Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! No 2 2016

 TUMU PARAU MATAMUA

E buka maitai noa anei te Bibilia?

E buka maitai noa anei te Bibilia?

Ua oti te Bibilia i te papaihia a piti tausani matahiti a‘enei. E rave rahi buka tei papaihia i muri a‘e e hope atura to ratou tau. Area te Bibilia, te vai noa nei ïa. A hi‘o na i te mau mana‘o i muri nei.

  • E feia mana tei tamata i te faaore i te Bibilia. A hi‘o na tei tupu i te mau fenua parauhia Kerisetiano i te senekele 13 e tae atu 15. Te faaite ra te tahi buka, “te vai ra ana‘e ta te taata Bibilia na roto i te reo tumu [o te rahiraa o te taata] e ia taio ratou i te reira, e faarirohia ïa ei feia orure hau e te patoi.” (An Introduction to the Medieval Bible) E nehenehe e taparahihia te feia e huri i te Bibilia na roto i te reo tumu o te taata, oia atoa tei faaitoito ia haapii i te Bibilia. Te vai ra vetahi, ua haapohe-roa-hia.

  • Noa ’tu to ’na mau enemi, o te Bibilia te buka opere-roa ’‘e-hia na mua ’‘e e tae roa mai i teie nei. Ua neneihia e pae miria Bibilia aore ra te tahi tuhaa o te reira na roto hau atu 2 800 reo. Mea atea roa ïa ia faaauhia i te tahi atu mau buka philosopho, aivanaa e te vai ra ’tu â o tei operehia i te tahi noa mau vahi e o te titauhia ia faaapî i muri a‘e.

  • Ua riro te huriraa o te Bibilia na roto vetahi reo ei ravea ia vai noa tera mau reo e ia itehia te mau ta‘o apî. Ua haafaufaa-mau-hia te huriraa a Martin Luther i roto i te reo Heremani. Ua parauhia o te neneiraa matamua o te King James Version “te buka faufaa roa ’‘e” no te reo Beretane.

  • “Ua ohipa mau [te Bibilia] i nia i te mau nunaa taata no Europa e no te pae apatoerau o Marite. Eiaha noa i nia i te mau tiaturiraa e peu, i nia atoa râ i te hamaniraa i te mau tao‘a, te mau papai, te ture, te poritita e i roto i te tahi atu mau tuhaa e rave rahi o te ore e nehenehe e faahiti pauroa ’tu.”—The Oxford Encyclopedia of the Books of the Bible.

Teie noa te tahi haapapuraa e faaite ra mea taa ê te Bibilia. No te aha râ tera te buka opere-roa ’‘e-hia? No te aha te taata i ineine ai i te pohe no te reira? Teie te tahi mau tumu: Tei roto i te Bibilia te mau aratairaa paari o te tauturu i te taata ia oaoa e ia haafatata i te Atua. Te faataa ra te Bibilia eaha te tumu o te mauiui e te mau fifi o te taata. E hau roa ’tu â, te fafau atoa mai ra fatata te taime e ore roa te reira.

 Te haapii ra te Bibilia nafea ia rave i te maitai e ia haafatata i te Atua

Mea faufaa ia haere i te haapiiraa. Te parau ra râ te tahi tumu parau i roto i te vea Ottawa Citizen i Kanada, “noa ’tu e rave rahi parau tuite ta oe, e ere te auraa e rave oe i te faaotiraa maitai.” A feruri na, e rave rahi taata ua noaa ta ratou parau tuite, mai te mau ona rahi e te mau tia faatere. Noa ’tu râ, te haavare nei ratou, te taviri nei i te taata e te eiâ nei. Ia au i te tahi titorotororaa piahia e te taiete Edelman, “tera te tumu rahi i faaea ’i te taata i te tiaturi ia ratou.”

Te horoa ra te Bibilia i te haapiiraa o te tauturu i te taata ia oaoa e ia haafatata i te Atua. Te haapii mai ra e nafea ia ite “i te parau-tia, e te parau au, e te pi‘o ore, e te mau e‘a maitatai atoa ra.” (Maseli 2:9) A hi‘o na i tei tupu no Stephen, 23 matahiti, o tei tapeahia i te fare auri i Poronia. I reira, ua haamata oia i te haapii i te Bibilia e te haafaufaa i te mau a‘oraa paari e vai ra i roto. Ua papai oia: “I teie nei au i taa ’i eaha te auraa, ‘e faatura ’tu i to metua tane e to metua vahine.’ Ua haapii atoa vau nafea ia haavî i to ’u huru, te riri iho â râ.”—Ephesia 4:31; 6:2.

Ua haafaufaa mau Stephen i te aratairaa o te Maseli 19:11: “Na te haapao o te taata e ore e riri vave ai; o to ’na ïa maitai te faaore i te hara ra.” Tei mua ana‘e Stephen i te tahi tupuraa fifi, e feruri maite na mua oia i te reira a haapao atu ai i te mau aratairaa papu a te Bibilia. Ua na ô oia: “Ua ite mau vau tei roto i te Bibilia te aratairaa maitai roa ’‘e.”

Ua faainohia Maria, e Ite no Iehova, i mua i te taata e te tahi vahine o tei imi i te peapea. Aita râ Maria i tâu‘a e aita i pahono atu. Taa a‘era i tera vahine ohipa ino ta ’na i rave e ua imi oia i te mau Ite. Hoê ava‘e i muri a‘e, farerei faahou atura oia ia  Maria. Ua haru ia ’na i roto i to ’na rima e ua ani ia faaore i ta ’na hapa. Ua taa maitai atoa oia ua faaite Maria i te mǎrû no ta ’na mau tiaturiraa. Eaha te hopearaa? Ua haapii tera vahine e e pae melo o to ’na utuafare i te Bibilia e te mau Ite no Iehova.

