Eaha to roto?

Mau faaho'iraa ê

Tapura tumu parau

Ite no Iehova

Tahiti

A ARA MAI NA! MATI 2013

 TUMU PARAU MATAMUA

Faarue i to ’na fenua no te tahi atu—Moemoeâ e te tupuraa mau

Faarue i to ’na fenua no te tahi atu—Moemoeâ e te tupuraa mau

Tapiraa i te hoê oraraa maitai a‘e

UA HEPOHEPO roa George. Eita ta ’na e nehenehe e faatamaa i to ’na utuafare. I tera ’toa taime, te ma‘ihia ra te mau taata tapiri, e te pohe ra vetahi i te poia. Te vai ra te hoê oire moni tau kilometera i te pae apatoa. Ua mana‘o oia: “E imi au i te tahi ohipa i te fenua ê. Oti ana‘e, e haere mai to ’u utuafare.”

Ua moemoeâ ’toa Patricia i te hoê oraraa apî i te fenua ê. Aita ta ’na e ohipa e mea iti roa te mau ravea no te haapiiraa i to ’na fenua. Noa ’tu e e titauhia ia na roto atu i te Sahara [hoê medebara aano i apatoerau o Afirika], ua faaoti o ’na e to ’na hoa i te faarue ia Nigéria no Algérie a tere atu ai i Paniora. Ua na ô oia: “Ua hapû vau, ta ’u e hinaaro mau ra, ia maitai a‘e ïa te oraraa o ta ’u tamarii.”

Ua hinaaro Rachel e taui i to ’na oraraa ma te tere atu i Europa. I Philipino, ua ere oia i ta ’na ohipa. No te parau a to ’na fetii e noaa oioi ta ’na ohipa i te fenua ê, tarahu a‘era oia i te moni no te hoo mai i te titeti manureva, aroha ihora i ta ’na tane e tamahine a na ô atu ai: “Aita e maoro, e farerei faahou tatou.”

I te mau matahiti i mairi, e au ra e ua hau atu i te 200 mirioni taata mai ia George, Patricia e Rachel tei haere i te fenua ê. Noa ’tu e ua na reira te tahi no te mau tama‘i, ati natura aore ra hamani-ino-raa, no te rahiraa râ no te moni  ïa. I te fenua ê, eaha te mau fifi ta ratou e faaruru? Ua maitai iho â anei te oraraa o te taatoaraa? Eaha te huru o te mau tamarii a faarue ai te hoê metua no te imi i te tahi ohipa moni maitai? A hi‘o i te pahonoraa o taua mau uiraa ra.

Ia tapae no te faaea roa ’tu

E pinepine o te tere iho te fifi matamua no te haere i te fenua ê. No George, tei faahitihia ’tu na i te tumu parau matamua, ua tere oia e hanere kilometera e mea iti roa hoi ta ’na maa. Ma te haamana‘o i te reira, ua na ô oia: “E atiraa tera tere.” Mea iti roa te taata e tapae atu.

Ua hinaaro Patricia e tae i Paniora. Mea na nia i te hoê pereoo aita e tafare to ’na haereraa ’tu na roto i te medebara o Sahara. “Hoê hebedoma te tere mai Nigéria i Algérie. Ua otaa noa e 25 taata i roto i te pereoo. Ua ite matou i te mau tino pohe e te feia e overe haere noa ra i te medebara a tiai ai i to ratou pohe. Ma te aroha ore, e faarue atoa na vetahi feia faahoro pereoo i te taata i nia i te purumu.”

Ua nehenehe Rachel, eiaha mai ia George raua Patricia, e reva i Europa no te rave i te ohipa. Aita râ oia i mana‘o noa ’‘e e e mihi o ’na i ta ’na tamahine iti e piti matahiti. Te haamana‘o ra oia: “I te mau taime atoa a ite ai au i te hoê mama e amo ra i ta ’na tamarii, e oto vau.”

Mea fifi roa no George ia haamatau ia ’na i to ’na fenua apî. Tau ava‘e tei mairi hou a nehenehe ai oia e hapono i te moni no to ’na utuafare. Te na ô ra oia: “Ehia po to ’u ta‘iraa no to ’u moemoe e te inoino.”

Ua faaea Patricia tau ava‘e i Algérie hou a tae atu ai i te otia o Maroc. Te faatia ra oia: “I reira to ’u fanauraa i ta ’u tamahine. Ua tapuni au no te feia hoo tao‘a o te haru ra i te vahine no te fenua ê mai a faahepo atu ai ia ratou ia taiata. I te pae hopea, ua navai ta ’u moni no te aufau i to ’u tere na nia i te hoê poti tahito no te fano i Paniora. Ua pue noa te taata i roto, aita ’toa i navai te ravea parururaa. I taipu atoa na matou i te miti e vai ra i roto e to matou tiaa! A tapae ai râ i te pae tatahi o Paniora, ua paruparu roa ino vau, aita e maraa faahou ia haere.”

