A faatia mai na i to oe oraraa na mua ˈˈe.

Ua fanauhia vau i 1979 i Marite. I te toruraa o to ˈu matahiti, ua faataa to ˈu na metua. Ua paari au ia mama i roto i te mau peu a te haapaoraa ati Iuda e ua tapao o ˈna ia ˈu i te mau fare haapiiraa ati Iuda parauhia yechiva. I te hituraa o to ˈu matahiti, ua haere mâua mama e ora i Iseraela hoê matahiti te maoro. Ua faaôhia vau i roto i te tahi fare haapiiraa o te hoê oire ati Iuda parauhia kibboutz. I muri mai, ua haere mâua mama e ora i te fenua Mehiko.

Aita e sunago i te vahi ta mâua e faaea ra, aita râ vau i faarue i te mau peu a te haapaoraa ati Iuda. E tutui na vau i te mori hinu no te oroa Sabati, e taio i ta matou buka Torah e e pure atoa maoti ta matou buka pure parauhia siddour. I te fare haapiiraa, pinepine au i te parau i te mau hoa, ta matou te haapaoraa matamua roa! Aita vau i taio aˈenei i te tuhaa o te Bibilia e parauhia ra Te Faufaa Apî o te faataa ra i te taviniraa e te mau haapiiraa a Iesu Mesia. Ua faaara mai mama eiaha e taio, aˈunei to ˈu feruriraa e taero ai i tera mau haapiiraa!

No te aha oe i faaoti ai i te taio i te Faufaa Apî o te Bibilia?

I te 17raa o to ˈu matahiti, ua hoˈi au i Marite no te faaoti i ta ˈu tau haapiiraa. I reira, ua parau mai te hoê taata ta ˈu i matau e o te tiaturi ra ia Iesu, mai te peu eita vau e haapii no nia ia Iesu, te ere ra vau i te hoê mea faufaa!

Pahono atura vau: “O te feia anaˈe tei haavarehia te tiaturi ia Iesu!”

Ani mai nei oia: “Ua taio aˈenei râ oe i te Faufaa Apî?”

Pahono atura vau, aita!

Parau mai nei oia: “Aita anei oe e haava ra no te hoê mea ta oe i ore i ite?”

Ua puta roa vau i ta ˈna mau parau! No ˈu, mea maamaa hoi ia haava ma te ore e imi i te haapapuraa! Rave atura vau i ta ˈna Bibilia no te taio i te Faufaa Apî.

Eaha to oe huru a taio ai i te reira?

Ua maere roa vau i te iteraa e ati Iuda te feia tei papai i te Faufaa Apî! E rahi atu â vau i te taio, rahi atu â vau i te hiˈo ia Iesu mai te hoê ati Iuda maitai, haehaa e te tauturu ia vetahi ê! Ua haere roa atoa vau i te vairaa buka no te rave mai i te papai e faatia ra i te aamu o Iesu, aita râ te reira i haapapu mai o ˈna te Mesia! Ua maere roa atoa vau te parau ra te tahi mau buka o Iesu te Atua! No ˈu râ, aita e tuati ra i ta te Bibilia e parau ra! Mai te peu o Iesu te Atua, o vai ïa ta ˈna i pure? Hau atu â, ua pohe Iesu. Area te Bibilia, te parau ra ïa no te Atua eita o ˈna e pohe! a

Ua itehia anei ia oe te pahonoraa o tera mau uiraa?

Ua ite au te vai ra te pahonoraa e ua faaoti papu vau i te imi i te parau mau! Ma te haavare ore e te taˈi, ua pure au i te Atua. I tera râ taime, aita vau i faaohipa i ta matou buka pure. No oti noa ˈtura ta ˈu pure, patoto mai nei e piti Ite no Iehova i te opani. Ua horoa mai raua hoê o ta ratou mau papai no te haapii i te Bibilia. Maoti tera papai e te mau aparauraa e te mau Ite no Iehova, ua papu ia ˈu ua niuhia ta ratou e tiaturi ra i nia i te Bibilia. Te tahi hiˈoraa, te tiaturi nei te mau Ite no Iehova ia Iesu, e ere râ o ˈna i te hoê tuhaa o te Toru tahi, o ˈna râ “te Tamaiti a te Atua” b e “te matamua ta te Atua i poiete.” c

Tau taime rii i muri aˈe, i reira, ua tamau vau i te haapii i te mau parau tohu no nia i te Mesia e te mau Ite no Iehova. Ua maere roa vau mea rahi te mau parau tohu no nia ia ˈna! Aita râ vau i tiaturi oioi o Iesu te Mesia! O Iesu noa anei te tano i tera mau parau tohu? Peneiaˈe, ua haavare noa Iesu o ˈna te Mesia!

Na te aha i haapapu ia oe o Iesu iho â te Mesia?

Ua faaite mai te mau Ite no Iehova i te mau parau tohu eita e tano i te mau huru taata atoa, ia Iesu anaˈe râ! Te tahi hiˈoraa, hau atu i te 700 matahiti na mua ˈtu, ua parau te peropheta Mika e fanauhia te Mesia i Betelehema i Iudea. d O vai ïa taata e nehenehe e maiti i te vahi e fanauhia o ˈna? Ua papai atoa Isaia, e haapohehia te Mesia mai te hoê taata tei rave i te ino, e hunahia râ o ˈna i rotopu i te feia taoˈa. e E ua tupu pauroa teie mau parau tohu ia Iesu.

Te tahi atu haapapuraa, o te pǎpǎraa tupuna ïa o Iesu. Ua parau te Bibilia e riro te Mesia ei huaai na te arii Davida. f I tahito ra, e faaherehere na te mau ati Iuda i te mau pǎpǎraa tupuna. Ahani e ere Iesu i te huaai na Davida, ua faaite aˈena ïa to ˈna mau enemi i te reira! Aita râ ratou i na reira, mea papu maitai hoi e tamaiti iho â Iesu na Davida. I to te nahoa iteraa ia Iesu, ua tuô atoa ratou ia ˈna mai te “Tamaiti a Davida!” g

I te matahiti 70, 37 ïa matahiti i muri aˈe i te poheraa o Iesu, ua haere mai to Roma e haru ia Ierusalema e i muri aˈe i te reira, ua moˈe aore ra ua ino te mau pǎpǎraa tupuna! Area te pǎpǎraa tupuna o te Mesia, ua haapapuhia ïa, te auraa, ua fa ê mai na ïa te Mesia na mua ˈˈe i te matahiti 70!

I to oe iteraa i te reira, eaha to oe huru?

I roto i te Deuteronomi 18:18, 19, te parauhia ra e faatupu te Atua i te hoê peropheta i Iseraela mai ia Mose ra te huru. Ia au i te irava 19, ua na ô atoa te Atua: “[Te feia] te ore e faaroo mai i te parau na ˈu ta ˈna e parau ra i to ˈu nei iˈoa, e faautua ˈtu ïa vau ia ˈna.” I to ˈu haapii-maite-raa i te taatoaraa o te Bibilia, papu atura ia ˈu o Iesu no Nazareta taua peropheta ra.