Eaha to roto?

Tapura tumu parau

 ORARAA KERISETIANO

‘Haamauruuru ihora Paulo i te Atua e itoito atura’

‘Haamauruuru ihora Paulo i te Atua e itoito atura’

Ua faaroo te amuiraa i Roma e tae mai o Paulo. Ua tere atura te hoê pǔpǔ taeae e 64 kilometera no te farerei ia ’na. Eaha to Paulo huru a ite ai i to ratou here miimii ore? “I to Paulo iteraa ’tu ia ratou, haamauruuru ihora oia i te Atua e itoito atura.” (Ohi 28:15) Ua matauhia o Paulo no te faaitoito i te mau amuiraa ta ’na e haere e farerei. I taua taime ra râ, ua tapeahia oia. O ’na ïa tei fana‘o i te mau faaitoitoraa.—Ko2 13:10.

I teie mahana, e haere te mau tiaau haaati i tera e tera amuiraa no te faaitoito i te mau taeae e tuahine. Mai te nunaa taatoa o te Atua, e faaruru ratou i te tahi taime i te rohirohi, te ahoaho e te toaruaru. Eaha ta oe e rave no te faaitoito i te tiaau haaati e ta ’na vahine i to raua tere i mua, ia nehenehe te tahi e te tahi e faaitoitohia?—Ro 1:11, 12.

  • A turu i te mau putuputuraa no te pororaa. E itoitohia te tiaau haaati a ite ai oia i ta te feia poro mau tutavaraa no te poro atu â i tera hebedoma taviniraa taa ê. (Te1 1:2, 3; 2:20) A feruri na. E nehenehe anei oe e rave i te taviniraa pionie tauturu i te ava‘e o to ’na tere? E nehenehe anei oe e ani ia poro e o ’na aore ra ta ’na vahine aore ra ia apiti hoê o raua i roto i te tahi haapiiraa Bibilia? Mea au roa na raua ia poro e e rave rau taata poro, oia atoa te feia poro apî aore ra o te hinaaro ra e aravihi atu â i roto i te taviniraa.

  • A titau manihini ia raua. E nehenehe anei oe e titau manihini ia raua no te taoto i te fare aore ra no te tamaa? Te faaite ra te reira e te here ra oe i te tiaau haaati e ta ’na vahine. Aita raua e titau ia ravehia te mau ohipa rahi no raua.—Lu 10:38-42.

  • A faaroo e a faaohipa i ta ’na aratairaa e a‘oraa. Ma te here, te tauturu mai ra te tiaau haaati ia ite e nafea ia haamaitai atu â i ta tatou taviniraa no Iehova. I te tahi taime, e a‘o mai paha oia. (Ko1 5:1-5) E oaoa tatou a pee ai e a auraro ai i te reira.—Heb 13:17.

  • A faaite i te mauruuru. A faaite i te tiaau haaati e ta ’na vahine e nafea oe i faufaahia ’i i ta raua mau tutavaraa. E nehenehe oe e parau roa ’tu i te reira ia raua aore ra e papai i te hoê tareta aore ra nota.—Kol 3:15.