Ua faaite Iesu e itehia te paari na roto i ta ’na mau ohipa. (Luka 7:35) E ere anei e mau aratairaa î i te paari ta te Bibilia? E tauturu mai hoi te reira ia riro ei taata maitai a‘e. Maoti ta ’na mau aratairaa “e paari ai te aau o te maua,” “e oaoa ’i te aau” e “e maramarama ’i te mata nei” no te ite i te mea maitai e te mea ino e eaha te opuaraa a te Atua.—Salamo 19:7, 8.

Te faataa ra te Bibilia mea nafea te ati e te mauiui i te haamataraa

Ia rave te mau aivanaa i te maimiraa no nia i te tahi ma‘i pee, e imi na mua ratou na te aha i faatupu i te reira. Hoê â huru no te mau ati e fifi o te huitaata. E faufaa rahi to roto i te Bibilia no te mea na ’na e faatia ra i tei tupu i te haamataraa, i te taime i ô mai ai te ino.

Te faaite ra te Genese, ua haamata te ati o te huitaata a orure hau ai na taata matamua i te Atua. Ua maiti raua i te faaoti eaha te mea maitai e te mea ino, e tiaraa ana‘e hoi tera no to tatou Atua poiete! (Genese 3:1-7) Ma te peapea, mai reira mai te rahiraa i faaite ai i te hoê â huru feruriraa orure hau. Ua itehia anei te tiamâraa e te oaoa? Aita roa, o te aroraa, te haavîraa, te haerea iino tei rahi mai e ua atea roa te taata i te Atua. (Koheleta 8:9) Ua tano maitai ta te Bibilia e parau ra: “E ere hoi tei te taata . . . i te haapao i to ’na taahiraa.” (Ieremia 10:23) Te parau apî râ, fatata roa te orureraa hau a te huitaata i te faaea.

 Te faaite ra te Bibilia i te tupu a muri a‘e

Te haapapu maira te Bibilia e here rahi to te Atua no te feia e auraro ra ia ’na e e haapao ra i ta ’na mau faaueraa. No reira oia e faaore ai i te ino e te mauiui. “E amu [te feia iino] i ta ratou iho i imi.” (Maseli 1:30, 31) “Area te feia mǎrû ra, e parahi ïa i te fenua, e oaoa ratou i te rahi o te hau.”—Salamo 37:11.

“O [te Atua] tei hinaaro i te taata atoa ia ora, e ia noaa te ite i te parau mau.”—Timoteo 1, 2:3, 4

E faatupu te Atua i ta ’na opuaraa e hopoi mai i te hau i te fenua nei maoti “te basileia o te Atua.” (Luka 4:43) Na tera Basileia e faatere i te ao taatoa e mea na roto i tera ravea te Atua e haapapu ai tei ia ’na te tiaraa e faatere i te huitaata. Teie ta Iesu i parau no tera Basileia: “Ia tae to oe ra basileia. Ia haapaohia to oe hinaaro i te fenua nei.”—Luka 11:2.

E rave te feia e faaterehia ra e te Basileia o te Atua i to ’na hinaaro ma te farii i te tiaraa faatere o te Atua poiete, eiaha to te tahi taata. E ore roa te mau ohipa petaraa, te nounou, te veve, te hi‘o-ino-raa i te tahi nunaa e te mau tama‘i. I tera taime, hoê ana‘e nunaa, hoê faatereraa, hoê aratairaa no nia i te mea maitai e te mea ino e hoê ana‘e haamoriraa.—Apokalupo 11:15.

Mea faufaa roa te ite no te fana‘o i tera huru oraraa. Te na ô ra te Timoteo 1, 2:3,  4: “O [te Atua] tei hinaaro i te taata atoa ia ora, e ia noaa te ite i te parau mau.” O te iteraa ïa i ta te Bibilia e haapii ra no nia i te pǎpǎ ture a te Basileia: Te mau ture e aratairaa ta ’na e faaohipa no te faatere i te taata, mai te itehia ra i roto i ta Iesu Mesia A‘oraa i nia i te mou‘a. (Mataio, pene 5-7) A taio ai i tera na pene e toru, a tamata na i te feruri i te huru o te oraraa ia haapao te taata atoa i ta Iesu mau a‘oraa paari.

E maere anei tatou o te Bibilia te buka opere-roa ’‘e-hia na te ao nei? Eita roa ’tu! Te itehia ra no ǒ mai i te Atua ra te mau haapiiraa e vai ra i roto. Na roto i to ’na opereraahia, te faaite ra te Atua i to ’na hinaaro ia haapii te taata no te mau reo e nunaa atoa i te parau mau no nia ia ’na e ia fana‘o ratou i te mau haamaitairaa ta te Basileia o te Atua e faatupu.—Ohipa 10:34, 35.

No te ite atu â

E parau mau anei te Bibilia?

Mai te peu e buka no ǒ mai i te Atua, eita anei te reira e taa ê i te tahi atu mau buka?

Te Bibilia—Te hoê buka no ǒ mai i te Atua ra

E nafea te Bibilia e tauturu ai ia oe ia faaruru i te mau fifi? No te aha oe e nehenehe ai e tiaturi i te mau parau tohu?

No te aha e haapii ai i te Bibilia?

E horoa te Bibilia i te mau pahonoraa i te mau uiraa faufaa o te oraraa i te mau mirioni taata na te ao nei. E hinaaro anei oe e ite i tera mau pahonoraa?