo’a V.C.J.S., 1976) Tera iho â tei tupu no John. * A tatama‘i ai e ta ’na vahine, ua haere oia i te tahi hotera, inu hua ’tura i te ava e faaturi a‘era. I muri a‘e, ua tatarahapa roa oia a faaoti papu ai ia ore e tapiti. E nehenehe te inu-hua-raa i te ava e haamauiui mai, e tuino i te feruriraa a fifi atu ai te taairaa e te Atua. Te na ô ra te Bibilia e e ore roa te taero ava e fana‘o i te ora mure ore.—Korinetia 1, 6:9, 10.

Afea eiaha ’i e inu i te ava?

“Ua ite te taata maramarama i te ino, e ua haere è atura; te na reira noa te taata paari ore i te haere, e roohia ihora i te ati.”—Maseli 22:3, V.C.J.S.

FAUFAARAA IA ITE

Ia au i te tahi buka, “e raau taero puai te ava.” (World Book Encyclopedia) I te tahi taime, e ere i te mea paari ia inu i te ava noa ’tu e inuhia te reira ma te tano noa.

TA TE BIBILIA E PARAU RA

E pinepine te taata i “te haere . . . i te ati” ma te inu i te taime tano ore. Ma te parau “e tau to te mau mea atoa,” te na ô ra ïa te Bibilia e te vai ra te taime no te haapae i te ava. (Koheleta 3:1) Te opani ra te ture ia inu te feia apî i te ava. E taata inu ava na mua ’‘e aore ra e raau ta oe e rave nei, e haapae atoa paha ïa oe i te ava. No te rahiraa, o te taime hou a haere ai i te ohipa aore ra i te vahi raveraa ohipa te “tau” tano no te haapae i te reira, hau roa ’tu â, ia faaohipahia te matini atâta. No te feia î i te paari, e ô no ǒ mai i te Atua iho â te ora. (Salamo 36:9) E haafaufaa ana‘e ïa i te reira ma te pee i te mau aratairaa Bibilia no nia i te ava.

^ par. 11 Ua tauihia te i‘oa.