Ia feruri maite ïa te feia e hinaaro e haere i te fenua ê i te mau fifi o te nehenehe e tupu a tere ai ratou. Oia atoa, te haapiiraa i te reo e ta‘ere o te fenua apî, te aufauraa i te parau faatia tomoraa e te haapaoraa i te mau faatureraa no te riro ei melo huiraatira aore ra no te faaea roa ’tu i reira. Aita ana‘e, mea fifi roa ïa ia noaa te hoê ohipa e fare maitai, ia haere i te haapiiraa e ia fana‘o i te mau ravea rapaauraa. E ere atoa i te mea ohie ia noaa te parau faahoro pereoo aore ra hoê afata moni. Mea pinepine atoa aita ana‘e ta te taata teie mau api parau faatia atoa, ia rave ratou i te ohipa e moni haihai roa te aufauhia ’tu.

Mea tano atoa ia feruri i te faufaaraa o te moni. E oaoa iho â anei tatou ia rahi te moni?  Te horoa ra te Bibilia teie a‘oraa paari mau: “Eiaha e faahope i te puai i te tao‘a ia rahi . . . te rave nei hoi te reira i te pererau, e te maue ê nei mai te aeto i nia i te ra‘i.” (Maseli 23:4, 5) A haamana‘o ïa e eita te moni e nehenehe e hoo mai i te mau mea faufaa roa mai te here, te hau e te hoê utuafare tahoê. Auê te peapea ia haafaufaa a‘e te mau metua i te moni i te here no te hoa faaipoipo aore ra no ta ratou tamarii!—Timoteo 2, 3:1-3.

Ei taata, ua poietehia tatou ma te hinaaro e ite o vai te Atua. (Mataio 5:3) No reira, e rave te mau metua feruriraa paari i te nehenehe no te amo i te hopoia ta te Atua i horoa ’tu e haapii i ta ratou tamarii no nia ia ’Na, i ta ’na opuaraa e faaueraa.—Ephesia 6:4.

 Te hoê utuafare tahoê—Faufaa a‘e i te moni

Ua rau iho â te aamu o te feia i faarue i to ratou fenua no te tahi atu. Ua tuea to ratou tupuraa e to George, Rachel e Patricia, tei faahitihia na i to na mua ’tu tumu parau. Ia vaiiho mai te hoê metua aore ra hoa faaipoipo, e mauiui te utuafare taatoa e e tiai â ratou tau matahiti no te amui faahou. No to George utuafare, ua mairi ïa e maha matahiti.

Fatata e pae matahiti i muri a‘e to Rachel ho‘iraa mai e tii i ta ’na tamahine i Philipino. Ua tapae Patricia i Paniora e ta ’na aiû i roto i to ’na rima. Te na ô ra oia: “O ’na ’na‘e to ’u utuafare, e aupuru maitai iho â ïa vau ia ’na.”

E faaea noa vetahi i te fenua apî noa ’tu e e faaruru ratou i te moemoe, te fifi i te pae moni e te taa-ê-raa e te utuafare. I te mea e ua rahi ta ratou haapaeraa e haamâu‘araa i rave no te haere i te fenua ê, ia ore ratou e manuïa, mea iti roa tei itoito i te ho‘i i ǒ ratou no te haama.

O Allan no Philipino te tahi. E ohipa maitai ta ’na i Paniora, 18 ava‘e râ i muri a‘e ua ho‘i oia i to ’na fenua. Te parau ra oia: “Ua mihi noa vau i ta ’u vahine e tamahine. E rave au i te ohipa i te fenua ê mai te peu noa râ e e haere atoa mai te taatoaraa o te utuafare. Ua na reira iho â matou. Mea faufaa a‘e te utuafare i te moni.”

Mai ta Patricia i ite, te vai ra ’tu â te tahi mea faufaa a‘e i te moni. Ua tae atu o ’na i Paniora e te tahi huriraa o te “Faufaa api” aore ra Papai Heleni Kerisetiano. Te na ô ra oia: “No ’u, maoti teie buka i tapae mai ai au. I muri a‘e, ua farerei au i te hoê vahine Ite no Iehova. Na mua ’‘e, aita roa ’tu vau i anaanatae i te tauaparau i te mau taata o tera haapaoraa. No reira, ua ui au ia ’na e rave rahi uiraa no te faahapa i ta ratou haapiiraa, ua tia râ ia ’na ia haapapu mai i te tanoraa o te reira. Aita vau i mana‘o noa ’‘e, ua nehenehe râ ta ’na e pahono mai i ta ’u mau uiraa maoti te Bibilia.”

Ua haapii Patricia e e ere na te moni aore ra te tahi fenua, na te ite râ no nia i te Atua e ta ’na opuaraa e haafana‘o ia ’na i te oaoa mau e te hoê tiaturiraa papu no a muri a‘e. (Ioane 17:3) Ua ite-atoa-hia ia ’na te i‘oa o te Atua mau, Iehova. (Salamo 83:18) Ua taio atoa oia i roto i te Bibilia e e faaore roa te Atua i te veve maoti to ’na Basileia faaterehia e Iesu Mesia. (Daniela 7:13, 14) Te na ô ra te Salamo 72:12, 14: “O tei veve ra e ua tiaoro maira, na [Iesu] ïa e faaora; e tei ati ra e aita o ’na e tauturu. E faaora oia ia ratou i te haavare e te rave ino.”

No te aha e ore ai e faataa i te taime no te hi‘opoa i te Bibilia? E faaite atu teie buka i te paari o te Atua. E tauturu te reira ia oe ia ite i te mea faufaa roa ’‘e i roto i te oraraa, ia rave i te mau faaotiraa paari e ia faaruru i te mau ati atoa ma te oaoa e te tiaturi.—Maseli 2:6-9, 20, 21.