Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  No 2 2016

Mea ninamu e rearea. (85 tenetimetera)

E manu nehenehe mau

E manu nehenehe mau

E ITEHIA te mau û purapura maitai ia rere te nǎnǎ manu parauhia Ara na nia i te ururaau! Ua faahiahia roa te feia hi‘opoa no Europa i te iteraa i te reira a tae ai ratou i Marite i Ropu e i Apatoa i te mau matahiti 1400. A hi‘o na i te hoho‘a i nia ’tu, tera te huru manu ta ratou i ite. Mea roroa to ratou hope e e itehia ratou na te mau vahi veavea e haumi o Marite. I nia i te mau hoho‘a fenua, mea maoro to ratou riroraa ei tapao faaite o te mau vahi faarirohia ei paradaiso.

Mea pura a‘e to ratou û i to te tahi atu mau manu. E manu maramarama ratou e te ohie ia haafatata ’tu. Mea ahoahoa roa e puai mau to ratou ta‘i. I te poipoi roa, mai to ratou ofaaraa, e rere amui hau atu 30 manu no te haere e imi i te maa mai te mau huero, te maa hotu e te vai ra ’tu â. E pinepine ratou i te faaohipa i to ratou avae no te haru i te maa e no te tuu i roto i to ratou utu rahi e te puu. Maoti te reira, e nehenehe roa ta ratou e vahi i te huero paari mau! Ia paia ratou, e haere te nǎnǎ i nia i te mato, e aore ra i te hiti anavai no te amuamu i te araea. E tauturu hoi te reira ia tamâ i te mea taero no roto mai i te maa ta ratou i amu e ia fana‘o i te mau mea maitatai no to ratou tino.

“Ua faanehenehe [te Atua] i te mau mea atoa i te tau mau ra.”—Koheleta 3:11

Eita te apiti o te manu e faarue ia ’na tae roa ’tu i to ’na pohe e mea haapao te tahi e te tahi i ta raua fanau‘a. E ofaa teie  mau manu huru rau i roto i te mau apoo o te mau tumu raau, hiti anavai e nia i te ofaaraa o te mau manumanu amu raau. Na reira atoa i roto i te mau ana e te mau afaraa o te mau mato. I reira e itehia ’i na apiti manu ia tamâ i te pererau o te tahi e te tahi. I te 6raa o to ’na ava‘e, ua paari te fanau‘a e e faaea oia i to ’na na metua e toru matahiti i te maoro. I roto i te ururaau, e nehenehe tera huru manu e ora 30 aore ra 40 matahiti. Ia tapeahia o ’na i roto i te fare manu, e naea ia ’na hau atu 60 matahiti. E 18 hoho‘a manu mai teie, a hi‘o na te tahi o ratou i raro noa ’tu e i te pae atau.

Mea matie e uteute. (Hau atu 95 tenetimetera)

Mea ura. (85 tenetimetera)

Mea ninamu pa‘o. (Hau atu 100 tenetimetera) Teie te mea rahi roa ’‘e i roto ia ratou e e nehenehe e naea ia ’na hau atu hoê kilo