Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Me 2013

 TAUTURU NO TE UTUAFARE | NO TE METUA

Ia tano te faatureraa i to tamarii taurearea, e nafea?

Ia tano te faatureraa i to tamarii taurearea, e nafea?

TE FIFI

Ia parau mai to tamarii taurearea e mea etaeta roa oe, e na ô paha oe, ‘Ia faatia vau i to ’na hinaaro ma te tuu i te hiti i ta ’u mau faatureraa, e fifihia o ’na!’

E nehenehe ta oe e horoa i te mau faatureraa e tano i ta oe tamarii taurearea. Na mua râ, ia ite oe no te aha mau na, i te tahi taime, eita o ’na e farii i te reira. *

TE TUMU

Tei matauhia i te parau: Ua tae ana‘e i tera matahiti, e patoi iho â te tamarii atoa i te mau faatureraa.

Te tupuraa mau: Ia tano te mau faatureraa e ia tauaparau na metua e te taurearea, e haapao atu paha ïa oia.

Noa ’tu e no te tahi atu tumu te taurearea e faaroo ore ai, e mea tia ia ara na metua eiaha ia etaeta roa ta raua mau faatureraa. Ia tano atoa te reira i te matahiti o te tamarii. A feruri na i tei parauhia i muri nei.

  • Mea etaeta roa. Eaha te tupu ia ore na metua e ani i te mana‘o o te tamarii hou a horoa ’i i te mau faatureraa? No ’na, e au ra e te taamuhia ra o ’na i nia i te parahiraa. Eita oia e taa e te paruruhia ra o ’na. Ia ore te metua e ite atu, o ta raua i opani o ta ’na ïa e rave.

  • Aita e tano faahou i to ’na matahiti. Ei tamariirii, e navai ia na ô, ‘Faaroo noa i tei parauhia ’tu.’ Ei taurearea râ, e hinaaro oia e ite i te tumu mau o te tahi faatureraa. E mea tano iho â! A muri a‘e, na ’na iho e faatere ia ’na e e rave i ta ’na mau faaotiraa faufaa. A haapii atu ïa i te na reira noa ’tu e tei roto noâ o ’na i to orua fare.

E nafea râ ia riri noa to tamarii taurearea no ta oe mau faatureraa?

 E NAFEA?

Noa ’tu e eita oia e parau mai, e hinaaro iho â te taurearea ia faaitehia ’tu to ’na mau otia. No reira, a horoa i te mau faatureraa e a faataa ’tu i te tumu. Ia au i te tahi buka: “E haerea maitai to te taurearea ia taa ia ’na to ’na mau otia e ia haapao maitai atu na metua.” Ia faatia-hanoa-hia râ to ’na hinaaro, e mana‘o oia e aita o ’na e tâu‘ahia ra. Te faahopearaa, e faaroo ore ïa o ’na.—Faaueraa Bibilia: Maseli 29:15.

E nafea ia ore ia etaeta roa? A vaiiho i te taurearea ia faaite mai i to ’na mana‘o no nia i te mau faatureraa a te utuafare. Ei hi‘oraa, ia ani o ’na ia tauihia te hora e ho‘i mai ai, a faaroo eaha ta ’na e parau mai. Ia tâu‘ahia to ’na mana‘o, e auraro te taurearea i ta oe faaotiraa noa ’tu e eita o ’na e mauruuru.—Faaueraa Bibilia: Iakobo 1:19.

A haamana‘o: Ia titau atu te taurearea ia rahi atu â to ’na tiamâraa, e pinepine eita te metua e farii. No reira, hou a rave ai i te tahi faaotiraa a feruri maite i to ’na mau hinaaro. E nehenehe anei ta oe e tiaturi atu? Ia au i te mau tupuraa, e titauhia anei ia taui i te faatureraa? Mai te peu e e, a na reira ïa.—Faaueraa Bibilia: Genese 19:17-22.

I te hoê â taime, a faaite ia ’na i ta oe e haapeapea ra. E haapii ïa o ’na ia haapao i to vetahi ê mana‘o eiaha râ to ’na ana‘e.—Faaueraa Bibilia: Korinetia 1, 10:24.

I te pae hopea, a rave i te faaotiraa e a faataa ’tu i te tumu. Noa ’tu e e ere tera ta ’na i mana‘o, e oaoa oia i te mea e ua faaroo to ’na na metua i ta ’na i parau. A haamana‘o e a taurearea ’i te faaineine ra o ’na i te riro ei taata paari. Ma te horoa i te mau faatureraa tano e ma te tauaparau e ta oe tamarii e riro ai oia ei taata paari maitai.—Faaueraa Bibilia: Maseli 22:6.

^ par. 5 E tano te mau faaueraa o teie tumu parau i te taurearea tamaroa e tamahine.

No te ite atu â

E NEHENEHE TO UTUAFARE E OAOA

E nafea ia haapii i to tamarii

E ere te a‘oraa i te tama‘i-noa-raa.