Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Mati 2013

 UIUIRAA MANA‘O | MASSIMO TISTARELLI

Te faataa ra te hoê taata hamani matini uira i to ’na faaroo

Te faataa ra te hoê taata hamani matini uira i to ’na faaroo

E aivanaa te orometua haapii ra Massimo Tistarelli i te Fare haapiiraa teitei o Sassari i Italia. E taata papai oia no e toru vea matauhia e no e hanere tiahapa papai i te pae o te ite aivanaa. E hi‘opoa oia e nafea te taata e hi‘o e e rave ai i te tahi mea ohie mai te haruraa i te popo. E feruri oia i te tahi faanahoraa o te nehenehe e ohipa mai ia tatou no te mau matini uira. Ua ui A ara mai na! ia ’na no nia i to ’na faaroo e ta ’na ohipa ei aivanaa.

Eaha ta oe tiaturiraa i na mua ’‘e?

E Katolika to ’u na metua aita râ raua e haere na i te fare pureraa. I to ’u apîraa, aita vau i tiaturi e te vai mau ra te Atua. Ua haapiihia vau e o te tauiuiraa o te mau mea ora te tumu o te ora. Ua farii iho â vau i te reira. Noa ’tu e no ’u aita e Atua Poiete, te vai ra râ te tahi i hau ê ia tatou. No te ite o vai, haere atura vau i te mau haapaoraa Bouddhisme, Hindouisme, e Taoïsme, aita râ ratou i pahono i ta ’u mau uiraa.

No te aha oe i anaanatae ai i te ite aivanaa?

I to ’u tamarii-riirii-raa, ua faahiahia vau i te mau matini. E pinepine au i te tatara e i te faaho‘i i te mau tao‘a o ta ’u mau hauti uira. O to ’u papa atoa te tumu. Mea ite roa o ’na e nafea te mau ratio e niuniu paraparau e tere ai. E rave rahi uiraa ta ’u e ui ia ’na.

Eaha ta oe ohipa ei aivanaa?

I haapii na vau no nia i te mau ravea roro uira i te Fare haapiiraa teitei i Gênes, e i muri iho, ua faahohonu vau i to ’u ite ia noaa mai ta ’u parau tuite no te hamani i te mau matini uira. No reira, ua faaaravihi au ia ’u i roto i te hi‘opoaraa i te faanahoraa o to tatou mata e e nafea ia faaohipa i te reira no teie mau matini.

 No te aha oe i anaanatae ai i te faanahoraa o te mata?

Eita to tatou mata e hi‘o noa e taa atoa râ ia ’na i ta ’na e ite ra. Mea faahiahia mau! Ei hi‘oraa: Ia haru oe i te hoê popo, eaha te tupu? A horo ai oe e haru i te reira, o te hoho‘a o te popo ta oe e ite. Ia au i te tere o te popo e te vahi ta to mata e hi‘o ra e hauti tera hoho‘a i roto i tei parauhia rétine, te hoê ïa iri rairai o te mata. Noa ’tu eaha to muri i te popo, o te reira ana‘e ta to oe mata e hi‘o.

I tera taime, e taa i te faanahoraa o to oe mata i te vitiviti o te popo e te vahi e tae ai. Te mea maere, e haamata te rétine i te taa i te tereraa e mana‘ohia o te popo ia au i te vai ra i muri mai. E faatae te uaua uira o te mata i te mau haamaramaramaraa i te roro a faaue atu ai ia oe ia haru i te popo. Mea faahiahia mau te taatoaraa o teie faanahoraa.

No te aha oe i tiaturi ai i te hoê Atua Poiete?

I 1990, ua faaea vau tau ava‘e i Dublin, i Irelane, no te rave i te mau maimiraa i Trinity College. A ho‘i ai i te fare, ua feruri ta ’u vahine, Barbara e vau i te oraraa no a muri a‘e o ta mâua mau tamarii. Faaoti a‘era mâua e haere e hi‘o i to ’u tuahine Ite no Iehova. Ua horoa mai oia i te buka La vie: comment est-elle apparue? Évolution ou création?, piahia e te mau Ite no Iehova. Ua faahiahia vau no te mau maimiraa i ravehia i roto. Ua taa ’tura ia ’u e ua farii noa vau i te haapiiraa o te tauiuiraa o te mau mea ora ma te ore e hi‘opoa e mea mau anei râ. Ei hi‘oraa, ua parau vau e te turu ra te mau ivi tahito i tera haapiiraa. Ua hape râ. Oia mau, rahi atu â vau i te hi‘opoa i te reira, rahi atu â vau i te papu e aita to te reira e niu.

Ua feruri a‘era vau i ta ’u ohipa e te mau matini uira. Na vai i hamani i te faanahoraa o te mata taata ta ’u e hi‘opoa nei?

Ua feruri a‘era vau i ta ’u ohipa e te mau matini uira. Na vai i hamani i te faanahoraa o te mata taata ta ’u e hi‘opoa nei? Eita e haere ia ’u ia hamani i te hoê matini uira o te nehenehe e haru i te popo mai ia tatou. E nehenehe te matini uira e na reira ia au noa i te mau tupuraa i porotaramahia i roto ia ’na. Ua rahi a‘e to tatou ite i to te mau matini uira e e taata hamani hoi to ratou! No tera tumu i faaoti ai au e te vai ra te hoê Atua poiete.

No te aha oe i riro ai ei Ite no Iehova?

Te tahi tumu, no te mea ua au roa mâua Barbara i ta ratou mau ravea haapiiraa. Ua faahiahia iho â vau i te mau maimiraa i ravehia i roto i ta ratou mau papai. Mea au na te taata e hinaaro e ite i te mau tuhaa rii roa i te reira. Mai tera ’toa vau. Ei hi‘oraa, mea anaanatae roa na ’u i te parau tohu Bibilia e rave rahi. Maoti ta ’u i haapii i papu ai ia ’u e no ǒ mai iho â te Bibilia i te Atua ra. I 1992, ua bapetizohia mâua Barbara ei Ite no Iehova.

Ua iti anei to oe faaroo no te ite aivanaa?

Aita, ua haapuai te reira i to ’u faaroo. Te tahi hi‘oraa, ei taata e taa ia tatou i te hoho‘a mata o te tahi atu. E nehenehe te hoê aiû e na reira tau hora noa i muri a‘e i to ’na fanauraahia mai. E nehenehe oe, oia ’toa vau e ite oioi i te hoê taata ta tâua i matau noa ’tu e tei rotopu oia i te nahoa taata. E taa ia tâua eaha to ’na huru, mea maitai anei aore ra aita. Aita râ tâua i ite noa ’‘e mea nafea to tera rahiraa haamaramaramaraa i tae oioi i te roro.

Ua papu râ ia ’u e no ǒ mai i te Atua ra o Iehova te hamaniraa faahiahia o to tatou mata. No te haamauruuru ia ’na no ta ’na mau ô, oia atoa hoi te Bibilia, e faaite au o vai o ’na ia vetahi ê. Inaha, no to ’u au i te parau-tia, ua turai te reira ia ’u ia parau e o ’Na iho â te tumu o te mau mea atoa.