Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! TIURAI 2013

 TAUTURU NO TE UTUAFARE | NO TE METUA

E nafea ia a‘o i to tamarii?

E nafea ia a‘o i to tamarii?

TE FIFI

I te fare, ia tupohehia te mau niuniu afaifai i te hora 9 i te po. I teie râ hebedoma e i te maororaa po, e piti taime to oe iteraa i ta oe tamahine e hapono ra i te poroi. Ia ho‘i mai iho â to tamaiti i te hora 10 i te po. I te rui i muri a‘e râ, a piti atura ïa taime, ua mairi i te hora 11 to ’na ho‘iraa mai.

E nehenehe ta oe tamarii e taui. Na mua râ, ia taa ia oe te tumu e ore ai o ’na e haapao i ta oe mau faatureraa. Teie râ te tahi parau apî? E ere te faaroo-ore-raa o to tamarii i te mea fifi roa ia hi‘ohia.

TE TUMU

Otia taa-ore-hia. No te ite i te mau otia, e rave vetahi taurearea mai ta ratou e hinaaro ma te ore e haapao i te mau faatureraa. Ua parau ana‘e te metua i te tupu ia faaroo ore te tamarii, e ofati o ’na i te faatureraa no te ite e e na reira mau anei te metua. Ua riro mai anei râ te taatoaraa o taua mau taurearea ra ei orure hau? Aore. Ia ore e ravehia mai tei faaarahia aore ra aita ana‘e na metua i faataa maitai i te mau faatureraa, e pinepine eita te tamarii e haapao atu.

Etaeta. No te faatere i te oraraa o te taurearea, e horoa vetahi metua e rave rahi faatureraa. Ia ore oia e haapao atu, e riri te metua a haamau atu â ai i te tahi atu. E pinepine, eita te taurearea e taui. Ia au i te hoê buka (Parent/Teen Breakthrough): “Rahi atu â oe i te faatere ia ’na, rahi atu â oia i te haapaari. E au ra e te parai ra oe i te pata tei ore i tahe i nia i te faraoa mǎrû, e hu‘ahu‘a roa te reira i muri a‘e. Te ravea, ia parai-mǎrû-noa-hia ïa e tia ’i.”

O te a‘oraa tano te tauturu atu. Mea taa ê hoi te “faautuaraa,” te haamauiuiraa ia vetahi ê, i te “a‘oraa” te haapiiraa ’tu ïa. E nafea ia haapao to tamarii i ta oe mau faatureraa?

 E NAFEA?

A haapapu i te titauhia ’tu ra. E hinaaro iho â te mau taurearea e ite eaha mau na ta oe e titau atu e te mau faahopearaa ia faaroo ore ratou.—Faaueraa Bibilia: Galatia 6:7.

Mana‘o tauturu: A tapaopao na i ta oe mau faatureraa. A uiui, ‘Ua rahi roa anei? E titauhia anei ia haamau atu â aore ra ia faaore i te tahi? Ia au i te haerea o te tamarii, e mea tia anei ia taui i te tahi?’

A tapea i te parau. E huru ê paha te taurearea ia vaiiho oe ia ’na ia ofati i te faatureraa i te tahi taime e i teie hebedoma e a‘o atu ai.—Faaueraa Bibilia: Mataio 5:37.

Mana‘o tauturu: Eiaha ia etaeta roa. Ua mairi anei to tamarii i te hora ho‘iraa mai i te fare? Mea tano ïa ia parau atu e ho‘i mai na mua ’‘e i te hora ho‘iraa mai i faaauhia ’tu na.

Ei taata mǎrû oe. A faaite i to taurearea e e metua mǎrû oe ma te horoa ’tu â i te tiamâraa ua tano ana‘e.—Faaueraa Bibilia: Philipi 4:5.

Mana‘o tauturu: A parahi e a tauaparau e te tamarii i nia i te mau faatureraa. A ani atoa i to ’na mana‘o no nia i taua mau faahopearaa ra. E farii ohie a‘e te tamarii ia tâu‘ahia to ’na mana‘o.

A haapii atu ia riro ei taata paari. Eita oe e hinaaro e faahepo i te tamarii ia faaroo i tei parauhia ’tu, ia tauturu râ ia noaa te hoê mana‘o haava maitai, te iteraa ïa i te mea ino e te mea maitai. (A hi‘o i te tumu parau tarenihia “A tauturu atu ia faatupu i te mau huru maitatai.”)—Faaueraa Bibilia: Petero 1, 3:16.

Mana‘o tauturu: A faaohipa i te Bibilia. Tera te buka maitai roa ’‘e e itehia ’i te “a‘o maitai ra ei mea faaroohia,” e te paari ia “noaa te haapaoraa i te taata maua; e te taata apî ra ia noaa te ite e te haapao maitai.”—Maseli 1:1-4.