Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! ME 2013

 IA AU I TE BIBILIA

Te mataitairaa i te hoho‘a faufau

Te mataitairaa i te hoho‘a faufau

Te opani ra anei te Bibilia ia mataitai i te hoho‘a faufau?

“O te hi‘o noa ’tu i t[a] vetahi ê ra vahine ei faatupu i te hinaaro, ua faaturi ïa ia ’na i to ’na ihora aau.”—Mataio 5:28.

TE FAUFAARAA

I teie mahana, mea pinepine e te ohie ia noaa mai te hoho‘a faufau. Ia au mai te Atua e ia oaoa oe, e mea tia ia ite i to ’na mana‘o no nia i te reira.

TA TE BIBILIA E PARAU RA

Aita te Bibilia i faahiti noa ’‘e no te hoho‘a faufau. Noa ’tu râ, ia au i te mau faaueraa Bibilia mea ino ia mataitai atu.

Ei hi‘oraa, ua parau te Bibilia e e faaturi te tane faaipoipo e “hi‘o noa ’tu” i ta vetahi ê vahine ma te hinaaro e taati atu. E tano ïa tera faaueraa no te taata faaipoipo aore ra taa noa e “hi‘o noa ’tu” i te hoho‘a faufau a hinaaro atu ai e taati. Mea riri roa na te Atua taua haerea ra.

 E ia ore e ravehia te peu faufau, mea ino anei ia mataitai i te reira?

“E tena na, uumi [aore ra haavî] iho i to outou mau melo . . . mai te faaturi, te parau faufau ra, te paia ra, te hinaaro tia ore ra, e te nounou tao‘a.”—Kolosa 3:5.

TA TE TAATA E PARAU RA

Aita vetahi mau aivanaa e mana‘o ra e e turai te hoho‘a faufau i te taata ia rave i te peu tia ore. Mea ino mau anei ïa i te aro o te Atua?

TA TE BIBILIA E PARAU RA

Mea ino e te viivii te “faaata rii iino,” aore ra parau hauti faufau. (Ephesia 5:3, 4) Eaha ’tu â ïa te hoho‘a faufau! I teie mahana, mea pinepine e taviri-roa-hia te taatiraa o te tane e te vahine, tane tane, vahine vahine e e rave rau atu â peu faufau. I te mea e mea ino te parau hauti faufau, mea riri roa ’tu â ïa na te Atua ia mataitaihia te hoho‘a faufau.

Aitâ te mau aivanaa i papu atura e e faatupu anei te taata i mataitai i te hoho‘a faufau i to ’na mau hinaaro tia ore. No te Bibilia râ, e tuino te reira ia tatou iho a faaoto atu ai i te Atua. Teie te a‘oraa a te Bibilia: “E tena na, uumi [aore ra haavî] iho i to outou mau melo . . . mai te faaturi . . . [e] te hinaaro tia ore.” (Kolosa 3:5) Aita te taata mataitai i te hoho‘a faufau e na reira ra. Te faatupu e te faarahi ra râ oia i tera mau hinaaro tia ore.

Na te aha e tauturu mai ia haapae i te mataitai i te hoho‘a faufau?

“E imi i te maitai, eiaha te ino . . . Ia riaria . . . i te ino, ia hinaaro râ i te maitai.”—Amosa 5:14, 15.

TA TE BIBILIA E PARAU RA

Ua faahiti te Bibilia i te mau taata taiata, taero ava e eiâ tei taui i to ratou haerea. (Korinetia 1, 6:9-11) Maoti te aha? Maoti te haapaoraa i te a‘oraa paari Bibilia ia riaria i te ino.

Ma te feruri i te mau faahopearaa iino e riaria ’i tatou i te mataitai i te hoho‘a faufau. Ia au i te tahi hi‘opoaraa piahia e te haapiiraa teitei i Utah, Marite, e rave rau fifi te tupu. “E ahoaho, e faataa ê vetahi taata mataitai i te hoho‘a faufau ia ratou a ino atu ai te taairaa e vetahi ê.” Hau roa ’tu â, mai te faataahia ’tu na, e faaoto tera peu i te Atua Poiete a faataa ê atu ai i te taata ia ’na.

Na te Bibilia e tauturu mai ia hinaaro i te maitai. Rahi atu â tatou i te taio i te reira, rahi atu â ïa tatou i te hinaaro e pee i ta ’na mau aratairaa. E itoitohia ïa tatou ia haapae i te mataitai i te hoho‘a faufau. Mai te papai salamo, e parau ana‘e: “E ore au e tuu i te hoê mea ino i mua i tau mata; e riri ïa vau i tei rave i te hapa ra; e ore hoi te reira e piri mai ia ’u.”—Salamo 101:3.