Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 3 2016

 TUMU PARAU MATAMUA | IA POHE TEI HEREHIA

A tamahanahana i te feia e oto ra

A tamahanahana i te feia e oto ra

E ere iho â i te mea ohie ia tamahanahana i te oto ra no te pohe o tei herehia. I te tahi taime, aita tatou i ite eaha te parau aore ra te rave. Te vai ra râ te tahi mau ohipa ta tatou e nehenehe e rave no te tauturu atu.

E pinepine, o te faaea-noa-raa i pihai iho ia ratou e te faaiteraa ’tu i te tapao aroha te tamahanahana ’tu. I te fenua e rave rahi, e tauahi aore ra e tapea te taata i te rima o te feia e oto ra. Ia hinaaro ratou e paraparau, a faaroo maite atu. Te mea au roa ’‘e râ, a rave i te tahi ohipa e ere i te mea ohie no te utuafare ia haapao. Peneia‘e, e tunu i te maa, e aupuru i te tamarii aore ra e faanaho i te hunaraa ia titauhia. Mea tamahanahana a‘e te reira i te mau parau atoa ta tatou e faahiti.

I te taime tano, e nehenehe e paraparau no nia i te taata i faarue mai, peneia‘e ma te faahiti i to ’na mau huru maitatai aore ra te tahi mau taime oaoa. E nehenehe te mata oaoa e itehia i nia i te hoho‘a o te taata e oto ra. Te na ô ra Pam, ua pohe ta ’na tane Yann * a ono matahiti i teie nei: “E faaite mai te taata i te tahi taime i te ohipa maitai ta  Yann i rave e aita vau i ite noa ’‘e. E tamahanahana mai te reira ia ’u.”

Te faaite ra râ te mau aivanaa, e rave rahi o te tauturu i te feia e oto ra i te haamataraa. I muri a‘e râ, eita te mau hoa e haapao faahou atu no te oraraa o te mau mahana atoa. A tutava ïa i te niuniu aore ra te farerei tamau i te feia e oto ra i te pohe o tei herehia. * E tamahanahana mau te reira i te feia iho â râ o te oto maoro a‘e i te tahi atu.

A hi‘o na i te hi‘oraa o te vahine apî ra o Kaori no Tapone. Ua hepohepo roa oia a pohe ai to ’na mama e te matahiti i muri iho to ’na tuaana. Auaa, ua fana‘o oia i te turu a te mau hoa papu. O Ritsuko te tahi, e vahine paari a‘e ia ’na e ua hinaaro ia riro raua ei hoa piri, mai te hoê mama te huru. Te na ô ra Kaori: “Ite outou, aita roa ’tu vau i afaro. Aita vau i hinaaro ia monohia to ’u mama e eita roa te tahi e nehenehe e mono ia ’na. No te huru râ o Mama Ritsuko i nia ia ’u, ua piri roa vau ia ’na. I te mau hebedoma atoa, e haere amui mâua i te pororaa e te mau putuputuraa Kerisetiano. Ua ani mai ia inu i te ti na muri ia ’na, ua afai mai i te maa e ua papai mai e rave rahi taime. Ua tamahanahana roa mai te huru o Mama Ritsuko ia ’u.”

Ua mairi 12 matahiti i muri a‘e i te pohe o te metua vahine o Kaori. I teie mahana, e feia poro ma te taime taatoa o ’na e ta ’na tane. Te na ô ra Kaori: “Te tamau noa ra Mama Ritsuko i te faaitoito ia ’u. Ia ho‘i au i to ’u fenua, e haere iho â vau e farerei ia ’na e e oaoa atoa no ta ’na mau faaitoitoraa.”

Ua fana‘o atoa Poli, te tahi Ite no Iehova i Kupero, i te turu tamau a te mau hoa. Mea maitai roa ta ’na tane o Sozos te i‘oa, ua riro oia ei hi‘oraa maitai ei tiaau Kerisetiano. Mea pinepine hoi oia i te titau manihini i te mau otare e te mau vahine ivi i to raua fare no te faaanaanatae e no te tamaa. (Iakobo 1:27) Ua pohe râ Sozos i te 53raa o to ’na matahiti no te tahi ma‘i i roto i te roro. Te na ô ra Poli: “E 33 matahiti faaipoiporaa to mâua, e tane taiva ore mau oia e teie nei, aita faahou o ’na.”

A imi i te ravea no te tauturu i te feia e oto ra

I muri a‘e i te hunaraa, ua haere Poli e ta ’na tamaiti hopea o Daniel, 15 matahiti, e ora i Kanada. Ua apiti raua i te putuputuraa a te tahi amuiraa a te mau Ite no Iehova i ǒ. Te faatia ra Poli: “Aita roa ’tu te mau hoa o tera amuiraa apî i ite eaha te mau fifi ta mâua i faaruru. Ua haafatata mai râ ratou e ua tamahanahana mai na roto i ta ratou mau parau e ohipa. Auê te oaoa ia fana‘o i te tauturu i te taime iho â a hinaaro roa ’i ta ’u tamaiti i to ’na papa! Ua faaite te mau tiaau o te amuiraa i te hamani maitai i nia ia Daniel. Hoê iho â i rotopu ia ratou tei titau manihini noa ia Daniel ia faaanaanatae e te mau hoa aore ra ia haere i te tueraa popo.” Mea maitai roa te mama e te tamaiti i teie nei.

E rave rahi ravea no te tauturu e tamahanahana i te feia e oto ra. Te tahi ravea no roto mai i te Bibilia, te hoê tiaturiraa faahiahia mau no a muri a‘e.

^ par. 5 Ua tauihia te i‘oa.

^ par. 6 Ua tapao vetahi i te mahana i pohe ai te tahi taata i nia i ta ratou tarena. E haamana‘o atu te reira ia hopoi i te tamahanahanaraa i te taime hinaaro-roa ’‘e-hia.