Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TETEPA 2013

 IA AU I TE BIBILIA

Te Basileia o te Atua

Te Basileia o te Atua

Tei roto anei te Basileia o te Atua i te aau o te taata?

“Aore oe i atea ê atu i te basileia o te Atua.”—Mareko 12:34.

TA TE TAATA E PARAU RA

Mai te rahiraa o te Amuiraa faaroo Kerisetiano, e rave rahi te tiaturi nei e “mai te peu e tei roto te Atua i to tatou mafatu, aore ra aau, tei reira atoa ïa te Basileia o te Atua.”

TA TE BIBILIA E PARAU RA

E ere te Basileia i te tahi noa mana‘o no te taata e tiaturi ra i te Atua, e faatereraa mau râ. E faatere te Basileia o te Atua i te fenua taatoa.—Salamo 72:8; Daniela 7:14.

Aita anei Iesu i na ô e “te basileia o te Atua tei roto ïa ia outou”? (Luka 17:21) Oia, e ere râ te auraa e tei roto te Basileia i te aau o te feia e faaroo ra ia ’na. No te aha? No te mea i tera taime, o te mau Pharisea te faaroo atu ra. I faaite na Iesu e eita te Atua e farii ia ô ratou i roto i te Basileia no to ratou haavare. (Mataio 23:13) Ua tano râ Iesu a na ô ai e “tei roto . . . ia outou” aore ra ia au i Te Faufaa Api, “tei rotopu . . . ia outou” te Basileia o te Atua. No te aha? I te mea e o ’na te Arii o te Basileia, te tia ra iho â oia i rotopu ia ratou.—Luka 17:21.

 Eaha te Basileia o te Atua?

“Ia tae to oe ra basileia. Ia haapaohia to oe hinaaro i te fenua nei mai tei te ra‘i atoa na.”—Luka 11:2.

TA TE BIBILIA E PARAU RA

E faatereraa mau no ǒ mai i te Atua te Basileia e o Iesu te Faatere i te reira. (Mataio 28:18; Timoteo 1, 6:14, 15) Maoti te Basileia e faatupuhia ’i to te Atua hinaaro i te ra‘i e te fenua. (Luka 11:2) Na ta te Atua faatereraa e faaore i te mau fifi atoa o te taata. E faatupu te Basileia i ta te mau faatereraa taata e ore e nehenehe e rave.

I raro a‘e i te faatereraa a te Basileia o te Atua e ite ai te huitaata i te hau a oaoa ’tu ai i te fenua nei. (Salamo 46:9; Isaia 35:1; Mika 4:4) Eita te taata e ma‘ihia aore ra e pohe faahou no te mea e ore roa te ma‘i. (Isaia 33:24; Apokalupo 21:4) E faaore-atoa-hia te ruhiruhiaraa. Te tohu ra te Bibilia: “E rahi hoi te poria o to ’na ra tino i to te tamarii; e ho‘i oia i tana ap[î]raa ra.”—Ioba 33:25.

TA OE E RAVE

Noa ’tu eaha to nunaa aore ra fenua, e nehenehe te Basileia o te Atua e faatere atu ia rave oe i ta te Atua e titau. Te na ô ra te Bibilia: “E ore te Atua e haapao i te huru o te taata. O tei mǎta‘u râ ia ’na, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.

Na te taata anei e haamau i te Basileia o te Atua?

“E faatupu ai te Atua o te ra‘i ra i te hoê basileia, o te ore roa ïa e mou.”—Daniela 2:44.

TA TE TAATA E PARAU RA

Te tiaturi nei vetahi e na te taata e haamau i te Basileia o te Atua i te fenua nei ma te faariro ia vetahi ê ei melo o ta ratou haapaoraa aore ra ma te haa no te autaeaeraa e hau na te ao nei.

TA TE BIBILIA E PARAU RA

Na te Atua e faatupu i te Basileia. (Daniela 2:44) No reira oia i na ô ai: “Ua faatahinu vau i tau arii.” (Salamo 2:6) E ere ïa na te taata e haamau i te Basileia o te Atua. Eita atoa ta ratou e nehenehe e faaore i te reira i te mea e e faatere te Basileia i te fenua mai te ra‘i mai.—Mataio 4:17.

FAUFAARAA IA ITE OE

E hinaaro iho â tatou ia hau e ia tahoê te huitaata atoa i te hoê mahana. Ua tamata ê na paha oe i te haa no te reira ma te ore râ e manuïa. Ma te ite e te turu ra te Atua i ta ’na Basileia, e hoona to taime ia faaitoito i te riro ei taata faaterehia e tera Basileia.