Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 3 2016

 A PEE I TO RATOU FAAROO | REBEKA

“E haere ïa vau”

“E haere ïa vau”

TEMATAITAI ra Rebeka i teie fenua a topa ’i te mahana. I muri a‘e i te tereraa tau hebedoma, ua matau roa o ’na i te haere na nia i te tua o te kamela. Mea atea roa to ’na fenua tumu o Harana, peneia‘e eita o ’na e farerei faahou i to ’na fetii. I te mea te hope ra to ratou tere, mea rahi te mau uiraa e puta mai i roto i to ’na feruriraa no te tupu i muri a‘e.

Tei Kanaana ratou e te tere ra na te fenua pâpâmǎrô i te pae apatoa o tera vahi. (Genese 24:62) Ua ite paha Rebeka i te mau mamoe, te vai atoa ra râ te animara taehae. I te mea e ere tera vahi i te mea pape roa, eita e nehenehe e faaapu rahi i reira. E navai râ te aihere no te faaamu i te mau nǎnǎ mamoe. Aita paha Rebeka i matau i te ite i te fenua mai tera, area to ’na aratai paari, oia ïa. E hinaaro rahi to tera taata e faaite i te parau apî i to ’na fatu: E riro Rebeka ei vahine na Isaaka! Eita e ore, ua uiui o Rebeka ia ’na, ‘Eaha te huru o to ’u oraraa i tera fenua? Mai te aha râ te huru o Isaaka, te tane ta ’u e faaineine ra i te faaipoipo? Aita mâua i farerei atura, e au anei au ia ’na e o ’na ia ’u?’

I teie mahana i roto e rave rahi fenua, mea huru ê roa na metua ana‘e e faaau i te faaipoiporaa. Area i te tahi atu mau vahi, ua matauhia te reira. Noa ’tu no teihea fenua oe, te taa ra ia oe aita o Rebeka i ite noa ’‘e mai te aha te huru o to ’na oraraa ananahi. E vahine itoito mau oia e te faaroo puai. E mea faufaa tera na huru maitatai ia tupu te tahi mau tauiraa i roto i to tatou oraraa. No to ’na faaroo, ua faaite Rebeka i te tahi atu mau huru maitatai mea varavara te itehia i teie mahana.

“E HUTI ATOA VAU I TE PAPE NA TE MAU KAMELA NA OE”

Ua taui roa te oraraa o Rebeka i to ’na haereraa e rave i te tahi ohipa ta ’na i matau. Ua paari paha oia i Harana, te hoê oire i Mesopotamia, aore ra i te tahi vahi piri atu. Mea taa ê to ’na na metua i te mau taata no Harana. Aita hoi raua e haamori i te atua-ava‘e Sîn, ia Iehova râ.—Genese 24:50.

I to Rebeka paariraa, ua riro oia ei vahine haviti mau, e ere râ i te mea hupehupe. Mea itoito o ’na e ua faaite noa i te hoê haerea tura i te aro o te Atua. I te mea e tavini ta to ’na utuafare, e oraraa fana‘o ïa to ratou. Aita râ te hinaaro o Rebeka i faatiatia-noa-hia e aita atoa i faarirohia mai te hoê arii vahine. Mai to ’na tamariiraa, ua matau oia i te rave i te ohipa ma te itoito. Mai te rahiraa o te mau vahine i to ’na tau, e tuhaa ohipa rohirohi mau ta Rebeka mai te haereraa e tii i te pape no te utuafare. I te pae ahiahi, te haere atura oia i te apoo pape e ta ’na farii i nia i te tapono.—Genese 24:11, 15, 16.

I te hoê ahiahi, ua oti ta ’na farii pape i te faaîhia, horo mai nei te hoê taata paari ia ’na, na ô a‘era: “Ho mai na i te tahi maa pape e inu i te farii pape na oe na.” Na roto i ta ’na mau parau, o te haehaa e te faatura te itehia ra! Ua taa ia Rebeka mea atea te vahi i haerehia mai e teie taata. Mau a‘era ia ’na te farii pape i nia i to ’na tapono, faainu ihora ia ’na i te pape to‘eto‘e e te haumârû mau e mâha ’tura to ’na poihâ. Ua ite atoa oia na ahuru kamela a teie taata e faaea noa ra i mua i te farii o tei ore i faaîhia ’tura i te pape. Te ite ra Rebeka te hi‘o noa ra teie taata paari ia ’na e aita to ’na e mana‘o ino. I te mea ua hinaaro Rebeka e faaite  i te hoê aau horoa noa, na ô atura o ’na: “E huti atoa vau i te pape na te mau kamela na oe, e ia fiu ana‘e ratou.”—Genese 24:17-19.

