Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! No 2 2016

 UIUIRAA MANA‘O | YAN-DER HSUUW

Te faataa ra te tahi aivanaa mea nafea oia i faatupu ai i te faaroo

Te faataa ra te tahi aivanaa mea nafea oia i faatupu ai i te faaroo

O TE AIVANAA Yan-Der Hsuuw te tiaau ra i te mau maimiraa no nia i te tupuraa o te pêpe i roto i te opu o te mama i te haapiiraa teitei o te ihi e te mau ravea apî i te oire Pingtung i Taïwan. I tiaturi na oia mea tupu noa te mau mea atoa. Ua faataa râ o ’na i te feia pia o te vea A ara mai na! no te aha to ’na mana‘o i taui ai i muri a‘e i ta ’na mau maimiraa.

A faaite mai na ihea oe i te paariraa.

Ua fanauhia vau i 1966 e ua paari i Taïwan. I tiaturi na to ’u na metua i te mau haapiiraa a te haapaoraa Taoïsme e ta Bouddha. Noa ’tu e faahanahana na matou i te mau tupuna e e pure atoa na i mua i te mau tii, aita matou i tiaturi te vai ra te hoê Atua poiete.

No te aha oe i maiti ai i te ihi ora?

I to ’u tamariiraa, mea au roa na ’u e haapao i te mau animara. Ua hinaaro vau e haapii eaha te rave ia ore te mau animara, oia atoa te taata, ia mauiui faahou. I muri a‘e, ua haere au i te haapiiraa no te riro ei taote no te mau animara e i muri a‘e, ua rave i te mau maimiraa no nia i te tupuraa o te hoê fanau‘a i roto te opu o to ’na mama. Ua mana‘o hoi au e tauturu mai te reira ia taa maoti te aha e ora ’i te animara e te taata.

Na mua ’‘e, i tiaturi na oe mea tupu noa mai te mau mea atoa. A faaite mai na eaha te tumu.

Tera ta te mau orometua o te haapiiraa teitei i parau e ua na ô atoa mai, e haapapuraa to te reira. Ua tiaturi au i ta ratou i haapii.

No te aha oe i haamata ’i i te taio i te Bibilia?

A tahi, ua feruri au i roto i tera mau rahiraa atua ta te taata e haamori ra, te vai ra iho â hoê mea rahi a‘e. E titauhia râ ia imi o vai. Te piti, ua ite au o te Bibilia te buka faatura-roa ’‘e-hia. Ua tamata ïa vau i te haapii i te Bibilia.

I to ’u haamataraa i te haere i te haapiiraa teitei Katolika o Louvain i Beletita i 1992, ua tomo vau i roto i te tahi fare pureraa Katolika e ua ani i te perepitero ia tauturu mai ia taa i te Bibilia. Aita râ oia i farii.

Mea nafea i noaa ’i te pahonoraa o ta oe mau uiraa?

E piti matahiti i muri a‘e, te rave noa ra ïa vau i te mau maimiraa i Beletita, ua farerei au i te tahi vahine Ite no Iehova no Poronia o Ruth te i‘oa. Ua haapii o ’na i te reo Tinito no te tauturu i te mau piahi i te haapiiraa teitei o te hinaaro e ite atu â no nia i te Atua. Tera te pahonoraa o ta ’u mau pure e ua oaoa roa vau i te farereiraa ia ’na.

Ua haapapu mai Ruth te tuati ra ta te Bibilia e parau ra i te mau hi‘opoaraa a te mau aivanaa. Ua na ô Davida i te Atua i roto i ta ’na pure: “Ua ite to mata ia ’u i to ’u vai-oti-ore-raa ra; e ua oti to ’u mau melo atoa ra i te papaihia i roto i te buka na oe; i te mau mahana atoa te raveraahia, e aore roa te hoê i toe.” (Salamo 139:16) Ua tano ta Davida i parau! Noa ’tu aita te tino o te hoê pêpe i oti atura, ua papai-a‘ena-hia te mau aratairaa no nia i to ’na tupu-maite-raa. I to ’u iteraa mea tano te Bibilia, ua tiaturi mau vau o te Parau a te Atua te reira. Ua haamata atoa vau i te taa hoê ana‘e Atua mau, o Iehova. 1

 No te aha oe i papu ai na te Atua i poiete i te mau mea atoa?

Te fa o te mau maimiraa a te mau aivanaa, o te iteraa ïa i te parau mau, e ere râ te imiraa i te haapapuraa o ta vetahi e mana‘o ra. I muri a‘e i ta ’u mau maimiraa, ua papu roa ia ’u mea poietehia te mau mea atoa. Ua ite a‘ena outou i te feia aravihi e patia i te mau niuniu uira i te vahi taa maitai e i te taime tano mau? Mai tera rii te tupuraa o te pêpe i roto i te opu, ua hau ê râ te faahiahia!

Hoê ana‘e tao‘a tahi ora te itehia i te haamataraa, e ere anei?

E. Mea nainai roa e o ’na ana‘e i te haamataraa. I muri iho râ, e hamani oia i te tahi atu mau tao‘a tahi ora e e rahi roa mai te reira. E tataipiti to ratou numera i te mau 12 hora atoa e tae atu 24 hora. I te haamataraa iho â e itehia ’i te mau tao‘a tahi ora tumu. 2 E nehenehe hoi ta ratou e hamani na 200 tao‘a tahi ora o te hinaarohia ia oti maitai te tupuraa o te tino o te pêpe mai te mau tao‘a tahi ora no te toto, no te mau ivi, no te mau uaua uira e te vai ra ’tu â.

I muri a‘e i ta ’u mau maimiraa, ua papu roa ia ’u mea poietehia te mau mea atoa

E tia ia hamanihia te tahi mau tao‘a tahi ora taa maitai i te taime tano mau e i te vahi i faataahia. Na mua, e haaputuputu e e apǎpǎ ratou ia ratou a hamani atu ai i te mau mero atoa e oti ana‘e te reira e tupu mai ai na avae e rima. Auê te faahiahia i te mana‘o-noa-raa e hamani i tera huru faanahoraa! Ma te faahiahia mau, ua papaihia te mau haamaramaramaraa atoa no nia i te tupuraa o te tino o te hoê pêpe i roto i to ’na ADN (acide désoxyribonucléique). Ua ite au i te faahiahia o te reira e ua papu atura ia ’u na te Atua i horoa mai i te ora.

No te aha oe i riro mai ai ei Ite no Iehova?

Hoê noa tumu, no te here. Ua na ô Iesu: “O te mea teie e ite ai te taata atoa e, e pǐpǐ outou na ’u, ia aroha outou ia outou iho.” (Ioane 13:35) Eita tera here e maiti i te taata ia au i te fenua no reira mai oia, ia au i ta ’na mau peu tumu aore ra to ’na iri. Ua mataitai e ua ite roa vau i tera here i to ’u haereraa i te putuputuraa a te mau Ite no Iehova.

^ 1. Salamo 83:18; Korinetia 1, 8:5, 6.

^ 2. No to ’na mana‘o haava Kerisetiano, aita te aivanaa Yan-Der Hsuuw i faaohipa i te mau tao‘a tahi ora o te hoê pêpe i roto i te opu o to ’na mama i roto i ta ’na mau maimiraa.