Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 3 2016

 TUMU PARAU MATAMUA | IA POHE TEI HEREHIA

Mea ino anei ia oto?

Mea ino anei ia oto?

Ua roo-a‘ena-hia anei oe te tahi ma‘i? Peneia‘e ua ora oioi mai oe e ua ore te mauiui. E ere râ hoê â huru no te oto. Ua papai te taote Alan Wolfelt i roto i ta ’na buka: “O te mauiui ia pohe tei herehia te mea fifi roa ’‘e ia faaoromai. E mǎrû mai râ te reira i te roaraa o te tau e maoti te tauturu a vetahi ê.”—Healing a Spouse’s Grieving Heart.

A hi‘o na i te huru o te patereareha Aberahama a pohe ai ta ’na vahine. Te faatia ra te Bibilia “ua haamata Aberahama i te oto e te ta‘i ia Sara.” (Genese 23:2; New World Translation) Ua titauhia ïa te taime ia ore to ’na mauiui. * Te vai atoa ra te hi‘oraa o Iakoba tei oto no to ’na tiaturi ua pohe ta ’na tamaiti Iosepha i te amuhia e te tahi animara taehae. “E rave rahi te mahana,” ua oto oia e aita i tia i te fetii ia tamahanahana ia ’na. Ua vai noa to ’na mauiui noa ’tu ua mairi tau matahiti.—Genese 37:34, 35; 42:36; 45:28.

Ua oto Aberahama i ta ’na vahine here o Sara

I teie mahana, e rave rahi atoa o te oto ra a pohe ai te tahi taata o tei piri roa ia ratou. A hi‘opoa na hi‘oraa e piti i muri nei.

  • “Ua pohe ta ’u tane Robert i te 9 no Tiurai 2008. I tera poipoi, ua rave mâua mai tei matauhia. I muri a‘e i te taofe, ua haere oia i te ohipa, ua apa e ua tauahi mâua ia mâua a haapapu atu ai to mâua here i te tahi e te tahi. Ono matahiti i muri a‘e, te oto noa ra to ’u aau. I to ’u mana‘o, eita tera mauiui e ore.”—Gail, 60 matahiti.

  • “Noa ’tu ua pohe ta ’u vahine a 18 matahiti i teie nei, te mana‘ona‘o e te oto noa ra vau ia ’na. Ia ite au te tahi ohipa nehenehe mau, e mana‘o vau ia ’na. E feruri au, e au atoa o ’na i ta ’u e mataitai ra ahiri tei pihai iho o ’na ia ’u.”—Etienne, 84 matahiti.

E mauiui e e mana‘ona‘o iho â tatou ia pohe tei herehia. Eiaha râ e inoino ia vetahi ê no to ratou huru i mua i tera ati, mea taa ê hoi te taata atoa. Eiaha atoa e faahapa ia tatou iho ia ore tatou e faaea oioi i te oto. Eaha te tamahanahana mai ia pohe tei herehia?

^ par. 4 Mea maoro atoa to Isaaka, te tamaiti a Aberahama, otoraa i to ’na metua vahine ia Sara. Mai te itehia i roto i te tumu parau “A pee i to ratou faaroo” o teie vea, ua oto noâ Isaaka noa ’tu ua mairi toru matahiti i muri a‘e i te pohe o Sara.—Genese 24:67.

No te ite atu â

Ua pohe anei to apiti?

Mea mauiui mau ia pohe te hoê hoa faaipoipo e eita te reira e ore oioi. Hi‘o nafea te tiaturiraa Bibilia i te tia-faahou-raa e tamahanahana ’i.