A tapao na, aita Rebeka i mana‘o e horoa maa pape noa i te mau kamela, ua hinaaro râ e faainu ia mâha roa to ratou poihâ. Hau atu 95 litera pape ta te kamela e inu ua poihâ roa ana‘e oia! Mai te peu tera iho â no na ahuru kamela, ehia ïa hora ohipa te tiai maira ia Rebeka! E au ra râ, aita te mau kamela i poihâ roa. * Ua ite anei râ Rebeka i te reira? Aita, ua ineine râ oia i te rohi no te farii maitai i teie taata paari ta ’na i ore i matau. Ua farii atura te taata ra e ua mataitai ia Rebeka ia haere noa e ia ho‘i mai no te faaî i te farii a te mau kamela.—Genese 24:20, 21.

E vahine itoito Rebeka i te rave i te ohipa e mea farii maitai

Te ora nei tatou i te hoê tau ua rahi roa te miimii, e hi‘oraa maitai roa ïa Rebeka no tatou. Mai tei tohuhia, e riro te taata “ei miimii,” eita e hinaaro e tuu i te maitai o vetahi ê na mua. (Timoteo 2, 3:1-5) Mea faufaa no te mau Kerisetiano o te tutava nei i te haapae i te miimii ia hi‘opoa i te aamu Bibilia o teie vahine apî o te horo ra e te ho‘i maira no te faaî i te pape.

Ua taa ia Rebeka e te hi‘o noa maira tera taata paari ia ’na. Aita to ’na e mana‘o ino, ua maere râ, ua faahiahia e ua oaoa ia Rebeka. Horoa ’tura oia i te tao‘a faaunauna na Rebeka i te otiraa ta ’na ohipa. E ua ani atu: “E tamahine oe na vai? e faaite mai na oe ia ’u. E ô anei matou i te fare o to metua ia taoto?” I to ’na faaiteraa o vai to ’na fetii, ua oaoa roa te taata paari. Peneia‘e, ua pahono oioi Rebeka ma te parau: “E aretu ta matou, e te maa, e e ô hoi i to matou fare ia taoto.” Auê te faahiahia e, te vai ra hoi te tahi atu mau taata tei haere mai na muri ia ’na. Horo atura Rebeka i to ’na metua vahine no te faaite i tei tupu.—Genese 24:22-28, 32.

Papu maitai, ua haapiihia ia Rebeka ia farii maitai i te taata. Mea varavara ia ite tera huru i teie mahana. Tera te tahi atu tumu ia pee i te faaroo o teie vahine apî o tei faaite i te aau maitai. E turai  to tatou faaroo i te Atua ia farii maitai i te taata. Tera atoa te tahi huru o Iehova, no reira oia e faaite ai i te aau horoa noa i te taata atoa e te hinaaro atoa ra ia na reira ta ’na mau tavini. E oaoa Iehova ia farii maitai tatou i te taata ma te ore e titau atu i te tahi mea.—Mataio 5:44-46; Petero 1, 4:9.

“A RAVE AI I TE TAHI VAHINE NA TAU TAMAITI NA ISAAKA”

O vai tera taata paari i te apoo pape ra? O te tavini a Aberahama, te tuaana o te papa ruau o Rebeka. Ua farii maitaihia o ’na i te fare o Betuela, te metua tane o Rebeka. E au ra e o Eliezera to ’na i‘oa. * Ua faaineinehia te maa na ’na e to ’na mau hoa, aita râ i farii i te tamaa na mua a‘e ia faaite atu oia i te tumu o to ’na tere. (Genese 24:31-33) A feruri na i to ’na oaoa a faatia ’i i ta ’na i ite iho nei o tei riro ei haapapuraa ua haamaitai Iehova to ’na Atua i to ’na tere faufaa mau.

