Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! No 2 2016

 TAUTURU NO TE UTUAFARE | NO TE METUA

Te area taime e taui ai te tino o to tamarii

Te area taime e taui ai te tino o to tamarii

TE FIFI

Ua paari oioi ta oe tamarii e te riro maira oia ei taurearea.

I roto i tera area taime huru ê mau no ’na, e ite oia i te tahi mau tauiraa i nia i to ’na tino. E nafea oe e tauturu ai i ta oe tamaroa aore ra tamahine?

TE TIA IA ITE

E taui iho â te tino o te tamarii i te tahi faito matahiti. No vetahi, e haamata i te 8raa o to ratou matahiti area no te tahi atu, i te 15raa ïa o to ratou matahiti. Ia au i te tahi buka: “Eita e nehenehe e haapapu i te matahiti taa maitai e taui ai te tino o te tahi tamarii.”—Letting Go With Love and Confidence.

I roto i tera area taime, e nehenehe te tamarii e taiâ hanoa. E haapeapea hanoa te taurearea i te ite i to vetahi ê mana‘o. Te na ô ra Jared *: “E haapeapea vau mai te aha râ to ’u huru faaahuraa e haerea. I mua i te taata, e uiui noa vau, ‘Te mana‘o ra anei ratou mea ê roa to ’u huru?’” E taiâ roa ’tu â te tamarii i te taime a faura mai ai te mau puupuu i nia te hoho‘a. Te na ô ra Kellie, 17 matahiti: “Ua î roa to ’u hoho‘a i te mau puupuu. Ua ta‘i au e ua parau e ere au i te tamahine nehenehe.”

E ere te mea ohie ia haamata te mau tauiraa i nia i te tino. No te mau tamahine iho â râ o te faaooohia ia rahi mai to ratou titi aore ra ohure. Ia au i te hoê buka: “E faahinaarohia ratou e te mau tamaroa paari a‘e o te nehenehe a‘ena e taoto i te tamahine.”—A Parent’s Guide to the Teen Years.

E ere te auraa ua paari to ’na feruriraa. Ia au i te Maseli 22:15: “Ua mau roa te maamaa i roto i te aau o te tamarii.” E tano atoa tera parau i roto i te area taime e taui ai te tino o to tamarii. I rapae mai, e tino taata paari paha to ’na. Ia au râ i te hoê buka: “E ere te auraa, e feruriraa paari to ’na no te rave i te faaotiraa maitai, e haerea maitai to ’na e e tia ia ’na ia haavî i to ’na huru, e aore ra [te faaite ra] oia i te tahi atu mau huru o te hoê taata paari.”—You and Your Adolescent.

 E NAFEA ÏA IA TAUTURU ATU?

A tauaparau i te tamarii hou a itehia ’i te tauiraa i nia i to ’na tino. A faaite i ta oe tamahine, e tupu mai to ’na ma‘i ava‘e e i ta oe tamaroa, e ite oia i to ’na pape tane ia tahe i te po. Mea taa ê tera mau tauiraa i te tahi atu no te mea e tupu taue noa mai te reira. E huru ê e e riaria atoa paha to tamarii. A aparau ai oe ia ’na, a tamahanahana atu ma te parau e tapao faaite te reira te riro maira oia ei taata paari.—Aratairaa Bibilia: Salamo 139:14.

Eiaha e taiâ i te faaite i te parau mau. Te haamana‘o ra John: “Aita to ’u na metua i horoa mai i te mau faataaraa papu no nia i te mau tauiraa o to ’u tino. No ’u, mea maitai a‘e ahiri raua i faaite tia roa mai eaha te tupu.” Hoê â atoa mana‘o to Alana, 17 matahiti: “Ua faataa mai to ’u mama eaha te tupu ra i nia i to ’u tino. Mea maitai a‘e râ, ahiri o ’na i tauturu mai ia ore ia haapeapea.” Eaha te haapiiraa? Noa ’tu e ere i te mea ohie, eiaha e taiâ i te tauaparau no nia i te mau tuhaa atoa.—Aratairaa Bibilia: Ohipa 20:20.

A turai i to tamarii ia faaite i to ’na mana‘o. Ia ore o ’na ia huru ê, a turai ia ’na ia faaite i te huru o te tahi atu mau tamarii i mua i tera mau tauiraa. E ani paha oe i ta oe tamahine: “I te fare haapiiraa, ua haamata anei vetahi tamahine i te paraparau no nia i te ma‘i ava‘e? Te faaooo anei ra vetahi i te mau tamahine no te mea ua taui to ratou tino?” I ta oe tamaroa, e ani paha oe: “Te faaooohia ra anei vetahi no te mea aita i itehia ’tura tera mau tauiraa i nia i to ratou tino?” Ia faaite te tamarii i te huru o vetahi ê i mua i tera mau tauiraa, mea ohie a‘e no ’na ia faataa i to ’na mau mana‘o. Ia na reira oia, a pee i te a‘oraa Bibilia: “Ia ru te taata atoa i te faaroo, ia haere maine i te parau.”—Iakobo 1:19.

A tauturu atu ia faaite “i te paari maitai e te haapao.” (Maseli 3:21) E taime tera e itehia ’i te tauiraa i nia i te tino e te huru o te tamarii. E taime atoa râ te reira e nehenehe ai oe e haapii ia ’na ia faaite i te feruriraa paari o te tauturu atu ia rave i te mau faaotiraa maitatai i muri a‘e, ia riro mai oia ei taata paari. A haafaufaa i tera taime no te haamataro i to tamarii ia ite eaha te mea maitai e te mea ino.—Aratairaa Bibilia: Hebera 5:14.

A tamau i te aparau e to tamarii. Mea faufaa ia tauaparau no nia i te mau tauiraa i nia i te tino o te tamarii noa ’tu e au ra aita te rahiraa o ratou e hinaaro ra. Ia au i te tahi buka: “E haamana‘o te tamarii i te mau parau atoa i faahitihia noa ’tu e parau oia aita o ’na e anaanatae ra, mea haumani, mea huru ê aore ra te haavare ite ra oia.”—You and Your Adolescent.

^ par. 8 Ua tauihia te mau i‘oa.