Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! MATI 2013

 TAATA O TE TAU TAHITO

Platon

Platon

E philosopho Heleni Platon (427-347 hou te Mesia). Ua fanauhia oia i Ateno i roto i te hoê utuafare ona e te mana e ua fana‘o atoa i te hoê haapiiraa tei matauhia e te feia apî Heleni. I pee atoa na oia i te philosopho tuiroo ra o Socrate e te mau pǐpǐ a Pythagore, e philosopho e e taata aravihi atoa i te pae o te numera.

I MURI a‘e i to ’na tereraa i te mau tuhaa fenua no Mediteranea e to ’na faaôraa ia ’na i roto i te poritita i Surakusa, te hoê oire Heleni, i Sicile, ua ho‘i Platon i Ateno. I reira, ua haamau oia i te hoê fare haapiiraa no nia i te philosophia e te ite aivanaa. Faahiti-pinepine-hia ei fare haapiiraa teitei matamua o Europa, ua riro te reira ei pu maimiraa i te pae o te numera e te philosophia.

NO TE AHA E ANAANATAE AI OE?

Ua niuhia e rave rahi tiaturiraa a e mirioni taata, oia atoa tei parau e e Kerisetiano ratou, i nia i ta Platon haapiiraa. Ua mana‘o e rave rahi ma te hape e ua niuhia te reira i nia i te Bibilia. I roto i tera mau haapiiraa, te vai ra te mana‘o e e mea te ora ’tu ia pohe te taata.

“O te pohe-ore-raa o te varua hoê o ta Platon tumu parau au roa ’‘e.”—Body and Soul in Ancient Philosophy

Ua anaanatae roa Platon i te oraraa i muri a‘e i te pohe. Ia au i te hoê buka, “o te pohe-ore-raa o te varua hoê o ta Platon tumu parau au roa ’‘e.” (Body and Soul in Ancient Philosophy) Ua papu ia ’na e “e mea te ora ’tu ia pohe te taata o te haamaitaihia aore ra faautuahia” no te ora i roto i te ao varua ia au i to ’na huru oraraa i te fenua. *

 UA PARARE TA PLATON MAU HAAPIIRAA, MEA NAFEA?

I te roaraa e iva senekele, ua ohipa noa te fare haapiiraa philosophia a Platon mai 387 hou te Mesia e tae atu i 529 i muri a‘e i te Mesia. Ua matauhia ’tura ta Platon mau haapiiraa i te mau fenua ta Heleni e Roma i faatere. Ua farii atoa te philosopho ati Iuda ra o Philète no Alesenaderia oia atoa e rave rahi tia haapaoraa a te Amuiraa faaroo Kerisetiano i ta Platon i haapii. Ei faahopearaa, ua ô riirii noa mai te mau mana‘o philosophia mai te oraraa ’tu te tahi mea ia pohe te taata i roto i te mau haapiiraa ati Iuda e Kerisetiano.

Ia au i te hoê buka, “ua taaihia te mau haapiiraa Kerisetiano atoa, i nia i te tahi faito, i te haapiiraa philosophia Heleni o tera tau, ta Platon iho â râ. No te tahi mau Kerisetiano i farii i te philosophia . . . mea tano ia parau e e Kerisetiano e turu ra ia Platon ratou.” (The Anchor Bible Dictionary) A hi‘o na i to muri nei mau mana‘o.

Ta Platon i parau: “[I te poheraa,] te hopea hoi o te taatoaraa, e haere te parauhia ra te varua pohe ore, i mua i te tahi atu mau atua, i reira . . . o ’na e tia ’i ma te itoito no to ’na maitai, ma te rurutaina râ no to ’na ino.”—Plato—Laws, Buka XII.

Ta te Bibilia e parau ra: E taata tatou, aita râ e mea e ora ’tu ia pohe tatou. Hoê â aho to te taata e to te animara, hoê â ’toa ïa faahopearaa to raua. * A hi‘o na i te mau irava i muri nei:

  • “I hamanihia te taata matamua o Adamu ei taata ora.”—Korinetia 1, 15:45.

  • “Ua parau ihora te Atua, Ia fanau mai te fenua nei i te mau mea ora ma to ratou ra huru, te mau puaa, te mau mea e nee haere, e te mau manu avae maha o te fenua ra, ma to ratou ra huru: e oia mau atura.”—Genese 1:24.

  • “Ia pohe noa ’tu vau.”—Te mau tavana 16:30.

  • “O tei rave i te hara ra, o te pohe ïa.”—Ezekiela 18:4.

Aita te Bibilia e haapii ra e e mea te ora ’tu ia pohe te taata. A uiui na: ‘Ua niuhia anei ta ’u mau tiaturiraa i nia i te Bibilia aore ra i nia i ta Platon mau haapiiraa?’

^ par. 7 Noa ’tu e na Platon i haaparare i te tiaturiraa o te pohe-ore-raa o te varua, e ere râ o ’na te taata matamua i farii i te reira. Ua rau te huru o teie haapiiraa o tei ite-ê-na-hia i roto i te mau haapaoraa i Aiphiti e i Babulonia atoa.

^ par. 12 Te haapii maira te Bibilia e te taoto ra te feia pohe e te tiai ra ratou i te tia-faahou-raa. (Koheleta 9:5; Ioane 11:11-14; Ohipa 24:15) Mai te peu e e mea te ora ’tu ia pohe te taata, aita ïa e faufaa te tia-faahou-raa.