A feruri na ia Eliezera ia faatia i ta ’na aamu ia Betuela, te metua tane o Rebeka, e ia Labana, to ’na taeae, o te faaroo noa ra ma te anaanatae rahi. Ua faaite oia ua haamaitai rahi Iehova ia Aberahama i Kanaana, hoê tamaiti ta raua Sara o Isaaka to ’na i‘oa e o ’na te fana‘o i ta raua faufaa atoa. E hopoia rahi ta Aberahama i horoa i ta ’na tavini, e haere e imi i te hoê vahine na Isaaka i roto i to ’na fetii i Harana.—Genese 24:34-38.

Na nia i te aniraa a Aberahama, ua fafau Eliezera eita oia e maiti i te vahine na Isaaka i rotopu i te mau tamahine o Kanaana. No te aha? No te mea aita to Kanaana e faatura e e haamori ra i te Atua ra o Iehova. Ua papu ia Aberahama e haamou Iehova i te hoê mahana i tera mau taata no ta ratou mau peu iino. Aita ïa i hinaaro ia amui ta ’na tamaiti here o Isaaka i tera nunaa e ia pee i ta ratou peu faufau. Ua ite o ’na e hopoia rahi ta Isaaka ia tupu ta te Atua mau parau fafau.—Genese 15:16; 17:19; 24:2-4.

Ua parau atoa Eliezera i tei titau manihini ia ’na, ua pure oia i te Atua ra o Iehova i to ’na taeraa i te apoo pape. Ua ani o ’na ia Iehova ia maiti i te vahine ta ’Na i hinaaro na Isaaka, ia haere mai oia i te apoo pape, ia farii oia i te horoa i te pape inu na ’na e ta ’na mau kamela atoa. (Genese 24:12-14) E o vai tei haere mai e tei rave mai tera? O Rebeka! A feruri na eaha to ’na huru ahiri oia i faaroo i te faatiaraa a Eliezera!

Ua putapû roa Betuela e Labana i te faatiaraa a Eliezera, na ô atura: “No ǒ ia Iehova taua parau nei.” Mai tei matauhia i ǒ, ua faaau ratou ia faaipoipo Rebeka ia Isaaka. (Genese 24:50-54) Te auraa anei aita ta Rebeka parau i tera ohipa?

Tau hebedoma na mua ’tu, ua ui Eliezera ia Aberahama: “O te ore hoi taua vahine ra o te pee mai ia ’u?” Ua pahono atura to ’na fatu: “Aita a oe hapa i taua tǎpǔ na ’u nei i reira.” (Genese 24:39, 41) I roto atoa te utuafare o Betuela, mea faufaa te mana‘o o te vahine. Ua oaoa roa Eliezera no te manuïaraa o to ’na tere i ani ai oia ia aratai oioi ia Rebeka i Kanaana i te poipoi a‘e. Area to ’na fetii, ua hinaaro ïa ia faaea Rebeka ahuru mahana ia ratou. No te faaafaro i tera fifi, faaoti atura ratou: “E parau atu na matou i taua potii nei, a ui atu ai ia ’na iho.”—Genese 24:57.

Tei mua Rebeka i te hoê faaotiraa o te taui roa i to ’na oraraa. Eaha ta ’na e pahono? E parau anei o ’na eita ta ’na e nehenehe e haere no to ’na aroha i to ’na metua tane e taeae? Aore ra e faariro oia i te reira ei haamaitairaa taa ê no ǒ mai ia Iehova. Na roto i ta ’na pahonoraa, ua faaite Rebeka i to ’na huru i mua i teie tauiraa taue e te riaria atoa paha. Ua na ô noa oia: “E haere ïa vau.”—Genese 24:58.

Auê huru feruriraa faahiahia e! I teie mahana, mea taa ê ta tatou faanahoraa no nia te faaipoiporaa, e nehenehe râ e haapii mai i te hi‘oraa o Rebeka. E ere to ’na hinaaro te mea faufaa roa ’‘e no ’na, to te Atua râ o Iehova. Te horoa noa mairâ te Parau a te Atua i te aratairaa maitai roa ’‘e no nia i te faaipoiporaa: E nafea ia maiti i te hoê hoa faaipoipo e ia riro ei tane aore ra ei vahine maitai. (Korinetia 2, 6:14, 15; Ephesia 5:28-33) E pee  ana‘e i te hi‘oraa o Rebeka e te mau aratairaa a te Atua.

“O VAI TERA RA TAATA?”

