Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 3 2016

 TUMU PARAU MATAMUA | IA POHE TEI HEREHIA

Eaha te tamahanahana ’tu?

Eaha te tamahanahana ’tu?

Mea rahi te ravea e horoahia mai. E tia râ ia haapao maitai. E parau atu hoi vetahi eiaha e ta‘i aore ra e faaite i to oe mauiui. Area te tahi atu, e parau roa mea ino ia ore ia ta‘i e ia tapea i to oe oto. Mea tano a‘e râ te mana‘o o te Bibilia e te tuati ra te reira i ta te mau aivanaa maimiraa o teie tau.

I te tahi mau fenua, mea haama ia ta‘i te hoê tane. E parau mau iho â anei te reira? E ere roa ’tu! Te faaite ra hoi te mau taote roro mai tera iho â te hamaniraa o te taata, ia mauiui o ’na e tahe te roimata. I te tahi taime, e tauturu te reira ia haere i mua noa ’tu te mauiui rahi. Te haapapu-atoa-hia ra mea ino roa ia tapea i to tatou mauiui. Aita roa ’tu te Bibilia e parau ra mea haama aore ra ino ia ta‘i. A haamana‘o na ia Iesu. I te pohe o to ’na hoa here Lazaro, ua ta‘i Iesu noa ’tu e mana to ’na no te faatia mai i te feia pohe i te ora!—Ioane 11:33-35.

E riri vetahi no te faaite i to ratou mauiui, ia pohe taue iho â râ tei herehia. E rave rahi tumu e riri ai te taata i mua i tera ati. Peneia‘e no te tahi mau parau feruri-ore-hia e te tano ore a te tahi taata faaturahia. Ua faataa Mike no Afirika Apatoa: “Ua pohe to ’u papa i te 14raa o to ’u matahiti. I to ’na hunaraa, ua parau te perepitero te hinaaro ra te Atua i te feia maitatai i pihai iho ia ’na. No reira oia e rave oioi ai ia ratou. * Ua riri roa vau no te mea o matou te mea hinaaro roa ’‘e i to matou papa. Ua mairi 63 matahiti i teie nei, te vai noa ra râ te mauiui.”

E faahapa atoa vetahi ia ratou. Ia pohe taue tei herehia, e mana‘o paha ratou: “Ahiri vau i rave teie aore ra tera ohipa, eita paha oia e pohe.” Aore ra ua tatama‘i paha tatou e te taata i pohe. E rahi roa ’tu ïa te mana‘o faahapa.

Ia tupu mai te mana‘o faahapa aore ra te riri, eiaha e tapea noa no oe. A paraparau i te tahi hoa o te faaroo e te tamahanahana atu ma te faaite tera iho â te huru o te feia ua pohe tei herehia. Te haamana‘o mai ra te Bibilia: “E aroha mai â te taua i te mau mahana atoa ra, i fanau mai râ te taeae no te anotau e ati ai ra.”—Maseli 17:17.

O to tatou Atua poiete o Iehova te hoa maitai roa ’‘e. A haamahora i to aau ia ’na na roto i te pure no te mea te tâu‘a ra te Atua ia tatou. (Petero 1, 5:7) Te fafau atoa ra te Atua i te tamahanahana i te feia e oto ra maoti “te hau a te Atua, o tei hau ê atu i te ite taata nei.” (Philipi 4:6, 7) A vaiiho atoa i te Atua ia tauturu ia oe maoti ta ’na Parau te Bibilia. A papai i te mau irava Bibilia tamahanahana mau. (A hi‘o i te  tumu parau tarenihia.) E hinaaro paha oe e tamau aau i te tahi. A feruriruri i nia i te reira i te mau po iho â râ o oe ana‘e e eita e topa te taoto.—Isaia 57:15.

 E 40 matahiti to Jack e aita i maoro a‘enei, ua pohe ta ’na vahine no te ma‘i mariri ai taata. Ua faaite Jack i te tahi taime, e mo‘emo‘e roa ino oia. Ua tauturu râ te pure ia ’na. Te faataa ra oia: “Ia pure au ia Iehova, eita vau e mo‘emo‘e faahou. Pinepine au i te ara i te po e eita e topa faahou te taoto. E taio e e feruriruri au i nia i te mau mana‘o tamahanahana mau i roto i te Bibilia. E faaite atoa vau i te mau mea atoa i roto i to ’u aau na roto i te pure. E tamǎrû mai te reira e e topa roa to ’u hau. E faaea vau i te oto a taoto atu ai.”

Ua pohe atoa te mama o Vanessa no te ma‘i. Ua ite atoa oia i te mana rahi o te pure. Te na ô ra oia: “I te mau taime fifi roa ’‘e, e faahiti au i te i‘oa o te Atua a ta‘i atu ai. Ua faaroo Iehova i ta ’u mau pure e ua horoa mai oia i te puai ta ’u i hinaaro.”

Ua faaitoito vetahi i te feia e oto ra ia tauturu ia vetahi ê aore ra ia ohipa ma te tamoni ore i te tahi pu. E oaoa te noaa mai e e tamahanahana atoa te reira i tei oto ra. (Ohipa 20:35) Ua tamahanahanahia e rave rahi Kerisetiano na roto i te tautururaa ia vetahi ê.—Korinetia 2, 1:3, 4.

^ par. 5 E ere tera ta te Bibilia e haapii ra. Te faaite ra te Bibilia e toru tumu e pohe ai te taata.—Koheleta 9:12; Ioane 8:44; Roma 5:12.