Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! No 1 2016

 IA AU I TE BIBILIA

Te hopea o teie nei ao

Te hopea o teie nei ao

Te parauhia ra i roto i te Ioane 1, 2:17: “Te mou nei hoi teie nei ao, e ta to te ao atoa e hinaaro nei.” Eaha tera “ao”? E nafea e afea te reira e mou ai?

Eaha te “ao” o te mou?

TA TE BIBILIA E PARAU RA

E ere te fenua, e “hinaaro” hoi to tera ao o ta te Atua e ore e au. O te mau taata râ aita e haapao ra i te Atua a riro atu ai ei enemi no ’na. (Iakobo 4:4) O ratou “te [faa]utuahia mai ïa i te pohe mure ore.” (Tesalonia 2, 1:7-9) Area te feia e haapao i ta Iesu Mesia faaueraa, “e ere outou i to teie nei ao,” e nehenehe ïa e fana‘o i te ora mure ore.—Ioane 15:19.

No reira e parauhia ’i i te pae hopea o te Ioane 1, 2:17: “O tei haapao râ i to te Atua ra hinaaro, e tia ïa i te oraraa e a muri noa ’tu.” E fana‘o ïa tera mau taata i te ora mure ore i nia i te fenua nei mai tei parauhia i roto i te Salamo 37:29: “E parahi te feia parau-tia i nia i te fenua, e parahi tamau â ratou i reira.”

“Eiaha e hinaaro i teie nei ao, e te mau mea atoa o teie nei ao. O te taata i hinaaro i teie nei ao ra, aore te hinaaro i te Metua ra i roto ia ’na.”Ioane 1, 2:15.

E nafea te ao e mou ai?

TA TE BIBILIA E PARAU RA

E piti tuhaa ia tae mai te hopea o te ao. Na mua, e haamou te Atua i te haapaoraa hape o tei faahoho‘ahia i te tahi vahine faaturi o “Babulonia rahi” te i‘oa. (Apokalupo 17:1-5; 18:8) Noa ’tu e parau oia te haamori ra o ’na i te Atua, te turu ra oia i te mau tia poritita o te ao. E fariu râ ratou i nia ia ’na. “E faufau ïa [ratou] i taua faaturi ra, e e pau oia ia ratou i te haru, e e veve roa, e e amu i to ’na tino [aore ra ta ’na mau faufaa], e e tutui ia ’na i te auahi.”—Apokalupo 17:16.

I muri iho, o “te hui arii o te fenua nei,” te mau faatere poritita, e te feia iino ta te Atua e haamou. E tupu te reira i “te tama‘i i taua mahana rahi o te Atua Puai hope ra” o te parau-atoa-hia Aramagedo.—Apokalupo 16:14, 16.

“E imi ia Iehova, e te feia i haehaa i nia i te fenua nei, . . . e imi i te parau-tia, e imi i te haehaa: peneia‘e outou o te faatapunihia ia tae i te mahana e riri ai Iehova ra.”Zephania 2:3.

 Afea te hopea o te ao e tae mai ai?

TA TE BIBILIA E PARAU RA

E tae mai te hopea ua faaite-maitai-ana‘e-hia na te ao te poroi o te Basileia o te Atua, te hoê faatereraa no te ao taatoa o te mono i ta te taata. (Daniela 7:13, 14) Ua na ô Iesu Mesia: “E parau-haere-hia te evanelia o te basileia nei e ati noa ’‘e teie nei ao, ia ite te mau fenua atoa: o te hopea ihora ïa i reira ra.” (Mataio 24:14) E tuhaa tera ohipa pororaa, o te faaite i te parau-tia a te Atua e to ’na aroha, o te “tapao” o te anotau hopea. Oia atoa te mau tama‘i, te mau aueueraa fenua, te o‘e e te mau ma‘i i te mau fenua atoa.—Mataio 24:3; Luka 21:10, 11.

Te faaite atoa ra te Bibilia mai te aha te huru o te taata i te “anotau hopea.” Te parauhia ra: “E tupu te ati rahi i taua anotau hopea nei, ia ite mai oe. E riro te taata nei ei miimii, e nounou moni, . . . e faaroo ore i te metua, . . . e haapao ore, e iria, e te au ore i te taata maitatai ra, . . . e te hinaaro i te mau mea e navenave ai ra aore hinaaro i te Atua.” *Timoteo 2, 3:1-5.

Fatata teie nei ao i “te mou.”—Ioane 1, 2:17.

Te faaite ra tera mau tupuraa atoa ua haamata tera anotau i te area matahiti a tupu ai te Tama‘i rahi matamua i 1914. Hau atu â, te faaitehia ra te Basileia o te Atua i te mau vahi atoa mai tera matahiti mai â. Te oaoa nei te mau Ite no Iehova ua ite te taata o ratou te rave nei i tera ohipa. No reira i ravehia ’i te i‘oa Te Pare Tiairaa e faaite ra i te Basileia o Iehova no ta ratou vea faufaa mau.

“E teie nei, e ara, aore hoi outou i ite i te mahana e te hora atoa.”Mataio 25:13.

^ par. 14 No te ite atu â, a hi‘o i te pene 9 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty.

No te ite atu â

E rave rahi te ora ’tu i te hopea: Oe atoa anei?

Eaha te rave? E haaputu anei oe i te maa aore ra e faaineine anei i te tahi atu ohipa?