Ua haamaitai te utuafare o Betuela i ta ratou tamahine here ra o Rebeka. Ua apee atoa ’tu Debora tei haapao ia ’na i to ’na tamariiraa e tae noa ’tu te tahi mau tavini vahine ia Eliezera e to ’na mau taata. (Genese 24:59-61; 35:8) Ua atea roa Harana ia ratou i teie nei. E toru paha hebedoma te maoro to ratou tere i nia 800 kilometera aore ra hau atu. E ere tera tere i te mea ohie. Ua ite a‘ena Rebeka i te kamela, aita râ paha i matau i te haere na nia i tera animara. Ia au i te Bibilia, e tiai mamoe to ’na utuafare fetii, e ere râ i te feia hoo tao‘a o te tere haere na nia i te kamela. (Genese 29:10) Pinepine e ere i te mea nahonaho no te taata a tahi ra e haere ai na nia i te kamela, noa ’tu no te hoê taime poto roa!

Aita Rebeka i haapao i te reira, ua hi‘o noa râ i mua no to ’na hinaaro e faaroo i te mau parau atoa ta Eliezera e faaite no nia ia Isaaka e to ’na utuafare. A feruri na ia ’na i mua i te auahi e ama ra ia faaroo i te taata paari ia faaite i ta Iehova i fafau i to ’na hoa ra o Aberahama. Mea na roto mai hoi ia ’na te huaai e haamaitai i te huitaata atoa. A feruri na i te huru o Rebeka i te iteraa mea na roto i ta ’na tane o Isaaka, ia ’na atoa ïa, e tupu ai ta te Atua parau fafau.—Genese 22:15-18.

Ua faaite Rebeka i te haehaa, te tahi huru maitai faufaa mau o te ore ra

Mai tei faahitihia i te omuaraa o teie tumu parau, te topa ra te mahana a haere noa ’i ratou na te fenua pâpâmǎrô i te pae apatoa o Kanaana. Ite atura Rebeka i te hoê taata o te haere ra na roto i te aihere o te feruriruri noa ra. Te parauhia ra no Rebeka, “ua pou ihora oia i raro mai nia mai i te kamela,” peneia‘e aita i tiai ia tapea te animara. Ua ani atura oia ia Eliezera: “O vai tera ra taata e haere mai na roto i te aua nei e farerei ia tatou?” I te faaiteraahia ’tu o Isaaka, tapoi ihora oia i to ’na upoo i te tahi ahu. (Genese 24:62-65) Eaha te tumu? No te faaite i to ’na faatura i te tane ta ’na e faaipoipo. Te parau nei paha vetahi, ua hope te tau o te auraroraa i te tane. E haapiiraa râ ta te mau tane e vahine e huti mai i te haehaa o Rebeka. O vai hoi i roto ia tatou o te faaite noa i tera huru maitai au mau!

E 40 matahiti to Isaaka e noa ’tu ua mairi toru matahiti, te mauiui noa ra oia no te pohe o to ’na mama o Sara. E taata mǎrû e te hamani maitai o Isaaka. Auê haamaitairaa ia horoahia ’tu te hoê vahine itoito, farii maitai e te haehaa na ’na! Eaha ’tura tei tupu no raua? Te faaite ra te Bibilia, ua here te tahi i te tahi.—Genese 24:67; 26:8.

Noa ’tu ua mairi 3 900 matahiti, mea ohie ia here ia Rebeka. E vahine itoito hoi, peepee no te rave i te ohipa, farii maitai e te haehaa. E nafea tatou e faufaahia ’i i to ’na hi‘oraa faahiahia mau? Ei feia apî e aore ra paari, faaipoipohia aore ra eita, e pee paatoa ana‘e i to ’na faaroo!

^ par. 10 Ua ahiahi a‘ena. Aita te aamu e parau ra ehia hora Rebeka i te apoo pape. Aita atoa e faaitehia ra ua taoto to ’na utuafare i to ’na ho‘iraa i te fare e aore ra ua haere mai te tahi e hi‘o no te aha o ’na i maoro ai.

^ par. 15 Aita te i‘oa o Eliezera i roto i teie aamu, o ’na râ te tavini e faahitihia ra. I opua na Aberahama e tutuu i ta ’na mau faufaa atoa ia Eliezera ia ore ta ’na tamarii e noaa. Te auraa ïa o ’na tei tavini maoro roa ’‘e ia Aberahama, oia atoa te mea tiaturi-roa ’‘e-hia. Mai tera atoa hoi te huru o te tavini e faahitihia ra i roto i teie aamu.—Genese 15:2; 24:2-4.