Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 3 2016

 TUMU PARAU MATAMUA | IA POHE TEI HEREHIA

E ora faahou mai tei pohe!

E ora faahou mai tei pohe!

Ua mauiui mau Gail, tei faahitihia i to na mua ’tu tumu parau, a pohe ai ta ’na tane Rob. Te tiai ra râ oia i te taime e farerei faahou ai o ’na ia ’na i roto i te ao apî fafauhia e te Atua. Te parau ra Gail: “Te irava Bibilia ta ’u e au roa ’‘e, o te Apokalupo 21:3, 4.” Te na ô ra tera irava: “Ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”

Te faataa ra Gail: “Tera to tatou tiaturiraa! Te haapeapea ra vau no te feia e oto ra i tei pohe e aita ratou i ite i te tiaturiraa e nehenehe e farerei faahou i te feia here tei pohe.” Ia au i ta ’na e tiaturi ra, te horoa ra Gail i to ’na taime ma te tamoni ore ei taata poro evanelia no te faaite i te parau fafau a te Atua no a muri a‘e, “e ore roa te pohe.”

Ua tiaturi papu Ioba i te tia-faahou-raa

E parau paha oe: “E moemoeâ noa tera!” A hi‘o na râ i te hi‘oraa o Ioba. Ua roohia oia i te ma‘i ino mau. (Ioba 2:7) Ua hinaaro Ioba e pohe, ua tiaturi papu râ oia e mana to te Atua no te faatia mai ia ’na i te ora i nia i te fenua nei. Te na ô ra oia: “Ahiri oe e faatapuni ia ’u i hade e . . . Na oe e tiaoro mai, e na ’u e parau atu ia oe; e oto â oe i te ohipa a to rima i rave ra.” (Ioba 14:13, 15) Ua papu ia Ioba e hinaaro to ’na Atua e faatia mai ia ’na i te ora e e tupu iho â te reira.

Fatata roa te Atua i te na reira no Ioba e no te tahi atu mau taata ia faarirohia teie nei fenua ei paradaiso. (Luka 23:42, 43) Te haapapu ra te Bibilia i roto i te Ohipa 24:15: “E tia-faahou-raa to tei pohe.” Te na ô atoa ra Iesu: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:28, 29) E ite Ioba i te tupuraa o tera parau fafau. E nehenehe oia e ho‘i mai “tana ap[î]raa ra” e e fana‘o i te iri apî a‘e i to ’na tamariiraa. (Ioba 33:24, 25) Tera atoa te tupu no te feia e mauruuru i te faanahoraa hamani maitai no ǒ mai i te Atua, te tia-faahou-raa no te ora i nia i te fenua nei.

Ua pohe anei te tahi taata herehia? Eita paha teie tumu parau e faaore i to oe mauiui. Ma te feruriruri râ i nia i te mau parau fafau a te Atua i roto i te Bibilia, e noaa ia oe te tiaturiraa papu e te puai no te haere i mua.—Tesalonia 1, 4:13.

E hinaaro anei oe e ite atu â eaha te tamahanahana ’tu? Ua ui a‘ena anei oe “No te aha te Atua e vaiiho ai i te ino e te mauiui?” A haere i nia i ta matou reni Internet jw.org no te ite i te mau pahonoraa Bibilia tamahanahana mau.

No te ite atu â

TE PARE TIAIRAA

Eaha te tupu i muri a‘e i te pohe?

Vau taata tei pohe e tei faaho‘ihia mai i te ora i roto i te Bibilia. Eaha ta ratou i parau no tei tupu i muri a‘e i to ratou pohe?