Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! ME 2013

 ANIMARA OVIRI

Te ria no Marite Apatoerau: te tahi animara taa ê

Te ria no Marite Apatoerau: te tahi animara taa ê

I ANAANATAE roa na te taata papai o Henry David Thoreau i teie animara. I te senekele 19, ua na ô oia: “Mea taa ê mau te hoho‘a o te ria no Marite Apatoerau. No te aha mea teitei ai teie animara e te roa ’i to ’na afii?” Mea varavara ia ite i te ria no Marite Apatoerau. E hoho‘a taa ê atoa hoi to ’na. Ua matauhia ïa i te parau e e animara maau. Tera iho â anei? I Marite Apatoerau, Europa e Asia, ua itea mai i te taata hi‘opoa te tahi mea no nia i teie animara taa ê.

Mea teitei iho â teie ria. E mana‘ohia e mea papu ore ta ’na haereraa no te roa o to ’na mau avae. Maoti râ te reira e nehenehe ai ia ’na e turai e rave rahi luko. Tau mahana noa i muri a‘e i te fanauraa e ite te fanau‘a o teie ria i te au. E na reira vetahi i nia e rave rahi kilometera. No te tamaa, e tii te tahi i te aihere ma te hopu fatata e 6 metera i te hohonu!

E nehenehe te ria no Marite Apatoerau e hautiuti i to ’na mata e e ite i  te vai ra i muri ia ’na ma te ore e huri i te afii. Mea faufaa atoa to ’na ihu. Ia au i te mau taata hi‘opoa, maoti to ’na na apoo ihu tei atea rii te tahi e tahi e ite papu ai i teie ria i te vahi o te tahi mea. E nehenehe to ’na tari‘a e fariuriu e e faaroo i te tahi atu ria e 3 kilometera te atea!

No te tahi taata papai, e ite-atoa-hia te hoho‘a huru ê o te ria no Marite Apatoerau i nia i to ’na fanau‘a. Na te maiaa e paruru atu ma te faaea noa i pihai iho e ma te aupuru atu. E taehae oia i nia i tei tapiri atu i to ’na fanau‘a, luko anei, daba aore ra taata. Ia tiahia râ to ’na hoê matahiti e ua hapû faahou te maiaa e tiahihia te fanau‘a.

I TE TAU TOETOE

I te mea e e aihere ta ’na maa, e nafea oia i te tau toetoe? E tamaa rahi o ’na. E amu te ria hau atu i te 23 kilo aihere i te mahana, aihere roa e 3 metera i nia i te fenua i roto atoa râ i te pape. E operehia ta ’na maa i roto e maha tuhaa o to ’na vairaa maa a poria ’tu ai. E fifi atu â râ ta te ria no Marite Apatoerau e faaruru.

A topa ’i te hiona, e faaoromai rahi to teie ria i te toetoe. Ma te ore e hahaere hanoa, e mahanahana noa oia i to ’na huruhuru. O te mau luko atoa te tahi fifi. Te mea atâta roa ’tu â râ, o te feia auau animara e faahoro pereoo.

Mea au na ’na ia amu i te papaa miti e vai ra i nia i te mau purumu rahi o te pae apatoerau o Marite e Kanada. Ia na reira oia i muri a‘e i te toparaa mahana, eita te taata faahoro pereoo e ite oioi atu no to ’na huruhuru ereere. E rave rahi taata e ria no Marite Apatoerau tei pohe mai tera.

E ANIMARA HAUTI

Te tahi mea au-roa-hia e teie ria, o te hopuraa i te pape mahanahana e te hautiraa ïa e te miti. I te tau apitiraa, mea haapao roa te pa‘e i te maiaa. Mea putapû mau atoa ia hi‘o i te aupuru a te maiaa i to ’na fanau‘a. E piri roa teie animara i te taata i faaamu ia ’na. Te na ô ra te taote Valerius Geist: “E ere teie animara huru ê i te maau. Mea aupuru oia i to ’na fanau‘a e eita atoa e moe ia ’na i tei faaamu atu.”

Mea ori haere e te nevaneva te fanau‘a o teie ria

Tera noa râ, a haapao maitai! Mea puai roa teie animara oviri. Ia ite noa ’tu outou i te tahi, a faaatea ’tu. Hau roa ’tu â, tei reira ana‘e te fanau‘a. Eiaha râ e haapeapea. Mai te vahi atea, e maere paha outou ia mataitai i te huru o teie animara taa ê.