Te mau fifi peapea mau

E nehenehe te mataˈi viivii e haafifi i te ora i nia i te fenua. Ia au i te faatureraa a te Faanahonahoraa no te ea na te ao, mea iti roa te taata na te ao nei o te fanaˈo nei i te mata ˈi viivii ore.

E nehenehe te mataˈi viivii e faatupu i te maˈi hutiraa aho, te mariri ai taata o te mahaha e te maˈi mafatu. I te mau matahiti atoa, te haapohe nei te reira fatata e 7 000 000 taata.

 E vai noa to tatou paraneta

Ua poietehia to tatou paraneta no te horoa tamau i te mataˈi viivii ore. E maitai noa te reira mai te peu e faatura te taata i te natura. Teie te tahi mau hiˈoraa.

• Ua ite maitai tatou e nehenehe te mau uru raau e rave mai i te mataˈi ino. Tera râ, e nehenehe te mau uru raau i te mau vahi varivari i te pae tahatai e tatara hau roa ˈtu â mataˈi ino ia faaauhia i te tahi atu mau uru raau.

• Te faaite atoa ra te mau tuatapaparaa apî e e nehenehe te tahi mau rimu rarahi e rave mai i te mataˈi ino i roto i te reva mataˈi. Maoti to ratou mau pute iti tei î i te mataˈi e painu ai teie mau rimu. I tua, e paaina teie mau pute iti e e topa teie mau rimu î i te mataˈi ino i roto i te hohonuraa o te moana e rave rahi hanere matahiti.

• I te tau opanipaniraa no te COVID-19, ua faaapî te reva mataˈi ia ˈna iho i te mau haaviiviiraa rahi. I 2020, a faaea ˈi te mau taiete hamaniraa taihaa na te ao e te mau pereoo i te haaviivii i te fenua, ua maitai oioi mai te huru o te mataˈi. Ia au i te hoê parau faataa (Rapport 2020 sur la qualité de l’air dans le monde), i muri noa aˈe i te tau opanipaniraa, mea viivii ore aˈe te mataˈi o te rahiraa o te mau fenua i titorotorohia.

 Eaha te ravehia nei?

Te tamau noa ra te mau faatereraa i te ani i te mau taiete hamaniraa taihaa ia faaiti i te haaviivii i te mataˈi. Te imi atoa ra te mau aivanaa i te mau ravea apî no te faaiti i te mau faahopearaa ino o te haaviiviiraa. Hoê ravea, o te faaohiparaa ïa i te mau mea ora hua roa no te faariro i te mau mea viivii atâta ei mea viivii ore. Hau atu â, te faaitoito nei te feia maimi i te taata ia haere na avae aore ra na nia i te pereoo taataahi e ia faaiti i te faaohiparaa i te uira i te fare.

Eita râ e navai! Tera tei itehia i roto i te hoê parau faataa i 2022. Ua ravehia te reira e te mau pu na te ao mai te Faanahonahoraa no te ea na te ao e te Fare moni o te tauturu i te mau fenua.

Ia au i teie parau faataa, i 2020, hoê taata i nia e toru na te ao te faaohipa nei i te mau mea o te haaviivii i te mataˈi a tunu ai i te maa. I e rave rahi vahi, mea iti te feia te nehenehe e hoo mai i te mau umu apî aore ra te nehenehe e fanaˈo i te mau ravea o te ore e haaviivii i te mataˈi.

Eaha te tiaturiraa ta te Bibilia e horoa ra?

“Teie ta te Atua mau, o Iehova, e parau ra, te Atua poiete o te raˈi e . . . Tei hamani i te fenua e te mau mea atoa i nia iho, Tei horoa i te aho no te taata i reira.”—Isaia 42:5.

Ua poiete te Atua i te mataˈi ta tatou e huti ra e ua faanaho oia ia faaapî-tamau-hia te reira i roto i te natura. Te haapapu ra te reira i te puai e te here o te Atua no te huitaata. E ere anei i te mea tano ia tiaturi e tatara roa o ˈna i te viivii i roto i te mataˈi? A hiˈo i te tumu parau “Te fafau ra te Atua e e vai noa to tatou paraneta.”