Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! ME 2013

 TUMU PARAU MATAMUA

E nafea ia riro ei metua tane maitai?

E nafea ia riro ei metua tane maitai?

“Eaha ta ’u i ore i rave?” O ta Michael * ïa no Afirika Apatoa e uiui noa. Noa ’tu e e ere i te mea ohie, ua tutava iho â oia i te riro ei papa maitai. I te mau taime atoa o ’na e mana‘o ai i ta ’na tamaiti orure hau 19 matahiti, e uiui noa oia e ua riro anei o ’na ei metua tane maitai.

No Terry râ e ora ra i Paniora, e au ra e mea maitai a‘e to ’na tupuraa. Te na ô ra ta ’na tamaroa Andrew: “I to ’u nainairaa, e peu matauhia na papa ia taio mai i te hoê aamu, ia hauti e o vau e ia reva i te tahi vahi o mâua ana‘e. Maoti ta papa mau ravea, mea au roa na ’u ia haapii.”

E ere iho â i te mea ohie ia riro ei metua tane maitai. E tauturu mai râ te tahi mau faaueraa. Ua faufaahia te mau papa e to ratou utuafare i te faaohiparaa i te mau a‘oraa paari o te Bibilia. E hi‘opoa ana‘e ïa vetahi.

 1. A faaherehere i te taime no to utuafare

Ei papa, e nafea ia faaite i ta oe tamarii e mea faufaa ratou? E tutava iho â oe ia noaa te tahi fare au e ia faatamaa ia ratou. Ia ore râ oe e faaherehere i te taime no ratou, e mana‘o te tamarii e aita ratou e tâu‘ahia ra aore ra mea faufaa a‘e ta oe ohipa, te mau hoa e faaanaanataeraa ia ratou.

Afea te metua tane e haamata ’i i te na reira? Noa ’tu e tei roto noâ te aiû i te opu o te mama, e taairaa piri roa to raua. Ahuru ma ono hebedoma i muri a‘e i te tôraa, e nehenehe te pêpe e faaroo. I tera taime e faatupu atoa ’i te papa i to ’na taairaa e te aiû. E faaroo oia i to ’na tupairaa mafatu e e ite atoa ia ’na ia hauti. E nehenehe ta ’na e paraparau e e himene atu.

Faaueraa Bibilia: I tahito ra, e hopoia na te tane ia haapii i ta ratou tamarii. I faaitoito-atoa-hia na te mau metua tane ia tamau i te faaherehere i te taime no ratou. O ta te Deuteronomi 6:6, 7 iho â ïa e faaite mai ra: “E teie nei mau parau ta ’u e parau atu ia oe i teie nei mahana, ei roto i to aau e vai ai: e e haapii tamau maite oe i to mau tamarii i taua mau parau nei; o ta oe ïa e parau ia parahi noa oe i roto i te fare, e ia haere noa oe na te e‘atia ra, e ia taoto noa oe ra, e ia tia noa oe i nia.”

2. A faaroo atu

A faaroo e a vai hau noa, eiaha e faahapa ’tu

Ia tauaparau ohie atu te tamarii, ia riro oe ei taata faaroo maitai e tia ’i. A tutava i te faaroo ma te ore e riri.

Mai te peu e e riri hanoa aore ra e faahapa oioi oe, e taiâ te tamarii i te faaite atu i to ratou mana‘o. Ia faaroo râ oe a vai hau noa ’i, e papu ia ratou e te tâu‘a mau atura oe. E haamahora ’tu ïa te tamarii i to ratou aau.

Faaueraa Bibilia: E faufaahia tatou i te mau a‘oraa paari o te Bibilia i roto i te mau tuhaa atoa o te oraraa. Ei hi‘oraa, te na ô ra te Bibilia: “Ia ru te taata atoa i te faaroo, ia haere maine i te parau, ia haere maine hoi i te riri.” (Iakobo 1:19) Mea ohie a‘e ia tauaparau e te tamarii ua pee ana‘e te metua tane i teie a‘oraa.

 3. A a‘o ma te here e a haapopou atu

Noa ’tu e ua riri oe, a a‘o i to tamarii ma te here ia faufaahia o ’na a paari noa ’i. Te auraa, e faaitoito, e a‘o, e e haapii atu ïa oe. Ia titauhia, e faaere atoa paha oe ia ’na i te tahi mea ta ’na e au roa.

Hau atu â, ia matau te papa i te haapopou i ta ’na tamarii, e farii ohie ïa oia i te a‘oraa a faaite atu ai i te mau huru maitatai. Te na ô ra te tahi parau paari: “Mai te lemoni auro i roto i te vairaa ario ra, o te parau ïa ia parauhia i te taime mau.” (Maseli 25:11) Ia tâu‘a ’tu na metua e oaoa ïa te tamarii. Ma te haapopou i te taime au, e ite te tamarii e mea faufaa o ’na. E tutava noa ïa oia i te rave i te mea tia.

Faaueraa Bibilia: “E te mau metua ra, eiaha e faariri atu i ta outou tamarii, o te taiâ hoi ratou.”Kolosa 3:21.

4. A here e a faatura i ta oe vahine

E hi‘o atoa te tamarii i te huru o te papa i nia i ta ’na vahine. Te faataa ra te hoê pǔpǔ taata hi‘opoa tamarii: “Te tahi mea maitai roa ’‘e ta te metua tane e nehenehe e rave, o te faaturaraa ïa i to ratou mama. . . . Ia faatura na metua ia raua, e oaoa te tamarii. E papu atoa ia ’na e te herehia ra o ’na.”—The Importance of Fathers in the Healthy Development of Children. *

Faaueraa Bibilia: “E te mau tane ra, e aroha outou i ta outou mau vahine . . . E aroha râ te taata atoa i tana  iho vahine, mai te aroha ia ’na ihora.”Ephesia 5:25, 33.

5. A pee i te a‘oraa paari o te Bibilia

E nehenehe te mau metua tane e here mau ra i te Atua e horoa i te tufaa faufaa roa ’‘e i ta ratou tamarii, te taairaa piri roa ïa e to ratou Metua i te ra‘i ra.

Ei Ite no Iehova, ua haapao iho â Antonio i ta ’na na tamarii e ono. Tau matahiti i muri a‘e, ua papai atu te tahi o ta ’na na tamahine: “Papa, te haamauruuru nei au ia oe no to haapiiraa mai ia riro ei taata maitai, ia here i te Atua ra o Iehova, to ’u taata-tupu e ia ’u iho. Ua ite au i to here ia Iehova e ia ’u iho. Mauruuru papa i te tuuraa ia Iehova na mua roa i roto i to oraraa e i te aupururaa i ta oe mau tamarii, ei ô no ǒ mai i te Atua!”

Faaueraa Bibilia: “E hinaaro atu oe i to Atua ia Iehova ma to aau atoa, e ma to varua atoa, e ma to puai atoa. E teie nei mau parau ta ’u e parau atu ia oe i teie nei mahana, ei roto i to aau e vai ai.”Deuteronomi 6:5, 6.

Eita iho â e navai ia haapao i na mana‘o e pae. Ei metua tane, te vai ra ’tu â te titauhia. Noa ’tu te mau tutavaraa, eita iho â oe e riro ei metua tane tia roa. Tera râ, ia faaohipahia teie mau faaueraa ma te here e te tano, e nehenehe oe e riro ei metua tane maitai. *

^ par. 3 Ua tauihia te tahi mau i‘oa.

^ par. 19 Noa ’tu e ua taa na metua, e maitai noa te taairaa o te tamarii e te mama mai te peu e e faatura te metua tane ia ’na.

^ par. 25 No te tahi atu â aratairaa no nia i te oraraa utuafare, a hi‘o i te buka Te ravea e itehia ’i te oaoa i te utuafare i nia www.jw.org/ty.